ನವದೆಹಲಿ, ಜು.೧೩-ಭಾರತದ ಬಹುನಿರೀಕ್ಷಿತ ಬಾಹ್ಯಾಕಾಶ ಯೋಜನೆ ಚಂದ್ರಯಾನ-೩ರ ಉಡಾವಣೆಗೆ ದಿನಗಣನೆ ಆರಂಭವಾಗಿದ್ದು, ನಾಳೆ ಅಂದರೆ ಜುಲೈ ೧೪ರ ಶುಕ್ರವಾರದಂದು ಶ್ರೀಹರಿಕೋಟದಿಂದ ಬಾಹ್ಯಾಕಾಶ ನೌಕೆ ನಭಕ್ಕೆ ಹಾರಲಿದೆ.
ನಾಳೆ ಮಧ್ಯಾಹ್ನ ೨.೩೫ಕ್ಕೆ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ ಬಾಹ್ಯಾಕಾಶ ನೌಕೆ ಉಡಾವಣೆಗೊಳ್ಳಲಿದ್ದು, ಫ್ಯಾಟ್ ಬಾಯ್’ ಎಂದು ಕರೆಯಲ್ಪಡುವ ಎಲ್‌ವಿಎಂ೩- ಎಂ೪ ರಾಕೆಟ್ ಉಪಗ್ರಹವನ್ನು ಹೊತ್ತೂಯ್ಯಲಿದೆ.ಈ ಕುರಿತು ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ಮಾಹಿತಿ ನೀಡಿದ್ದು, ಇದು ಸತತ ೬ ಯಶಸ್ವಿ ಕಾರ್ಯಾಚರಣೆಗಳನ್ನು ಪೂರೈಸಿದೆ. ಜಿಯೋ ಟ್ರಾನ್ಸ್‌ಫರ್ ಆರ್ಬಿಟ್( ಜಿಟಿಒ)ಗೆ ಬಾಹ್ಯಾಕಾಶ ನೌಕೆಯನ್ನು ಉಡಾವಣೆಗೊಳಿಸಲು ಉದ್ದೇಶಿಸಿರುವ, ಎಲ್‌ವಿಎಂ೩- ಎಂ೪ ನಡೆಸುತ್ತಿರುವ ೪ನೇ ಕಾರ್ಯಾಚರಣೆ ಇದಾಗಿದೆ.ಹಾಗೇ, ಚಂದ್ರಯಾನ -೩ರ ಬಾಹ್ಯಾಕಾಶ ನೌಕೆಯನ್ನು ಯಶಸ್ವಿಯಾಗಿ ಕಕ್ಷೆಗೆ ಸೇರ್ಪಡೆಗೊಳಿಸಲಿದೆ ಎಂದು ಇಸ್ರೋ ವಿಶ್ವಾಸ ವ್ಯಕ್ತಪಡಿಸಿದೆ.ಈಗಾಗಲೇ ಉಡಾವಣಾ ಪೂರ್ವಾಭ್ಯಾಸವನ್ನು ಇಸ್ರೋ ಪೂರ್ಣಗೊಳಿಸಿದೆ. ಚಂದ್ರಯಾನ-೨ರಲ್ಲಿ ಆದಂಥ ತಾಂತ್ರಿಕ ದೋಷಗಳನ್ನು ಪರಿಹರಿಸಿ ಚಂದ್ರಯಾನ-೩ನ್ನು ಸಜ್ಜುಗೊಳಿಸಿದೆ.ಉಪಗ್ರಹ ಉಡಾವಣೆಯಾದ ಬಳಿಕ ಆಗಸ್ಟ್ ೨೩-೨೪ರ ವೇಳೆಗೆ ಚಂದ್ರನ ಮೇಲ್ಮೆ?ನಲ್ಲಿ ಸುರಕ್ಷಿತ ಲ್ಯಾಂಡಿಂಗ್ ಸಾಧಿಸುವ ಗುರಿಯನ್ನು ಮಿಷನ್ ಹೊಂದಿದೆ.
