ಜನಸಾಮಾನ್ಯರಿಗೆ ಕಾನೂನಿನ ತಿಳವಳಿಕೆ ಅಗತ್ಯ

ಕಲಬುರಗಿ.ನ.09:ದೇಶದಲ್ಲಿರುವ ಪ್ರತಿಯೊಬ್ಬ ನಾಗರಿಕನು ತನ್ನ ಹಕ್ಕುಗಳು, ಕರ್ತವ್ಯಗಳು, ಆಡಳಿತ ಸೇರಿದಂತೆ ತಮ್ಮ ದೈನಂದಿನ ಸುಗಮ ಬದುಕಿಗೆ ಬೇಕಾದ ಕನಿಷ್ಠ ಕಾನೂನಿನ ಜ್ಞಾನವನ್ನು ಹೊಂದಿರಬೇಕು. ಇದರಿಂದ ಸಮಾಜದಲ್ಲಾಗುವ ಅಪರಾದಗಳ ಸಂಖ್ಯೆ ಕಡಿಮೆಯಾಗಿ ಸದೃಢ ರಾಷ್ಟ್ರ ನಿರ್ಮಾಣವಾಗಲು ಸಾಧ್ಯವಿದೆ ಎಂದು ಪ್ರಭಾರಿ ಪ್ರಧಾನ ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶ ನ್ಯಾ.ಜಗದೀಶ ವಿ.ಎನ್ ಆಶಯ ವ್ಯಕ್ತಪಡಿಸಿದರು.
ನಗರದ ಜಿಲ್ಲಾ ನ್ಯಾಯಾಲಯದ ಆವರಣದಲ್ಲಿರುವ ‘ಜಿಲ್ಲಾ ಕಾನೂನು ಸೇವೆಗಳ ಪ್ರಾಧಿಕಾರ’ ಕಚೇರಿಯಲ್ಲಿ ‘ಬಸವೇಶ್ವರ ಸಮಾಜ ಸೇವಾ ಬಳಗ’ ಮತ್ತು ‘ಸುಜಯ್ ಶಿಕ್ಷಣ ಮತ್ತು ಕಲ್ಯಾಣ ಸಂಸ್ಥೆ’ ಇವುಗಳ ವತಿಯಿಂದ ಮಂಗಳವಾರ ಹಮ್ಮಿಕೊಳ್ಳಲಾಗಿದ್ದ ‘ಕಾನೂನು ಸೇವೆಗಳ ದಿನಾಚರಣೆ’ಯ ಕಾರ್ಯಕ್ರಮದಲ್ಲಿ ಸತ್ಕಾರವನ್ನು ಸ್ವೀಕರಿಸಿ ಅವರು ಮಾತನಾಡುತ್ತಿದ್ದರು.
ಕಾನೂನು ಸೇವೆಗಳ ಅಡಿಯಲ್ಲಿ ನಿರ್ಗತಿಕ ಮಹಿಳೆಯರು, ಮಕ್ಕಳು, ವಿದ್ಯಾರ್ಥಿಗಳು, ಹಿಂದುಳಿದ ವರ್ಗದವರಿಗೆ ನ್ಯಾಯವನ್ನು ಒದಗಿಸಿಕೊಡುವ ಕಾರ್ಯ ನಿರಂತರವಾಗಿ ಜರುಗುತ್ತಿದೆ. ಇದಕ್ಕಾಗಿ ‘ಕಾನೂನು ಸೇವೆಗಳ ಪ್ರಾಧಿಕಾರ’ ಘಟಕವನ್ನು ರಚಿಸಿ ಎಲ್ಲೆಡೆ ಕಾನೂನಿನ ಅರಿವು, ನೆರವು ನೀಡಲಾಗುತ್ತಿದೆ. ‘ಉಚಿತ ಕಾನೂನು ಸಲಹಾ ಕೇಂದ್ರ’ಗಳನ್ನು ಸ್ಥಾಪಿಸಲಾಗಿದೆ ಎಂದು ನುಡಿದರು.
ಜಿಲ್ಲಾ ಕಾನೂನು ಸೇವೆಗಳ ಪ್ರಾಧಿಕಾರದ ಸದಸ್ಯ ಕಾರ್ಯದರ್ಶಿ ಸುಶಾಂತ ಮಹಾವೀರ ಚೌಗಲೆ ಮಾತನಾಡಿ, ಸಮಾಜದಲ್ಲಿರುವ ಅಶಕ್ತ ವರ್ಗದವರಿಗೆ ಉಚಿತ ಕಾನೂನು ದೊರೆಯಬೇಕೆಂಬ ಉದ್ದೇಶದಿಂದ ‘ಕಾನೂನು ಸೇವೆಗಳ ಕಾಯ್ದೆ-1987’ರಲ್ಲಿ ರಚಿಸಿ, ನವ್ಹೆಂಬರ್-9, 1995 ರಲ್ಲಿ ಅದನ್ನು ಜಾರಿಗೊಳಿಸಲಾಯಿತು. ಈ ಕಾಯ್ದೆಯಡಿ ತಾಲೂಕಾ, ಜಿಲ್ಲಾ, ರಾಜ್ಯ ಮತ್ತು ರಾಷ್ಟ್ರ ಮಟ್ಟದಲ್ಲಿ ಲೋಕ ಅದಾಲತ್‍ಗಳನ್ನು ನಡೆಸಿ ಜನಸಾಮಾನ್ಯರಿಗೆ ಉಚಿತ ಮತ್ತು ಶೀಘ್ರ ನ್ಯಾಯವನ್ನು ದೊರೆಯುವಂತೆ ಮಾಡಲಾಗುತ್ತಿದ್ದು, ಅದರ ಸದುಪಯೋಗವನ್ನು ಪಡೆಸಿಕೊಳ್ಳಬೇಕು ಎಂದರು.
ಬಳಗದ ಗೌರವ ಗೌರವ ಸಲಹೆಗಾರ ಸುನೀಲಕುಮಾರ ವಂಟಿ ಮಾತನಾಡಿ, ಪ್ರತಿಯೊಬ್ಬರೂ ಕಾನೂನಿನ ಬಗ್ಗೆ ನಿರ್ಲಕ್ಷ ವಹಿಸಿ ಬೇಜವಬ್ದಾರಿ ತೋರಿಸದೇ, ಅದರ ಅರಿವನ್ನು ಮೂಡಿಸಿಕೊಂಡರೆ ಸಮಾಜದಲ್ಲಿ ಶಾಂತಿ, ನೆಮ್ಮದಿ, ಶಿಸ್ತು ಬೆಳವಣಿಗೆಯಾಗಲು ಸಾಧ್ಯವಿದೆ. ಕಾನೂನುಗಳು ವ್ಯಕ್ತಿ ಹಾಗೂ ದೇಶವನ್ನು ರಕ್ಷಿಸುತ್ತವೆ ಎಂದರು.
ಕಾರ್ಯಕ್ರಮದಲ್ಲಿ ಜಿಲ್ಲಾ ನ್ಯಾಯವಾದಿಗಳ ಸಂಘದ ಕಾರ್ಯದರ್ಶಿ ಪಿ.ಎನ್.ಕಪನೂರ, ಬಳಗದ ಅಧ್ಯಕ್ಷ ಎಚ್.ಬಿ.ಪಾಟೀಲ, ನ್ಯಾಯವಾದಿಗಳಾದ ವಿಶ್ವನಾಥ ಹೊನ್ನಳ್ಳಿ, ಶಿವಕುಮಾರ ಬಿದರಿ, ವಿನೋದಕುಮಾರ ಜೇನವೇರಿ, ಧೂಳಪ್ಪ ದ್ಯಾಮನಕರ್, ಲಕ್ಷ್ಮೀಕಾಂತ ವಾಗೆ, ಹಣಮಂತರಾಯ ಎಸ್.ಅಟ್ಟೂರ್, ಜ್ಯೋತಿ ಎಸ್.ಶೆಟ್ಟಿ, ಪ್ರಮುಖರಾದ ಆರ್.ಜಿ.ಶೆಟಗಾರ, ಬಸಯ್ಯಸ್ವಾಮಿ ಹೊದಲೂರ, ದೇವೇಂದ್ರಪ್ಪ ಗಣಮುಖಿ, ಬಾಬುರಾವ ಗಾಯಕವಾಡ, ರಾಮಚಂದ್ರ ತಿರಲಾಪೂರ್, ಸುಮಿತ್ರಾ ಗಾಯಕವಾಡ ಸೇರಿದಂತೆ ಮತ್ತಿತರರು ಭಾಗವಹಿಸಿದ್ದರು.