ಸಾಯೊ ಪೌಲೊ , ಮಾ ೨೯- ಲಸಿಕೆ ನಿರ್ಲಕ್ಷ್ಯದಿಂದಾಗಿ ಬ್ರೆಜಿಲ್‌ನಲ್ಲಿ ಇದುವರೆಗೂ ಸುಮಾರು ೭ ಲಕ್ಷ ಮಂದಿ ಕೊರೊನಾ ಮಹಾಮಾರಿಗೆ ಸಾವನ್ನಪ್ಪಿದ್ದಾರೆ ಎಂದು ತಿಳಿದು ಬಂದಿದೆ.
ಇಡೀ ವಿಶ್ವವನ್ನೇ ತಲ್ಲಣಗೊಳಿಸಿದ ಕೊರೊನಾಗೆ ಲಸಿಕಾಕರಣ ಅಭಿಯಾನ ನಡೆಸಿ ಕಡಿವಾಣ ಹಾಕಲು ಸರ್ಕಾರಗಳು ಪ್ರಯತ್ನ ನಡೆಸುತ್ತಿವೆ. ಕೆಲವೆಡೆ ಲಸಿಕೆಯ ಬಗೆಗಿನ ಅಸಡ್ಡೆಯಿಂದಾಗಿ ಸಾವು-ನೋವುಗಳು ಹೆಚ್ಚಿವೆ. ಅದರಲ್ಲಿ ಅಮೆರಿಕ ಮತ್ತು ಬ್ರೆಜಿಲ್ ಮೊದಲೆರಡು ಸ್ಥಾನಗಳಲ್ಲಿವೆ. ಅಮೆರಿಕದಲ್ಲಿ ೧೧ ಲಕ್ಷಕ್ಕೂ ಅಧಿಕ ಜನರು ಕೋವಿಡ್‌ಗೆ ತುತ್ತಾದರೆ, ೭ ಲಕ್ಷ ಮಂದಿ ಬ್ರೆಜಿಲ್‌ನಲ್ಲಿ ಸಾವನ್ನಪ್ಪಿದ್ದಾರೆ.
ಬ್ರೆಜಿಲ್‌ನಲ್ಲಿ ಸಾವು ನೋವುಗಳಿಗೆ ಕಾರಣ ಏನೆಂದರೆ ಕೊರೊನಾ ಲಸಿಕೆ ಹಾಕಿಸದೇ ಇರುವುದು ಮತ್ತು ವಿವಿಧ ರೀತಿಯ ಕಾಯಿಲೆಗಳು ಅಲ್ಲಿನ ಜನರನ್ನು ಬಾಧಿಸುವಂತೆ ಮಾಡಿದೆ. ಅಮೆರಿಕದ ಬಳಿಕ ವಿಶ್ವದಲ್ಲಿಯೇ ಅತಿಹೆಚ್ಚು ಕೋವಿಡ್ ಸಾವಾಗಿದ್ದು ಬ್ರೆಜಿಲ್‌ನಲ್ಲಿ ೭ ಲಕ್ಷಕ್ಕೂ ಅಧಿಕ ಮಂದಿ ಕೊರೊನಾಗೆ ತುತ್ತಾಗಿದ್ದಾರೆ ಎಂದು ಅಲ್ಲಿನ ಆರೋಗ್ಯ ಸಚಿವಾಲಯ ಮಾಹಿತಿ ನೀಡಿದೆ.
ಇತ್ತೀಚಿನ ದಿನಗಳಲ್ಲಿ ಕೋವಿಡ್-೧೯ ನಿಂದ ಸಾಯುತ್ತಿರುವ ಹೆಚ್ಚಿನ ಜನರು ಲಸಿಕೆ ಹಾಕಿಸಿಕೊಂಡಿಲ್ಲ ಅಥವಾ ಇತರ ಭೀಕರ ಕಾಯಿಲೆಗಳಿಂದ ಬಳಲುತ್ತಿದ್ದವರಾಗಿದ್ದಾರೆ ಎಂದು ಬ್ರೆಜಿಲಿಯನ್ ಆರೋಗ್ಯ ತಜ್ಞರು ತಿಳಿಸಿದ್ದಾರೆ. ಅಲ್ಲದೇ ಲಸಿಕೆ ಪಡೆಯುವಂತೆ ಸೂಚಿಸಿದೆ.
