ವಿಶ್ವ ಪರಿಸರ ದಿನಾಚರಣೆ ಅಂಗವಾಗಿ ನುಗ್ಗೆ ಮತ್ತು ತೆಂಗಿನ ಸಸಿಗಳ ನಾಟಿ

ಸಿರುಗುಪ್ಪ ಜೂ 06 : ತಾಲೂಕಿನ 64ಹಳೇಕೋಟೆ ಗ್ರಾಮ ಪಂಚಾಯಿತಿಯ ವ್ಯಾಪ್ತಿಯಲ್ಲಿ ಜಿಲ್ಲಾ ಪಂಚಾಯಿತಿ, ತಾಲೂಕು ಪಂಚಾಯಿತಿ ಹಾಗೂ ತೋಟಗಾರಿಕೆ ಇಲಾಖೆಯ ಸಹಯೋಗದಲ್ಲಿ ಮೌನೇಶ ಆಚಾರಿ ಅವರ 2ಎಕರೆ ಜಮೀನಿನಲ್ಲಿ ವಿಶ್ವ ಪರಿಸರ ದಿನಾಚರಣೆ ಅಂಗವಾಗಿ ಮಹಾತ್ಮ ಗಾಂಧೀಜಿ ರಾಷ್ಟ್ರೀಯ ಗ್ರಾಮ ಉದ್ಯೋಗ ಖಾತ್ರಿ ಯೋಜನೆಡಿಯಲ್ಲಿ ತಾಲೂಕು ಪಂಚಾಯಿತಿ ಕಾರ್ಯನಿರ್ವಹ ಅಧಿಕಾರಿ ಶಿವಪ್ಪ ಸುಬೇದರ್ ಸಾಂಕೇತಿಕವಾಗಿ ನುಗ್ಗೆ ಮತ್ತು ತೆಂಗು ಸಸಿಗಳನ್ನು ನೆಟ್ಟು ನೀರು ಹಾಕಿದರು.
ತೋಟಗಾರಿಕೆ ಸಹಾಯಕ ನಿದೇರ್ಶಕ ವಿಶ್ವನಾಥ ಅವರು ಮಾತನಾಡಿ ಮಹಾತ್ಮ ಗಾಂಧೀಜಿ ರಾಷ್ಟ್ರೀಯ ಗ್ರಾಮ ಉದ್ಯೋಗ ಖಾತ್ರಿ ಯೋಜನೆಡಿಯಲ್ಲಿ 64ಹಳೇಕೋಟೆ ಗ್ರಾಮದ ಫಲಾನುಭವಿ ಮೌನೇಶ ಆಚಾರಿ ಅವರ 2ಎಕರೆ ಜಮೀನಿನಲ್ಲಿ ನುಗ್ಗೆ ನಾಟಿ ಮಾಡಿದ್ದು, 2ಎಕರೆಯ ಬದುವಿನ ಸುತ್ತ ತೆಂಗಿನ ಸಸಿಗಳನ್ನು ಇಡಲಾಯಿತು. ಇದರಿಂದ ರೈತರು ಸಾಂಪ್ರದಾಯಕ ಬೆಳೆಗಳನ್ನು ಬೆಳೆಯುವುದನ್ನು ಬದಲಾಯಿಸಿಕೊಂಡು ತೋಟಗಾರಿಕೆ ಬೆಳೆಗಳನ್ನು ಬೆಳೆದು ಉತ್ತಮ ಲಾಭ ಪಡೆಯುವುದರೊಂದಿಗೆ ಭೂಮಿಯ ಸವಳಿಕೆ ಮತ್ತು ಫಲವತ್ತತೆಯನ್ನು ಸಂರಕ್ಷಿಸಿದಂತೆಯಾಗುತ್ತದೆ ಎಂದು ಅಭಿಪ್ರಾಯಿಸಿದರು.
ಇದೆ ಸಂದರ್ಭದಲ್ಲಿ ಕೃಷಿ ಸಹಾಯಕ ನಿದೇರ್ಶಕ ನಜೀರ್ ಅಹ್ಮದ್, ನರೇಗಾ ಯೋಜನಾಧಿಕಾರಿ ನಿರ್ಮಲ ಇದ್ದರು.