ದೆಹಲಿ, ಜು.೧೫- ವಿವಿಧ ಕಾರಣಗಳಿಂದಾಗಿ ದೇಶದಲ್ಲಿ ಟೊಮೊಟೋ ಬೆಲೆ ಗಗನಕ್ಕೇರಿದ್ದು, ಹೆಚ್ಚಿನ ಕಡೆಗಳಲ್ಲಿ ಕೆ.ಜಿ.ಗೆ ೨೦೦ ರೂ. ದಾಟಿದೆ. ಈ ಹಿನ್ನೆಲೆಯಲ್ಲಿ ಜಾಗತಿಕ ಮಟ್ಟದ ಪ್ರಸಿದ್ಧ ಫಾಸ್ಟ್ ಫುಡ್ ರೆಸ್ಟೋರೆಂಟ್‌ಗಳಲ್ಲಿ ಒಂದಾಗಿರುವ ಮೆಕ್‌ಡೊನಾಲ್ಡ್ ಇದೀಗ ತನ್ನ ಉತ್ತರ ಭಾರತ ಹಾಗೂ ಪೂರ್ವ ಭಾರತದಲ್ಲಿನ ಮಳಿಗೆಗಳ ಆಹಾರ ಉತ್ಪನ್ನಗಳಲ್ಲಿ ಟೊಮೊಟೋ ಬಳಕೆಯನ್ನು ಸ್ಥಗಿತಗೊಳಿಸಿದೆ.
ಭಾರೀ ಮಳೆ ಹಾಗೂ ಇತರೆ ಕಾರಣಗಳಿಂದಾಗಿ ಕಳೆದೊಂದು ವಾರಗಳಲ್ಲಿ ಭಾರತದಲ್ಲಿ ಟೊಮೊಟೋ ಬೆಲೆ ಗಗನಕ್ಕೇರಿದೆ. ಪರಿಣಾಮ ಹೆಚ್ಚಿನ ಕಡೆಗಳಲ್ಲಿ ಕೆ.ಜಿ ಟೊಮೊಟೋ ಬೆಲೆ ೨೦೦ ರೂ. ದಾಟಿದೆ. ಸಾಮಾನ್ಯವಾಗಿ ೪೦-೫೦ರ ಆಸುಪಾಸಿನಲ್ಲಿದ್ದ ಟೊಮೊಟೊ ಬೆಲೆ ಹಠಾತ್ ಏರಿಕೆಯಾಗಿರುವು ದೇಶದಲ್ಲಿ ಜನಸಾಮಾನ್ಯರ ಬೆಲೆ ಸುಡುವಂತೆ ಮಾಡಿದೆ. ಅದರಲ್ಲೂ ಫಾಸ್ಟ್‌ಫುಡ್‌ಗಳಲ್ಲಿ ಟೊಮೊಟೋ ಸಾಮಾನ್ಯವಾಗಿರುವ ಹಿನ್ನೆಲೆಯಲ್ಲಿ ಇದೀಗ ಗ್ರಾಹಕರಿಗೆ ಇದರ ಬೆಲೆಏರಿಕೆಯ ಬಿಸಿ ತಾಗಿದೆ. ಬೆಲೆ ಏರಿಕೆಯಿಂದಾಗಿ ತಮ್ಮ ಉತ್ಪನ್ನಗಳಲ್ಲಿ ಟೊಮೊಟೋ ಬಳಕೆಯನ್ನು ನಿಲ್ಲಿಸಲಾಗಿದೆ ಎಂದು ಮೆಕ್‌ಡೊನಾಲ್ಡ್ ಅಧಿಕೃತವಾಗಿ ಹೇಳಿಕೊಂಡಿಲ್ಲ. ಬದಲಾಗಿ ಋತುಮಾನ ಬೆಳೆ ಸಮಸ್ಯೆಗಳಿಂದಾಗಿ ಗುಣಮಟ್ಟದ ಟೊಮೆಟೊಗಳ ಅಲಭ್ಯತೆಯನ್ನು ಅದು ಉಲ್ಲೇಖಿಸಿದೆ. ಆದರೂ ಟೊಮೊಟೋ ಬಳಕೆಯನ್ನು ನಿಲ್ಲಿಸಲು ಬೆಲೆಏರಿಕೆಯೇ ಕಾರಣ ಎನ್ನಲಾಗಿದೆ. ಪ್ರತಿಕೂಲ ಹವಾಮಾನ ಪರಿಸ್ಥಿತಿಗಳು ಬೆಳೆಗಳನ್ನು ಹಾನಿಗೊಳಿಸಿದ್ದು, ಇದು ಟೊಮೊಟೋ ಬೆಲೆಗೂ ತಟ್ಟಿದೆ ಎನ್ನಲಾಗಿದೆ. ಮುಖ್ಯವಾಗಿ ಮಾರುಕಟ್ಟೆಯಲ್ಲಿ ಇಂಧನ ಕೊರತೆ ಮತ್ತು ಬೇಡಿಕೆ ಮತ್ತು ಪೂರೈಕೆಯ ನಡುವಿನ ಹೊಂದಾಣಿಕೆಯಿಲ್ಲ ಎಂದು ತಜ್ಞರು ತಿಳಿಸಿದ್ದಾರೆ. ಆದರೆ ಗಗನಕ್ಕೇರುತ್ತಿರುವ ಬೆಲೆಗಳು ತಾತ್ಕಾಲಿಕ ಸಮಸ್ಯೆಯಾಗಿದ್ದು, ಮುಂಬರುವ ತಿಂಗಳುಗಳಲ್ಲಿ ಅವು ಕಡಿಮೆಯಾಗಲಿವೆ ಎಂದು ಸರ್ಕಾರ ಹೇಳಿದೆ. ಈ ನಡುವೆ ಕೆಲವು ರಾಜ್ಯಗಳು ಗ್ರಾಹಕರಿಗೆ ಸಹಾಯ ಮಾಡಲು ಸರ್ಕಾರ ನಡೆಸುವ ಅಥವಾ ರೈತ ಬೆಂಬಲಿತ ಮಳಿಗೆಗಳಲ್ಲಿ ಕಡಿಮೆ ಬೆಲೆಗೆ ಟೊಮೆಟೊಗಳನ್ನು ಮಾರಾಟ ಮಾಡಲು ಪ್ರಾರಂಭಿಸಿವೆ. ಆದರೆ ಅಚ್ಚರಿ ಎಂಬಂತೆ ಕೆಲ ತಿಂಗಳ ಹಿಂದೆಯಷ್ಟೇ ಭಾರತದ ಕೆಲ ಕಡೆ ಸೂಕ್ತ ಬೆಲೆ ಸಿಗದೇ ಹಿನ್ನೆಲೆಯಲ್ಲಿ ರಾಶಿಗಟ್ಟಲೇ ಟೊಮೊಟೋಗಳನ್ನು ರೈತರು ರಸ್ತೆಯಲ್ಲೇ ಬಿಸಾಡಿದ್ದರು. ಆದರ ಇದೀಗ ಟೊಮೊಟೋ ಬೆಲೆ ಗಗನ ಮುಟ್ಟಲು ಆರಂಭಿಸಿದೆ.
