ಹ್ಯಾಂಬರ್ಗ್ (ಜರ್ಮನಿ), ಮಾ.೧೦- ಇಲ್ಲಿನ ಯೆಹೋವನ ವಿಥ್‌ನೆಸ್ ಸೆಂಟರ್‌ನಲ್ಲಿ ನಡೆದ ಗುಂಡಿನ ದಾಳಿಯಲ್ಲಿ ಕನಿಷ್ಠ ಏಳು ಮಂದಿ ಮೃತಪಟ್ಟು, ಎಂಟು ನಾಗರಿಕರು ಗಂಭೀರ ರೀತಿಯಲ್ಲಿ ಗಾಯಗೊಂಡ ಘಟನೆ ನಡೆದಿದೆ. ಘಟನೆಯಲ್ಲಿ ಗುಂಡಿನ ದಾಳಿ ನಡೆಸಿದ ವ್ಯಕ್ತಿ ಕೂಡಾ ಮೃತಪಟ್ಟಿದ್ದಾನೆ ಎಂದು ಜರ್ಮನ್ ಪೊಲೀಸರು ತಿಳಿಸಿದ್ದಾರೆ.
ಗುಂಡಿನ ದಾಳಿಯಲ್ಲಿ ನಿಖರವಾಗಿ ಸಾವಿನ ಸಂಖ್ಯೆಯನ್ನು ಪೊಲೀಸರು ಪ್ರಕಟಿಸಿಲ್ಲ. ಆದರೆ ಜರ್ಮನ್ ಮಾಧ್ಯಮಗಳ ಪ್ರಕಾರ ಕನಿಷ್ಠ ೭ ಮಂದಿ ಮೃತಪಟ್ಟಿದ್ದಾರೆ ಸ್ಥಳಕ್ಕೆ ಮೊದಲು ಭೇಟಿ ನೀಡಿದ ಪೊಲೀಸ್ ಅಧಿಕಾರಿಯ ಪ್ರಕಾರ, ಹಲವು ಜೀವರಹಿತ ದೇಹಗಳು ಮತ್ತು ಗಂಭೀರವಾಗಿ ಗಾಯಗೊಂಡ ಜನ ಪತ್ತೆಯಾಗಿದ್ದಾರೆ. ಕರೆ ಬಂದ ಕಟ್ಟಡದ ಮೇಲ್ಭಾಗದಲ್ಲೂ ಗುಂಡಿನ ದಾಳಿಯ ಸದ್ದು ಕೇಳಿಸಿದೆ ಎಂದು ಪೊಲೀಸರು ಸ್ಪಷ್ಟಪಡಿಸಿದ್ದಾರೆ. ದಾಳಿಕೋರ ತಪ್ಪಿಸಿಕೊಂಡು ಹೋದ ಬಗ್ಗೆ ಯಾವುದೇ ಸುಳಿವು ಇಲ್ಲ ಎಂದು ವಿವರಿಸಿದ್ದಾರೆ. ಸ್ಥಳೀಯ ದಿನಪತ್ರಿಕೆ ಹ್ಯಾಂಬರ್ಗರ್ ಅಬೆಂಡ್‌ಬ್ಲಾಟ್‌ನ ಪ್ರಕಾರ ಯೆಹೋವನ ಸಾಕ್ಷಿ ಕೇಂದ್ರದಲ್ಲಿ ಜನರು ಸಾಪ್ತಾಹಿಕ ಬೈಬಲ್ ಅಧ್ಯಯನ ಕೂಟಕ್ಕಾಗಿ ಒಟ್ಟುಗೂಡಿದ್ದರು. ಈ ವೇಳೆ ಗುಂಡಿನ ದಾಳಿ ನಡೆಸಲಾಗಿದೆ. ಸದ್ಯ ದಾಳಿಕೋರ ಕೂಡ ಮೃತಪಟ್ಟಿದ್ದಾನೆ.
ಉತ್ತರ ಹ್ಯಾಂಬರ್ಗ್‌ನ ಕಟ್ಟಡದಲ್ಲಿ ಗುಂಡಿನ ದಾಳಿ ನಡೆದ ಬಗ್ಗೆ ರಾತ್ರಿ ೮.೧೫ಕ್ಕೆ ಮೊದಲ ತುರ್ತು ಕರೆ ಬಂದಿತ್ತು ಎಂದು ಪೊಲೀಸ್ ವಕ್ತಾರರು ಹೇಳಿದ್ದಾರೆ. “ಹಲವು ಮಂದಿ ಗಾಯಗೊಂಡಿದ್ದು, ಕೆಲವರಿಗೆ ಮಾರಣಾಂತಿಕ ಗಾಯಗಳಾಗಿವೆ” ಎಂದು ಪೊಲೀಸರು ಟ್ವೀಟ್ ಮಾಡಿದ್ದಾರೆ. “ಸದ್ಯಕ್ಕೆ ದಾಳಿಯ ಉದ್ದೇಶದ ಬಗ್ಗೆ ಯಾವುದೇ ವಿಶ್ವಾಸಾರ್ಹ ಮಾಹಿತಿ ಇಲ್ಲ” ಎಂದು ಸ್ಪಷ್ಟಪಡಿಸಿದ್ದಾರೆ. ಜನತೆ ಯಾವುದೇ ವದಂತಿಗಳಿಗೆ ಕಿವಿ ಕೊಡಬಾರದು ಎಂದು ವಕ್ತಾರರು ಮನವಿ ಮಾಡಿದ್ದಾರೆ. ಪೊಲೀಸರು ಕೆಟಸ್ಟೋಪ್ ವಾರ್ನಿಂಗ್ ಆ?ಯಪ್ ಮೂಲಕ ಭಾರಿ ಅಪಾಯದ ಎಚ್ಚರಿಕೆ ನೀಡಿದ್ದಾರೆ. ನಿವಾಸಿಗಳು ಮನೆಗಳಲ್ಲೇ ಉಳಿಯಬೇಕು ಹಾಗೂ ಆ ಪ್ರದೇಶದಲ್ಲಿ ಸಂಚರಿಸಬಾರದು ಎಂದು ಸಲಹೆ ಮಾಡಿದ್ದಾರೆ. ಆ ಬೀದಿಯ ಸುತ್ತಮುತ್ತಲ ಎಲ್ಲ ಕಟ್ಟಡಗಳಿಗೆ ಪೊಲೀಸ್ ಪಹರೆ ಹಾಕಲಾಗಿದೆ.
