ಆಳಂದದಲ್ಲಿ ಕೊರೋನಾ ರಣಕೇಕೆ- ಬಿಗಿ ಕ್ರಮಗಳೆಲ್ಲಿ?: ಆಡಳಿತಕ್ಕೆ ಕೆಪಿಸಿಸಿ ಸದಸ್ಯ ಹಣಮಂತ ಭೂಸನೂರ್ ಪ್ರಶ್ನೆ

ಕಲಬುರಗಿ:ಎ.22:ಕೊರೋನಾ ಸೋಂಕು ಇಡೀ ಜಿಲ್ಲೆಯನ್ನೇ ವ್ಯಾಪಿಸುತ್ತಿದೆ. ಅದರಲ್ಲೂ ಮಹಾರಾಷ್ಟ್ರಕ್ಕೆ ಅಂಟಿಕೊಂಡಿರುವ ಗಡಿ ತಾಲೂಕು ಆಳಂದದಲ್ಲಿ ಸೋಂಕಿನ ಆತಂಕ ಹೆಚ್ಚಾಗಿದ್ದರೂ ಸಹ ಆಡಳಿತ ಅಗತ್ಯ ತ್ರಮಗಳನ್ನು ಕೈಗೊಳ್ಳುವಲ್ಲಿ ವಿಫಲವಾಗಿದೆ, ಇದರಿಂದ ಸೋಂಕು- ಸಾವುನೋವು ಹಾಗೇ ಮುಂದುವರಿದಿದ್ದು ತಾಲೂಕಿನಲ್ಲಿ ಜನತೆ ಕಂಗಾಲಾಗಿದ್ದಾರೆ ಎಂದು ಕೆಪಿಸಿಸಿ ಸದಸ್ಯ ಹಣಮಂತ ಭೂಸನೂರ್ ಆಕ್ರೋಶ ಹೊರಹಾಕಿದ್ದಾರೆ.

ಈ ಕುರಿತಂತೆ ಹೇಳಿಕೆ ನೀಡಿರುವ ಅವರು ಈಗಾಗಲೇ ಗಡಿಗ್ರಾಮ ಆಳಂಗಾ ಸೀಲ್‍ಡೌನ್ ಆಗಿದೆ ನೂರಾರು ಸೋಂಕಿತರು ಒಂದೇ ಊರಲ್ಲಿ ಪತ್ತೆಯಾಗಿದ್ದಾರೆ, 5 ಮಂದಿ ಸಾವನ್ನಪ್ಪಿದ್ದಾರೆ, ಇನ್ನು ಇಡೀ ತಾಲೂಕಿನಲ್ಲಿ 300 ರಷ್ಟು ಸೋಂಕಿನ ಸಕ್ರೀಯ ಪ್ರಕರಣ ಕಂಡು ಬಂದಿವೆ. ಇಷ್ಟಿದ್ದರೂ ನಿತ್ಯ ಹೆಚ್ಚಿನ ಪರೀಕ್ಷೆ ನಡೆಸುವ, ತಕ್ಷಣ ಫಲಿತಾಂಶ ನೀಡುವ ಕೆಲಸ ಆಗುತ್ತಿಲ್ಲ. ಗಂಟಲು ದ್ರವ ಸಂಗ್ರಹಿಸಿ ವಾರ ಆದಮೇಲೆ ಫಲಿತಾಂಶ ನೀಡಲಾಗುತ್ತಿದ್ದು ಇದರಿಂದ ಜನತೆ ಗೊಂದಲದ್ದಿದ್ದಾರೆ. ಗಂಟಲು ದ್ರವ ಸಂಗ್ರಹದ ನಂತರ 1 ದಿನದಲ್ಲೇ ಫಲಿತಾಂಶ ಯಾಕೆ ನೀಡಲಾಗುತ್ತಿಲ್ಲ? ಎಂದು ತಾಲೂಕು ತಹಸೀಲ್ದಾರ್, ಜಿಲ್ಲಾಧಿಕಾರಿಗಳನ್ನು ಪ್ರಶ್ನಿಸಿದ್ದಾರೆ.

ಅಳಂಗಾ ಊರಲ್ಲಿ ಸೀಲ್‍ಡೌನ್ ಮುಂದುವರೆದಿದೆ. ಆದರೆ ಸೋಂಕಿತರ ಹೆಚ್ಚುತೊಡಗಿರುವುದು ಗ್ರಾಮಸ್ಥರಲ್ಲಿ ಮತ್ತಷ್ಟು ಆತಂಕ ಮೂಡಿಸಿದೆ. ಒಟ್ಟಾರೆಯಾಗಿ ಈ ಗ್ರಾಮದಲ್ಲಿ 11 ದಿನಗಳಲ್ಲಿ ಸುಮಾರು 14 ಮಂದಿ ವಿವಿಧ ಕಾರಣಗಳಿಂದ ವಯೋವೃದ್ಧರು ಮೃತಪಟ್ಟಿದ್ದಾರೆ. ಸಾವಿಗೆ ನಿಖರ ಕಾರಣ ಇನ್ನೂ ಗೊತ್ತಗಿಲ್ಲವೆಂದು ತಾಲೂಕು ಆಡಳಿತ ಹೇಳುತ್ತಿದೆ. ಇದರಿಂದಾಗಿ ಗ್ರಾಮದಲ್ಲಿ ಭಯದ ವಾತಾವರಣ ಸೃಷ್ಟಿಯಾಗಿದೆ, ಇಲ್ಲಿಯವರೆಗೂ ಕೊರಂಟೇನ್ ಸೆಂಟರ್ ತೆಗೆದಿಲ್ಲ ಎಂದು ದೂರಿದ್ದಾರೆ.

ಅಳಂಗಾದಲ್ಲಿ ಮಹಾರಾಷ್ಟ್ರದಿಂದ ಹೇಗೆ ಜನ ಬಂದರು, ಹೀಗೆ ಬಂದವರಿಂದಲೇ ಸೊಂಕು ಹರಡಿದ್ದರೂ ಇದಕ್ಕೆ ಹೊಣೆಗಾರರಾಗಿರುವ ಅದಿಕಾರಿಗಳ ವಿರುದ್ಧ ಇಂದಿಗೂ ಕ್ರಮ ಕೈಗೊಳ್ಳಲಾಗಿಲ್ಲ ಯಾಕೆ? ತಾಲೂಕು ಆಡಳಿತ ಜನಪರ ಕಾಳಜಿಗಿಂತ ಹೆಚ್ಚಿಗೆ ಸಮಜಾಯಿಷಿ, ಸಬೂಬು ಹೇಳುತ್ತ ಹೊರಟಿರುವಂತಿದೆ. ಇದರಿಂದಾಗಿಯೇ ಬೇರುಮಟ್ಟದಲ್ಲಿ ಕೋರೋನಾ ತಡೆಗಟ್ಟುವ ದಿಶೆಯಲ್ಲಿ ಕೆಲಸಗಳು ಅಷ್ಟೊಂದು ಪರಿಣಾಮಕಾರಿಯಾಗಿ ಸಾಗುತ್ತಿಲ್ಲವೆಂದು ಭೂನಸೂರ್ ದೂರಿದ್ದಾರೆ.

ಊರು ಕೊಳ್ಳೆ ಹೋದ ಮೇಲೆ… ಎಂಬಂತೆ ಆಳಂದದಲ್ಲಿ ಕೋವಿಡ್ ಕೇರ್ ಸೆಂಟರ್ ಈಗ ಆರಂಭಿಸಿದ್ದಾರೆ. ತಾಲೂಕು ಹಂತದಲ್ಲಿ ಕೋವಿಡ್ ಕೇರ್ ಸೆಂಟರ್ ಮುಂಚೆಯೇ ಆರಂಭವಾಗಿದ್ದರೆ ಸಾವು- ನೋವು ಸಂಭವಿಸುತ್ತಿರಲಿಲ್ಲ. ಇಂತಹ ಜನಪರ ಕ್ರಮಕ್ಕೂ ವಿಳಂಬ ಯಾಕೋ? ಎಂದು ಪ್ರಶ್ನಿಸಿದ್ದಾರೆ.

ಮಹಾರಾಷ್ಟ್ರದಿಂದ ಬರುವವರಿಗೆ 3 ಕಡೆಗಳಲ್ಲಿ ತಪಾಸಣೆ ನಡೆಸಲು ಚೆಕ್ ಪೋಸ್ಟ್ ಹಾಕಲಾಗಿದೆಯಾದರೂ ಜನ ಕಣ್ಣು ತಪ್ಪಿಸಿ ಅಡ್ಡ ದಾರಿಗಳಲ್ಲಿ ಆಳಂದ ಪ್ರವೇಸಿಸುತ್ತಿದ್ದರೂ ಕೇಳೋರಿಲ್ಲ. ಅನೇಕರು ಚೆಕ್ ಪೋಸ್ಟ್ ನಲ್ಲಿಯೇ ಗಿಂಬಳ ಕೊಟ್ಟೂ ಬರುತ್ತಿದ್ದಾರೆ. ದೊಡ್ಡ ಗಾಡಿಗೆ 500 ರು, ಸಣ್ಣ ಗಾಡಿಗೆ 250 ರು ಎಂಬ ದರವೇ ನಿಗದಿ ಮಾಡಲಾಗಿದೆ. ಹೀಗಾದಲ್ಲಿ ಸೋಂಕಿನ ನಿಯಂತ್ರಣ ಹೇಗೆ ಸಾಧ್ಯ ಎಂದು ಹಣಮಂತ ಪ್ರಶ್ನಿಸಿದ್ದಾರೆ.

ಕೋವಿಡ್ ಭೀತಿಯಿಂದಾಗಿ ಸಹಜವಾಗಿ ಅನಾರೋಗ್ಯಕ್ಕೆ ತುತ್ತಾದವರಿಗೂ ಆಸ್ಪತ್ರೆಯಲ್ಲಿ ಬೇಡ್‍ಗಳ ಭರ್ತಿಯಿಂದಾಗಿ ಚಿಕಿತ್ಸೆ ದೊರೆಯದೆ ಸಾವನ್ನಪ್ಪಿತ್ತಿರುವ ಪ್ರಕರಣಗಳು ಹೆಚ್ಚಾಗಿ ಜನ ಭಯದಲ್ಲಿದ್ದಾರೆ. ಖಜೂರಿ ಗ್ರಾಮದ ಪ್ರಾಥಮಿಕ ಆರೋಗ್ಯ ಕೇಂದ್ರದ ವ್ಯಾಪ್ತಿಯಲ್ಲಿ ಸೋಂಕು ಆವರಿಸಿದ ಸಕ್ರಿಯ ಒಟ್ಟು 65 ಪ್ರಕರಣಗಳು ದಾಖಲಾಗಿ ಆತಂಕ ಮೂಡಿಸಿದೆ ಇದೇ ರೀತಿ ತಾಲೂಕಿನ ಎಲ್ಲಾ ಗ್ರಾಮಗಳಲ್ಲಿಯೂ ಆತಂಕ ಹೆಚ್ಚುತ್ತಿದೆ.

ಅನಾರೋಗ್ಯದಿಂದಾಗಿ ನೆರೆಯ ಉಮರಗಾ, ಸೋಲಾಪೂರ ಹಾಗೂ ಕಲಬುರಗಿ ಹಾಗೂ ಹೈದರಾಬಾದ ಆಸ್ಪತ್ರೆಗೆ ದಾಖಲಾಗಿ ಕೆಲವರು ಗುಣಮುಖರಾದರೆ, ಇನ್ನೂ ಕೆಲವರ ಮೃತರಾಗಿರುವುದು ಆರೋಗ್ಯ ಇಲಾಖೆಯ ದಾಖಲೆಗೆ ಸೇರುತ್ತಿಲ್ಲ. ಆದರೆ ಆಸ್ಪತ್ರೆಯಿಂದ ಪಾರ್ಥೀವ ಶರೀರ ತಂದು ಕೋವಿಡ್ ನಿಮಾವಳಿಯಂತೆ ಅಂತ್ಯಕ್ರಿಯೆ ನೆರವೇರಿಸಲಾಗುತ್ತಿದೆ. ಇದರಿಂದಾಗಿ ನಾಗರಿಕರು ಸೋಂಕಿನ ಕುರಿತಂತೆ ಮತ್ತಷ್ಟೂ ಗೊಂದಲಕ್ಕಿಡಾಗುತ್ತಿದ್ದಾರೆ.

ಹೀಗೆ ಆಳಂದ ಪಟ್ಟಣ ಸೇರಿ ಗ್ರಾಮೀಣ ಭಾಗದಲ್ಲಿ ಹಠಾತಾಗಿ ಜನರ ಸಾವು ಸಂಭವಿಸತೊಡಗಿದ್ದು, ಆದರೆ ಈ ನಡುವೆ ಕೆಲವರಿಗೆ ಕೋವಿಡ್ ನಿಮಾವಳಿಯಲ್ಲಿ ಅಂತ್ಯಕ್ರಿಯೆ ನೆರವೇರಿದರು ಸಹ ಆರೋಗ್ಯ ಇಲಾಖೆಯ ಅಂಕಿ ಅಂಶಗಳಲ್ಲಿ ಮೃತರ ಹೆಸರು ದಾಖಲಾಗುತ್ತಿಲ್ಲ. ಯಾಕೆ ಇಂತಹ ಗೊಂದಲ? ದ್ವಂದ್ವ? ಇದಕ್ಕೆ ಆಡಳಿತದವರು ಉತ್ತರಿಸಬೇಕಿದೆ. ತಾಲೂಕಿನಲ್ಲಿ ಜನತೆ ಸೋಂಕಿನ ಭಯ ಭೀತಿ ಆವರಿಸಿದೆ. ಈಗಾಗಲೇ ಅಲಂಗಾ ಸೀಲ್‍ಡೌನ್ ಆಗಿದೆ ಇನ್ನೂ ಹೆಚ್ಚಿನ ಗ್ರಾಮಗಲು ಇಂತಹ ದುರವಸ್ಥೆಗೆ ತಲುಪುವ ಮುನ್ನವೇ ಇನ್ನಾದರೂ ಆಡಳಿತ ಎಚ್ಚೆತ್ತು ಮುನ್ನೆಚ್ಚರಿಕೆ, ಜನರಿಗೆ ತಿಳುವಳಿಕೆ ನೀಡುವ ಕ್ರಮಗಳಿಗೆ ಮುಂದಾಗಲಿ ಎಂದೂ ಹಣಮಂತ ಭೂಸನೂರ್ ಆಗ್ರಹಿಸಿದ್ದಾರೆ