ಕೀವ್ (ಉಕ್ರೇನ್), ಜು.೨೨- ಅಚ್ಚರಿಯ ಬೆಳವಣಿಗೆಯಲ್ಲಿ ಬ್ರಿಟನ್‌ನಲ್ಲಿರುವ ಉಕ್ರೇನ್ ರಾಯಭಾರಿ ವದಿಮ್ ಪ್ರಿಸ್ಟಯಿಕೊರನ್ನು ಅಧ್ಯಕ್ಷ ವೊಲೊದಿಮಿರ್ ಝೆಲೆನ್ಸ್ಕಿ ವಜಾಗೊಳಿಸಿರುವುದಾಗಿ ವರದಿ ಮಾಡಲಾಗಿದೆ. ಸ್ವತಹ ಝೆಲೆನ್ಸ್ಕಿ ಅವರನ್ನೇ ಸಾರ್ವಜನಿಕವಾಗಿ ಟೀಕೆ ನಡೆಸಿದ ಹಿನ್ನೆಲೆಯಲ್ಲಿ ವದಿಮ್ ಅವರನ್ನು ವಜಾಗೊಳಿಸಲಾಗಿದೆ ಎಂದು ಆರೋಪಿಸಲಾಗಿದೆ.
ಅದೂ ಅಲ್ಲದೆ ಇಂಟರ್ನ್ಯಾಷನಲ್ ಮ್ಯಾರಿಟೈಮ್ ಆರ್ಗನೈಸೇಷನ್ (ನೌಕಾಯಾನವನ್ನು ನಿಯಂತ್ರಿಸುವ ವಿಶ್ವಸಂಸ್ಥೆಯ ವಿಶೇಷ ಸಂಘಟನೆ)ನಲ್ಲಿ ಉಕ್ರೇನ್‌ನ ಪ್ರತಿನಿಧಿ ಹುದ್ದೆಯಿಂದಲೂ ವದಿಮ್‌ರ ವಜಾಗೊಂಡಿದ್ದಾರೆ ಎಂದು ಉಕ್ರೇನ್ ಅಧ್ಯಕ್ಷರ ಕಚೇರಿಯ ಆದೇಶ ತಿಳಿಸಿದ್ದು ವಜಾಗೊಳಿಸಲು ಕಾರಣವೇನೆಂದು ಮಾಹಿತಿ ನೀಡಿಲ್ಲ. ರಷ್ಯಾ ವಿರುದ್ಧದ ಹೋರಾಟದಲ್ಲಿ ಅತ್ಯಾಧುನಿಕ ಶಸ್ತ್ರಾಸ್ತ್ರ ಪೂರೈಸುತ್ತಿರುವುದಕ್ಕೆ ಉಕ್ರೇನ್ ತನ್ನ ಮಿತ್ರದೇಶಗಳಿಗೆ ಇನ್ನಷ್ಟು ಕೃತಜ್ಞವಾಗಿರಬೇಕು ಎಂದು ಬ್ರಿಟನ್ ರಕ್ಷಣಾ ಕಾರ್ಯದರ್ಶಿ ಬೆನ್ವ್ಯಾಲೇಸ್ ಹೇಳಿದ್ದರು. ಇದಕ್ಕೆ ಪ್ರತಿಕ್ರಿಯಿಸಿದ್ದ ಉಕ್ರೇನ್ ಅಧ್ಯಕ್ಷ ಝೆಲೆನ್ಸ್ಕಿ, ಉಕ್ರೇನ್ ಆಪ್ತಮಿತ್ರ ಬ್ರಿಟನ್‌ಗೆ ಯಾವತ್ತೂ ಕೃತಜ್ಞವಾಗಿರುತ್ತದೆ ಎಂದಿದ್ದರು. ಜತೆಗೆ ಇನ್ನಷ್ಟು ಕೃತಜ್ಞತೆಯನ್ನು ಹೇಗೆ ವ್ಯಕ್ತಪಡಿಸಬಹುದು ಅಥವಾ ಬೆಳಗ್ಗೆ ಎದ್ದು ಸಚಿವರಿಗೆ ನಮ್ಮ ಕೃತಜ್ಞತೆಯನ್ನು ಹೇಗೆ ಸಲ್ಲಿಸಬಹುದು’ ಎಂಬುದನ್ನು ವ್ಯಂಗ್ಯದ ರೀತಿಯಲ್ಲಿ ಸೂಚಿಸಬಹುದು ಎಂದು ಹೇಳಿರುವುದಾಗಿ ಬ್ರಿಟನ್ ಮಾಧ್ಯಮಗಳು ವರದಿ ಮಾಡಿದ್ದವು. ಅದೂ ಅಲ್ಲದೆ ಝೆಲೆನ್ಸ್ಕಿ ವ್ಯಂಗ್ಯವಾಡುತ್ತಿದ್ದಾರೆಯೇ ಎಂದು ಕಳೆದ ವಾರ ಮಾಧ್ಯಮಗಳು ಪ್ರಶ್ನಿಸಿದ್ದವು. ಇದಕ್ಕೆ ಉತ್ತರಿಸಿದ್ದ ವದಿಮ್, ಈ ಹೇಳಿಕೆಯಲ್ಲಿ ಸ್ವಲ್ಪ ವ್ಯಂಗ್ಯವಿತ್ತು. ಇದು ಉತ್ತಮ ಹೇಳಿಕೆ ಎಂದು ಭಾವಿಸಲಾಗದು. ನಾವು ಜತೆಗೂಡಿ ಕೆಲಸ ಮಾಡುತ್ತಿರುವುದು ರಷ್ಯನ್ನರಿಗೆ ಗೊತ್ತಾಗಬೇಕಿದೆ’ ಎಂದಿದ್ದರು. ಸದ್ಯ ಈ ಹೇಳಿಕೆ ನೀಡಿದ ಹಿನ್ನೆಲೆಯಲ್ಲಿ ಇದೀಗ ವದಿಮ್ ವಜಾಗೊಂಡಿದ್ದಾರೆ.
