ಐಪಿಎಲ್‌ ಚೊಚ್ಚಲ ಅರ್ಧಶತಕ ಸಿಡಿಸಿದ ದೇವದತ್‌ ಪಡಿಕ್ಕಲ್‌ ಬಗ್ಗೆ ಇನ್ನಷ್ಟು ಮಾಹಿತಿ ಇಲ್ಲಿದೆ


ನವದೆಹಲಿ, ಸೆ 22 – ಪ್ರಸ್ತುತ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ನ ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು ಹಾಗೂ ಸನ್‌ ರೈಸರ್ಸ್ ಹೈದರಾಬಾದ್‌ ನಡುವಿನ ಪಂದ್ಯದಲ್ಲಿ ಆಸಕ್ತದಾಯಕ ವಿಷಯವೇನೆಂದರೆ ಆರಂಭಿಕ ಬ್ಯಾಟ್ಸ್‌ಮನ್‌ಗಳು. ಆರೋನ್‌ ಫಿಂಚ್‌ ಜತೆ ಪಾರ್ಥಿವ್‌ ಪಟೇಲ್‌ ಅಥವಾ ವಿರಾಟ್‌ ಕೊಹ್ಲಿ ಇನಿಂಗ್ಸ್ ಆರಂಭಿಸಬಹುದು ಎಂಬ ಊಹೆ ಇತ್ತು.

ಆದರೆ, ಆಸ್ಟ್ರೇಲಿಯಾ ಸೀಮಿತ ಓವರ್‌ಗಳ ನಾಯಕನ ಜತೆ ದೇವದತ್‌ ಪಡಿಕ್ಕಲ್‌ ಕ್ರೀಸ್‌ಗೆ ಆಗಮಿಸಿದರು. ಇದನ್ನು ನೋಡುತ್ತಿದ್ದ ಆರ್‌ಸಿಬಿ ಅಭಿಮಾನಿಗಳಿಗೆ ಎಲ್ಲೆಲ್ಲದ ಸಂಭ್ರಮ. ಏಕೆಂದರೆ, ಒಬ್ಬ ಕರ್ನಾಟಕದ ಆಟಗಾರ ಆರ್‌ಸಿಬಿ ತಂಡದ ಅಂತಿಮ 11 ರಲ್ಲಿ ಕಾಣಿಸಿಕೊಂಡು ಹಲವು ವರ್ಷಗಳು ಕಳೆದಿವೆ. ಸಿಕ್ಕ ಅವಕಾಶವನ್ನು ಸದುಪಯೋಗ ಪಡಿಸಿಕೊಂಡ ದೇವದತ್‌ ಪಡಿಕ್ಕಲ್, ಆರಂಭದಿಂದಲೇ ಸನ್ ರೈಸರ್ಸ್ ಹೈದರಾಬಾದ್‌ ಬೌಲರ್‌ಗಳ ಮೇಲೆ ದಾಳಿ ನಡೆಸಿದರು.

ಆರ್‌ಸಿಬಿ 13ನೇ ಆವೃತ್ತಿಯ ಅಭಿಯಾನ ಆರಂಭಿಸು ಮುನ್ನ ಸಾಕಷ್ಟು ಕ್ರಿಕೆಟ್‌ ಪಂಡಿತರು ದೇವದತ್‌ ಪಡಿಕ್ಕಲ್‌ ಈ ಬಾರಿ ಮಿಂಚಲಿದ್ದಾರೆಂದು ಭವಿಷ್ಯ ನುಡಿದಿದ್ದರು. ಅದರಂತೆ ಎಡಗೈ ಬ್ಯಾಟ್ಸ್‌ಮನ್‌ 42 ಎಸೆತಗಳಲ್ಲಿ 56 ರನ್‌ ಸಿಡಿಸಿ ತಮ್ಮ ಸಾಮರ್ಥ್ಯವನ್ನು ಸಾಬೀತುಪಡಿಸಿದರು. ಅಲ್ಲದೆ, ನಾಯಕ ವಿರಾಟ್‌ ಕೊಹ್ಲಿ ಇಟ್ಟಿದ್ದ ನಂಬಿಕೆಯನ್ನು ಉಳಿಸಿಕೊಂಡರು.

ಭುವನೇಶ್ವರ್‌ ಕುಮಾರ್‌ ಅವರ ಮೊದಲನೇ ಓವರ್‌ನಲ್ಲಿ ತಾಳ್ಮೆಯಿಂದ ಪಿಚ್‌ ಸ್ಥಿತಿಯನ್ನು ಅರಿತುಕೊಂಡ ಕರ್ನಾಟಕದ ಬ್ಯಾಟ್ಸ್‌ಮನ್‌, ನಂತರ ಸಂದೀಪ್‌ ಶರ್ಮಾ ಓವರ್‌ನಲ್ಲಿ ಅದ್ಭುತ ಹೊಡೆತಗಳಿಂದ ಎರಡು ಬೌಂಡರಿ ಸಿಡಿಸಿದರು. ನಂತರ,ಮೂರನೇ ಓವರ್‌ನಲ್ಲಿ ಭುವನೇಶ್ವರ್‌ ಕುಮಾರ್‌ ಎಸೆತದಲ್ಲಿ ಬೌಂಡರಿ ಗಳಿಸಿದರು. ಇವರು ಹೊಡೆದ ಗುಣಮಟ್ಟದ ಹೊಡೆತಗಳು ಸನ್‌ ರೈಸರ್ಸ್ ಹೈದರಾಬಾದ್‌ ನಾಯಕ ಡೇವಿಡ್‌ ವಾರ್ನರ್‌ ಅವರನ್ನು ಚಿಂತೆಗೆ ತಳ್ಳಿತು.

ನಂತರ, ನಾಲ್ಕನೇ ಓವರ್‌ನಲ್ಲಿ ನಟರಾಜನ್‌ಗೆ ಮೂರು ಬೌಂಡರಿಗಳನ್ನು ಸಿಡಿಸಿದರು. ವಿಕೆಟ್‌ಗಳ ಎರಡೂ ಬದಿಯಲ್ಲಿ ಲೀಲಾ ಜಾಲವಾಗಿ ಪಡಿಕ್ಕಲ್‌ ಬ್ಯಾಟ್‌ ಬೀಸಿದರು. ನಂತರ, ಬೌಲಿಂಗ್‌ ಬದಲಾವಣೆಯೊಂದಿಗೆ ಬಂದ, ಮಿಚೆಲ್‌ ಮಾರ್ಷ್‌ ಅವರಿಗೂ ಮುಲಾಜಿಲ್ಲದೆ, ಎಡಗೈ ಬ್ಯಾಟ್ಸ್‌ಮನ್‌ ಭರ್ಜರಿ ಶಾಟ್‌ಗಳನ್ನು ಸಿಡಿಸಿದರು.

11 ಓವರ್‌ ಕೊನೆಯ ಎಸೆತದಲ್ಲಿ ವಿಜಯ್‌ ಶಂಕರ್‌ಗೆ ಔಟ್‌ ಆಗುವ ಮುನ್ನ ದೇವದತ್‌ ಪಡಿಕ್ಕಲ್‌ ಐಪಿಎಲ್‌ ಚೊಚ್ಚಲ ಅರ್ಧಶತಕ ಸಿಡಿಸಿದರು. ಪೆವಿಲಿಯನ್‌ನಲ್ಲಿದ್ದ ನಾಯಕ ವಿರಾಟ್‌ ಕೊಹ್ಲಿ ಸೇರಿದಂತೆ ಆಟಗಾರರೆಲ್ಲರೂ ಎದ್ದು ನಿಂತು ಚಪ್ಪಾಳೆ ತಟ್ಟುವ ಮೂಲಕ ಯುವ ಬ್ಯಾಟ್ಸ್‌ಮನ್‌ ಆಟಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದರು.

ದೇಶಿ ಕ್ರಿಕೆಟ್‌ನಲ್ಲಿ ಕರ್ನಾಟಕ ತಂಡವನ್ನು ಪ್ರತಿನಿಧಿಸುವ ದೇವದತ್‌ ಪಡಿಕ್ಕಲ್, 2019ರ ಆವೃತ್ತಿಯ ಸೈಯದ್‌ ಮುಷ್ತಾಕ್ ಅಲಿ ಟ್ರೊಫಿ ಟೂರ್ನಿಯಲ್ಲಿ 580 ರನ್‌ ದಾಖಲಿಸಿದ್ದರು. ಇದು ಈ ಟೂರ್ನಿಯ ಗರಿಷ್ಠ ಮೊತ್ತವಾಗಿತ್ತು. ಅವರು 64ರ ಸರಾಸರಿಯಲ್ಲಿ ರನ್‌ ಗಳಿಸಿದ್ದ ಪಡಿಕ್ಕಲ್‌, 175 ಸ್ಟ್ರೈಕ್‌ ರೇಟ್‌ ಅನ್ನು ಹೊಂದಿದ್ದರು.

ಸೈಯದ್‌ ಮುಷ್ತಾಕ್‌ ಅಲಿ ಟ್ರೊಫಿ ಅಲ್ಲದೆ, ರಣಜಿ ಟ್ರೋಫಿಯಲ್ಲಿಯೂ ಕರ್ನಾಟಕದ ಬ್ಯಾಟ್ಸ್‌ಮನ್‌ ಮಿಂಚಿದ್ದರು. ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ ಅವರು 650ಕ್ಕೂ ಹೆಚ್ಚಿನ ರನ್‌ಗಳನ್ನು ಗಳಿಸುವ ಮೂಲಕ ಎಲ್ಲರ ಗಮನವನ್ನು ಸೆಳೆದಿದ್ದರು. ಲಿಸ್ಟ್ ಎ ನಲ್ಲಿ ಪಡಿಕ್ಕಲ್‌ 60ರ ಸರಾಸರಿಯಲ್ಲಿ ರನ್‌ ಗಳಿಸಿದ್ದಾರೆ.

2020ರ ಐಪಿಎಲ್‌ ಟೂರ್ನಿಗೆ ಆರಂಭಿಕ ಬ್ಯಾಟ್ಸ್‌ಮನ್ ಹುಡುಕುತ್ತಿದ್ದ ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ತಂಡದ ಡೈರೆಕ್ಟರ್ ಮೈಕ್‌ ಹೇಸನ್‌ ಕಣ್ಣಿಗೆ ದೇವದತ್‌ ಪಡಿಕ್ಕಲ್‌ ಬಿದ್ದರು. ಎಡಗೈ ಬ್ಯಾಟ್ಸ್‌ಮನ್‌ನ ದೇಶಿ ಕ್ರಿಕೆಟ್‌ ದಾಖಲೆಗಳನ್ನು ಪರಿಶೀಲಿಸಿದ ಮೈಕ್‌ ಹೇಸನ್‌, ಆರ್‌ಸಿಬಿಗೆ ಆರಂಭಿಕ ಸ್ಥಾನಕ್ಕೆ ಫಿಟ್‌ ಮಾಡಿದರು. ಅದರಂತೆ ಟೂರ್ನಿ ಆರಂಭಕ್ಕೂ ಮುನ್ನ ಪಡಿಕ್ಕಲ್‌, ನೆಟ್ಸ್‌ನಲ್ಲಿ ತಮ್ಮ ಸ್ಪೋಟಕ ಬ್ಯಾಟಿಂಗ್‌ನಿಂದ ನಾಯಕ ವಿರಾಟ್‌ ಕೊಹ್ಲಿ ಹಾಗೂ ಡೈರೆಕ್ಟರ್‌ ಮೈಕ್‌ ಹೇಸನ್‌ ಅವರ ಗಮನ ಸೆಳೆದಿದ್ದರು.

ಇದರ ಫಲವಾಗಿ 13ನೇ ಆವೃತ್ತಿಯ ಐಪಿಎಲ್‌ ಟೂರ್ನಿಯ ಆರಂಭಿಕ ಪಂದ್ಯದಲ್ಲಿಯೇ ಕರ್ನಾಟಕದ ಬ್ಯಾಟ್ಸ್‌ಮನ್‌ಗೆ ಆರಂಭಿಕ ಸ್ಥಾನದಲ್ಲಿ ಅವಕಾಶ ಪಡೆದುಕೊಂಡರು. ಅದರಂತೆ, ಪಡಿಕ್ಕಲ್‌ ತನಗೆ ನೀಡಿದ್ದ ಅವಕಾಶವನ್ನು ಸಂಪೂರ್ಣವಾಗಿ ಸದುಪಯೋಗಪಡಿಸಿಕೊಂಡರು.