ದಾಸೋಹ, ಕಾಯಕ ಶರಣಬಸವರ ಮೂಲಮಂತ್ರಗಳು

ಕಲಬುರಗಿ:ಜು.29:ಮಹಾದಾಸೋಹಿ ಶರಣಬಸವರು ದಾಸೋಹ ಮತ್ತು ಕಾಯಕವನ್ನು ಮೈಗೂಡಿಸಿಕೊಂಡು ಈ ಲೋಕದ ಕಷ್ಟಗಳನ್ನು ದೂರಮಾಡುತ್ತಿದ್ದಾರೆ ಎಂದು ಶರಣಬಸವ ವಿಶ್ವವಿದ್ಯಾಲಯದ ಕುಲಪತಿ ಡಾ.ನಿರಂಜನ ನಿಷ್ಠಿ ಹೇಳಿದರು.

ಕಲಬುರಗಿಯ ಶರಣಬಸವೇಶ್ವರ ಸಂಸ್ಥಾನದ ಅಖಿಲ ಭಾರತ ಶಿವಾನುಭವ ಮಂಟಪದಲ್ಲಿ ಶ್ರಾವಣ ಮಾಸದ ಪ್ರಯುಕ್ತ ಹಮ್ಮಿಕೊಂಡಿರುವ 40 ದಿನಗಳ ಉಪನ್ಯಾಸ ಮಾಲಿಕೆಯಲ್ಲಿ ಗುರುವಾರ ಉಪನ್ಯಾಸ ನೀಡಿದರು. ಶರಣಬಸವರು ನಿರಂತರವಾಗಿ ದಾಸೋಹ ಮಾಡಿದವರು, ಅದರಂತೆ ಕಾಯಕವನ್ನೆ ನಂಬಿದ್ದರು. ಅದರಂತೆ ಪ್ರತಿಯೊಬ್ಬರು ಶುದ್ಧ ಮನಸ್ಸಿನ ಕಾಯಕ ಮತ್ತು ತಮಗೆ ಆದಷ್ಟು ದಾಸೋಹ ಮಾಡಬೇಕು. ಇಂತಹ ಒಂದು ಸಂಸ್ಕøತಿ ಬೆಳೆಸಿಕೊಳ್ಳಬೇಕು. ಶರಣಬಸವರು ಅನೇಕ ಪವಾಡಗಳನ್ನು ಅನೇಕರ ಜೀವನದಲ್ಲಿ ಮಾಡಿದ್ದಾರೆ. ಅನೇಕ ಕಷ್ಟಗಳನ್ನು ದೂರ ಮಾಡುತ್ತಿದ್ದಾರೆ. ತಮ್ಮಲ್ಲಿ ಬಂದವರನ್ನು ಎಂದು ಕೈಬಿಟ್ಟವರಲ್ಲ. ಶರಣಬಸವರು ಭೌತಿಕವಾಗಿ ಇಲ್ಲವಾದರೂ ಶಿವೈಕ್ಯರಾಗಿ, ಶಿವರೂಪರಾಗಿ, ಶಿವಚೈತನ್ಯದ ಸತ್ವವಾಗಿ ನಮ್ಮೆಲ್ಲರನ್ನು ಕಾಪಾಡುತ್ತಿದ್ದಾರೆ. ಪೂಜ್ಯ ಅಪ್ಪಾ ಅವರು ಶರಣಬಸವರಂತೆ ಅನೇಕ ಕಾರ್ಯಗಳನ್ನು ಮಾಡಿದ್ದಾರೆ, ಮಾಡುತ್ತಿದ್ದಾರೆ ಎಂದರು.

ಅರ್ಚನ, ಅರ್ಪಣ, ಅನುಭಾವ ಶರಣಪರಂಪರೆ

ಕಲಬುರಗಿ :ಶರಣಬಸವೇಶ್ವರ ಸಂಸ್ಥಾನದಲ್ಲಿ ಅರ್ಚನ, ಅರ್ಪಣ ಮತ್ತು ಅನುಭಾವ ನಿರಂತರವಾಗಿ ನಡೆಯುತ್ತಾ ಬಂದಿದೆ ಎಂದು ಸಾರಂಗಧರ ಶ್ರೀಶೈಲ ಹಾಗೂ ಸುಲಫಲಮಠ, ಶಹಾಬಜಾರದ ಪೂಜ್ಯ ಶ್ರೀ ಜಗದ್ಗುರು ಡಾ.ಸಾರಂಗಧರ ದೇಶಿಕೇಂದ್ರ ಮಹಾಸ್ವಾಮಿಗಳು ಹೇಳಿದರು.

ಶರಣಬಸವೇಶ್ವರ ಸಂಸ್ಥಾನದ ಅಖಿಲ ಭಾರತ ಶಿವಾನುಭವ ಮಂಟಪದಲ್ಲಿ ಮಹಾದಾಸೋಹಿ ಶರಣಬಸವರ 200ನೇ ವರ್ಷದ ಪುಣ್ಯಸ್ಮರಣೋತ್ಸವ ಹಾಗೂ ಶ್ರಾವಣ ಮಾಸದ 40 ದಿನಗಳ ಸಾಂಸ್ಕøತಿಕ ಕಾರ್ಯಕ್ರಮಗಳನ್ನು ಉದ್ಘಾಟಿಸಿ ಮಾತನಾಡಿದರು. ಶರಣಬಸವೇಶ್ವರರು ನಿರಂತರವಾಗಿ ಭಕ್ತರ ಕಷ್ಟ ಕಾರ್ಪಣ್ಯಗಳನ್ನು ತೊಲಗಿಸುತ್ತಿದ್ದಾರೆ. ಅದೇ ರೀತಿ ಪೂಜ್ಯ ಡಾ.ಅಪ್ಪಾ ಅವರು ಶರಣಬಸವೇಶ್ವರ ಪ್ರತಿರೂಪವಾಗಿದ್ದಾರೆ. 40 ದಿನಗಳವರೆಗೆ ಇಂತಹ ಕಾರ್ಯಕ್ರಮ ನಡೆಸುವುದು ಸುಲಭದ ಮಾತಲ್ಲ. ಶರಣಬಸವೇಶ್ವರ ಸಂಸ್ಥಾನದಲ್ಲಿ ಮಾತ್ರ ಸಾಧ್ಯ. ಮಹಾತ್ಮರು, ಶರಣರ, ಸಂತರ, ಅನುಭಾವಿ ಹತ್ತಿರ ಬಂದಾಗ ಸುಖ, ಶಾಂತಿ, ನೆಮ್ಮದಿ ದೊರಕುತ್ತದೆ ಎಂದರು.

ಕಾರ್ಯಕ್ರಮದ ಸಾನಿಧ್ಯವಹಿಸಿದ ಶರಣಬಸವೇಶ್ವರ ವಿದ್ಯಾವರ್ಧಕ ಸಂಘದ ಚೇರಪರ್ಸನ ರಾದ ಪೂಜ್ಯ ಡಾ.ದಾಕ್ಷಾಯಣಿ ಎಸ್.ಅಪ್ಪ ಅವರು ಮಾತನಾಡಿ ಒಂದು ತಿಂಗಳ ಪವಿತ್ರ ಶ್ರಾವಣ ಮಾಸ ಎಲ್ಲರನ್ನೂ ಧಾರ್ಮಿಕ ಭಾವನೆಯಲ್ಲಿ ತೊಡಗಿಸುತ್ತದೆ. ಶರಣರ ದರ್ಶನ ಪಡೆದು ಪುನೀತರಾಗಬೇಕು ಎಂದರು.

ಚೌದಾಪುರಿ ಹಿರೇಮಠ, ಬ್ರಹ್ಮಪುರದ ವೇದಮೂರ್ತಿ ಪೂಜ್ಯ ಶ್ರೀ ಷ.ಬ್ರ, ರಾಜಶೇಖರ ಶಿವಾಚಾರ್ಯರು ಮಾತನಾಡಿದರು. ಶರಣಬಸವ ವಿಶ್ವವಿದ್ಯಾಲಯದ ಕುಲಪತಿ ಡಾ.ನಿರಂಜನ ನಿಷ್ಠಿ ಉಪನ್ಯಾಸ ನೀಡಿದರು. ಶರಣಬಸವೇಶ್ವರ ಸಂಸ್ಥಾನದ ಪೀಠಾಧಿಪತಿ, ಅಖಿಲ ಭಾರತ ಶಿವಾನುಭವ ಮಂಟಪದ ಅಧ್ಯಕ್ಷರಾದ ಪೂಜ್ಯ ಡಾ.ಶರಣಬಸವಪ್ಪ ಅಪ್ಪ ಅವರ ದಿವ್ಯ ಸಾನಿಧ್ಯದಲ್ಲಿ ಕಾರ್ಯಕ್ರಮ ಜರುಗಿತು.

ವೇದಿಕೆ ಮೇಲೆ ಶರಣಬಸವೇಶ್ವರ ಸಂಸ್ಥಾನದ 9ನೇ ಪೀಠಾಧಿಪತಿ ಪೂಜ್ಯ ಚಿರಂಜೀವಿ ದೊಡ್ಡಪ್ಪ ಅಪ್ಪ, ಕು.ಶಿವಾನಿ ಎಸ್.ಅಪ್ಪ, ಕು.ಕೋಮಲ ಎಸ್.ಅಪ್ಪ, ಕು.ಮಹೇಶ್ವರಿ ಎಸ್.ಅಪ್ಪ, ಶರಣಬಸವೇಶ್ವರ ವಿದ್ಯಾವರ್ಧಕ ಸಂಘದ ಕಾರ್ಯದರ್ಶಿ ಬಸವರಾಜ ದೇಶಮುಖ, ಡಾ.ಉಮಾ ದೇಶಮುಖ ಮತ್ತಿತರರು ಇದ್ದರು.

ಡಾ.ಶಿವರಾಜ ಶಾಸ್ತ್ರಿ ಹೇರೂರು ಬರೆದ ದಾಸೋಹ ಪರಿಣಾಮಿ ಪರಮ ಪೂಜ್ಯ ದೊಡ್ಡಪ್ಪ ಅಪ್ಪನವರ ಜೀವನ ಚರಿತ್ರೆ ಪುಸ್ತಕ ಬಿಡುಗಡೆಯಾಯಿತು.

ಶರಣಬಸವ ವಿಶ್ವವಿದ್ಯಾಲಯದ ಕುಲಸಚಿವ ಡಾ.ಅನಿಲಕುಮಾರ ಬಿಡವೆ, ಡಾ.ವಾಣಿಶ್ರೀ ಸಿ.ಟಿ. ಡಾ.ನೀಲಾಂಬಿಕಾ ಶೇರಿಕಾರ, ಡಾ.ಎಂ.ಆರ್.ಹುಗ್ಗಿ ಸಂಸ್ಥೆಯ ಎಲ್ಲಾ ಶಾಲಾ, ಕಾಲೇಜುಗಳು ಮುಖ್ಯಸ್ಥರು, ಸಿಬ್ಬಂದಿಯವರು ಉಪಸ್ಥತಿರಿದ್ದರು.

ಗೋದುತಾಯಿ ದೊಡ್ಡಪ್ಪ ಅಪ್ಪ ಕಲಾ ಮತ್ತು ವಾಣಿಜ್ಯ ಮಹಿಳಾ ಮಹಾವಿದ್ಯಾಲಯದ ವಿದ್ಯಾರ್ಥಿನಿಯರಿಂದ ಡೊಳ್ಳು ಮತ್ತು ಬ್ಯಾಂಡ್ ವಂದನೆ ನಡೆಯಿತು.

ಪ್ರೊ. ವೆಂಕಣ್ಣ ಡೊಣ್ಣೆಗೌಡರ ನಿರೂಪಿಸಿದರು, ಶ್ರೀಮತಿ ಶರಣಮ್ಮ ವಾರದ ವಂದಿಸಿದರು.


ಶರಣಬಸವರು ವಿಭೂತಿಯಿಂದ ಕಷ್ಟಗಳನ್ನು ಹೋಗಲಾಡಿಸಿದವರು
ಕಲಬುರಗಿ:ಮಹಾದಾಸೋಹಿ ಶರಣಬಸವರು ವಿಭೂತಿಯಂದ ಅನೇಕ ಕಷ್ಟಗಳನ್ನು ಹೋಗಲಾಡಿಸಿ ಲೀಲೆಗೈದಿದ್ದಾರೆ ಎಂದು ಶರಣಬಸವೇಶ್ವರ ಕಲಾ, ವಾಣಿಜ್ಯ ಮತ್ತು ವಿಜ್ಞಾನ ಪದವಿ ಪೂರ್ವ ಮಹಾವಿದ್ಯಾಲಯದ ಸಹ ಪ್ರಾಧ್ಯಾಪಕಿ ಡಾ.ಮರಿಯಮ್ಮ ಎಸ್. ಹೇಳಿದರು.

ಕಲಬುರಗಿಯ ಶರಣಬಸವೇಶ್ವರ ಸಂಸ್ಥಾನದ ಅಖಿಲ ಭಾರತ ಶಿವಾನುಭವ ಮಂಟಪದಲ್ಲಿ ಶ್ರಾವಣ ಮಾಸದ ಪ್ರಯುಕ್ತ ಹಮ್ಮಿಕೊಂಡಿರುವ 40 ದಿನಗಳ ಉಪನ್ಯಾಸ ಮಾಲಿಕೆಯಲ್ಲಿ ಮಂಗಳವಾರ ‘ಮಹಾದಾಸೋಹಿ ಶರಣಬಸವರ ಶಿವಲೀಲೆಗಳ’ ಕುರಿತು ಉಪನ್ಯಾಸ ನೀಡಿದರು.

ಶರಣಬಸವೇಶ್ವರ ಸಂಸ್ಥಾನದಲ್ಲಿ ಇಂದಿಗೂ ವಿಭೂತಿಗೆ ಪ್ರಥಮ ಆದ್ಯತೆ. ಬಂದ ಭಕ್ತರಿಗೆಲ್ಲ ವಿಭೂತಿ ಕೊಡುವ ಪರಿಪಾಠವಿದೆ. ಆ ವಿಭೂತಿಯಿಂದ ತಮಗೆ ಒಳ್ಳೆಯದಾಗುತ್ತದೆಂಬ ಭಾವನೆ ಭಕ್ತ ಸಮೂಹದಲ್ಲಿದೆ. ಚೆನ್ನಪ್ಪನೆಂಬುವನು ಶರಣರಲ್ಲಿಗೆ ಬಂದು ಅವರ ದರ್ಶನ ಮಾಡಿದಾಗ ವಿಭೂತಿಯ ಉಂಡಿಯೊಂದು ಆತನಿಗೆ ಕೊಡುತ್ತಾರೆ. ತಿಳಿಯದೆ ಅದನ್ನು ಹೊರಗೆ ಕಟ್ಟಿಯ ಬುಡಕ್ಕೆ ಇಟ್ಟು ಬಂದು ಪ್ರಸಾದ ಪಡೆಯಬೇಕೆಂದು ಪಂಕ್ತಿಯಲ್ಲಿ ಕೂಡಬೇಕೆನ್ನುತ್ತಾನೆ. ಅಷ್ಟರಲ್ಲಿ ಕೈಕಾಲು ಬಾಯಿಯೆಲ್ಲ ವಂಕಾಗಿ ನೆಲಕ್ಕೆ ಬೀಳುತ್ತಾನೆ. ಸುದ್ದಿ ತಿಳಿದ ಶರಣರು ತಾವೇ ಅಲ್ಲಿಗೆ ಬಂದು ವಿಭೂತಿ ಎಲ್ಲಿದೆ ಎಂದು ಕೇಳುತ್ತಾರೆ. ಆಗ ಆತ ಹೊರಗೆ ಕೈ ಮಾಡಿ ತೋರಿಸುತ್ತಾನೆ. ಹಾಗೆ ಎತ್ತಿಕೊಂಡು ಇಟ್ಟ ಸ್ಥಳಕ್ಕೆ ತರುತ್ತಾರೆ. ಅದರ ಸಮೀಪದಲ್ಲಿ ನಾಗರಹಾವೊಂದು ಕುಳಿತಿರುತ್ತದೆ. ಅದು ಯಾರಿಗೂ ವಿಭೂತಿಯ ಸಮೀಪ ಬರುಗೊಡುತ್ತಿಲ್ಲ. ಶರಣರು ಕುಳಿತಲ್ಲಿಂದಲೇ ಕೈಯೆತ್ತಿದಾಗ ಸರ್ಪ ಸರಿದು ಹೋಗುತ್ತದೆ. ಅಲ್ಲಿ ಬಿದ್ದ ಭಸ್ಮವನ್ನು ಅವನ ಕೈಯೊಳಗಿಡುತ್ತಾರೆ. ತಕ್ಷಣವೇ ಎದ್ದು ಕೂಡುತ್ತಾನೆ.

ಕೈಕಾಲು ಮೊಂಡಾಗಿದ್ದ ವ್ಯಕ್ತಿಯೊಬ್ಬ ಶರಣರ ನಾಮ ಜಪಿಸುತ್ತಾ ಮಹಾಮನೆ ಕಡೆಗೆ ಹೊರಟ. ಜನ ಅವನನ್ನು ನೋಡಿ ಬಯ್ಯತೊಡಗಿದರು ಆದರೂ ‘ ಯಪ್ಪಾ ಶರಣಾ’ ಎನ್ನುತ್ತಾ ಆತ ಕೈಕಾಲು ಎಳೆಯುತ್ತಾ ಹೊರಟ. ಮಹಾಮನೆಯ ದ್ವಾರಕ್ಕೆ ಬಂದು ಜೋರಾಗಿ ಧ್ವನಿ ತೆಗೆದು ಅಳಲು ಪ್ರಾರಂಭಿಸಿದ. ಶರಣರ ಬಂದು ಜನರಿಗೆ ‘ ಆತ ಕಲ್ಲಲ್ಲ, ಕಸವಲ್ಲ, ಮನುಷ್ಯನಿದ್ದಾನೆ ಒಳಗಿನ ಕಣ್ಣಿನಿಂದ ನೋಡಿರಪ್ಪಾ’ ಎನ್ನುತ್ತಾ ಹಾಗೆ ಬಂದು ಆತನ ಮೈಗೆ ತಮ್ಮ ಕೈಯಾರೆ ಭಸ್ಮವನ್ನು ಹಚ್ಚುತ್ತಾರೆ. ಅವನು ಸರಿಯಾಗುತ್ತಾನೆ. ಜನರೆಲ್ಲ ‘ ನೀನು ದೇವರಪ್ಪಾ, ನಿನಗಿಂತ ಬೇರೆ ದೇವರು ಬೇಕೆ’ ಎಂದು ಬಾಗಿ ನಮಸ್ಕರಿಸುತ್ತಾರೆ.

ಒಂದು ಸಲ ಮಾರಿ ಮಹಾರೋಗ ಊರೆಲ್ಲ ಹಬ್ಬಿದಾಗ ಅದರ ಶಮನಕ್ಕೆ ಜನರು ಮಾರಿ ಮುಂದೆ ಕುರಿ, ಕೋಳಿ ಬಲಿಕೊಡಬೇಕೆಂದು ಸಿದ್ದರಾಗುತ್ತಾರೆ. ಶರಣರಿಗೆ ಈ ವಿಷಯ ತಿಳಿದು ಅದನ್ನು ತಡೆಯಲು ಹೊರಟರು. ಕುರಿಯನ್ನು ಕಡಿಯಬೇಕೆನ್ನುವಷ್ಟರಲ್ಲಿಯೇ ಕುರಿ ಚೀರಲು ಪ್ರಾರಂಭಿಸುತ್ತದೆ. ಕುಳಿತಲ್ಲಿಯೇ ಶರಣರು ತಮ್ಮ ಕೈಗಳನ್ನು ಎತ್ತಲು ಆ ಕುರಿ ಬಿಡಿಸಿಕೊಂಡು ಓಡತೊಡಗಿತ್ತದೆ. ಅದು ಶರಣರಲ್ಲಿ ಬಂದು ಅವಿತು ನಿಂತುಕೊಳ್ಳುತ್ತದೆ. ಕಡಿಯಬೇಕೆನ್ನುವವನ ಕೈ ಹಾಗೆಯೇ ಮೇಲಕ್ಕೆ ನಿಂತಿದೆ. ಶರಣರು ಭಸ್ಮಕೊಟ್ಟು ಊರಿನ ಆಗಸಿ ಬಾಗಿಲಿಗೆ ಹಚ್ಚಿರಿ ಎಂದು ಹೇಳಿದಾಗ ಮಾರಿಬೇನೆ ಊರಿಂದ ಪಲಾಯನಗೊಳ್ಳುತ್ತದೆ.

ಒಬ್ಬ ಸಾಹುಕಾರನಿಗೆ ಸಾಹುಕಾರಕೀಯ ಅಮಲು ನೆತ್ತಿಗೇರಿತು. ಶರಣಬಸವರ ಕಾರ್ಯಗಳನ್ನು ಪ್ರಶ್ನಿಸುವಷ್ಟು ಅವನ ಸೊಕ್ಕು ಹೆಚ್ಚಾಗತೊಡಗಿತು. ಬರುಬರುತ್ತಾ ಸಾಹುಕಾರ ಎಲ್ಲವನ್ನು ಕಳೆದುಕೊಂಡು ನಿರ್ಗತಿಕನಾದ. ಈತ ಮಾಡಿದ ಪಾಪ ಮಕ್ಕಳಿಗೂ ತಗಲಿ ಎಲ್ಲರೂ ಭಿಕ್ಷೆ ಬೇಡುವ ಪಾಳಿ ಬಂದಿತು. ಗಂಜಿ ಗತಿಯಿಲ್ಲದೆ ಮರಮರನೆ ಮರಗುತ್ತಿರುವ ಸಾಹುಕಾರ ನೇರವಾಗಿ ಕಲಬುರಗಿಗೆ ಬಂದು ಶರಣರ ಪಾದವಿಡಿಯುತ್ತಾನೆ. ಶರಣರು ಭಸ್ಮವನ್ನು ಆತನ ಹಣೆಗಚ್ಚಿ ‘ ಇದ್ದಾಗ ಕರೆದು ದಾಸೋಹ ಮಾಡಪ್ಪಾ’ ಎಂದು ಉಪದೇಶ ಮಾಡಿ ಕಳುಹಿಸುತ್ತಾರೆ. ಮುಂದೆ ಕಳೆದುಕೊಂಡಷ್ಟು ಪಡೆಯುತ್ತಾನೆ. ತಪ್ಪಿಯೂ ಅಹಂಕಾರ ಪಡದೆ ಕೊಟ್ಟುಂಡು ಬದುಕುತ್ತಾನೆ. ಹೀಗೆ ಶರಣರ ಲೀಲೆಗಳು ಎಷ್ಟು ಹೇಳಿದರೂ ಕಡಿಮೆ ಎಂದು ಹೇಳಿದರು.