ಶ್ರೀ ರೇಣುಕಾಚಾರ್ಯರ ಜಯಂತಿ

ಮುನವಳ್ಳಿ,ಮಾ26: ವಿಜ್ಞಾನ ಎಷ್ಟೇ ಬೆಳೆದರೂ ಮನಷ್ಯನಿಗೆ ಮಾನಸಿಕ ನೆಮ್ಮದಿ ಸಿಗುವುದು ಆಧ್ಯಾತ್ಮದಲ್ಲಿ ಮಾತ್ರ ಅಂತಹ ಆಧ್ಯಾತ್ಮದ ಅರಿವಿಗೆ ಸಂಸ್ಕಾರ ಅಗತ್ಯ ಆ ನಿಟ್ಟಿನಲ್ಲಿ ಪ್ರತಿಯೋಬ್ಬರಿಗೂ ಧರ್ಮ ಸಂಸ್ಕಾರ ನೀಡಬೇಕು ಎಂದು ಜೆ.ಸಿ.ನಾವಲಗಿಮಠ ತಿಳಿಸಿದರು.
ಅವರು ಕಟಕೋಳ ಗ್ರಾಮದ ಪ್ರಿಯದರ್ಶಿನಿ ವಿದ್ಯಾಲಯದ ಜ್ಞಾನಮಂಟಪದಲ್ಲಿ ಜರುಗಿದ ಶ್ರೀ ಜಗದ್ಗುರು ರೇಣುಕ ಜಯಂತಿ ಹಾಗೂ 47 ನೇ ಮಾಸಿಕ ಸದ್ಬಾವನಾ ಗೋಷ್ಠಿ ಕಾರ್ಯಕ್ರಮದಲ್ಲಿ ಮಾತನಾಡಿದರು ಜಾತಿಗಿಂತ ನೀತಿ ತತ್ವಕ್ಕಿಂತ ಆಚರಣೆ ಮುಖ್ಯ ಮಾತಿಗಿಂತ ಕೃತಿ ಬೋಧನೆಗಿಂತ ಸಾಧನೆ ದಾನಕ್ಕಿಂತ ದಾಸೋಹ ಚರಿತ್ರಕ್ಕಿಂತ ಚಾರಿತ್ರ್ಯ ಮುಖ್ಯ ನೊಂದು ಬೆಂದವರ ಧ್ವನಿಯಾಗಿ ಸಕಲ ಸಮುದಾಯದ ಶ್ರೇಯಸನ್ನು ಬಯಸಿದವರು ಪಂಚಾಚಾರ್ಯರು ಜಾತಿ ಮತ ಪಂಥಗಳ ಗಡಿ ಮೀರಿ ಮಾನವೀಯತೆಯ ಆದರ್ಶ ಮೌಲ್ಯಗಳನ್ನು ಎತ್ತಿ ಹಿಡಿದ ಕಾರುಣ್ಯ ಶೀಲರು ಶ್ರೀ ಜಗದ್ಗುರು ರೇಣುಕಾಚಾರ್ಯರು ಎಂದರು.
ದಿವ್ಯ ಸಾನಿಧ್ಯ ವಹಿಸಿದ ಕಟಕೋಳ ಎಂ ಚಂದರಗಿ ಹಿರೇಮಠದ ಶ್ರೀ ವೀರಭದ್ರ ಶ್ರೀಗಳು ಆಶೀರ್ವಚನದಲ್ಲಿ ಜಗದ್ಗುರು ರೇಣುಕಾಚಾರ್ಯರು ಜನ ಸಮುದಾಯದಲ್ಲಿ ಧಾರ್ಮಿಕ ಮತ್ತು ಸಾಮಾಜಿಕ ಸಂಕ್ರಾಂತಿಗೈದು ಪುರುಷರಂತೆ ಮಹಿಳೆಯರಿಗೂ ಧಾರ್ಮಿಕ ಸ್ವಾತಂತ್ರವನ್ನು ತಂದು ಕೊಟ್ಟ ಪ್ರಥಮಾಚಾರ್ಯರು ಕಾಯಕ ದಾಸೋಹದ ಮೂಲಕ ಬದುಕಿಗೆ ಕರೆಕೊಟ್ಟವರು ಮಾಮುನಿ ಅಗಸ್ತ್ಯರಿಗೆ ಶಿವಾನ್ವಿತ ಸಿದ್ದಾಂತವನ್ನು ಬೋಧನೆಗೈದು ಕಾರಣ ಪುರುಷರು ಅವರಾಗಿದ್ದಾರೆ ಎಂದರು.
ಕಾರ್ಯಕ್ರಮದ ಪೂರ್ವದಲ್ಲಿ ರೇಣುಕ ಮಂದಿರದಿಂದ ಜಗದ್ಗುರು ರೇಣುಕಾಚಾರ್ಯರ ಭಾವಚಿತ್ರದ ಭವ್ಯ ಮೆರೆವಣಿಗೆ ಜರುಗಿತು.
ಟಿ.ಪಿ.ಮನೋಳಿ, ಸಿ.ಎ.ದೇಸಾಯಿ, ಬಿ.ಡಿ.ಹಿರೇಮಠ, ಎ.ಸಿ.ಸುರಗ, ಗೌಡಪ್ಪ ಮಾಳಪ್ಪನವರ, ಪರಪ್ಪ ತೊಲಗಿ, ಮುದಕಪ್ಪ ಹುದ್ದಾರ, ಆಯ್.ಬಿ.ಪಾಟೀಲ ಭಕ್ತರು ಇತರರು ಉಪಸ್ಥಿತರಿದ್ದರು.
ಶಿಕ್ಷಕ ವ್ಹಿ.ಎಸ್.ಜಂಗಣ್ಣವರ ನಿರೂಪಿಸಿದರು, ಎಂ.ಎಸ್.ಹಗೇದಾಳ ಸ್ವಾತಿಸಿದರು, ಬಿ,ಎಂ.ಬೆಳಕೊಪ್ಪ ವಂದಿಸಿದರು.