ಕಲಬುರಗಿ,ಏ 16: ಪರಪುರುಷನೊಡನೆ ಅಕ್ರಮ ಸಂಬಂಧ ಇಟ್ಟುಕೊಂಡ ಮಹಿಳೆ ಮತ್ತು ಇತರ ಮೂವರು ಸೇರಿ ಮಹಿಳೆಯ ಪತಿಯನ್ನು ಕೊಲೆ ಮಾಡಿದ ಆರೋಪ ಸಾಬೀತಾದ್ದರಿಂದ ಮೂವರಿಗೆ ಜೀವಾವಧಿ ಶಿಕ್ಷೆ ಮತ್ತು ತಲಾ 15 ಸಾವಿರ ರೂ ದಂಡ ಹಾಗೂ ಮಹಿಳೆಗೆ 7 ವರ್ಷಕಠಿಣ ಶಿಕ್ಷೆ ಮತ್ತು 30 ಸಾವಿರ ರೂ ದಂಡ ವಿಧಿಸಿ 3 ನೇ ಅಪರ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯ ಆದೇಶಿಸಿದೆ.
ಜೇವರಗಿ ತಾಲೂಕು ನೆಲೋಗಿ ಪೊಲೀಸ್ ಠಾಣೆ ವ್ಯಾಪ್ತಿಯ ಕಾಸರಭೋಸಗಾ ಗ್ರಾಮದ ರಾವುತರಾಯ ಗುರಣ್ಣ ಬಮ್ಮನಜೋಗಿ,ಚಂದ್ರಶೇಖರ ರಾವುತರಾಯ ಕುರನಳ್ಳಿ,ನಾಗಣ್ಣ ಈರಣ್ಣ ಗದ್ದಿಯವರ ಮತ್ತು ಲಕ್ಷ್ಮಿ ಸಿದ್ದಗುಂಡ ಯರಗಲ ಶಿಕ್ಷೆಗೊಳಗಾದವರು.
ರಾವುತರಾಯ ಗುರಣ್ಣ ಬಮ್ಮನಜೋಗಿ ಈತನು ಲಕ್ಷ್ಮಿ ಸಿದ್ದಗುಂಡ ಎಂಬ ಮಹಿಳೆ ಜತೆ ಅನೈತಿಕ ಸಂಬಂಧವಿಟ್ಟುಕೊಂಡಿದ್ದ.ಆದ್ದರಿಂದ ಆಕೆ ಪತಿಯೊಂದಿಗೆ ನಿರಂತರ ಕಲಹಗಳು ನಡೆಯುತ್ತಿದ್ದವು.ಕೊಲೆಗೆ ಸಂಚು ರೂಪಿಸಿದ ರಾವುತರಾಯ ಗುರಣ್ಣ ಬಮ್ಮನಜೋಗಿಯು ಮಹಿಳೆ ಮತ್ತು ಇತರ ಇಬ್ಬರೊಂದಿಗೆ ಸೇರಿ2020 ರ ಜೂನ್ 2 ರಂದು ಮಹಿಳೆಯ ಪತಿ ಸಿದ್ದಗುಂಡ ಯರಗಲ ನನ್ನು ಕೊಲೆ ಮಾಡಿದ್ದರು.ಜೇವರಗಿ ವೃತ್ತ ನಿರೀಕ್ಷಕರು ತನಿಖೆ ನಡೆಸಿ ನ್ಯಾಯಾಲಯಕ್ಕೆ ದೋಷಾರೋಪಣೆ ಪಟ್ಟಿ ಸಲ್ಲಿಸಿದ್ದರು.ಪ್ರಕರಣದ ವಿಚಾರಣೆ ನಡೆಸಿದ ಕಲಬುರಗಿ 3 ನೇ ಅಪರ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯ ನ್ಯಾಯಾಧೀಶರಾದ ಚಂದ್ರಶೇಖರ ಕರೋಶಿ ಅವರು ತೀರ್ಪು ಪ್ರಕಟಿಸಿ ಆದೇಶಿಸಿದ್ದಾರೆ.ಸರಕಾರದ ಪರವಾಗಿ 3 ನೇ ಅಪರ ಸರಕಾರಿ ಅಭಿಯೋಜಕ ಗುರುಲಿಂಗಪ್ಪ ಶ್ರೀಮಂತ ತೇಲಿ ಅವರು ವಾದಮಂಡಿಸಿದ್ದರು.
