ಶಿವ ಕ್ರೆಡಿಟ್ ಕೋ-ಆಪರೇಟಿವ್ ಸೊಸೈಟಿಯ 20ನೇ ವಾರ್ಷಿಕ ಮಹಾಸಭೆ

ಹೊನ್ನಾಳಿ.ಡಿ.೨೨; ಶಿವ ಕ್ರೆಡಿಟ್ ಕೋ-ಆಪರೇಟಿವ್ ಸೊಸೈಟಿಯು ತಾಲೂಕಿನ ಸುರಹೊನ್ನೆಯಲ್ಲಿ 42 ಲಕ್ಷ ರೂ.ಗಳ ಮೌಲ್ಯದ ಶಾಖಾ ಕಟ್ಟಡ ಹೊಂದಿದ್ದು, ಸುಮಾರು 14 ಲಕ್ಷ ರೂ.ಗಳಷ್ಟು ವೆಚ್ಚದಲ್ಲಿ ಸಾಸ್ವೆಹಳ್ಳಿಯ ಶಾಖೆಗೆ ನಿವೇಶನ ಖರೀದಿಸಲಾಗಿದೆ. 5,245 ಸದಸ್ಯರನ್ನು ಹೊಂದಿದ್ದು, 37 ಕೋಟಿ ರೂ.ಗಳಷ್ಟು ದುಡಿಯುವ ಬಂಡವಾಳ ಹೊಂದಿದೆ ಎಂದು ಸೊಸೈಟಿ ಅಧ್ಯಕ್ಷ ಕೂಲಂಬಿ ಕೆ.ಎಂ. ಬಸವಲಿಂಗಪ್ಪ ಹೇಳಿದರು.ತಾಲೂಕಿನ ಗೊಲ್ಲರಹಳ್ಳಿ ಗ್ರಾಮದ ತರಳಬಾಳು ಸಮುದಾಯ ಭವನದಲ್ಲಿ  ಆಯೋಜಿಸಲಾಗಿದ್ದ ಸೊಸೈಟಿಯ 20ನೇ ವರ್ಷದ ವಾರ್ಷಿಕ ಮಹಾಸಭೆಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.ತರಳುಬಾಳು ಜಗದ್ಗುರುಗಳ ಆಶೀರ್ವಾದದಿಂದ ಸೊಸೈಟಿಯ 3 ಶಾಖೆಗಳು ಲಾಭದಾಯಕ ವಹಿವಾಟು ನಡೆಸುತ್ತಿವೆ. ವಾರ್ಷಿಕ 156.83 ಕೋಟಿ ರೂ.ಗಳಷ್ಟು ವಹಿವಾಟು ನಡೆಸಿ 3.83 ಕೋಟಿ ರೂ.ಗಳಷ್ಟು ಆದಾಯದೊಂದಿಗೆ ಒಟ್ಟು 44.14 ಲಕ್ಷ ರೂ.ಗಳಷ್ಟು ನಿವ್ವಳ ಲಾಭ ಲಭಿಸಿದೆ. ಕಳೆದ 20 ವರ್ಷಗಳಲ್ಲಿ ಸೊಸೈಟಿಯು ಉತ್ತಮವಾಗಿ ಕಾರ್ಯ ನಿರ್ವಹಿಸಿಕೊಂಡು ಬರುತ್ತಿದೆ. ಪ್ರಸ್ತಕ ಸಾಲಿನಲ್ಲಿ ಷೇರುದಾರರಿಗೆ ಶೇ.10ರಷ್ಟು ಡಿವಿಡೆಂಡ್ ನೀಡಲು ತೀರ್ಮಾನಿಸಲಾಗಿದೆ ಎಂದು ತಿಳಿಸಿದರು.ಸೊಸೈಟಿಯ ಕಾರ್ಯದರ್ಶಿ ಎಚ್.ಎನ್. ರುದ್ರೇಶ್ ಮಾತನಾಡಿ, ಮರಣ ಹೊಂದಿದ 44 ಸದಸ್ಯರಿಗೆ ಹಾಗೂ 24 ಸಾಲಗಾರರಿಗೆ ಸಾಲಗಾರರ ಕ್ಷೇಮ ನಿಧಿಯಿಂದ ನೆರವು ದೊರೆಯುವಂತೆ ಸೌಲಭ್ಯ ಕಲ್ಪಿಸಲಾಗಿದೆ ಎಂದು ಹೇಳಿದರು.ಶಿವ ಕ್ರೆಡಿಟ್ ಕೋ-ಆಪರೇಟಿವ್ ಸೊಸೈಟಿ ಉಪಾಧ್ಯಕ್ಷೆ ದೊಡ್ಡೇರಿ ಶಕುಂತಲ, ನಿರ್ದೇಶಕರಾದ ಕುಂದೂರು ನಾಗರಾಜಪ್ಪ, ಮಲ್ಲಿಗೇನಹಳ್ಳಿ ಎಂ.ಜಿ. ಬಸವರಾಜಪ್ಪ, ಬಿದರಗಡ್ಡೆ ನಾಗೇಂದ್ರಪ್ಪ, ಸುರಹೊನ್ನೆ ಸಿದ್ಧೇಶ್ವರಪ್ಪ, ಕ್ಯಾಸಿನಕೇರಿ ಶಂಕರಗೌಡ, ನ್ಯಾಮತಿ ಶ್ರೀಕಾಂತ್, ಹೊನ್ನಾಳಿ ಶೈಲೇಶ್, ಕಮ್ಮಾರಗಟ್ಟೆ ಶಿವಕುಮಾರ್, ಚಟ್ನಹಳ್ಳಿ ವಿಕಾಸ್, ತರಗನಹಳ್ಳಿ ಮಂಜುಳಾ, ವಿಜಯಪುರದ ಕೃಷ್ಣನಾಯ್ಕ ಮತ್ತಿತರರು ಉಪಸ್ಥಿತರಿದ್ದರು.ಪ್ರತಿಭಾವಂತ ವಿದ್ಯಾರ್ಥಿಗಳನ್ನು ಸನ್ಮಾನಿಸಲಾಯಿತು.