ತೈವಾನ್ ಪ್ರವೇಶಿಸಿದ ಚೀನಾ ವಿಮಾನ

ತೈಪೆ, (ತೈವಾನ್), ಆ.೩- ಅಮೆರಿಕಾದ ಸ್ಪೀಕರ್ ನ್ಯಾನ್ಸಿ ಪೆಲೋಸಿ ತೈವಾನ್‌ಗೆ ಭೇಟಿ ಆರಂಭಿಸಿದ್ದ ಬೆನ್ನಲ್ಲೇ ಚೀನಾ ಸೇನೆಯ ೨೧ ಯುದ್ಧ ವಿಮಾನಗಳು ತೈವಾನ್‌ನ ವಾಯು ರಕ್ಷಣಾ ವಲಯವನ್ನು ಪ್ರವೇಶಿಸಿರುವುದು ಇದೀಗ ಬಯಲಾಗಿದೆ. ಆದರೆ ಚೀನಾದ ಈ ರೀತಿಯ ಬೆದರಿಕೆ ಕ್ರಮವು ಪೊಲೋಸಿಯವರನ್ನು ತೈವಾನ್‌ಗೆ ಭೇಟಿ ನೀಡದಂತೆ ಮಾಡಲು ಸಾಧ್ಯವಾಗಿಲ್ಲ.
೨೧ ಪಿಎಲ್‌ಎ ವಿಮಾನಗಳು ಆಗಸ್ಟ್ ೨ರಂದು ತೈವಾನ್‌ನ ನೈರುತ್ಯ ಎಡಿಝ್ ಪ್ರದೇಶವನ್ನು ಪ್ರವೇಶಿಸಿತ್ತು ಎಂದು ತೈವಾನ್‌ನ ರಕ್ಷಣಾ ಸಚಿವಾಲಯ ಟ್ವೀಟ್ ಮಾಡಿದೆ. ಇನ್ನು ಇದಕ್ಕೆ ಪ್ರತಿಯಾಗಿ ತೈವಾನ್ ತನ್ನ ಗಸ್ತು ವಿಮಾನಗಳ ಹಾರಾಟವನ್ನು ಮತ್ತಷ್ಟು ಚುರುಕುಗೊಳಿಸಿದ್ದು, ರೇಡಿಯೋ ತರಂಗಗಳ ಎಚ್ಚರಿಕೆಯನ್ನು ಕೂಡ ನೀಡಿದೆ. ಅಲ್ಲದೆ ಚೀನಾದ ಮಿಲಿಟರಿ ವಿಮಾನಗಳನ್ನು ಪತ್ತೆಹಚ್ಚಲು ರಕ್ಷಣಾ ಕ್ಷಿಪಣಿ ವ್ಯವಸ್ಥೆಗಳನ್ನು ತೈವಾನ್ ಸ್ಥಳದಲ್ಲಿ ನಿಯೋಜಿಸಿತು. ಎಡಿಝ್ ತೈವಾನ್‌ನ ಗಡಿಯೊಳಗಿರುವ ವಾಯುಪ್ರದೇಶವಲ್ಲದಿದ್ದರೂ, ಚೀನಾದ ಸ್ವಂತ ವಾಯುರಕ್ಷಣಾ ಗುರುತಿಸುವಿಕೆ ವಲಯದಿಂದ ದೂರ ಪ್ರದೇಶಗಳೂ ಇದಕ್ಕೆ ಸೇರುತ್ತವೆ. ಕೆಲ ಭಾಗ ದೇಶದ ವಾಯುಪ್ರದೇಶಕ್ಕೂ ಸೇರುತ್ತದೆ. ೮೨ರ ಹರೆಯದ ಸಂಸದೆ, ಅಮೆರಿಕದ ಸೇನಾ ವಿಮಾನದಲ್ಲಿ ದ್ವೀಪರಾಷ್ಟ್ರಕ್ಕೆ ತೆರಳಿರುವ ದೃಶ್ಯಗಳನ್ನು ದೃಶ್ಯಮಾಧ್ಯಮಗಳು ಪ್ರಸಾರ ಮಾಡಿವೆ.