ಕಲಬುರಗಿ,ಜು.26:ಕಲಬುರಗಿ ಮಹಾನಗರದಲ್ಲಿ ವಿಶ್ವ ಬ್ಯಾಂಕ್ ನೆರವಿನ, ಕರ್ನಾಟಕ ನಗರ ನೀರು ಸರಬರಾಜು ಆಧುನೀಕರಣ ಯೋಜನೆಯ ಅನುಷ್ಠಾನವು ಪ್ರಗತಿಯಲ್ಲಿದ್ದು, ಯೋಜನೆಯ ಪರಿಣಾಮಗಳ ಮೌಲ್ಯಮಾಪನ (Baseline Survey for Impact Evaluation Study) ಕೈಗೊಳ್ಳಲು ಎಮ್/ಎಸ್ ಅಥೆನಾ ಇನ್ಫೋನೋಮಿಸ್ ಇಂಡಿಯಾ ಪ್ರೈ. ಲಿ. M/s (Athena Infonomies India Pvt.LTD) ಸಂಸ್ಥೆ ಆಯ್ಕೆಯಾಗಿದೆ ಎಂದು ಎಂದು ಕಲಬುರಗಿ ಕೆಯುಐಡಿಎಫ್‍ಸಿ-ಕುಸೆಂಪ್ ಉಪ ಯೋಜನಾ ನಿರ್ದೇಶಕರು ಹಾಗೂ ಕಲಬುರಗಿ ಮಹಾನಗರ ಪಾಲಿಕೆಯ ಆಯುಕ್ತರು ತಿಳಿಸಿದ್ದಾರೆ.
ಸದರಿ ಸಂಸ್ಥೆಯು ಧಾರವಾಡದ ಸೆಂಟರ್ ಫಾರ್ ಮಲ್ಟಿ ಡಿಸಿಪ್ಲಿನರಿ ಡೆವಲಪ್‍ಮೆಂಟ್ ರಿಸರ್ಚ್ ಸಂಸ್ಥೆ ಸಹಯೋಗದೊಂದಿಗೆ ಪ್ರಾತ್ಯಕ್ಷಿಕ (Demo Zone) ಹಾಗೂ ಪ್ರಾತ್ಯಕ್ಷಿಕವಲ್ಲದ (Non-Demo Zone) ವಲಯಗಳಲ್ಲಿನ 2700 ಗ್ರಾಹಕರನ್ನು ಭೇಟಿ ಮಾಡಿ (2000 ಪ್ರಾತ್ಯಕ್ಷಿಕವಲ್ಲದ ಕುಟುಂಬಗಳು, 500 ಪ್ರಾತ್ಯಕ್ಷಿಕ ವಲಯದ ಕುಟುಂಬಗಳು ಮತ್ತು 200 ವಾಣಿಜ್ಯ ಗ್ರಾಹಕರು). ನೀರು ಸರಬರಾಜು ಯೋಜನೆಯ ಸ್ಥಿತಿಗತಿಗಳಾದ ನೀರು ಸರಬರಾಜಿನ ಅಂತರ(ದಿನಗಳಲ್ಲಿ), ಗುಣಮಟ್ಟದ ನೀರು ಸರಬರಾಜು, ನಿರಂತರ ನೀರು ಸರಬರಾಜು,ನೀರಿನ ಪರ್ಯಾಯ ಮೂಲಗಳು, ಅಡುಗೆ ಮನೆಗೆ ನೇರವಾಗಿ ನೀರಿನ ಸಂಪರ್ಕ ಪಡೆದ ಬಗ್ಗೆ, ನೀರಿನ ಅಭಾವ ಎದುರಿಸಲಾದ ಸಂದರ್ಭಗಳು, ಶೌಚಾಲಯ ಹೊಂದಿರುವವಿಕೆ, ನೀರಿನಿಂದ ಹರಡುವ ಕಾಯಿಲೆಗಳು ಸೇರಿದಂತೆ ಒಟ್ಟು 15 ವಿಭಾಗಗಳಲ್ಲಿ 120 ಕ್ಕಿಂತ ಹೆಚ್ಚು ಪ್ರಶ್ನೆಗಳನ್ನು ಆಯ್ಕೆಯಾದ ಕುಟುಂಬಗಳಿಂದ ಕೇಳಲಾಗುವುದು. ಸಮೀಕ್ಷೆಗೆ ಆಗಮಿಸುವ ಸಮೀಕ್ಷೆದಾರರು ಕೇಳುವ ಮಾಹಿತಿಯನ್ನು ಗ್ರಾಹಕರು ನೀಡಿ ಸಹಕರಿಸಬೇಕು.
ನೀರು ಸರಬರಾಜಿನ ಕ್ಷೇತ್ರದಲ್ಲಿ ಮೊದಲ ಬಾರಿಗೆ ಸಮಗ್ರವಾಗಿ ವಿವಿಧ ಆಯಾಮಗಳಲ್ಲಿ ಕಂಡು ಬಂದಿರುವ ಅಂಶಗಳ ಬಗ್ಗೆ ಅಧ್ಯಯನ ಕೈಗೊಳ್ಳಲಾಗುವುದು. ನಗರದಲ್ಲಿ ಬರುವ ಆಯ್ದ ವಾಣಿಜ್ಯ ಸಂಪರ್ಕಗಳಿಂದ ನೀರು ಸರಬರಾಜಿನಿಂದ ಆಗಿರುವ ಅನುಕೂಲಗಳ ಹಾಗೂ ಮತ್ತಿತರ ಅಂಶಗಳ ಬಗ್ಗೆ ಮತ್ತು ನೀರು ಸರಬರಾಜು ಮಾಡುತ್ತಿರುವ ಸಂಸ್ಥೆಯು ನೀರು ಸರಬರಾಜು ವ್ಯವಸ್ಥೆಗೆ ಕೈಗೊಂಡಿರುವ ಕ್ರಮಗಳು ಹಾಗೂ ವ್ಯವಸ್ಥೆಯ ಸುಧಾರಣೆಗೆ ಮುಂದೆ ಕೈಗೊಳ್ಳಬೇಕಾಗಿರುವ ಕ್ರಮಗಳ ಬಗ್ಗೆಯೂ ಸಹ ಅಧ್ಯಯ ಕೈಗೊಳ್ಳಲಿದೆ ಎಂದು ಅವರು ತಿಳಿಸಿದ್ದಾರೆ.
