ಢಾಕಾ, ಮಾ.೬- ರೋಹಿಂಗ್ಯಾ ನಿರಾಶ್ರಿತರ ಶಿಬಿರದಲ್ಲಿ ಭಾರೀ ಪ್ರಮಾಣದಲ್ಲಿ ಅಗ್ನಿ ಅವಘಡ ಸಂಭವಿಸಿದ ಘಟನೆ ಆಗ್ನೇಯ ಬಾಂಗ್ಲಾದೇಶದಲ್ಲಿ ಸಂಭವಿಸಿದೆ. ದುರ್ಘಟನೆ ಹಿನ್ನೆಲೆಯಲ್ಲಿ ಯಾವುದೇ ಸಾವು-ನೋವಿನ ಪ್ರಮಾಣ ವರದಿಯಾಗಿಲ್ಲ.
ಕಾಕ್ಸ್ ಬಝಾರ್‌ನಲ್ಲಿನ ರೋಹಿಂಗ್ಯಾ ನಿರಾಶ್ರಿತರ ಶಿಬಿರದಲ್ಲಿ ಸುಮಾರು ೨ ಸಾವಿರ ಮನೆಗಳು ಬೆಂಕಿಗಾಹುತಿಯಾಗಿದ್ದು, ೧೨ ಸಾವಿರಕ್ಕೂ ಅಧಿಕ ಮಂದಿ ಇಲ್ಲಿ ವಾಸಿಸುತ್ತಿದ್ದರು ಎಂದು ಅಂದಾಜಿಸಲಾಗಿದೆ. ಸ್ಥಳೀಯ ಕಾಲಮಾನ ಸುಮಾರು ೧೪:೨೫ರ ವೇಳೆಗೆ ಈ ಅವಘಡ ಆರಂಭವಾಗಿದ್ದು, ಬಿದಿರು ಮತ್ತು ಟಾರ್ಪಾಲಿನ್ ವಸ್ತುಗಳಿಂದ ನಿರ್ಮಿಸಲಾಗಿರುವ ಮನೆಗಳು ಬಹುಬೇಗನೇ ಬೆಂಕಿಗಾಹುತಿಯಾಗಿದೆ ಎನ್ನಲಾಗಿದೆ. ಅಗ್ನಿ ಆವರಿಸಿದ ಮೂರು ಗಂಟೆಗಳಲ್ಲಿ ಬೆಂಕಿಯನ್ನು ನಿಯಂತ್ರಣಕ್ಕೆ ತರಲಾಯಿತು. ಆದರೆ ಆ ವೇಳೆಗಾಗಲೇ ಕನಿಷ್ಠ ೩೫ ಮಸೀದಿಗಳು ಮತ್ತು ನಿರಾಶ್ರಿತರಿಗಾಗಿ ನಿರ್ಮಿಸಲಾಗಿದ ೨೧ ಕಲಿಕಾ ಕೇಂದ್ರಗಳು ನಾಶವಾಗಿದೆ. ಕಳೆದ ತಿಂಗಳು ಬಿಡುಗಡೆಯಾದ ಬಾಂಗ್ಲಾದೇಶ ರಕ್ಷಣಾ ಸಚಿವಾಲಯದ ವರದಿಯ ಪ್ರಕಾರ, ಜನವರಿ ೨೦೨೧ ಮತ್ತು ಡಿಸೆಂಬರ್ ೨೦೨೨ ರ ನಡುವೆ, ರೋಹಿಂಗ್ಯಾ ಶಿಬಿರಗಳಲ್ಲಿ ೬೦ ಅಗ್ನಿಸ್ಪರ್ಶ ಪ್ರಕರಣಗಳು ಸೇರಿದಂತೆ ೨೨೨ ಬೆಂಕಿಯ ಘಟನೆಗಳು ನಡೆದಿವೆ. ಮಾರ್ಚ್ ೨೦೨೧ರಲ್ಲಿ ಇಲ್ಲಿನ ನಿರಾಶ್ರಿತರ ಶಿಬಿರದಲ್ಲಿ ನಡೆದ ಅಗ್ನಿ ಅವಘಡದಲ್ಲಿ ಕನಿಷ್ಠ ೧೫ ಜನರು ಸಾವನ್ನಪ್ಪಿದರು ಮತ್ತು ಸುಮಾರು ೫೦,೦೦೦ ನಾಗರಿಕರನ್ನು ಸ್ಥಳಾಂತರಗೊಳಿಸಲಾಗಿತ್ತು. ಮ್ಯಾನ್ಮಾರ್‌ನಲ್ಲಿ ಮಿಲಿಟರಿ ಆಡಳಿತದಲ್ಲಿ ರೋಹಿಂಗ್ಯಾ ಅಲ್ಪಸಂಖ್ಯಾತ ಜನಾಂಗೀಯರ ವಿರುದ್ಧ ದಾಳಿಗಳು ಹೆಚ್ಚಿದ್ದು, ಈ ಹಿನ್ನೆಲೆಯಲ್ಲಿ ಎಲ್ಲರೂ ಬಾಂಗ್ಲಾದೇಶದಲ್ಲಿ ಬಂದು ನಿರಾಶ್ರಿತರ ಶಿಬಿರದಲ್ಲಿ ನೆಲೆಸಿದ್ದಾರೆ. ಅದರಲ್ಲೂ ೨೦೧೭ರಲ್ಲಿ ರೋಹಿಂಗ್ಯಾ ದಂಗೆಕೋರರ ಗುಂಪು ಹಲವಾರು ಪೊಲೀಸ್ ಪೋಸ್ಟ್‌ಗಳ ಮೇಲೆ ನಡೆಸಿದ ದಾಳಿಗೆ ಪ್ರತಿಕಾರವಾಗಿ ಮ್ಯಾನ್ಮಾರ್‌ನ ಮಿಲಿಟರಿ ಆಡಳಿತ ಉಗ್ರವಾಗಿ ವರ್ತಿಸಿತ್ತು. ಈ ಹಿನ್ನೆಲೆಯಲ್ಲಿ ಭಾರೀ ಪ್ರಮಾಣದಲ್ಲಿ ಅಲ್ಲಿನ ನಾಗರಿಕರು ಬಾಂಗ್ಲಾದೇಶಕ್ಕೆ ಆಗಮಿಸಿದ್ದರು.
