ಕೋವಿಡ್ ಕೇರ್ ಸೆಂಟರ್‌ನಲ್ಲಿ ರೋಗಿಗಳಿಗೆ ಮೆಚ್ಚುಗೆಯಾದ ವ್ಯವಸ್ಥೆ


ಜಗಳೂರು.ಅ.೧೯; ತಾಲೂಕಿನ ಮುಗ್ಗಿದರಾಗಿಹಳ್ಳಿ ಮೊರಾರ್ಜಿ ದೇಸಾಯಿ ವಸತಿ ಶಾಲೆಯಲ್ಲಿ ಜಿಲ್ಲಾಡಳಿತ ಆರಂಭಿಸಿರುವ ಕೋವಿಡ್ ಕೇರ್ ಸೆಂಟರ್‌ಗೆ ದಾಖಲಾಗುವ ರೋಗಿಗಳಿಗೆ ಅತ್ಯುತ್ತಮ ಗುಣಮಟ್ಟದ ಊಟೋಪಾಚಾರದ ವ್ಯವಸ್ಥೆ ಮಾಡಲಾಗಿದೆ..!
ಹೌದು ನಿಜ ಜಿಲ್ಲಾಧಿಕಾರಿ ಮಹಾಂತೇಶ್ ಬೀಳಗಿ ಅವರ ವಿಶೇಷ ಮುತುವರ್ಜಿಯಿಂದ ಕಳೆದ ಎರಡೂವರೆ ತಿಂಗಳಿಂದ ನಡೆಯುತ್ತಿರುವ ಕೋವಿಡ್ ಕೇರ್ ಸೆಂಟರ್‌ನಲ್ಲಿ ರೋಗಿಗಳಿಗೆ ಚೇತರಿಸಿಕೊಳ್ಳಲು ಬೇಕಾದ ಅಗತ್ಯ ಪೌಷ್ಠಿಕ ಆಹಾರ ನೀಡಲಾಗುತ್ತಿದೆ.
ಸಮಾಜ ಕಲ್ಯಾಣ ಇಲಾಖೆಯ ಸಹಾಯಕ ನಿರ್ದೇಶಕ ಬಿ. ಮಹೇಶ್ವರಪ್ಪ ಅವರ ಉಸ್ತುವಾರಿಯಲ್ಲಿ ನಡೆಯುತ್ತಿರುವ ಊಟದ ನಿರ್ವಹಣಾ ವ್ಯವಸ್ಥೆಯ ಬಗ್ಗೆ ರೋಗಿಗಳಿಂದ ಮೆಚ್ಚುಗೆ ವ್ಯಕ್ತವಾಗಿದೆ. ಕೇರ್ ಸೆಂಟರ್‌ನಲ್ಲಿ ಆಹಾರದ ಕೊರೆತೆಯಾಗದಂತೆ ನಿಗಾವಹಿಸಲಾಗುತ್ತಿದೆ. ಸಮಾಜ ಕಲ್ಯಾಣ ಇಲಾಖೆ ಮತ್ತು ಬಿಸಿಎಂ ಇಲಾಖೆಯ ಸಿಬ್ಬಂದಿಗಳು ರುಚಿ ರುಚಿಯಾದ ಅಡುಗೆ ತಯಾರಿಸುತ್ತಿದ್ದಾರೆ. ಅಡುಗೆಗೆ ಪ್ರತಿ ದಿನ ತಾಜಾ ತರಕಾರಿಗಳನ್ನು ಬಳಸುತ್ತಿರುವುದು ಇಲ್ಲಿಯ ವಿಶೇಷ. ಬೆಳಿಗ್ಗೆ ತಿಂಡಿ, ಕಾಫಿ, ಮಧ್ಯಾಹ್ನ ಚಪಾತಿ, ರಾತ್ರಿ ಬಿಸಿ ಬಿಸಿ ರಾಗಿಮುದ್ದೆಯ ಊಟ, ಜೊತೆಗೆ ಮೊಟ್ಟೆ ರೋಗಿಗಳ ಪಾಲಿಗೆ ಹಿತಕರ ಎನಿಸಿದೆ. ಪ್ರತಿ ದಿನ ಸಂಜೆ ವೇಳೆಯಲ್ಲಿ ನೀಡುವ ಶಕ್ತಿದಾಯಕ ಫ್ರೂಟ್ ಸಾಲಿಡ್ ಆಹಾರ ಅಚ್ಚು-ಮೆಚ್ಚು. ಪಪ್ಪಾಯಿ, ಸೇಬು, ಬಾಳೆ ಹಣ್ಣು, ಬಿಕ್ಕಿ ಹಣ್ಣುಗಳು ರೋಗಿಗಳಿಗೆ ಮತ್ತೋಷ್ಟು ಪೋಷಕಾಂಶಗಳು ಹೆಚ್ಚಾಗಲು ನೆರವಾಗುತ್ತಿವೆ. ಸುಮಾರು ನೂರು ಹಾಸಿಗೆಯುಳ್ಳ ಈ ಕೋವಿಡ್ ಕೇರ್ ಸೆಂಟರ್‌ನಲ್ಲಿ ಆರಂಭದಿಂದ ಇಲ್ಲಿಯವರೆಗೂ ಒಂಬೈನೂರಕ್ಕೂ ಹೆಚ್ಚು ರೋಗಿಗಳು ದಾಖಲಾಗಿ ಬಿಡುಗಡೆಯಾಗಿದ್ದಾರೆ. ಈ ಸದ್ಯ ೧೦ಕ್ಕೂ ಹೆಚ್ಚು ಮಂದಿ ರೋಗಿಗಳಿದ್ದಾರೆ.


ಕೋವಿಡ್ ಕೇರ್ ಸೆಂಟರ್‌ಗೆ ದಾಖಲಾಗುವ ರೋಗಿಗಳಿಗೆ ಎಲ್ಲಾ ರೀತಿಯ ಮೂಲಭೂತ ಸೌಲಭ್ಯಗಳಲ್ಲಿ ತೊಂದರೆಯಾಗದಂತೆ ನಿಗಾವಹಿಸಲಾಗುವುದು. ಅವರಿಗೆ ಬೇಕಾದ ಮಾಸ್ಕ್, ಸ್ಯಾನಿಟೈಸರ್ ನೀಡಲಾಗುತ್ತದೆ. ಜಿಲ್ಲಾಧಿಕಾರಿಗಳು ಕಾಲ ಕಾಲಕ್ಕೆ ಭೇಟಿ ನೀಡಿ ಕೇರ್ ಸೆಂಟರ್ ಮೇಲುಸ್ತುವಾರಿ ನಡೆಸುತ್ತಿದ್ದಾರೆ.

-ಡಾ, ನಾಗವೇಣಿ , ತಹಶೀಲ್ದಾರ್, .

ರೋಗಿಗಳಿಗೆ ಪ್ರತಿ ದಿನ ಒಂದೊಂದು ರೀತಿಯ ಅಡುಗೆ ಮಾಡಲಾಗುತ್ತದೆ. ಕಾಫಿ, ತಿಂಡಿ, ಊಟದಲ್ಲಿ ಯಾವುದೇ ಕೊರತೆಯಾಗದಂತೆ ನೋಡಿಕೊಳ್ಳಲಾಗುತ್ತದೆ. ಪ್ರೋಷಕಾಂಶ ಹೆಚ್ಚಿಸಲು ರೋಗಿಗಳಿಗೆ ವಿಶೇಷವಾಗಿ ಫ್ರೂಟ್ ಸಲಾಡ್ ನೀಡಲಾಗುತ್ತದೆ. ಇಲ್ಲಿ ದಾಖಲಾದ ಬಹುತೇಕ ರೋಗಿಗಳು ವಾಸಿಯಾಗಿ ಬಿಡುಗಡೆಯಾಗಿದ್ದಾರೆ.
– ಬಿ.ಮಹೇಶ್ವರಪ್ಪ, ಸಹಾಯಕ ನಿರ್ದೇಶಕರು, ಸಮಾಜ ಕಲ್ಯಾಣ ಇಲಾಖೆ.