ಐಪಿಎಲ್ 2020: ಸೈಡ್‌ ಸ್ಟ್ರೈನ್‌ನಿಂದ ಚೇತರಿಸಿಕೊಂಡ ಆಲ್‌ರೌಂಡರ್‌ ಕ್ರಿಸ್‌ ಮೋರಿಸ್‌


ನವದೆಹಲಿ, ಸೆ 23 – ಗುರುವಾರ ನಡೆಯಲಿರುವ (ಸೆ. 24 ರಂದು) ಕಿಂಗ್ಸ್ ಇಲೆವೆನ್‌ ಪಂಜಾಬ್‌ ವಿರುದ್ಧದ ತನ್ನ ಎರಡನೇ ಪಂದ್ಯಕ್ಕೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡಕ್ಕೆ ದಕ್ಷಿಣ ಆಫ್ರಿಕಾ ಆಲ್‌ರೌಂಡರ್‌ ಕ್ರಿಸ್‌ ಮೋರಿಸ್‌ ಲಭ್ಯರಾಗಲಿದ್ದಾರೆಂದು ಆರ್‌ಸಿಬಿ ತಂಡದ ಡೈರೆಕ್ಟರ್‌ ಮೈಕ್‌ ಹೇಸನ್‌ ಸ್ಪಷ್ಟಪಡಿಸಿದ್ದಾರೆ.

ಕ್ರಿಸ್‌ ಮೋರಿಸ್‌ ಅವರು ಸೈಡ್‌ ಸ್ಟ್ರೈನ್‌ನಿಂದಾಗಿ ಮೊದಲನೇ ಹಣಾಹಣಿಗೆ ಲಭ್ಯರಾಗಿರಲಿಲ್ಲ. ಕಳೆದ ವರ್ಷ ಡಿಸೆಂಬರ್‌ನಲ್ಲಿ ನಡೆದಿದ್ದ 2020ರ ಐಪಿಎಲ್‌ ಹರಾಜಿನಲ್ಲಿ ಸ್ಟಾರ್‌ ಆಲ್‌ರೌಂಡರ್‌ ಅನ್ನು 10 ಕೋಟಿ ರೂ. ಗಳಿಗೆ ಬೆಂಗಳೂರು ಫ್ರಾಂಚೈಸಿ ಖರೀದಿಸಿತ್ತು. ಆ ಮೂಲಕ ಕಳೆದ ಹಲವು ಆವೃತ್ತಿಗಳಿಂದ ಇದ್ದ ಡೆತ್‌ ಬೌಲಿಂಗ್‌ ಸಮಸ್ಯೆಯನ್ನು ಪರಿಹರಿಸುವ ಉದ್ದೇಶ ಇದಾಗಿತ್ತು.

“ಕಳೆದ ಹಲವು ದಿನಗಳ ಹಿಂದೆ ಅನಿರೀಕ್ಷಿತವಾಗಿ ಸ್ವಲ್ಪ ಸೈಡ್‌ ಸ್ಟ್ರೈನ್‌ಗೆ ಒಳಗಾಗಿದ್ದರು. ಮಧ್ಯಮ ಹಾಗೂ ಡೆತ್‌ ಓವರ್‌ಗಳಲ್ಲಿ ಬೌಲಿಂಗ್‌ ಮಾಡಿದ ಅನುಭವವನ್ನು ಹೊಂದಿರುವ ಅವರು, ಬ್ಯಾಟಿಂಗ್‌ನಲ್ಲಿಯೂ ತಂಡಕ್ಕೆ ನೆರವಾಗಲಿದ್ದಾರೆ,” ಎಂದು ಟ್ವಿಟರ್‌ನಲ್ಲಿ ಆರ್‌ಸಿಬಿ ಪೋಸ್ಟ್ ಮಾಡಿರುವ ವಿಡಿಯೋದಲ್ಲಿ ಮೈಕ್‌ ಹೇಸನ್‌ ತಿಳಿಸಿದ್ದಾರೆ.

“ಅವರ ಆಗಮನದೊಂದಿಗೆ ತಂಡದ ಸಮತೋಲನ ಬದಲಾವಣೆಯಾಗಲಿದೆ. ಇವರು ಮೂವರಲ್ಲಿ ಒಬ್ಬರಾಗಿದ್ದು, ತಂಡದಲ್ಲಿ ಅವರನ್ನು ಬದಲಾಯಿಸುವುದು ಸುಲಭವಲ್ಲ. ಒಂದು ವೇಳೆ ಕ್ರಿಸ್‌ ಮೋರಿಸ್‌ ಅವರನ್ನು ಆಯ್ಕೆ ಮಾಡಿದರೆ, ಇಡೀ ತಂಡವನ್ನೇ ಬದಲಾಯಿಸಬೇಕಾಗುತ್ತದೆ,” ಎಂದು ಹೇಳಿದರು.

“ಗುರುವಾರದ ಪಂದ್ಯಕ್ಕೆ ಕ್ರಿಸ್‌ ಮೋರಿಸ್‌ ಪರಿಗಣಿಸಬಹುದು ಎಂಬ ನಿರೀಕ್ಷೆ ಇದೆ. ಅವರ ನಿರ್ವಹಣೆಯನ್ನು ಮುಂದುವರಿಸುತ್ತೇವೆ,” ಎಂದು ಮೈಕ್‌ ಹೇಸನ್‌ ಸೇರಿಸಿದರು.

ಕಳೆದ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ನಲ್ಲಿ ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ತಂಡ ಕೊನೆಯ ಸ್ಥಾನಕ್ಕೆ ಕುಸಿದಿತ್ತು. ಆಡಿದ್ದ 14 ಪಂದ್ಯಗಳಲ್ಲಿ ಕೇವಲ ಐದರಲ್ಲಿ ಮಾತ್ರ ಗೆಲುವು ಪಡೆದಿತ್ತು. ಸೋಮವಾರ ನಡೆದಿದ್ದ ಪ್ರಸಕ್ತ ಆವೃತ್ತಿಯ ತನ್ನ ಮೊದಲನೇ ಹಣಾಹಣಿಯಲ್ಲಿ ಆರ್‌ಸಿಬಿ 10 ರನ್‌ಗಳಿಂದ ಸನ್‌ ರೈಸರ್ಸ್ ತಂಡವನ್ನು ಸೋಲಿಸಿತ್ತು.