ಅಂತರಾಷ್ಟ್ರೀಯ ಮಹಿಳಾ ದಿನಾಚರಣೆ

ಸಂಜೆವಾಣಿ ವಾರ್ತೆ.
ವಿಜಯಪುರ,ಮಾ.14:ತೊಟ್ಟಿಲು ತೂಗುವ ಕೈ ಜಗತ್ತೆ ತೂಗುತ್ತದೆ ಎಂದು ಜಗತ್ತಿಗೆ ಸಾರಿ ಹೇಳುವ ಒಂದು ಹಬ್ಬದ ಆಚರಣೆಯನ್ನು ನಗರದ ಡಾ. ನಾಗೂರ ಎಜುಕೇಶನ್ ಟ್ರಸ್ಟ್ ಮತ್ತು ಶ್ರೀ ಶಿವಯೋಗೇಶ್ವರ ಎಜುಕೇಶನ್ ಸೊಸೈಟಿ ಇವರ ಸಂಯುಕ್ತ ಆಶ್ರಯದಲ್ಲಿ ಅಂತಾರಾಷ್ಟ್ರೀಯ ಮಹಿಳಾ ದಿನಾಚರಣೆಯನ್ನು ಆಚರಿಸಲಾಯಿತು.
ಈ ಸಮಾರಂಭದ ದಿವ್ಯ ಸಾನ್ನಿಧ್ಯ ವಹಿಸಿದ ಮಾತಾಜಿ ಶ್ರೀ ಯೋಗೇಶ್ವರಿ ಮಾತಾಜಿ ಅವರು ಮಾತನಾಡಿ, ಹೆಣ್ಣಿನ ಜನ್ಮದ ಕುರಿತು ಅನುಭಾವದ ಮಾತುಗಳನ್ನು ಆಡಿದರು.
ಅಧ್ಯಕ್ಷತೆ ವಹಿಸಿದ ಜಯಶ್ರೀ ನಾಗೂರ ಅವರು ಮಾರ್ಚ್ 8 ಮಹಿಳಾ ದಿನದ ಮಹತ್ವ ತಿಳಿಸಿದರು. ಅತಿಥಿಗಳೆಲ್ಲರೂ ಸ್ತ್ರೀ ಕುಲದ ಬಗ್ಗೆ ಅರಿವಿನ ಅನುಭವವನ್ನು ಹಂಚಿಕೊಂಡರು.
ಈ ಜಗತ್ತಿನಲ್ಲಿರುವ ಎಲ್ಲ ದುಡಿಮೆಯ ಕ್ಷೇತ್ರಗಳಲ್ಲಿ ಹೆಣ್ಣಿನ ಛಾಪು ಇದ್ದೇ ಇದೆ. ಅಂತರಿಕ್ಷದಿಂದ ಪಾತಾಳದ ವಿಜ್ಞಾನ, ಯೋಜನೆಗಳೆಲ್ಲದರಲ್ಲೂ ಮಹಿಳೆ ಇದ್ದಾಳೆ ಎಂಬುದನ್ನು ಗುರಿತಿಸಲು ಸಮಾಜದ ಅನೇಕ ಸ್ತರಗಳಲ್ಲಿ ಸಾಧನೆಗೈದ ಮಹಿಳಾ ಕಣ್ಮಣಿಗಳನ್ನು ಅವರ ಶ್ರಮದ ದ್ಯೋತಕವಾಗಿ ಸನ್ಮಾನಿಸಲಾಯಿತು.
ಡಾ. ಭುವನೇಶ್ವರಿ ಸಾಸನೂರ, ಶಾಮಲಾ ಗಣೂರ, ಪಿ.ಎಸ್.ಐ ಪ್ರೇಮಾ ಕೂಚಬಾಳ ಉಜ್ವಲಾ ಸರನಾಡಗೌಡ, ಜಯಲಕ್ಷ್ಮೀ ಕಿಣಗಿ, ಡಾ. ರಾಜೇಶ್ವರಿ ಕಡಕೋಳ, ಅಶ್ವಿನಿ, ಸುರೇಶ ಲೋಣಿ ಉಪಸ್ಥಿತರಿದ್ದರು.