ನಾಡಿಗೆ ಮಠ-ಮಾನ್ಯಗಳ ಕೊಡುಗೆ ಅಪಾರ : ಶಿವಾನಂದ ಶ್ರೀ

ಕಲಬುರಗಿ:ನ.29: ನಾಡಿನ ಮಠ-ಮಾನ್ಯಗಳು ಬಡ, ದುರ್ಬಲರ ಮಕ್ಕಳಿಗೆ ಉಚಿತ ಅಥವಾ ಅತ್ಯಂತ ಕಡಿಮೆ ಶುಲ್ಕದಲ್ಲಿ ಉತ್ತಮವಾದ ಶಿಕ್ಷಣವನ್ನು ನೀಡುತ್ತಿವೆ. ಅನ್ನ ದಾಸೋಹ, ಸಂಸ್ಕಾರ, ಮಾನವೀಯ ಮೌಲ್ಯಗಳನ್ನು ಬಿತ್ತುತ್ತಿವೆ. ಮಠದ ಸಂಸ್ಕøತಿಯಲ್ಲಿ ಓದಿದ ಅನೇಕ ಮಕ್ಕಳು ಇಂದು ಉನ್ನತವಾದ ಸಾಧನೆಯನ್ನು ಮಾಡಿ, ನಮ್ಮ ನಾಡಿನ ಕೀರ್ತಿಯನ್ನು ದೇಶ-ವಿದೇಶಗಳಲ್ಲಿ ಪಸರಿಸುವಂತೆ ಮಠ-ಮಾನ್ಯಗಳು ಮಾಡುವ ಮೂಲಕ ನಾಡಿಗೆ ಅಪಾರವಾದ ಕೊಡುಗೆಯನ್ನು ನೀಡಿವೆ ಮತ್ತು ಪ್ರಸ್ತುವಾಗಿ ನೀಡುತ್ತಿವೆ ಎಂದು ಮಕ್ತಂಪುರ ಗುರುಬಸವ ಮಠದ ಪರಮಪೂಜ್ಯ ಶಿವಾನಂದ ಸ್ವಾಮೀಜಿ ಹೇಳಿದರು.
ನಗರದ ಮಕ್ತಂಪುರನಲ್ಲಿರುವ ಮಠದ ಸಂಸ್ಥೆಯಡಿಯಲ್ಲಿನ ಅಣ್ಣಾರಾವ ಗಣಮುಖಿ ಪ್ರೌಢಶಾಲೆ ಮತ್ತು ಪಿಯು ಕಾಲೇಜಿನಲ್ಲಿ ‘ಬಸವೇಶ್ವರ ಸಮಾಜ ಸೇವಾ ಬಳಗ’ದ ವತಿಯಿಂದ ಸುವರ್ಣ ಕರ್ನಾಟಕ ರಾಜ್ಯೋತ್ಸವ ಪ್ರಯುಕ್ತ ಜರುಗುತ್ತಿರುವ ಸರಣಿ ಕಾರ್ಯಕ್ರಮ-21ರಲ್ಲಿ ಮಂಗಳವಾರ ಜರುಗಿದ ‘ನಾಡಿಗೆ ಮಠ-ಮಾನ್ಯಗಳು, ಶಿಕ್ಷಣ ಮತ್ತು ಧಾರ್ಮಿಕ ಸಂಸ್ಥೆಗಳ ಕೊಡುಗೆ’ ಎಂಬ ವಿಶೇಷ ಉಪನ್ಯಾಸ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಆಶೀರ್ವಚನ ನೀಡಿದರು.
ವಿಶೇಷ ಉಪನ್ಯಾಸ ನೀಡಿದ ಗುವಿವಿ ವಿಶ್ರಾಂತ ಪ್ರಾಧ್ಯಾಪಕ ಡಾ.ವಾಸುದೇವ ಸೇಡಂ ಎಚ್. ತುಮಕೂರಿನ ಸಿದ್ದಗಂಗಾ, ಚಿತ್ರದುರ್ಗಾ, ಧಾರವಾಡದ ಮುರಘಾಮಠ, ಮೈಸೂರಿನ ಸುತ್ತೂರು, ಕೊಪ್ಪಳದ ಗವಿಸಿದ್ದೇಶ್ವರ ಮಠ, ಗದಗಿನ ತೋಂಟದಾರ್ಯ ಮಠ, ಧರ್ಮಸ್ಥಳದ ಮಂಜುನಾಥೇಶ್ವರ ಶಿಕ್ಷಣ ಸಂಸ್ಥೆಗಳು, ಕಲಬುರಗಿಯ ಶರಣಬಸವೇಶ್ವರ ಸಂಸ್ಥಾನ, ನೂತನ ವಿದ್ಯಾಲಯ ಸಂಸ್ಥೆ, ಎಚ್.ಕೆ.ಇ. ಶಿಕ್ಷಣ ಸಂಸ್ಥೆ, ಮಕ್ತಂಪುರ ಗುರುಬಸವ ಮಠ, ಸುಲಫಲ ಮಠ, ಚೌದಾಪುರಿ ಮಠ ಹೀಗೆ ಮಠ-ಮಾನ್ಯಗಳು, ಶಿಕ್ಷಣ ಮತ್ತು ಧಾರ್ಮಿಕ ಸಂಸ್ಥೆಗಳ ಪಟ್ಟಿ ಬೆಲೆಯುತ್ತಲೇ ಹೋಗುತ್ತದೆ. ಇಂತಹ ಮುಂತಾದ ಸಂಸ್ಥೆಗಳು ನೂರಾರು ವರ್ಷಗಳಿಂದ ಸೇವೆ ಸಲ್ಲಿಸುತ್ತಿರುವುದರಿಂದಲೇ ನಮ್ಮ ನಾಡಿನಲ್ಲಿ ಇಂದು ಶೈಕ್ಷಣಿಕ ವಾತಾವರಣ ಉತ್ತಮವಾಗಿ ಬೆಳೆದಿದೆ ಎಂದು ವಿವರಿಸಿದರು.
ಇದೇ ಸಂದರ್ಭದಲ್ಲಿ ಜಿಲ್ಲಾ ವೀರಶೈವ-ಲಿಂಗಾಯತ ನೌಕರರ ಸಂಘದ ಅಧ್ಯಕ್ಷ ದೇವೇಂದ್ರಪ್ಪ ಗಣಮುಖಿ ಅವರು, ಮುಂಬರುವ ಎಸ್ಸೆಸ್ಸೆಲ್ಸಿ ಪರಿಕ್ಷೆಯಲ್ಲಿ ಹೆಚ್ಚಿನ ಅಂಕಗಳೊಂದಿಗೆ ತಲಾ ಮೂರು ಸ್ಥಾನಗಳನ್ನು ಪಡೆದು ಉತ್ತೀರ್ಣರಾಗುವ ವಿದ್ಯಾರ್ಥಿಗಳಿಗೆ ಪ್ರತಿಭಾ ಪುರಸ್ಕಾರ ನೀಡುತ್ತೇನೆ ಎಂದು ಘೋಷಿಸಿದರು.
ಕಾರ್ಯಕ್ರಮದಲ್ಲಿ ಬಳಗದ ಅಧ್ಯಕ್ಷ ಹಾಗೂ ಉಪನ್ಯಾಸಕ ಎಚ್.ಬಿ.ಪಾಟೀಲ, ಕಸಾಪ ಉತ್ತರ ವಲಯದ ಗೌರವ ಅಧ್ಯಕ್ಷ ಶಿವಯೋಗಪ್ಪ ಬಿರಾದಾರ, ಕಾಲೇಜಿನ ಪ್ರಾಚಾರ್ಯ ಶಿವರಾಜ ನಂದಗಾಂವ, ಉಪನ್ಯಾಸಕರಾದ ಶರಣಮ್ಮ ಸಿಂಗನಕಟ್ಟಿ, ವಿಜಕುಮಾರ ಶಿತಾಳೆ, ಮಲ್ಲಿಕಾರ್ಜುನ ಕಂಡಳ್ಳಿ, ನಿಂಬೆವ್ವ ಪಾಟೀಲ, ಪ್ರೌಢಶಾಲೆಯ ಮುಖ್ಯ ಶಿಕ್ಷಕಿ ಶ್ರೀಲೇಖಾ ರತ್ನಗಿರಿ, ಶಿಕ್ಷಕರಾದ ರಾಮಕಿಶನ್ ಪವಾರ, ಸಂತೋಷ ಗೌಡಗಾಂವ, ಜಗದೇವಿ ತಿಗಡಿ, ಗುಂಡಮ್ಮ ನಂದಗಾಂವ, ನೇತ್ರಾ ಮಠಪತಿ, ಸಮಾಜ ಸೇವಕ ಮಲ್ಲಿಕಾರ್ಜುನ ಕಾಕಂಡಕಿ ಹಾಗೂ ಕಾಲೇಜು, ಪ್ರೌಢಶಾಲೆಯ ವಿದ್ಯಾರ್ಥಿಗಳು ಭಾಗವಹಿಸದ್ದರು.