ಮದುವೆಯಲ್ಲಿಯೇ ಮದುಮಗನಿಂದ ದೊಡ್ಡಾಟ: ರಂಗ ಪದವೀಧರನ ಜನಪದ ಕಾಳಜಿ

ಕಲಬುರಗಿ.ಜ.5: ದೊಡ್ಡಾಟ, ಸಣ್ಣಾಟ ಈ ಪದಗಳು ಇಂದಿನ ಪೀಳಿಗೆಯ ಕೆಲ ಯುವಕರಿಗೆ ಗೊತ್ತಿರಲಿಕ್ಕಿಲ್ಲ. ಹಿರಿಯರು ಬಿಟ್ಟು ಹೋದ ಈ ವಿಶಿಷ್ಟ ಕಲೆಯ ಉಳಿವಿಗಾಗಿ ಸಣ್ಣಪುಟ್ಟ ಪ್ರಯತ್ನಗಳು ಅಲ್ಲಲ್ಲಿ ನಡೆದಿವೆ. ಆದಾಗ್ಯೂ, ಫಲಿತಾಂಶ ಮಾತ್ರ ಶೂನ್ಯ.
ಅಳಿವಿನ ಅಂಚಿನಲ್ಲಿರುವ ದೊಡ್ಡಾಟ ಕಲೆಯನ್ನು ಉಳಿಸುವ ನಿಟ್ಟಿನಲ್ಲಿ ಸೇಡಂ ತಾಲ್ಲೂಕಿನ ಗಡಿ ಗ್ರಾಮ, ತೆಲುಗನ್ನಡದ ನೆಲ ಜಾಕನಪಲ್ಲಿ ಗ್ರಾಮದ ಸಿದ್ದಪ್ಪ ಅವರು ತಮ್ಮ ಮದುವೆಯಲ್ಲಿ ದೊಡ್ಡಾಟದ ಹೆಜ್ಜೆಗಳನ್ನು ಹಾಕಿ ಗಮನಸಳೆದರು. ಸಿದ್ದಪ್ಪ ಅವರು ಮೈಸೂರು ರಂಗಾಯಣದ ರಂಗ ಪದವೀಧರರೂ ಆಗಿದ್ದಾರೆ.
ಕೈಯಲ್ಲಿ ಅರಿಗೆ ಬಿಲ್ಲು, ಬಾಣ, ಕಿರೀಟಗಳನ್ನು ತೊಟ್ಟು ಹತ್ತು ನಿಮಿಷಗಳ ಕಾಲ ದೊಡ್ಡಾಟದ ಮೂರು ಹಾಡುಗಳನ್ನು ತಾಳಕ್ಕೆ ಹೆಜ್ಜೆ ಹಾಕಿರುವ ಅವರು ವಿಶಿಷ್ಟ ಜನಪದ ಕಲೆಯನ್ನು ರಕ್ಷಿಸಲು ಅರಿವು ಮೂಡಿಸಿದ್ದಾರೆ.
ತೆಲುಗು ಮತ್ತು ಕನ್ನಡ ಭಾಷಿಕರಿರುವ ಜಾಕನಪಲ್ಲಿ ಗ್ರಾಮವು ಗಡಿ ಭಾಗದಲ್ಲಿದೆ. ಇಲ್ಲಿನ ಸರ್ಕಾರಿ ಸರ್ಕಾರಿ ಪ್ರೌಢಶಾಲೆಯ ನಾಟಕ ನಿರ್ದೇಶಕ ಅಶೋಕ್ ತೋಟ್ನಳ್ಳಿ ಹಲವಾರು ವರ್ಷಗಳಿಂದ ಜಾನಪದ ಕಲೆಯ ರಕ್ಷಣೆಯ ಜೊತೆಗೆ ಮಕ್ಕಳಿಗೆ ನಾಟಕ ಕಲಿಸಿ, ರಾಜ್ಯ ಮಟ್ಟದಲ್ಲಿ ಪ್ರಯೋಗಿಸುವ ಮೂಲಕ ಸೈ ಎನ್ನಿಸಿಕೊಂಡಿದ್ದಾರೆ. ಅವರ ಗರಡಿಯಲ್ಲಿ ಪಳಗಿದ ಅನೇಕರು ಇಂದಿಗೂ ಸಹ ರಂಗಕಲೆಯನ್ನು ಉಳಿಸಿ ಬೆಳೆಸುವ ಕೆಲಸ ಮಾಡುತ್ತಿದ್ದಾರೆ. ಈ ಸಾಲಿನಲ್ಲಿ ರಂಗ ಪದವೀಧರ ಸಿದ್ದಪ್ಪ ಸಹ ಒಬ್ಬರು.
ಜನಪದ ಕಲೆಗಳಲ್ಲಿ ದೊಡ್ಡಾಟ ಕಲೆಯು ಬಹು ವಿಶಿಷ್ಟ. ಅದರಲ್ಲಿ ದೊಡ್ಡಾಟ, ಸಣ್ಣಾಟ ಎಂಬ ಎರಡು ಬಗೆಗಳಿವೆ. ದೊಡ್ಡಾಟವನ್ನು ಉತ್ತರ ಕರ್ನಾಟಕದ ಗಂಡು ಕಲೆ ಅಂತಲೂ ಕರೆಯಲಾಗುತ್ತದೆ. ದೊಡ್ಡಾಟದ ಕತೆಗಾರ ಮತ್ತು ಸಾರಥಿಯ ಪಾತ್ರಗಳು ಬಹು ವೈಶಿಷ್ಟ್ಯತೆಯಿಂದ ಕೂಡಿರುತ್ತದೆ. ತಮ್ಮ ಚಾಕಚಕ್ಯತೆ, ನಟನಾ ಕೌಶಲ್ಯ ಮತ್ತು ನವರಸಗಳೊಂದಿಗೆ ಪ್ರದರ್ಶಿಸುವ ಪಾತ್ರಗಳು ನೋಡುಗರನ್ನು ಮಂತ್ರ ಮುಗ್ದರನ್ನಾಗಿಸುತ್ತವೆ.
ಪೌರಾಣಿಕ ಕತೆಯನ್ನು ಮೂಲ ಆಧಾರವಾಗಿಟ್ಟು ದೊಡ್ಡಾಟಗಳು ಪ್ರದರ್ಶನಗೊಳ್ಳುತ್ತವೆ. ಇಡೀ ರಾತ್ರಿಯೆಲ್ಲ ಆಟಗಳು ನಡೆದು ಸೂರ್ಯೋದಯದ ವೇಳೆಗೆ ಮುಕ್ತಾಯಗೊಳ್ಳುತ್ತದೆ. ದೊಡ್ಡಾಟ ಪ್ರದರ್ಶನಕ್ಕೆ ಹತ್ತು ದಿನಗಳು ಇರುವಾಗಲೇ ಗ್ರಾಮದ ವಿಶಾಲವಾದ ಪ್ರದೇಶವನ್ನು ಗುರುತಿಸಿ ಅಲ್ಲಿ ಹಂದರಗಂಬವನ್ನು ನೆಡಲಾಗುತ್ತದೆ. ಅದೇ ಕಂಬ ಪ್ರಚಾರದ ಮುಖ್ಯ ಕೇಂದ್ರ ಬಿಂದುವೆನಿಸಿಕೊಳ್ಳುತ್ತದೆ. ದೊಡ್ಡಾಟಕ್ಕೆ ಮತ್ತೊಂದು ಜೀವಾಳ ಭಾಗವತರು. ಅವರ ಅಣತಿಯಂತೆ ಇಡೀ ಆಟ ಪ್ರದರ್ಶನಗೊಳ್ಳುತ್ತದೆ.