ಬೆಂಗಳೂರು.ಏ೨:ರಾಕೆಟ್ ಉಡಾವಣೆಯ ‘ಪುನರ್ ಬಳಕೆಯ ಉಡಾವಣಾ ವಾಹನ’(ಆರ್‌ಎಲ್‌ವಿ?ಎಲ್‌ಇಎಕ್ಸ್)ದ ಲ್ಯಾಂಡಿಂಗ್ ಪರೀಕ್ಷೆ ಭಾನುವಾರ ಯಶಸ್ವಿಯಾಗಿದೆ ಎಂದು ಭಾರತೀಯ ಬಾಹ್ಯಾಕಾಶ ಸಂಸ್ಥೆ (ಇಸ್ರೊ) ತಿಳಿಸಿದೆ.
ಈ ಪರೀಕ್ಷೆಯನ್ನು ಚಿತ್ರದುರ್ಗದಲ್ಲಿರುವ ರಕ್ಷಣಾ ಇಲಾಖೆಯ ಏರೋನಾಟಿಕಲ್ ಪರೀಕ್ಷಾ ವಲಯದಲ್ಲಿ ಸ್ಥಾಪಿಸಿದ್ದ ಪ್ರಥಮ ರನ್‌ವೇನಲ್ಲಿ ನಡೆಸಲಾಯಿತು.
ವಾಯುಪಡೆ ಮತ್ತು ರಕ್ಷಣಾ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಯ ಸಹಯೋಗದೊಂದಿಗೆ ಭಾನುವಾರ ಮುಂಜಾನೆ ಈ ಪ್ರಯೋಗವನ್ನು ನಡೆಸಲಾಯಿತು ಎಂದು ಇಸ್ರೊ ಹೇಳಿದೆ.
ಪರೀಕ್ಷೆಯ ವೇಳೆಯಲ್ಲಿ ಪುನರ್ ಬಳಕೆಯ ಉಡಾವಣಾ ವಾಹನದ ಕವಚವನ್ನು ಹೆಲಿಕಾಪ್ಟರ್ ಮೂಲಕ ೩ ರಿಂದ ೫ ಕಿ.ಮೀ ಎತ್ತರದಿಂದ ಸಮತಲ ವೇಗದಲ್ಲಿ ರನ್‌ವೇಗೆ ಇಳಿ ಬಿಡಲಾಗುವುದು. ಹೀಗೆ ಇಳಿ ಬಿಟ್ಟ ಬಳಿಕ ಕವಚವು ರನ್‌ವೇಯಲ್ಲಿ ಜಾರಿಕೊಂಡು ಚಲಿಸಲಿದೆ ಎಂದು ಇಸ್ರೊ ಅಧಿಕಾರಿಗಳು ನವೆಂಬರ್‌ನಲ್ಲಿ ಪರೀಕ್ಷೆಯ ಸಿದ್ಧತೆ ವೇಳೆ ತಿಳಿಸಿದ್ದರು.
