ಸೊಂಟ ನೋವಿಗೆ ಸರಳ ಸಲಹೆ

ಸಾಮಾನ್ಯ ಬೆನ್ನು ನೋವು ಹಾಗೂ ಸೊಂಟ ನೋವು ಮನೆಮದ್ದಿನಲ್ಲಿ ಗುಣಮುಖವಾಗುವುದು. ವ್ಯಾಯಾಮ , ಮಸಾಜ್‌, ಹಾಟ್‌ ಅಂಡ್‌ ಕೋಲ್ಡ್ ಪ್ಯಾಕ್‌ ಹೀಗೆ ಸರಳ ವಿಧಾನದ ಮೂಲಕ ನೋವು ಶಮನ ಮಾಡಬಹುದು. ಮನೆಮದ್ದು ಸಾಮಾನ್ಯವಾಗಿ ಕಾಣಿಸುವ ಸೊಂಟ ನೋವನ್ನಷ್ಟೇ ಶಮನ ಮಾಡುವುದು. ಇತರ ಆರೋಗ್ಯ ಸಮಸ್ಯೆಯಿಂದ ಸೊಂಟ ನೋವು ಕಾಡುತ್ತಿದ್ದರೆ ವೈದ್ಯರ ಸಲಹೆ ಪಡೆಯಿರಿ.
ಸೊಂಟ ನೋವು ಒಂದು ಸಾಮಾನ್ಯ ಸಮಸ್ಯೆ. ಮಧ್ಯ ವಯಸ್ಸು ದಾಟಿದವರಲ್ಲಿ ಈ ಸಮಸ್ಯೆ ಹೆಚ್ಚಾಗಿ ಕಂಡು ಬರುತ್ತದೆ. ನಾವು ಕೂರುವ ಭಂಗಿಯಲ್ಲಿ ವ್ಯತ್ಯಾಸ ಉಂಟಾದರೆ, ಅತಿಯಾದ ಭಾರ ಎತ್ತುವುದು ಮಾಡಿದರೆ ಸೊಂಟ ನೋವು ಕಾಣಿಸುವುದು.
ಸೊಂಟ ನೋವು ಕಡಿಮೆ ಮಾಡುವಲ್ಲಿ ವ್ಯಾಯಾಮ ಅದರಲ್ಲೂ ಯೋಗ ಸಹಕಾರಿ. ಮೆಲ್ಲನೆ ಬಾಗಿ ಹೆಬ್ಬರಳು ಮುಟ್ಟುವುದು, ಮ್ಯಾಟ್‌ ಮೇಲೆ ಅಂಗಾತ ಮಲಗಿ ಬಲಗೈ ಎಡಗಾಲನ್ನು ನಿಧಾನಕ್ಕೆ ಮೇಲಕ್ಕೆ 90 ಡಿಗ್ರಿ ಕೋನದಲ್ಲಿ ಎತ್ತಿ, ನಂತ ನಿಧಾನಕ್ಕೆ ಇಳಿಸಿ, ಎಡಗೈ, ಬಲಗಾಲನ್ನು ಮೇಲಕ್ಕೆ ಎತ್ತಬೇಕು. ಈ ವ್ಯಾಯಾಮ ಸೊಂಟ ನೋವು ಕಡಿಮೆ ಮಾಡುವಲ್ಲಿ ಸಹಕಾರಿ.
ಆಯುರ್ವೇದ ಮಸಾಜ್‌ ಮಾಡಿಸುವುದು, ಆಕ್ಯೂಪಂಕ್ಚರ್‌ ಥೆರಪಿ ಮಾಡಿಸಿದರೆ ಸೊಂಟ ನೋವು ಬೇಗನೆ ಕಡಿಮೆಯಾಗುವುದು.
ತುಂಬಾ ದೂರ ಕುಳಿತು ಪ್ರಯಾಣಿಸುವಾಗ, ಆಫೀಸ್‌ನಲ್ಲಿ ಕಂಪ್ಯೂಟರ್‌ ಮುಂದೆ ಕೂರುವಾಗ ಕೂರುವ ಭಂಗಿ ಕಡೆ ಗಮನ ಕೊಡಿ. ಸೊಂಟದ ಮೇಲೆ ಹೆಚ್ಚು ಒತ್ತಡ ಬೀಳದಂತೆ ದಿಂಬು ಇಟ್ಟು ಕೂರುವುದರಿಂದ ರಿಲ್ಯಾಕ್ಸ್‌ ಅನಿಸುವುದು.
ಹಾಟ್ ಪ್ಯಾಕ್‌ ಇಟ್ಟರೆ ಆ ಭಾಗದಲ್ಲಿ ಊತ ಇದ್ದರೆ ಕಡಿಮೆಯಾಗುವುದು. ತುಂಬಾ ನೋವು ಇದ್ದಾಗ ಕೋಲ್ಡ್ ಪ್ಯಾಕ್‌ ಇಟ್ಟರೆ ನೋವು ಕಡಿಮೆಯಾಗುವುದು. ಎರಡು ದಿನ ಹೀಗೆ ಮಾಡಿ ನಂತರ ಟವಲ್ ಅನ್ನು ಬಿಸಿ ನೀರಿನಲ್ಲಿ ಅದ್ದಿ ಸೊಂಟದ ಮೇಲೆ ಇಟ್ಟರೆ ನೋವು ಕಡಿಮೆಯಾಗುವುದು.
ಒಂದು ಬಕೆಟ್ ಬಿಸಿ ನೀರಿಗೆ ಸ್ವಲ್ಪ ನೀಲಗಿರಿ ಎಣ್ಣೆ ಹಾಕಿ ಸ್ನಾನ ಮಾಡಿದರೆ ನೋವು ಕಡಿಮೆಯಾಗುವುದು, ನರಗಳು ರಿಲ್ಯಾಕ್ಸ್ ಆಗುವುದು.