ಬಡ್ಡಿದರ ಹೆಚ್ಚಿಸಿದ ಫೆಡರಲ್ ರಿಸರ್ವ್

ನ್ಯೂಯಾರ್ಕ್, ಜು.೨೭- ಅಮೆರಿಕಾದಲ್ಲಿ ಮಿತಿಮೀರುತ್ತಿರುವ ಹಣದುಬ್ಬರ ಪ್ರಮಾಣವನ್ನು ನಿಯಂತ್ರಿಸುವ ಸಲುವಾಗಿ ಫೆಡರಲ್ ರಿಸರ್ವ್ ಇದೀಗ ಎಲ್ಲರ ನಿರೀಕ್ಷೆಯಂತೆ ಮಾನದಂಡದ ಸಾಲದ ದರವನ್ನು ಏರಿಕೆ ಮಾಡಿದ್ದು, ಈ ಮೂಲಕ ೨೦೦೧ರ ಬಳಿಕ ಇದೇ ಮೊದಲ ಬಾರಿ ಅತ್ಯಧಿಕ ಮಟ್ಟಕ್ಕೆ ಕೊಂಡೊಯ್ದಿದೆ. ಎರಡು ದಿನಗಳ ಕಾಲ ನಡೆದಿದ್ದ ಫೆಡರಲ್ ರಿಸರ್ವ್ ತನ್ನ ಸಭೆಯ ಅಂತ್ಯದಲ್ಲಿ ಈ ಕಠಿಣ ನಿರ್ಣಯ ತೆಗೆದುಕೊಳ್ಳಲಾಗಿದೆ.
ಸದ್ಯ ಫೆಡರಲ್ ರಿಸರ್ವ್ ತೆಗೆದುಕೊಂಡ ಬಡ್ಡಿದರ ಹೆಚ್ಚಳ ಪ್ರಕ್ರಿಯೆಯು ಮುಂದಿನ ದಿನಗಳಲ್ಲಿ ಮತ್ತಷ್ಟು ಮುಂದುವರೆಯುವ ಸಾಧ್ಯತೆ ಇದೆ ಎನ್ನಲಾಗಿದ್ದು, ಸಹಜವಾಗಿಯೇ ಇದರಿಂದ ಜಾಗತಿಕ ಮಟ್ಟದಲ್ಲಿ ಆಘಾತ ಮೂಡಿಸಿದೆ. ಯಾಕೆಂದರೆ ಅಮೆರಿಕಾದ ಫೆಡರಲ್ ರಿಸರ್ವ್ ತನ್ನ ಬಡ್ಡಿದರ ಹೆಚ್ಚಿಸಿದರೆ ಜಾಗತಿಕ ಮಟ್ಟದ ಬ್ಯಾಂಕ್‌ಗಳು ಕೂಡ ತಮ್ಮ ತಮ್ಮ ಬಡ್ಡಿದರ ಹೆಚ್ಚಿಸುವ ಸಾಧ್ಯತೆ ಇದ್ದು, ಜಗತ್ತಿನ ಆರ್ಥಿಕವಾಗಿ ನಷ್ಟ ಹೊಂದುವ ಸಾಧ್ಯತೆ ಕೂಡ ಇರುತ್ತದೆ. ಇದು ಜಗತ್ತಿನಲ್ಲಿ ಸದ್ಯ ನಡೆಯುತ್ತಿರುವ ಆರ್ಥಿಕ ಅನಿಶ್ಚಿತತೆಗೆ ದಾರಿ ಮಾಡಲಿದೆ ಎಂಬ ಮಾತು ಕೂಡ ಕೇಳಿಬರುತ್ತಿದೆ. ಇನ್ನು ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಫೆಡರಲ್ ರಿಸರ್ವ್ ಮುಖ್ಯಸ್ಥ ಜೆರೋಮ್ ಪಾವೆಲ್, ನೀತಿಯು ತನ್ನ ಸಂಪೂರ್ಣ ಅಪೇಕ್ಷಿತ ಪರಿಣಾಮಗಳನ್ನು ಹೊಂದಲು ಸಾಕಷ್ಟು ಸಮಯದವರೆಗೆ ಹೆಚ್ಚು ನಿರ್ಬಂಧಿತವಾಗಿಲ್ಲ. ಹಾಗಾಗಿ ಹಣದುಬ್ಬರ ಪ್ರಮಾಣವು ಎರಡು ಪ್ರತಿಶತದತ್ತ ಕೆಳಗಿಳಿಯುವ ಬಗ್ಗೆ ನಾವು ವಿಶ್ವಾಸ ಹೊಂದುವ ವರೆಗೂ ನೀತಿಯನ್ನು ನಿರ್ಬಂಧಿತವಾಗಿಡಲು ನಾವು ಉದ್ದೇಶಿಸಿದ್ದೇವೆ. ಒಂದು ವೇಳೆ ಸೂಕ್ತ ಸೂಕ್ತವಾಗಿದ್ದರೆ ಮತ್ತೆ ನಾವು ಮತ್ತಷ್ಟು ಬಿಗಿಕ್ರಮಗಳನ್ನು ತೆಗೆದುಕೊಳ್ಳಲು ಸಿದ್ಧರಿದ್ದೇವೆ ಎಂದು ತಿಳಿಸಿದ್ದಾರೆ. ಜೂನ್‌ನಲ್ಲಿ ಅಮೆರಿಕಾದ ಹಣದುಬ್ಬರ ಪ್ರಮಾಣವು ಕಡಿಮೆಯಾಗಿದ್ದರೂ ಉದ್ದೇಶಿತ ಗುರಿಗಿಂತ ಹೆಚ್ಚಿದೆ. ಹಾಗಾಗಿ ಮುಂದಿನ ದಿನಗಳಲ್ಲಿ ಕೂಡ ಇದೇ ರೀತಿಯ ಕಠಿಣ ಕ್ರಮಗಳನ್ನು ತೆಗೆದುಕೊಳ್ಳುವ ಸಾಧ್ಯತೆ ಇದೆ ಎನ್ನಲಾಗಿದೆ.