ಕಲಬುರಗಿ-ಬೀದರ್ ನೂತನ ಡೆಮು ರೈಲು ಸಂಚಾರಕ್ಕೆಸಂಸದ ಡಾ. ಉಮೇಶ ಜಿ ಜಾಧವ ಚಾಲನೆ

ಕಲಬುರಗಿ:ಮಾ.06: ಕಲಬುರಗಿ-ಬೀದರ್ (ರೈಲು ಸಂಖ್ಯೆ 07747) ನೂತನ ಡೆಮು ರೈಲು ಸಂಚಾರಕ್ಕೆ ಕಲಬುರಗಿ ರೈಲ್ವೆ ನಿಲ್ದಾಣದಲ್ಲಿ ಸೋಮವಾರ ಲೋಕಸಭಾ ಸದಸ್ಯ ಡಾ. ಉಮೇಶ ಜಿ. ಜಾಧವ ಅವರು ಹಸಿರು ನಿಶಾನೆ ತೋರಿಸಿ ಚಾಲನೆ ನೀಡಿದರು.
ಈ ಸಂದರ್ಭದಲ್ಲಿ ಮಾತನಾಡಿದ ಅವರು, ಈ ರೈಲಿನಿಂದ ಕಲಬುರಗಿ ಮತ್ತು ಬೀದರ ಜಿಲ್ಲೆಗಳ ಜನಸಾಮಾನ್ಯರಿಗೆ ಹೆಚ್ಚಿನ ಅನುಕೂಲವಾಗಲಿದ್ದು, ಭಾನುವಾರ ಹೊರತುಪಡಿಸಿ ಉಳಿದ ದಿನಗಳಂದು ಈ ರೈಲು ನಿತ್ಯವೂ ಸಂಚರಿಸಲಿದೆ ಎಂದರು.
ಕೊರೋನಾ ಸಂದರ್ಭದಲ್ಲಿ ಹಲವು ರೈಲುಗಳು ನಿಲ್ಲಿಸಲಾಗಿತ್ತು, ಇದೀಗ ಎಲ್ಲ ರೈಲುಗಳು ಮತ್ತೆ ಆರಂಭಮಾಡಲಾಗುತ್ತಿದೆ. ಇದರಿಂದ ಎಲ್ಲಾ ಭಾಗದ ಬಡ ಜನರಿಗೆ ಶ್ರೀಮಂತ ವರ್ಗದವರಿಗೆ ಮಧ್ಯಮ ವರ್ಗದವರೆಗೆ ತುಂಬಾ ಅನುಕೂಲವಾಲಿದೆ ಎಂದು ಹೇಳಿದರು.
ಈ ಭಾಗದ ಜನರ ಬೇಡಿಕೆಯಂತೆ ಈ ಭಾಗದ ಮೂಲಕ ಸಂಚರಿಸುವ ಅಹ್ಮದಾಬಾದ್-ಚೆನ್ನೈ ಎಕ್ಸ್‍ಪ್ರೆಸ್ ರೈಲು ಸೇರಿದಂತೆ ಇನ್ನೂ ಕೆಲವು ಪ್ರಮುಖ ರೈಲುಗಳನ್ನು ಕಲಬುರಗಿ, ಶಹಾಬಾದ ಮತ್ತು ವಾಡಿ ನಿಲ್ದಾಣಗಳಲ್ಲಿ ನಿಲುಗಡೆ ಮಾಡುವುದಕ್ಕೆ ಕ್ರಮ ಕೈಗೊಳ್ಳಲಾಗಿದೆ. ಬರುವ ದಿನಗಳಲ್ಲಿ ಇನ್ನೂ ಕೆಲ ರೈಲುಗಳನ್ನು ಸಹ ನಿಲುಗಡೆ ಮಾಡಲಾಗುವುದು ಎಂದರು.
ನಾಗರಕೋಯಿಲ್ ಎಕ್ಸ್‍ಪ್ರೆಸ್ ರೈಲು ಶಹಾಬಾದ್ ನಿಲ್ದಾಣದಲ್ಲಿ ನಿಲುಗಡೆಯಾಗುತ್ತಿದೆ. ಹಾಗೆಯೇ ಸಿಕಂದ್ರಾಬಾದ್-ಮುಂಬೈ ರೈಲು ವಾಡಿ ನಿಲ್ದಾಣದಲ್ಲಿ ಹಾಗೂ ಯಶವಂತಪುರ-ಲಾತೂರ್ ಎಕ್ಸ್‍ಪ್ರೆಸ್ ರೈಲು ನಾಲವಾರ ನಿಲ್ದಾಣದಲ್ಲಿ ನಿಲುಗಡೆಯಾಗಲಿದೆ. ವಂದೇ ಭಾರತ್ ಎಕ್ಸ್‍ಪ್ರೆಸ್ ರೈಲು ಕೂಡ ಈ ಭಾಗದಲ್ಲಿ ಸಂಚರಿಸಲಿದೆ ಎಂದರು.
ಅಮೃತ್ ಭಾರತ್ ಸ್ಟೇಷನ್ ಯೋಜನೆಗೆ ಕಲಬುರಗಿ ರೈಲ್ವೆ ನಿಲ್ದಾಣವನ್ನು ಆಯ್ಕೆ ಮಾಡಲಾಗಿದ್ದು, ಇದರಡಿ ಈ ನಿಲ್ದಾಣ ಆಧುನೀಕರಣಗೊಳ್ಳಲಿದೆ, ಇನ್ನಷ್ಟು ಸೌಲಭ್ಯಗಳು ಲಭ್ಯವಾಗಲಿವೆ ಎಂದು ಸಂಸದ ಡಾ. ಉಮೇಶ ಜಾಧವ ತಿಳಿಸಿದರು.
ಕಲಬುರಗಿ ದಕ್ಷಿಣ ಶಾಸಕ ಹಾಗೂ ಕಲ್ಯಾಣ ಕರ್ನಾಟಕ ಪ್ರದೇಶ ಅಭಿವೃದ್ಧಿ ಮಂಡಳಿ ಅಧ್ಯಕ್ಷರಾದ ದತ್ತಾತ್ರೇಯ ಪಾಟೀಲ್ ರೇವೂರ ಮಾತನಾಡಿ, ಸಂಸದ ಉಮೇಶ ಜಾಧವ ಅವರು ಚುನಾವಣೆ ವೇಳೆ ಭರವಸೆ ನೀಡಿದಂತೆ ಹೊಸ ರೈಲು ಆರಂಭಿಸಿದ್ದಾರೆ, ಅದೇ ರೀತಿ ಈ ಭಾಗದ ರೈಲ್ವೆ ಬೇಡಿಕೆಗಳ ಕುರಿತು ಸಂಸತ್ತಿನಲ್ಲಿ ಆಗಾಗ್ಗೆ ಪ್ರಸ್ತಾಪಿಸುತ್ತಿದ್ದು, ಪರಿಣಾಮವಾಗಿ ಜನರಿಗೆ ಸೌಲಭ್ಯಗಳು ಸಿಗುತ್ತಿವೆ ಎಂದರು.
ಈ ಭಾಗದ ಜನರ ಅನುಕೂಲಕ್ಕಾಗಿ ಬೀದರದಿಂದ ಬೆಂಗಳೂರಿಗೆ ಹೊಸ ರೈಲು ಆರಂಭಿಸಬೇಕೆಂದು ಈ ಭಾಗದ ಜನರಿಗೆ ಅನೇಕ ಸೌಲಭ್ಯ ಬೆಂಗಳೂರಿಗೆ ಹೋಗಲು ಅನುಕೂಲ ಮಾಡಿಕೊಡಬೇಕೆಂದು ರೈಲ್ವೆ ಅಧಿಕಾರಿಗಳಲ್ಲಿ ಮನವಿ ಮಾಡಿದರು.
ಮಧ್ಯ ರೈಲ್ವೆಯ ಸೋಲಾಪುರ ವಿಭಾಗೀಯ ರೈಲ್ವೆ ವ್ಯವಸ್ಥಾಪಕ ನೀರಜ ಧವಳೆ ಹಾಗೂ ಇನ್ನಿತರ ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದರು.
ಝಡ್‍ಆರ್‍ಯುಸಿಸಿ ಸದಸ್ಯರಾದ ವಿಜಯಕುಮಾರ ಹಳಕರ್ಟಿ, ಅರವಿಂದ ನವಲಿ, ಮಾಜಿ ಕಾಪೆರ್Çೀರೇಟರ್ ವಿಠ್ಠಲ ಜಾಧವ ಮತ್ತಿತರರು ಇದ್ದರು.

ರೈಲು ಸಂಚಾರದ ವಿವರ ಇಂತಿದೆ. ಕಲಬುರಗಿ-ಬೀದರ್ (ರೈಲು ಸಂಖ್ಯೆ 07745) ಈ ರೈಲು ಕಲಬುರಗಿಯಿಂದ ಬೆಳಿಗ್ಗೆ 7.30 ಗಂಟೆಗೆ ಹೊರಟು ಬೆಳಿಗ್ಗೆ 10.15 ಗಂಟೆಗೆ ಬೀದರಗೆ ತಲುಪಲಿದೆ. ಇದೇ ರೈಲು ಬೀದರ-ಕಲಬುರಗಿ (ರೈಲು ಸಂಖ್ಯೆ 07746) ಬೀದರಿಂದ ಬೆಳಿಗ್ಗೆ 10.35 ಗಂಟೆಗೆ ಹೊರಟು ಮಧ್ಯಾಹ್ನ 1.20 ಗಂಟೆಗೆ ಕಲಬುರಗಿಗೆ ಮರಳಿ ಆಗಮಿಸಲಿದೆ.
ಕಲಬುರಗಿ-ಬೀದರ್ (ರೈಲು ಸಂಖ್ಯೆ 07747) ಈ ರೈಲು ಕಲಬುರಗಿಯಿಂದ ಮಧ್ಯಾಹ್ನ 1.30 ಗಂಟೆಗೆ ಹೊರಟು ಸಂಜೆ 4.15 ಗಂಟೆಗೆ ಬೀದರಗೆ ತಲುಪಲಿದೆ. ಇದೇ ರೈಲು ಬೀದರ-ಕಲಬುರಗಿ (ರೈಲು ಸಂಖ್ಯೆ 07748) ಬೀದರಿಂದ ಸಂಜೆ 4.40 ಗಂಟೆಗೆ ಹೊರಟು ಸಂಜೆ 7.25 ಗಂಟೆಗೆ ಕಲಬುರಗಿಗೆ ಮರಳಿ ಆಗಮಿಸಲಿದೆ.