ಮಂಗಳೂರು ವಿಶ್ವವಿದ್ಯಾನಿಲಯ ಬ್ಯಾರಿ ಅಧ್ಯಯನ ಪೀಠದ ವತಿಯಿಂದ ಪ್ರಚಾರೋಪನ್ಯಾಸ

ಮಂಗಳೂರು, ಮಾ.೨೩- ಭಾಷೆ ಎಂಬುದು ಒಂದು ಜನಸಂಸ್ಕೃತಿಯ ಬಿಂಬ, ಸಮುದಾಯವೊಂದರ ಅಸ್ಮಿತೆ, ಜನರನ್ನು ಒಗ್ಗೂಡಿಸಬಲ್ಲ ಮಹಾಶಕ್ತಿ ಅದಕ್ಕೆ ಇದೆ. ಶಿಕ್ಷಣದ ಕೊರತೆಯಿಂದಾಗಿ ಸಹಜವಾಗಿಯೇ ಬ್ಯಾರಿಗಳಲ್ಲಿ ಸಾಹಿತ್ಯದ ಆಸಕ್ತಿ ಅಷ್ಟಾಗಿ ಇರಲಿಲ್ಲ. ಒಂದಷ್ಟು ವಿದ್ಯೆ ಪಡೆದ ಕೆಲವೇ ಮಂದಿ ಮಾತ್ರ ಸಾಹಿತ್ಯದಲ್ಲಿ ಆಸಕ್ತಿ ತೋರಿದ್ದರು. ಅದರಲ್ಲೂ ಹೀಗೆ ಸಾಹಿತ್ಯ ಕೃಷಿ ಮಾಡಿದವರೆಲ್ಲರೂ ತಮ್ಮ ಪ್ರತಿಭೆಯನ್ನು ಧಾರೆ ಎರೆದದ್ದು ಕನ್ನಡ ಸಾಹಿತ್ಯಕ್ಕೆ ಎಂಬುದು ಗಮನಾರ್ಹ. ಬ್ಯಾರಿ ಭಾಷೆಯಲ್ಲಿ ಹಲವಷ್ಟು ಜನಪದ ಹಾಡುಗಳು, ಕಥೆಗಳು ಇದ್ದರೂ ಕೂಡಾ ಕ್ರಮೇಣ ನೆನಪಿನಿಂದ ಮರೆಯಾಗುತ್ತಾ ಬಂದದ್ದು ವಿಪರ್ಯಾಸ ಎಂದು ಖ್ಯಾತ ಸಾಹಿತಿ ಶಂಶುದ್ದೀನ್ ಮಡಿಕೇರಿ ಅಭಿಪ್ರಾಯಪಟ್ಟರು. ಮಂಗಳೂರು ವಿಶ್ವವಿದ್ಯಾನಿಲಯ ಬ್ಯಾರಿ ಅಧ್ಯಯನ ಪೀಠದ ವತಿಯಿಂದ ಮೆಲ್ಕಾರ್ ಪ್ರಥಮ ದರ್ಜೆ ಕಾಲೇಜು, ಮೆಲ್ಕಾರ್ ಸಹಯೋಗದಲ್ಲಿ ಕಾಲೇಜಿನಲ್ಲಿ ನಡೆದ ಬ್ಯಾರಿ ಭಾಷೆ ಮತ್ತು ಸಾಹಿತ್ಯ – ಒಂದು ಅವಲೋಕನ ಎಂಬ ವಿಷಯದ ಬಗ್ಗೆ ಪ್ರಚಾರೋಪನ್ಯಾಸ ಕಾರ್ಯಕ್ರಮದಲ್ಲಿ ಅವರು ಸಂಪನ್ಮೂಲ ವ್ಯಕ್ತಿಯಾಗಿ ಭಾಗವಹಿಸಿದರು.
ಯಾವುದೇ ಭಾಷೆಗೆ ಸರಿಸಮಾನವಾಗಿ ನಿಲ್ಲಬಲ್ಲ ಬೃಹತ್ ಶಬ್ಧ ಭಂಡಾರ ಬ್ಯಾರಿ ಭಾಷೆಯಲ್ಲೂ ಇದೆ. ಈ ಶಬ್ಧ ಭಂಡಾರವನ್ನು ಸಂಗ್ರಹಿಸುವ ಮೂಲಕ ದ್ರಾವಿಡ ಭಾಷೆಗಳ ತೌಲನಿಕ ಅಧ್ಯಯನ ಮಾಡಲು ಸಾಧ್ಯವಾಗಬಹುದು. ಅಲ್ಲದೆ ಬ್ಯಾರಿ ಭಾಷೆಯ ಮೂಲ ರೂಪದ ಪುನರ್ ನಿರ್ಮಾಣ ಕೂಡಾ ಸಾಧ್ಯವಾಗಬಲ್ಲುದು ಎಂಬುದು ಭಾಷಾ ತಜ್ಞರ ಅಭಿಮತ ಎಂದು ಅವರು ಹೇಳಿದರು.
ಮೆಲ್ಕಾರ್ ಪ್ರಥಮ ದರ್ಜೆ ಕಾಲೇಜು, ಮೆಲ್ಕಾರ್ ಇಲ್ಲಿನ ಪ್ರಾಚಾರ್ಯರಾದ ಶ್ರೀ ಅಬ್ಧುಲ್ ಲತೀಫ್ ಬಿ.ಕೆ ಅಧ್ಯಕ್ಷತೆ ವಹಿಸಿದ್ದರು. ಬ್ಯಾರಿ ಅಧ್ಯಯನ ಪೀಠದ ಸಂಯೋಜಕರಾದ ಡಾ. ಎ. ಸಿದ್ಧಿಕ್ ಪ್ರಾಸ್ತಾವಿಕವಾಗಿ ಮಾತನಾಡಿ, ಸ್ವಾಗತಿಸಿದರು. ಬ್ಯಾರಿ ಅಧ್ಯಯನ ಪೀಠದ ಸಲಹಾ ಸಮಿತಿ ಸದಸ್ಯರಾದ ಶ್ರೀ. ಅಹಮದ್ ಬಾವ ಮೊದಿನ್, ಶ್ರೀ. ಅಬ್ದುಲ್ ರಹಿಮಾನ್ ಕುತ್ತೆತ್ತೂರು, ಸಹಪ್ರಾಧ್ಯಾಪಕರಾದ ಶ್ರೀ. ಹೈದರಾಲಿ ಉಪಸ್ಥಿತರಿದ್ದರು. ಶ್ರೀ. ಅಹಮದ್ ಬಾವ ಮೊದಿನ್ ವಂದಿಸಿ, ಕುಮಾರಿ ಇಸಾಮುನ್ನೀಸ ಕಾರ್ಯಕ್ರಮ ನಿರೂಪಿಸಿದರು.