ಕೃಷಿ ಪರಿಕರ ಮಾರಾಟಗಾರರು ರೈತರ ರಾಯಭಾರಿಗಳು: ಡಾ. ಎಸ್. ಎಸ್. ಅಂಗಡಿ

ವಿಜಯಪುರ, ಮೇ, 22: ವಿಜಯಪುರ ಕೃಷಿ ವಿಸ್ತರಣಾ ಶಿಕ್ಷಣ ಕೇಂದ್ರದ ವತಿಯಿಂದ ಹಿಟ್ನಳ್ಳಿ ಕೃಷಿ ಮಹಾವಿದ್ಯಾಲಯದಲ್ಲಿ ಕೃಷಿ ಪರಿಕರಗಳ ಮಾರಾಟಗಾರರಿಗೆ ಕೃಷಿ ವಿಸ್ತರಣಾ ಸೇವೆಗಳ ಡಿಪ್ಲೋಮಾ ಕೋರ್ಸಿನ 2022-23 ನೇ ಸಾಲಿನ ಪ್ರಮಾಣ ಪತ್ರ ವಿತರಣಾ ಸಮಾರಂಭ ಜರುಗಿತು.
ಈ ಕಾರ್ಯಕ್ರಮವನ್ನು ಕೃ.ವಿ.ವಿ ಧಾರವಾಡ, ವಿಸ್ತರಣಾ ನಿರ್ದೇಶಕ ಡಾ. ಎಸ್. ಎಸ್. ಅಂಗಡಿ ಉದ್ಘಾಟಿಸಿ ಮಾತನಾಡಿ, ರೈತ ಇಂದು ಸಂಕಷ್ಟದಲ್ಲಿ ಇದ್ದಾರೆ. ನಿರಂತರ ಬರ ಪರಸ್ಥಿತಿ ಆತನ ಆತ್ಮಸ್ಥೈರ್ಯ ಕುಗ್ಗಿಸಿದೆ. ಕಾರಣ ಕೃಷಿ ಪರಿಕರ ಮಾರಾಟಗಾರರು ಕಳಪೆ ಮಟ್ಟದ ಔಷಧ, ಬೀಜ, ಗೊಬ್ಬರಗಳನ್ನು ರೈತರಿಗೆ ನೀಡದೆ, ರೈತರ ಬದುಕು ಹಸನಾಗುವಂತೆ ತಾವೆಲ್ಲರೂ ಶ್ರಮಿಸಬೇಕೆಂದು ತಿಳಿಸಿದರು.
ತಾವು ಪಡೆದ ದೇಸಿ ಪದವಿಯನ್ನು ರೈತರ ಅಭ್ಯುದಯಕ್ಕಾಗಿ ಉಪಯೋಗಿಸಬೇಕು. ರೈತರಿಗೆ ಸೂಕ್ತ ಮಾರ್ಗದರ್ಶನ ನೀಡಿ ಕಡಿಮೆ ಖರ್ಚಿನಲ್ಲಿ ಹೆಚ್ಚಿನ ಲಾಭ ಬರುವಂತೆ ಸಲಹೆ ನೀಡಬೇಕೆಂದರು.
ಮುಖ್ಯ ಅತಿಥಿ ಜಂಟಿ ಕೃಷಿ ನಿರ್ದೇಶಕ, ಡಾ. ರಾಜಶೇಖರ ವಿಲಿಯಮ್ಸ್ ಮಾತನಾಡಿ, ದೇಸಿ ಕೋರ್ಸ ಮುಗಿಸಿದ ಎಲ್ಲ ಪರಿಕರ ಮಾರಾಟಗಾರರು ಹೆಚ್ಚಿನ ವೈಜ್ಞಾನಿಕ ಜ್ಞಾನವನ್ನು ವಿವಿಧ ವಿಷಯಗಳಲ್ಲಿ ಪಡೆದಿರುವದರಿಂದ ಅದರ ಸದುಪಯೋಗವನ್ನು ರೈತರಿಗೆ ಒದಗಿಸಬೇಕು. ತಮ್ಮ ಆದಾಯ ಹೆಚ್ಚಿಸಲು ರೈತರಿಗೆ ಮೋಸ ಮಾಡದೆ ಪ್ರಾಮಾಣಿಕತೆಯಿಂದ ವ್ಯವಹಾರ ಮಾಡಬೇಕೆಂದರು.
ವಿಜಯಪುರ ಜಿಲ್ಲೆಯಲ್ಲಿ ವಿವಿಧ ಬೆಳೆಗಳನ್ನು ಬೆಳೆಯುವದರಿಂದ ಗುಣಮಟ್ಟದ ಪರಿಕರಗಳನ್ನು ರೈತರಿಗೆ ಪೂರೈಸಿ, ಅವರ ಅಭಿವೃದ್ಧಿಗಾಗಿ ಶ್ರಮಿಸಬೇಕು. ಉತ್ತಮ ಗುಣಮಟ್ಟದ ಬೀಜ, ಗೊಬ್ಬರ ಮತ್ತು ಔಷಧಿಗಳನ್ನು ಕಾನೂನಿನ ಅಡಿಯಲ್ಲಿ ಮಾರಾಟ ಮಾಡಿ ರೈತರ ಏಳಿಗೆಗಾಗಿ ತಾವೆಲ್ಲರೂ ಶ್ರಮಿಸಬೇಕೆಂದರು.

ಸಹ ಸಂಶೋಧನಾ ನಿರ್ದೇಶಕ ಡಾ. ಅಶೋಕ ಸಜ್ಜನ ಮಾತನಾಡಿ, ದೇಸಿ ಕೋರ್ಸನ್ನು ಅತ್ಯಂತ ಸಮರ್ಪಕವಾಗಿ ನಿರ್ವಹಿಸಿದ ಧಾರವಾಡ ವಿಸ್ತರಣಾ ನಿರ್ದೇಶನಾಲಯಕ್ಕೆ ಮ್ಯಾನೇಜ್ ಹೈದರಾಬಾದ ಸಂಸ್ಥೆಗೆ ಪ್ರಶಸ್ತಿ ಗರಿಗೇರಿದ ಬಗ್ಗೆ ಪ್ರಶಂಸೆ ವ್ಯಕ್ತಪಡಿಸುತ್ತಾ, ದೇಸಿ ಕೋರ್ಸನ್ನು ಮುಗಿಸಿದ ಎಲ್ಲ ಪರಿಕರ ಮಾರಾಟಗಾರರಿಗೆ ಉತ್ತಮ ಗುಣಮಟ್ಟದ ಬೀಜ, ಗೊಬ್ಬರ, ಔಷಧಗಳನ್ನು ರೈತರಿಗೆ ವಿತರಿಸಿ ರೈತ ಸಮುದಾಯದ ಅಭಿವೃದ್ಧಿಗಾಗಿ ಶ್ರಮಿಸಬೇಕೆಂದು ತಿಳಿಸಿದರು.

ಪ್ರಾಸ್ತಾವಿಕವಾಗಿ ಮಾತನಾಡಿದ ದೇಸಿ ಕಾರ್ಯಕ್ರಮ ಸಂಯೋಜಕ ಸಹ ವಿಸ್ತರಣಾ ನಿರ್ದೇಶಕ ಡಾ. ಆರ್. ಬಿ. ಬೆಳ್ಳಿ, ದೇಶದಲ್ಲಿ ರೈತರಿಗೆ ಹೆಚ್ಚು ನಿಕಟವಾಗಿರುವ ಕೃಷಿ ಪರಿಕರ ಮಾರಾಟಗಾರರು ಸಮಾನಾಂತರ ವಿಸ್ತರಣಾ ಕಾರ್ಯಕರ್ತರಾಗಿ ರೈತರಿಗೆ ವಿವಿಧ ಕೃಷಿ ತಂತ್ರಜ್ಞಾನ ಹಾಗೂ ಪರಿಕರಗಳ ವಿತರಣೆಯಲ್ಲಿ ಸಕ್ರಿಯವಾಗಿ ಭಾಗವಹಿಸಬೇಕೆಂದು ತಿಳಿಸಿದರು.
ಮಣ್ಣು ಮತ್ತು ನೀರಿನ ಸಂರಕ್ಷಣೆ, ಸುಸ್ಥಿರ ಕೃಷಿ ಮತ್ತು ಸ್ವಾವಲಂಬಿ ಕೃಷಿ ವಿಧಾನಗಳಿಂದ ರೈತರ ಆದಾಯವನ್ನು ದ್ವಿಗುಣಗೊಳಿಸಲು ರೈತ ಸಮುದಾಯಕ್ಕೆ ಸಹಾಯ ಮಾಡಬೇಕೆಂದು ಕರೆ ನೀಡಿದರು. ಕೃಷಿ ಪರಿಕರ ಮಾರಟಗಾರರು ತಮ್ಮ ಮಳಿಗೆಯಲ್ಲಿ ಎಕ್ಸಟೆನ್ಸನ್ ಕಾರ್ನರ್‍ನ್ನು ಅಳವಡಿಸಿ ಡಿಜಿಟಲ್ ಡಿಸಪ್ಲೇ ಬೋರ್ಡಗಳನ್ನು ಅಳವಡಿಸಬೇಕೆಂದರು.
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿದ, ವಿದ್ಯಾಧಿಕಾರಿ, ಡಾ. ಎ. ಭೀಮಪ್ಪ, ದೇಸಿ ಕೋರ್ಸ ಮುಗಿಸಿದ ಎಲ್ಲ ಪರಿಕರ ಮಾರಾಟಗಾರರು ರೈತರ ಏಳಿಗೆಗಾಗಿ ಶ್ರಮಿಸಿ, ಸೂಕ್ತ ತಾಂತ್ರಿಕ ತಂತ್ರಜ್ಞಾನಗಳನ್ನು ರೈತರಿಗೆ ಒದಗಿಸಿ, ಹೆಚ್ಚಿನ ಲಾಭ ಪಡೆಯಲು ಸಹಕರಿಸಬೇಕೆಂದರು. ರೈತರಿಗೆ ಮೋಸ ಮಾಡದೆ ಪ್ರಾಮಾಣಿಕವಾಗಿ ವ್ಯವಹಾರ ಮಾಡಬೇಕೆಂದು ಸಲಹೆ ನೀಡಿದರು.
ಇದೇ ಸಂದರ್ಭದಲ್ಲಿ ದೇಸಿ ಕಾರ್ಯಕ್ರಮದಲ್ಲಿ ಅಧಿಕ ಅಂಕ ಪಡೆದ ಸಂಗಮೇಶ ಹೊಕ್ರಾಣಿ, ಶಿವಾನಂದ ಹಳ್ಳಿ ಮತ್ತು ಪ್ರಮೋದ ಹಿರೇಗೌಡರ ಅವರನ್ನು ಸನ್ಮಾನಿಸಲಾಯಿತು.
ಕಾರ್ಯಕ್ರಮದಲ್ಲಿ ಡಾ. ಪ್ರಕಾಶ ಹೆಚ್. ಟಿ., ಡಾ. ಶಿಲ್ಪಾ ಚೋಗಟಾಪುರ, ಡಾ. ಶ್ವೇತಾ ಮಣ್ಣಿಕೇರಿ, ಶ್ರೀಶೈಲ ರಾಠೋಡ ಸೇರಿದಂತೆ ಕೃಷಿ ಪರಿಕರ ಮಾರಾಟ ಪ್ರತಿನಿಧಿಗಳಾದ ಬಂಗಾರೆಪ್ಪಗೌಡ ಬಿರಾದಾರ, ಅಣ್ಣಪ್ಪಗೌಡ ಪಾಟೀಲ, ಮಲ್ಲಿಕಾರ್ಜುನ ದೇಶಮುಖ, ಗೋವಿಂದ ರಜಪೂತ ಹಾಗೂ ದೇಸಿ ಪ್ರಮಾಣಪತ್ರ ಪಡೆದ ಜಿಲ್ಲೆಯ ಕೃಷಿ ಪರಿಕರ ಮಾರಾಟಗಾರರು ಸಮಾರಂಭದಲ್ಲಿ ಉಪಸ್ಥಿತರಿದ್ದರು.
ಡಾ. ರವೀಂದ್ರ ಬೆಳ್ಳಿ ಸ್ವಾಗತಿಸಿ, ನಿರೂಪಿಸಿದರು. ಡಾ. ಎಸ್. ಎಮ್. ವಸ್ತ್ರದ ವಂದಿಸಿದರು.