ದೆಹಲಿ, ಮಾ.೨೩- ದೇಶ ಬಿಟ್ಟು ಪರಾರಿಯಾಗಿರುವ ಉದ್ಯಮಿ ವಿಜಯ್ ಮಲ್ಯ ೨೦೧೭ರಲ್ಲಿ ಸುಮಾರು ೭,೫೦೦ ಕೋಟಿ ರೂ. ಮೌಲ್ಯದ ಆಸ್ತಿ ಹೊಂದಿದ್ದರು. ಆ ಸಮಯದಲ್ಲಿ ಮಲ್ಯ ಅವರು ತಾನು ವಿಮಾನಯಾನ ಸಂಸ್ಥೆಗಾಗಿ ಬ್ಯಾಂಕ್‌ನಿಂದ ಪಡೆದ ಸಾಲವನ್ನು ಮರುಪಾವತಿಸಲು ಸಾಕಷ್ಟು ಮೊತ್ತ ಹೊಂದಿದ್ದರು ಎಂದು ಕೇಂದ್ರೀಯ ತನಿಖಾ ದಳ (ಸಿಬಿಐ) ತನ್ನ ಮೂರನೇ ಪೂರಕ ಚಾರ್ಜ್ ಶೀಟ್‌ನಲ್ಲಿ ಉಲ್ಲೇಖಿಸಿದೆ.
ಮದ್ಯದ ದೊರೆ ವಿಜಯ್ ಮಲ್ಯ ಅವರು ಯುನೈಟೆಡ್ ಕಿಂಗ್‌ಡಮ್‌ನಲ್ಲಿ ಸುಮಾರು ೪೪ ಘಟಕಗಳನ್ನು ಸ್ಥಾಪಿಸಿದ್ದು, ಈ ಮೂಲಕ ಅವರು ಯುರೋಪಿನಾದ್ಯಂತ ಹಲವಾರು ಆಸ್ತಿಗಳನ್ನು ಸ್ವಾಧೀನಪಡಿಸಿಕೊಂಡು ಮತ್ತು ಹೂಡಿಕೆ ಮಾಡಿದ್ದರು ಎಂದು ಸಿಬಿಐ ತನ್ನ ಚಾರ್ಜ್‌ಶೀಟ್‌ನಲ್ಲಿ ಹೇಳಿಕೊಂಡಿದೆ. ೨೦೦೮ ಮತ್ತು ೨೦೧೪ ರ ನಡುವೆ ಮಲ್ಯ ಅವರ ಬಳಿ ಸಾಕಷ್ಟು ಹಣವಿದೆ ಎಂದು ಸಂಸ್ಥೆ ಹೇಳಿಕೊಂಡಿದೆ. ಇದರ ಹೊರತಾಗಿಯೂ ಐಡಿಬಿಐ ಬ್ಯಾಂಕ್ ಸೇರಿದಂತೆ ಸಾಲದಾತರಿಗೆ ಕಿಂಗ್‌ಫಿಷರ್ ಏರ್‌ಲೈನ್ಸ್ ಲಿಮಿಟೆಡ್ (ಕೆಎಎಲ್)ನಲ್ಲಿ ಇಕ್ವಿಟಿ ಇನ್ಫ್ಯೂಷನ್ ಕುರಿತು ಪುನರಾವರ್ತಿತ ಭರವಸೆಗಳ ಹೊರತಾಗಿಯೂ ಅವರು ಯಾವುದೇ ಕ್ರಮಗಳನ್ನು ಅನುಸರಿಸಲಿಲ್ಲ ಎಂದು ಸಿಬಿಐ ಹೇಳಿದೆ. ಕಿಂಗ್‌ಫಿಷರ್ ಏರ್‌ಲೈನ್ಸ್ ೨೦೦೮ ಮತ್ತು ೨೦೧೨ ರ ನಡುವೆ ಕಚೇರಿ ಮತ್ತು ಕಾರ್ಯಾಚರಣೆಯ ವೆಚ್ಚಗಳನ್ನು ಸರಿದೂಗಿಸುವ ನೆಪದಲ್ಲಿ ಯುಕೆಯಲ್ಲಿ ನಿರ್ವಹಿಸಲಾಗಿದ್ದ ತನ್ನದೇ ಖಾತೆಗಳಿಗೆ ೨೪೧೮.೮೯ ಕೋಟಿ ರೂ. (೫೦೦ ಮಿಲಿಯನ್ ಡಾಲರ್‌ಗಿಂತ ಹೆಚ್ಚು) ಮೊತ್ತ ವರ್ಗಾಯಿಸಿದೆ ಎಂದು ಸಿಬಿಐ ಚಾರ್ಜ್‌ಶೀಟ್‌ನಲ್ಲಿ ಹೇಳಿದೆ. ಮಲ್ಯ ಒಡೆತನದ ರೇಸಿಂಗ್ ತಂಡವಾದ ಫೋರ್ಸ್ ಇಂಡಿಯಾ ಫಾರ್ಮುಲಾ-೧ ಟೀಮ್ ಲಿಮಿಟೆಡ್ ಹಣವನ್ನು ತಿರುಗಿಸಲಾಯಿತು ಎಂದು ಸಿಬಿಐ ತಿಳಿಸಿದೆ.
