ಡಾ ಕಲಾಂ ಸಾವು ವಿಜ್ಞಾನ ಕ್ಷೇತ್ರಕ್ಕೆ ನಷ್ಟ

ಹುಣಸೂರು.ಜು.30.- ಮಾಜಿ ರಾಷ್ಟ್ರಪತಿ ಬಾರತ ರತ್ನ ಡಾ.ಅಬ್ದುಲ್ ಕಲಾಂ ರವರ ನಿದನದಿಂದ ವಿಜ್ಞಾನ ಕ್ಷೇತ್ರಕ್ಕೆ ಮತ್ತು ಈ ದೇಶಕ್ಕೆ ತುಂಬಲಾರದ ನಷ್ಟ ಉಂಟಾಗಿದೆ ಎಂದು ಸ್ನೇಹ ಜೀವಿ ಗ್ರಾಮೀಣಾಭಿವೃದ್ದಿ ಸಂಸ್ಥೆಯ ಅಧ್ಯಕ್ಷ ಆನಂದ್ ತಿಳಿಸಿದರು.

ಪಟ್ಟಣದ ಹಳೇ ಅಂಚೆ ಕಛೇರಿ ರಸ್ತೆಯಲ್ಲಿರುವ ಬಿ.ಎಸ್.ಪಿ. ಡ್ಯಾನ್ಸ್ ಕೆಫೆಯಲ್ಲಿ ನಿಧನ ಹೊಂದಿದ ಡಾ. ಅಬ್ದುಲ್ ಕಲಾಂ ರವರ ಶ್ರದ್ಧಾಂಜಲಿ ಭಾಗವಹಿಸಿ ಮಾತನಾಡಿದ ಅವರು, ಕಲಾಂ ರವರನ್ನು ವಿಶ್ವವೇ ಪ್ರೀತಿಸುತ್ತಿದ್ದು, ಪತ್ರಿಕೆ ಹಂಚುವ ಹುಡುಗನಾಗಿ ಈ ದೇಶದ ರಾಷ್ಟ್ರಪತಿಯಾಗಿ, ದೊಡ್ಡವಿಜ್ಞಾನಿಯಾಬಿ ಬಾಹ್ಯಾಕಾಶದ ಕ್ಷೇತ್ರಕ್ಕೆ ಇವರ ಕೊಡುಗೆ ಅಪಾರವಾಗಿದೆ ಎಂದರು.

ಪ್ರತೀಕ್ಷಣದಲ್ಲೂ ಚಟುವಟಿಕೆಯಿಂದ ಇದ್ದು, ಮಕ್ಕಳೊಂದಿಗೆ ಬೆರೆತು ಅವರಲ್ಲಿ ದೇಶ ಪ್ರೇಮವನ್ನು ಬಿತ್ತುತ್ತಿದ್ದರು. ಇವರ ದೇಶಪ್ರೇಮ ಮತ್ತು ಸೇವೆ ನಮ್ಮ ರಾಷ್ಟ್ರಕ್ಕೆ ಅಗಾದವಾಗಿದೆ. ಒಬ್ಬ ಶಿಕ್ಷಣ ತಜ್ಞನಾಗಿ ಉತ್ತಮ ವಿಜ್ಞಾನಿಯಾಗಿ ನಿರಂತರ ಕಾರ್ಯಚಟುವಟಿಕೆಯ ಪುರುಷನಾಗಿ ಕಾಯಕ ಮಾಡುತ್ತಲೇ ನಿದನಹೊಂದಿದ ಮಹಾನ್ ವ್ಯೆಕ್ತಿಯಾಗಿದ್ದಾರೆ ಎಂದರು.

ಬಿ.ಎಸ್.ಪಿ. ಡ್ಯಾನ್ಸ್ ಕೆಫೆಯಲ್ಲಿನ ತರಬೇತಿ ಮಕ್ಕಳು ಮತ್ತು ಪೋಷಕರು ಮೇಣದ ಬತ್ತಿ ಹಚ್ಚುವ ಮೂಲಕ ಮೇನದ ಬತ್ತಿ ಬೆಳಕಿನಲ್ಲಿ ಶ್ರದ್ಧಾಂಜಲಿ ಅರ್ಪಿಸಿದರು. ಈ ಸಂದರ್ಭದಲ್ಲಿ ಬಿ.ಎಸ್.ಪಿ. ಡ್ಯಾನ್ಸ್ ಕೆಫೆಯ ಉಮೇಶ್ ಬಾಬು, ಮಂಜು, ಭರತ್, ಡ್ಯಾನ್ಸ್ ಕೆಫೆ ಮಕ್ಕಳು ಮತ್ತು ಪೋಷಕರು ಹಾಜರಿದ್ದರು.

Post Title

ನೊಂದ ಜನರ ಕಣ್ಣೊರೆಸುವುದೇ ಲಯನ್ಸ್ ಸಂಸ್ಥೆಯ ಧ್ಯೆಯ

ಕೃಷ್ಣರಾಜಪೇಟೆ, ಜು.30- ವಿಶ್ವದಲ್ಲಿಯೇ ಅತ್ಯುತ್ತಮ ಸೇವಾ ಸಂಸ್ಥೆಯೆಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಲಯನ್ಸ್ ಸಂಸ್ಥೆಯ ಸದಸ್ಯರಾಗಿ ಸೇವಾ ಕೆಲಸ ಮಾಡುವುದೇ ಪುಣ್ಯವಾಗಿದೆ. ಸಮಾಜದಲ್ಲಿನ ನೊಂದವರು ಮತ್ತು ಬಡ ಜನತೆಯ ಕಣ್ಣೀರನ್ನು ಒರೆಸುವ ಕೆಲಸವನ್ನು ಲಯನ್ಸ್ ಸದಸ್ಯರು ಬದ್ಧತೆಯಿಂದ ಮಾಡುವ ಮೂಲಕ ಸಂಸ್ಥೆಯ ಕೀರ್ತಿಯನ್ನು ಮತ್ತಷ್ಟು ಎತ್ತರಕ್ಕೆ ಕೊಂಡೊಯ್ಯಬೇಕು ಎಂದು ಲಯನ್ಸ್ ಜಿಲ್ಲಾಧಿಕಾರಿ ಪಿ.ಸಿ.ಕಸ್ತೂರಿ ಕರೆ ನೀಡಿದರು.

ಪಟ್ಟಣದ ಜಯಮ್ಮ ಶಿವಲಿಂಗೇಗೌಡ ಕಲ್ಯಾಣ ಮಂಟಪದಲ್ಲಿ ನಡೆದ 2015-16ನೇ ಸಾಲಿನ ಲಯನೆಸ್ಟಿಕ್ ವರ್ಷದ ಪದಾಧಿಕಾರಿಗಳು ಮತ್ತು ನೂತನ ಅಧ್ಯಕ್ಷೆ ವಿಜಯಲಕ್ಷ್ಮೀ ರಾಜಶೇಖರ್ ತಂಡದ ಸದಸ್ಯರ ಪದಗ್ರಹಣ ಸಮಾರಂಭದಲ್ಲಿ ಭಾಗವಹಿಸಿ ಅಧ್ಯಕ್ಷರು ಮತ್ಯು ಸದಸ್ಯರಿಗೆ ಪ್ರಮಾಣ ವಚನ ಬೋಧಿಸಿ ಮಾತನಾಡಿದರು.

ಭಾರತ ದೇಶದ ಉದ್ದಗಲಕ್ಕೂ ಶಾಖೆಗಳನ್ನು ಹೊಂದಿದ್ದು, ಕೋಟ್ಯಾಂತರ ಸ್ವಯಂ ಸೇವಕರನ್ನು ಹೊಂದಿರುವ ಲಯನ್ಸ್ ಸೇವಾ ಸಂಸ್ಥೆಯು ಗ್ರಾಮಾಭಿವೃಧ್ಧಿಗೆ ಪೂರಕವಾಗಿ ಕೆಲಸ ಮಾಡುತ್ತಿದ್ದು ಸ,ಆಜದಲ್ಲಿನ ನೊಂದವರು ಮತ್ತು ಬಡ ಜನರ ಕಣ್ಣೀರನ್ನು ಒರೆಸುವ ಕೆಲಸವನ್ನು ಪ್ರಾಮಾಣಿಕವಾಗಿ ಮಾಡುತ್ತಿದೆ. ಗ್ರಾಮೀಣ ಜನರಿಗೆ ಅನುಕೂಲವಾಗುವಂತೆ ಆರೋಗ್ಯ ತಪಾಸಣೆ, ನೇತ್ರ ತಪಾಸಣೆ ಮತ್ತು ಶಸ್ತ್ರಚಿಕಿತ್ಸೆ, ಕ್ಯಾನ್ಸರ್, ಹೃದ್ರೋಗ ತಪಾಸಣೆ, ಸಕ್ಕರೆ ಖಾಯಿಲೆಯ ತಪಾಸಣಾ ಶಿಬಿರ ಸೇರಿದಂತೆ ಗ್ರಾಮೀಣ ಪ್ರದೇಶದ ಬಡ ಜನರ ಅಭ್ಯುದಯಕ್ಕೆ ಪೂರಕವಾಗಿ ಕೆಲಸ ಮಾಡುತ್ತಿರುವ ಲಯನ್ಸ್ ಸಂಸ್ಥೆಯಲ್ಲಿ ಸದಸ್ಯರು ನಿಸ್ವಾರ್ಥ ಸೇವಾ ಮನೋಭಾವನೆಯಿಂದ ಕೆಲಸ ಮಾಡುತ್ತಾ ಭಗವಂತನ ಪ್ರೀತಿಗೆ ಪಾತ್ರರಾಗುತ್ತಿದ್ದಾರೆ. ಶಾಲಾ ಮಕ್ಕಳಿಗೆ ನೋಟ್‍ಪುಸ್ತಕಗಳು, ಬ್ಯಾಗುಗಳು, ಶೂಗಳು, ಡೈಜೆಸ್ಟ್‍ಗಳು ಸೇರಿದಂತೆ ಶೈಕ್ಷಣಿಕ ವಿಕಾಸಕ್ಕೆ ಪೂರಕವಾದ ಸವಲತ್ತುಗಳನ್ನು ಉಚಿತವಾಗಿ ನೀಡಿ ಮಕ್ಕಳ ಶೈಕ್ಷಣಿಕ ವಿಕಾಸಕ್ಕೆ ಪೂರಕವಾಗಿ ಲಯನ್ಸ್ ಸಂಸ್ಥೆಯು ಸಮಾಜಮುಖಿಯಾಗಿ ಕೆಲಸ ಮಾಡುತ್ತಿದೆ. ಕೃಷ್ಣರಾಜಪೇಟೆ ತಾಲೂಕಿನ ಲಯೆನಸ್ ಕ್ಲಬ್ ಆಫ್ ಹೇಮಾವತಿ ಸಂಸ್ಥೆಯು ಗ್ರಾಮೀಣ ಜನರ ಅಭ್ಯುದಯವನ್ನು ಗುರಿಯನ್ನಾಗಿಸಿಕೊಂಡು ಮಾದರಿಯಾಗಿ ಕೆಲಸ ಮಾಡುತ್ತಿದೆ ಎಂದು ಕಸ್ತೂರಿ ಅಭಿಮಾನದಿಂದ ಹೇಳಿದರು.

ಲಯನ್ಸ್ ಗೌರ್ನರ್ ಜಿ.ಪಿ.ದಿವಾಕರ್ ಮಾತನಾಡಿ ಬಡತನದಲ್ಲಿಯೇ ನೊಂದು ಬೇಯುತ್ತಿರುವ ಬಡ ಜನರ ಕಲ್ಯಾಣವನ್ನು ಗುರಿಯನ್ನಾಗಿಸಿಕೊಂಡು ಸಂಸ್ಥೆಯು ವಿಶ್ವದಾಧ್ಯಂತ ಶಾಖೆಗಳನ್ನು ತೆರೆದು ಆಯಾ ಶಾಖೆಯ ಸದಸ್ಯರ ಮೂಲಕ ಸೇವಾ ಚಟುವಟಿಕೆಗಳನ್ನು ನಡೆಸುತ್ತಿದೆ. ಸಂಪೂರ್ಣವಾಗಿ ಮಹಿಳೆಯರೇ ಕಾರ್ಯನಿರ್ವಹಿಸುತ್ತಿರುವ ಲಯನೆಸ್ ಕ್ಲಬ್ ಆಫ್ ಹೇಮಾವತಿ ಸಂಸ್ಥೆಯು ಕಳೆದ 6 ವರ್ಷಗಳಿಂದ ಗ್ರಾಮಾಭಿವೃದ್ಧಿಗೆ ಪೂರಕವಾಗಿ ಕರ್ತವ್ಯ ನಿರ್ವಹಿಸುತ್ತಾ ತಾಲೂಕಿನ ಜನತೆಯ ಮೆಚ್ಚುಗೆಗೆ ಪಾತ್ರವಾಗಿದೆ. ಸೇವೆಯೆಂಬ ಪದವು ಇಂದಿನ ಸ್ವಾರ್ಥ ತುಂಬಿರುವ ಸಮಾಜದಲ್ಲಿ ಕಣ್ಮರೆಯಾಗುತ್ತಿದೆ. ಆದರೆ ಲಯನ್ಸ್ ನಂತಹ ಸೇವಾ ಸಂಸ್ಥೆಗಳ ಕ್ರಿಯಾಶೀಲ ಚಟುವಟಿಕೆಗಳ ಮೂಲಕ ಸೇವೆಯು ಜೀವಂತವಾಗಿದೆಯಲ್ಲದೇ ಉಳ್ಳವರು ದಾನ, ಧರ್ಮವನ್ನು ಮಾಡುವ ಮೂಲಕ ನೊಂದವರ ಸೇವೆಯನ್ನು ಮಾಡುತ್ತಾ, ಬಡ ಜನರ ಸೇವೆಯಲ್ಲಿ ಭಗವಂತನನ್ನು ಕಾಣುವ ಪ್ರಯತ್ನ ಮಾಡುತ್ತಿದ್ದಾರೆ. ಇದು ನಿಜವಾಗಿಯೂ ಆಶಾದಾಯಕ ಬೆಳವಣಿಗೆಯಾಗಿದೆ. ಭಗವಂತನ ಸಾಕ್ಷಾತ್ಕಾರಕ್ಕೆ ಆಡಂಬರದ ಪೂಜೆ ಪುರಸ್ಕಾರಗಳು ಬೇಕಾಗಿಲ್ಲ. ಅಂತೆಯೇ ನೊಂದಿರುವ ಬಡ ಜನತೆಗೆ ಸಹಾಯವನ್ನು ಮಾಡಲು ಯಾರದೇ ಹಂಗು ಬೇಕಾಗಿಲ್ಲ, ಬದಲಾಗಿ ಸೇವೆ ಮಾಡಬೇಕೆಂಬ ಮನಸ್ಸಿರಬೇಕಷ್ಟೇ ಎಂದು ದಿವಾಕರ್ ಮಾರ್ಮಿಕವಾಗಿ ಹೇಳಿದರು.

ಕಾರ್ಯಕ್ರಮದ ಆರಂಭಕ್ಕೂ ಮುನ್ನ ಇತ್ತೀಚೆಗೆ ನಮ್ಮನಗಲಿದ ಭಾರತ ದೇಶದ ಹೆಮ್ಮೆಯ ಪುತ್ರ ಮಾಜಿ ರಾಷ್ಟ್ರಪತಿ ಡಾ.ಎಪಿಜೆ ಅಬ್ದುಲ್ ಕಲಾಂ ಅವರ ಆತ್ಮಕ್ಕೆ ಶಾಂತಿ ಕೋರಿ ಎರಡು ನಿಮಿಷಗಳ ಕಾಲ ಮೌನಾಚರಣೆ ನಡೆಸಲಾಯಿತು. ಕಾರ್ಯಕ್ರಮದಲ್ಲಿ ಮಾಜಿಶಾಸಕ ಕೆ.ಬಿ.ಚಂದ್ರಶೇಖರ್, ಲಯನ್ಸ್ ಮೈಸೂರು ಪ್ಯಾಲೇಸ್ ಸಿಟಿಯ ವಲಯ ವ್ಯವಸ್ಥಾಪಕ ಶಿವಕುಮಾರ್, ವಿಭಾಗೀಯ ವ್ಯವಸ್ಥಾಪಕ ಸುದೀಪ್, ವ್ಯವಸ್ಥಾಪಕ ಡಾ.ರಂಗಸ್ವಾಮಿ ಪಾಪಯ್ಯ, ಲಯನೆಸ್ ಪದಾಧಿಕಾರಿಗಳಾದ ಪುಷ್ಪ ಸುಕುಮಾರ್, ಕೌನ್ಸಿಲ್ ಕಾರ್ಯದರ್ಶಿಗಳಾದ ಲತಾ ಮಹೇಶ್, ರಜನೀ ಉಮೇಶ್, ಲಯೆನಸ್ ಸಂಸ್ಥಾಪಕ ಅಧ್ಯಕ್ಷೆ ರಮಾಮಣಿಚಂದ್ರಶೇಖರ್, ಲಯನೆಸ್ ಕೌನ್ಸಿಲರ್‍ಗಳಾದ ಗಿರಿಜಾ ನಂಜಪ್ಪಗೌಡ, ರಾಧ ಈಶ್ವರಪ್ರಸಾದ್, ದಾಕ್ಷಾಯಿಣಿ ಚಂದ್ರಶೇಖರ್, ಪೂರ್ಣಿಮಾ ಮಂಜುನಾಥ, ಲಯೆನಸ್ ನಿರ್ದೇಶಕರಾದ ಮುಬೀನಾಸುರೇಶ್, ಸುಚೇತಸೋಮಶೇಖರ್, ಹೇಮಾವಿವೇಕ್, ಸರೋಜಮ್ಮಶಿವರಾಮೇಗೌಡ, ಸೌಭಾಗ್ಯ ಅಶೋಕ್, ಕಾರ್ಯದರ್ಶಿ ಜಿ.ಸಿ.ಪ್ರೇಮಕುಮಾರಿ, ಖಜಾಂಚಿ ಸರ್ವಮಂಗಳ ವೆಂಕಟೇಶ್, ಜಂಟಿ ಕಾರ್ಯದರ್ಶಿ ಸಾಕಮ್ಮ ಹನುಮಂತೇಗೌಡ, ಟೇಮರ್ ನಾಗರತ್ನಮ್ಮ ಸಿದ್ದಪ್ಪಶೆಟ್ಟಿ, ರಾಷ್ಟ್ರಪ್ರಶಸ್ತಿ ವಿಜೇತ ಶಿಕ್ಷಕ ಅಂಚಿ ಸಣ್ಣಸ್ವಾಮಿಗೌಡ, ವೈದ್ಯಾಧಿಕಾರಿಗಳಾದ ಡಾ.ಜಯಶೇಖರ್, ಡಾ.ನವೀನ್‍ಕುಮಾರ್, ಪುರಸಭೆ ಅಧ್ಯಕ್ಷ ಕೆ.ಗೌಸ್‍ಖಾನ್, ಉಪಾಧ್ಯಕ್ಷ ಆಟೋಕುಮಾರ್, ಸದಸ್ಯರಾದ ಡಿ.ಪ್ರೇಮಕುಮಾರ್, ಕೆ.ಆರ್.ಹೇಮಂತ್‍ಕುಮಾರ್, ಚೆಲುವರಾಜು, ಕೋಳಿನಾಗರಾಜು, ಕೆ.ಎಸ್.ಸಂತೋಷ್, ಶ್ರೀಧರ್‍ಸಿರಿವಂತ್ ಮತ್ತಿತರರು ಭಾಗವಹಿಸಿದ್ದರು.

ಲಯೆನಸ್ ಕ್ಲಬ್ ಆಫ್ ಹೇಮಾವತಿ ಸಂಸ್ಥೆಯ ಕಾರ್ಯದರ್ಶಿ ಪ್ರೇಮಕುಮಾರಿ ಸ್ವಾಗತಿಸಿದರು, ಅಧ್ಯಕ್ಷೆ ವಿಜಯಲಕ್ಷಿö್ಮೀ ರಾಜಶೇಖರ್ ವಂದಿಸಿದರು, ಸುಚೇತ ಸೋಮಶೇಖರ್, ದ್ರಾಕ್ಷಾಯಿಣಿ ಚಂದ್ರಶೇಖರ್ ಕಾರ್ಯಕ್ರಮ ನಿರೂಪಿಸಿದರು. ಇದೇ ಸಂದರ್ಭದಲ್ಲಿ ವಿಕಲಚೇತನರಿಗೆ ಸಾಧನ ಸಲಕರಣೆಗಳು ಹಾಗೂ ಶಾಲಾ ವಿದ್ಯಾರ್ಥಿಗಳಿಗೆ ನೋಟ್ ಪುಸ್ತಕಗಳು ಮತ್ತು ಬ್ಯಾಗುಗಳನ್ನು ವಿತರಿಸಲಾಯಿತು.

ವಿರೋಧ ಪಕ್ಷಗಳ ಕಡಗಣನೆ ಖಂಡಿಸಿ ಸಭಾಂಗಣಕ್ಕೆ ಬೀಗ ಜಡಿದು ಪ್ರತಿಭಟನೆ

ಕೃಷ್ಣರಾಜಪೇಟೆ, ಜು.30- ವಿರೋಧ ಪಕ್ಷಗಳ ಸದಸ್ಯರು ಪ್ರತಿನಿಧಿಸುವ ವಾರ್ಡುಗಳಿಗೆ ಅನುದಾನ ಬಿಡುಗಡೆಯಲ್ಲಿ ತಾರತಮ್ಯ ನೀತಿಯನ್ನು ಅನುಸರಿಸಿ ವಿಪಕ್ಷಗಳ ಸದಸ್ಯರ ವಾರ್ಡುಗಳನ್ನು ಸಂಪೂರ್ಣವಾಗಿ ಕಡೆಗಣಿಸಿ, ನಿಯಮ ನಿಬಂಧನೆಗಳನ್ನು ಗಾಳಿಗೆ ತೂರಿ ಸರ್ವಾಧಿಕಾರಿ ಧೋರಣೆ ಪ್ರದರ್ಶನ ಮಾಡುತ್ತಿರುವ ಕಾಂಗ್ರೆಸ್ ನೇತೃತ್ವದ ಆಡಳಿತ ಮಂಡಳಿಯ ದೌರ್ಜನ್ಯವನ್ನು ವಿರೋಧಿಸಿ ಇಂದು ಪುರಸಭೆಯ ಜೆಡಿಎಸ್ ಸದಸ್ಯರು ಪ್ರತಿಭಟನೆ ನಡೆಸಿ ಸಭಾಂಗಣಕ್ಕೆ ಬೀಗ ಜಡಿದು ಇಂದು ನಡೆಯಬೇಕಿದ್ದ ಪುರಸಭೆಯ ಸಾಮಾನ್ಯ ಸಭೆಯ ಕಲಾಪಗಳನ್ನು ತಡೆದು ಆಕ್ರೋಶ ವ್ಯಕ್ತಪಡಿಸಿದ ಘಟನೆಯು ನಡೆಯಿತು.

ಪಟ್ಟಣದ ಶಹರೀ ರೋಜ್‍ಗಾರ್ ಯೋಜನಾ ಭವನದಲ್ಲಿ ಇಂದು ಪುರಸಭೆಯ ಸಾಮಾನ್ಯ ಸಭೆಯು ಅಧ್ಯಕ್ಷ ಕೆ.ಗೌಸ್‍ಖನ್ ಅವರ ಅಧ್ಯಕ್ಷತೆಯಲ್ಲಿ ನಿಗಧಿಯಾಗಿತ್ತು. ಸಭಾಂಗಣದ ಬಾಗಿಲಿಗೆ ಬೀಗ ಜಡಿದು ಪ್ರತಿಭಟನೆ ನಡೆಸುತ್ತಿದ್ದ ಜೆಡಿಎಸ್ ಸದಸ್ಯರೊಂದಿಗೆ ಮಾತುಕತೆ ನಡೆಸಿದ ಪುರಸಭೆಅಧ್ಯಕ್ಷ ಕೆ.ಗೌಸ್‍ಖಾನ್ ಮತ್ತು ಮುಖ್ಯಾಧಿಕಾರಿ ಬಸವರಾಜು ವಿಪಕ್ಷಗಳ ಸದಸ್ಯರುಗಳಿಗೆ ಆಗಿರುವ ಅನ್ಯಾಯವನ್ನು ಸರಿಪಡಿಸಿ ವಿಶೇಷ ಅನುದಾನದಲ್ಲಿ ಹೆಚ್ಚಿನ ಪಾಲನ್ನು ನೀಡುವ, ತಾರತಮ್ಯ ನೀತಿಯನ್ನು ಸರಿಪಡಿಸುವ ಭರವಸೆ ನೀಡಿದ ಹಿನ್ನೆಲೆಯಲ್ಲಿ ಜೆಡಿಎಸ್ ಸದಸ್ಯರು ಸಾಮಾನ್ಯ ಸಭೆಗೆ ಹಾಜರಾದರು.

ಪಟ್ಟಣದಲ್ಲಿ ಅಭಿವೃದ್ಧಿ ಕೆಲಸ-ಕಾರ್ಯಗಳು ಸ್ಥಗಿತಗೊಂಡಿವೆ ಎಂದು ಜೆಡಿಎಸ್ ಸದಸ್ಯರು ಆಕ್ರೋಶ ವ್ಯಕ್ತಪಡಿಸಿದ ಬೆನ್ನ ಹಿಂದೆಯೇ ಆಡಳಿತ ಪಕ್ಷದ ಸದಸ್ಯರಾದ ನಂಜುಂಡಯ್ಯ ಮತ್ತು ಕೆ.ಟಿ.ಚಕ್ರಪಾಣಿ ಅಧ್ಯಕ್ಷ ಕೆ.ಗೌಸ್‍ಖಾನ್ ಅವರು ಸಮರ್ಥವಾದ ಆಡಳಿತವನ್ನು ನೀಡುವಲ್ಲಿ ವಿಫಲರಾಗಿದ್ದಾರೆ ಎಂದು ಗದ್ದಲ ಎಬ್ಬಿಸಿ ನೀರಿನ ಬಾಟಲ್‍ಗಳು ಮತ್ತು ಸಭೆ ನಡಾವಳಿಯ ಪ್ರತಿಯನ್ನು ಅಧ್ಯಕ್ಷರ ಕಡೆಗೆ ಎಸೆದು ಆಕ್ರೋಶ ವ್ಯಕ್ತಪಡಿಸಿದರು. ಈ ಮಧ್ಯೆ ಪ್ರವೇಶಿಸಿ ಮಾತನಾಡಿದ ವಿಪಕ್ಷ ನಾಯಕ ಕೆ.ಆರ್.ಹೇಮಂತ್‍ಕುಮಾರ್ ಮಾತನಾಡಿ ಆಡಳಿತ ಪಕ್ಷದ ಸದಸ್ಯರಂತೆ ನಾವೂ ಜನರ ಮತಪಡೆದು ಸದಸ್ಯರಾಗಿ ಆಯ್ಕೆಯಾಗಿ ಬಂದಿದ್ದೇವೆ. ಆದರೆ ನಮ್ಮನ್ನು ಮಲತಾಯಿ ಮಕ್ಕಳಂತೆ ಕಂಡು ನಾವು ಪ್ರತಿನಿಧಿಸುವ ವಾರ್ಡುಗಳಲ್ಲಿ ಅಭಿವೃದ್ಧಿ ಕಾರ್ಯಗಳನ್ನು ಕೈಗೊಳ್ಳದೇ ಸಂಪೂರ್ಣವಾಗಿ ಕಡೆಗಣನೆ ಮಾಡಲಾಗಿದೆ. ಅಧ್ಯಕ್ಷರೇ ಅನ್ಯಾಯ ಸರಿಪಡಿಸಿ ನ್ಯಾಯ ದೊರಕಿಸಿ ಕೊಡಿ ಇಲ್ಲದಿದ್ದರೆ ಸಭೆ ನಡೆಯಲು ಅವಕಾಶ ನೀಡುವುದಿಲ್ಲ. ಈ ಬಗ್ಗೆ ನಮಗೆ ಅಧ್ಯಕ್ಷರು ಖಚಿತ ಭರವಸೆ ನೀಡಬೇಕು ಎಂದು ಮನವಿ ಮಾಡಿದಾಗ ಮಾತನಾಡಿದ ಪುರಸಭೆ ಅಧ್ಯಕ್ಷ ಕೆ.ಗೌಸ್‍ಖನ್ ಈವರೆಗೆ ನಡೆದಿರುವ ಘಟನೆಗಳ ಬಗ್ಗೆ ಅವಲೋಕಿಸುವುದು ಬೇಡ ಎಸ್‍ಏಫ್‍ಸಿ ಅನುಧಾನ, ಪುರಸಭೆ ನಿಧಿಯಿಂದ ಹೆಚ್ಚಿನ ಅನುದಾನವನ್ನು ಬಿಡುಗಡೆ ಮಾಡಿ ಅನ್ಯಾಯವನ್ನು ಸರಿಪಡಿಸುವುದಾಗಿ ಭರವಸೆ ನೀಡಿ ಸಭೆಯ ಗದ್ದಲವನ್ನು ನಿಯಂತ್ರಣಕ್ಕೆ ತಂದರು.

ಬೀದಿ ದೀಪಗಳ ಅಳವಡಿಕೆ ಸರಿಯಾಗಿ ನಡೆಯುತ್ತಿಲ್ಲ, ಸ್ವಚ್ಛತಾ ಕಾರ್ಯವು ಸಮರ್ಪಕವಾಗಿಲ್ಲ. ಕೆಲವು ಸದಸ್ಯರು ಗುತ್ತಿಗೆದಾರರಾಗಿ ಬದಲಾಗಿದ್ದು ಕಳಪೆ ಕೆಲಸಗಳನ್ನು ನಡೆಸಿ ಸರ್ಕಾರದ ಹಣವನ್ನು ಲೂಟಿ ಮಾಡುತ್ತಿದ್ದಾರೆ. ಅಧ್ಯಕ್ಷರು ಈ ಬಗ್ಗೆ ಕಾಳಜಿ ವಹಿಸಬೇಕು. ಶೇ.22.75 ಅನುಧಾನದಲ್ಲಿ ಖರೀದಿ ಮಾಡಿರುವ ವಸ್ತುಗಳನ್ನು ಬಡ ವಿದ್ಯಾರ್ಥಿಗಳಿಗೆ ವಿತರಿಸಲು ಕ್ರಮಕೈಗೊಳ್ಳಬೇಕು. ಪುರಸಭೆಯ ವ್ಯಾಪ್ತಿಯಲ್ಲಿ ನಡೆಯುತ್ತಿರುವ ಕಳಪೆ ಕೆಲಸಕ್ಕೆ ಮಂಗಳ ಹಾಡಿ ಕಳಪೆ ಕೆಲಸ ನಡೆಸುವ ಗುತ್ತಿಗೆದಾರರ ಹೆಸರನ್ನು ಕಪ್ಪುಪಟ್ಟಿಗೆ ಸೇರಿಸಲು ಕ್ರಮಕೈಗೊಳ್ಳಬೇಕು. ಪುರಸಭಾ ವ್ಯಾಪ್ತಿಯಲ್ಲಿ ನಡೆದಿರುವ ಅವ್ಯವಹಾರಗಳನ್ನು ತನಿಖೆ ನಡೆಸುವಂತೆ ಜಿಲ್ಲಾಧಿಕಾರಿಗಳಿಗೆ ಪತ್ರ ಬರೆಯಬೇಕು ಎಂದು ಸದಸ್ಯರಾದ ಲೋಕೇಶ್ ಮತ್ತು ಚೆಲುವರಾಜು ಸಲಹೆ ನೀಡಿದಾಗ ಆಡಳಿತ ಪಕ್ಷದ ಸದಸ್ಯರಾದ ಕೆ.ವಿನೋದ್ ಮತ್ತು ಕೆ.ಟಿ.ಚಕ್ರಪಾಣಿ ಅವರ ನಡುವೆ ಬಿಸಿ ಬಿಸಿ ವಾಗ್ಯುದ್ಧ ನಡೆಯಿತು. ಸಭೆಯಲ್ಲಿ ಎಲ್ಲಾ 23 ಸದಸ್ಯರು ಹಾಜರಾಗಿದ್ದರು. ಸಭೆಯ ಆರಂಭಕ್ಕೂ ಮುನ್ನ ಮಾಜಿ ರಾಷ್ಟ್ರಪತಿಗಳಾದ ಡಾ.ಎಪಿಜೆ ಅಬ್ದುಲ್‍ಕಲಾಂ ಅವರ ಗೌರವಾರ್ಥವಾಗಿ ಮೌನಾಚರಣೆ ನಡೆಸಲಾಯಿತು. ಉಪಾಧ್ಯಕ್ಷ ಆಟೋ ಕುಮಾರ್, ಸ್ಥಾಯಿ ಸಮಿತಿಯ ಅಧ್ಯಕ್ಷ ಕೆ.ಕೆ.ಪುರುಷೋತ್ತಮ್, ಮುಖ್ಯಾಧಿಕಾರಿ ಬಸವರಾಜು ಸದಸ್ಯರ ಪ್ರಶ್ನೆಗಳಿಗೆ ಉತ್ತರಿಸಿದರು. ಸದಸ್ಯರಾದ ಡಿ.ಪ್ರೇಮಕುಮಾರ್, ಚಂದ್ರಕಲಾ, ಸೌಭಾಗ್ಯ ಅಶೋಕ್, ಹೆಚ್.ಕೆ.ಅಶೋಕ್, ನಂಜುಂಡಯ್ಯ, ಪದ್ಮಾವತಿ, ರೂಪ, ಜಯಮ್ಮ, ಅನುಸೂಯ, ತಂಜೀಮಾ ಕೌಸರ್, ರತ್ನಮ್ಮ, ನಂದೀಶ್ ಚರ್ಚೆಯಲ್ಲಿ ಭಾಗವಹಿಸಿದ್ದರು.

ಡಾ.ಕಲಾಂ ಆದರ್ಶ ರೂಢಿಸಿಕೊಳ್ಳಲು ಯುವಕರಿಗೆ ಕರೆ

ಕೃಷ್ಣರಾಜಪೇಟೆ, ಜು.30- ಭಾರತ ದೇಶ ಕಂಡಂತಹ ಅಪರೂಪದ ಮಾಣಿಕ್ಯ, ಮಹಾನ್ ಚೇತನ ಡಾ.ಎಪಿಜೆ ಅಬ್ದುಲ್ ಕಲಾಂ ಅವರ ಜೀವನದ ಆದರ್ಶಗಳನ್ನು ಯುವಜನರು ಕಡ್ಡಾಯವಾಗಿ ಪಾಲಿಸುವ ಮೂಲಕ ದೇಶದ ಅಭಿವೃದ್ಧಿಗೆ ಕಾಣಿಕೆ ನೀಡಿ ಶ್ರೇಷ್ಠ ವ್ಯಕ್ತಿಗಳಾಗಿ ಹೊರಹೊಮ್ಮಬೇಕು ಎಂದು ಶಾಸಕ ನಾರಾಯಣಗೌಡ ವಿದ್ಯಾರ್ಥಿಗಳಿಗೆ ಕರೆ ನೀಡಿದರು.

ಪಟ್ಟಣದ ಸರ್ಕಾರಿ ಪದವಿಪೂರ್ವ ಕಾಲೇಜಿನ ಆವರಣದಲ್ಲಿ ನಡೆದ ಭಾರತರತ್ನ ಡಾ. ಕಲಾಂ ಅವರ ಶ್ರದ್ಧಾಂಜಲಿ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಪುಷ್ಪ ನಮನವನ್ನು ಸಲ್ಲಿಸಿ ಮಾತನಾಡಿದರು.

ತಮ್ಮ ಜೀವಿತದುದ್ದಕ್ಕೂ ಸರಳತೆಯನ್ನು ಮೈಗೂಡಿಸಿಕೊಂಡು ದೇಶದ ಅಭಿವೃಧ್ಧಿಗೆ ಶ್ರೇಷ್ಠ ಕಾಣಿಕೆ ನೀಡಿ ವೈಜ್ಞಾನಿಕ ಕ್ಷೇತ್ರಕ್ಕೆ ಅಪರೂಪವೆನಿಸಿದ ಶ್ರೇಷ್ಠ ಕೊಡುಗೆಯನ್ನು ನೀಡಿದ ಮಹಾನ್ ಚೇತನ ಡಾ.ಕಲಾಂ ಅವರು ಸಮಯಕ್ಕೆ ಮಹತ್ವ ನೀಡಿ, ಜೀವನದುದ್ದಕ್ಕೂ ಶಿಸ್ತು, ಸಂಯಮ ಹಾಗೂ ಕಾರ್ಯತತ್ಪರತೆಯನ್ನು ಮೈಗೂಡಿಸಿಕೊಂಡು ಒಬ್ಬ ಸಾಮಾನ್ಯ ಬಡವನ ಮಗನಾದರೂ ದೇಶದ ಅತ್ಯುನ್ನತ ಶ್ರೇಷ್ಠ ಹುದ್ದೆಗಳಲ್ಲೊಂದಾದ ರಾಷ್ಟ್ರಪತಿ ಹುದ್ದೆಯನ್ನು ಅಲಂಕರಿಸಿದ, ವಿದ್ಯಾರ್ಥಿಗಳ ಶ್ರೇಯೋಭಿವೃಧ್ಧಿಯ ಕನಸಿನ ಬೀಜವನ್ನು ಬಿತ್ತದ ಕಲಾಂ ಅವರು ಚರಿತ್ರೆಯ ಪುಟಗಳಲ್ಲಿ ಚಿರಸ್ಥಾಯಿಯಾಗಿ ನಿಂತಿದ್ದಾರೆ ಎಂದು ಕಂಬನಿ ಮಿಡಿದ ಶಾಸಕ ನಾರಾಯಣಗೌಡ ಇಂದಿನ ಯುವಜನರು ಡಾ.ಕಲಾಂ ಅವರಂತೆ ಕನಸನ್ನು ಕಂಡು , ಕಂಡ ಕನಸನ್ನು ನನಸು ಮಾಡಿಕೊಂಡು ಸಾಧಕರಾಗಲು ಕಷ್ಟಪಟ್ಟು ಪ್ರಯತ್ನ ಮಾಡಬೇಕು. ಇಂದಿನ ಸೋಲೇ ನಾಳಿನ ಗೆಲುವಾಗುವುದರಿಂದ ಸೋಲಿಗೆ ಹೆದರದೇ ಆತ್ಮವಿಶ್ವಾಸದಿಂದ ಮುನ್ನಡೆದು ಗುರಿ ಮುಟ್ಟಬೇಕು. ಯುವಜನರು ದೇಶದ ಅಭಿವೃಧ್ಧಿಗೆ ಕಾಣಿಕೆ ನೀಡಲು ಆತ್ಮವಿಶ್ವಾಸ ಹಾಗೂ ಸಾಧಿಸುವ ಛಲದೊಂದಿಗೆ ಮುನ್ನಡೆಯಬೇಕು ಎಂದು ಕಿವಿ ಮಾತು ಹೇಳಿದರು.

ಸಭೆಯಲ್ಲಿ ಉಪಸ್ಥಿತರಿದ್ದ ಜಿ.ಪಂ ಶಿಕ್ಷಣ ಮತ್ತು ಆರೋಗ್ಯ ಸ್ಥಾಯಿ ಸಮಿತಿಯ ಅಧ್ಯಕ್ಷ ವಿ.ಮಂಜೇಗೌಡ, ತಾಲೂಕು ಪಂಚಾಯಿತಿ ಅಧ್ಯಕ್ಷೆ ಭುವನೇಶ್ವರಿಮೋಹನ್, ಉಪಾಧ್ಯಕ್ಷೆ ನಾಗರತ್ನಮ್ಮ, ಪುರಸಭೆ ಅಧ್ಯಕ್ಷ ಕೆ.ಗೌಸ್‍ಖಾನ್, ಸದಸ್ಯರಾದ ಕೆ.ಎಸ್.ಸಂತೋಷ್, ಕೆ.ಆರ್.ಹೇಮಂತ್‍ಕುಮಾರ್, ಕೋಳಿನಾಗರಾಜು, ಚೆಲುವರಾಜು, ಪದ್ಮಾವತಿ ಪುಟ್ಟಸ್ವಾಮಿ, ಪ್ರಾಂಶುಪಾಲ ಕೆ.ಕಾಳೇಗೌಡ, ಉಪಪ್ರಾಂಶುಪಾಲ ಡಿ.ರಾಜೇಗೌಡ ಸಮಾರಂಭದಲ್ಲಿ ಕಲಾಂ ಅವರನ್ನು ಕುರಿತು ಮಾತನಾಡಿದರು.

ಕಾಲೇಜು ಅಭಿವೃದ್ಧಿ ಸಮಿತಿಯ ಉಪಾಧ್ಯಕ್ಷ ಡಾ.ಎಸ್.ಕೃಷ್ಣಮೂರ್ತಿ ಸಮಾರಂಭದ ಅಧ್ಯಕ್ಷತೆ ವಹಿಸಿದ್ದರು. ಕಾರ್ಯಕ್ರಮಕ್ಕೂ ಮುನ್ನ ಡಾ.ಕಲಾಂ ಅವರ ಆತ್ಮಕ್ಕೆ ಚಿರಶಾಂತಿಯನ್ನು ಕೋರಿ ಎರಡು ನಿಮಿಷಗಳ ಕಾಲ ಮೌನಾಚರಣೆ ಮಾಡಲಾಯಿತು.

ಸತ್ಯಾಸತ್ಯತೆ ಅರಿತು ಕಾರ್ಯ ನಿರ್ವಹಿಸಿ

ಕುಶಾಲನಗರ, ಜು.30- ಪ್ರೆಸ್ ಕ್ಲಬ್ ವತಿಯಿಂದ ಪತ್ರಿಕಾ ದಿನಾಚರಣೆಯನ್ನು ಆಚರಿಸಲಾಯಿತು. ಪತ್ರಕರ್ತರು ಸತ್ಯಾಸತ್ಯತೆಯನ್ನು ಅರಿತು ಕಾರ್ಯ ನಿರ್ವಹಿಸುವಂತೆ ಕಾರ್ಯಕ್ರಮದಲ್ಲಿ ಪಾಲ್ಗೊಂಡ ಗಣ್ಯರು ಕರೆ ನೀಡಿದರು.

ಕುಶಾಲನಗರದ ಎಪಿಸಿಎಂಪಿ ಹಾಲ್‍ನಲ್ಲಿ ಪತ್ರಿಕಾ ದಿನಾಚರಣೆ ಕಾರ್ಯಕ್ರಮ ನಡೆಯಿತು. ಕಾರ್ಯಕ್ರಮವನ್ನು ಆಂದೋಲನ ದಿನಪತ್ರಿಕೆ ಸಂಪಾದಕರಾದ ರಾಜಶೇಖರ್ ಕೋಟಿ ಉದ್ಘಾಟಿಸಿದರು. ಬಳಿಕ ಮಾತನಾಡಿದ ಅವರು, ಪತ್ರಕರ್ತರು ಸತ್ಯಾಸತ್ಯತೆಯನ್ನು ಅರಿತು ಕಾರ್ಯನಿರ್ವಹಿಸಬೇಕಿದೆ. ರಾಜಕೀಯ ವ್ಯಕ್ತಿಗಳನ್ನು ಸಂತೋಷಪಡಿಸುವ ಕೆಲಸ ಮಾಡುವ ಬದಲು ಸಮಾಜದ ಪ್ರತಿಯೊಬ್ಬ ವ್ಯಕ್ತಿಯ ಪರವಾಗಿ ಕೆಲಸ ಮಾಡಬೇಕೆಂದು ಕರೆ ನೀಡಿದರು.

ಕುಶಾಲನಗರ ಪಟ್ಟಣ ಪಂಚಾಯಿತಿ ಅಧ್ಯಕ್ಷ ಡಿ.ಕೆ ತಿಮ್ಮಪ್ಪ ಮಾತನಾಡಿ, ಪತ್ರಿಕಾ ರಂಗ ಸಮಾಜದಲ್ಲಿ ಉತ್ತಮ ಕೆಲಸ ಮಾಡುತ್ತಿದ್ದು, ಸಮಾಜದ ಹಾಗುಹೋಗುಗಳನ್ನು ಜನತೆಗೆ ತಿಳಿಸುವ ಕೆಲಸ ಮಡುತ್ತಿದೆ. ಸಮಾಜದ ಅಳಿವು ಉಳಿವುಗಳನ್ನು ಅರಿತು ಪತ್ರಕರ್ತರು ಕಾರ್ಯನಿರ್ವಹಿಸುವಂತೆ ಸಲಹೆ ಮಾಡಿದರು.

ಈ ಸಂದರ್ಭ ಸಯ್ಯಾದ್ ಇರ್ಫಾನ್, ಮಿಲನಾ ಭರತ್, ಬಿ.ಎನ್. ಪುಷ್ಪಾ, ಬಿ.ಎ. ಚಂದ್ರ, ಪಿ.ಎಸ್. ತೋಮಸ್, ಗಣೇಶ್, ಆರ್.ಎಸ್. ಕಾಶೀಪತಿ ಅವರನ್ನು ಸನ್ಮಾನಿಸಲಾಯಿತು.

ಬಳಿಕ ವಿದ್ಯಾರ್ಥಿಗಳಿಂದ ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆದವು.

ಕುಶಾಲನಗರ ಪ್ರೆಸ್‍ಕ್ಲಬ್ ಅಧ್ಯಕ್ಷ ರಘು ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದರು.ಪ್ರೆಸ್ ಕ್ಲಬ್‍ನ ಖಜಾಂಜಿ ಪ್ರಭುದೇವ್ ಸೇರಿದಂತೆ ಮತ್ತಿತರರು ಸಮಾರಂದಲ್ಲಿ ಪಾಲ್ಗೊಂಡಿದ್ದರು.

ಗ್ರಾಮದ ಅಭಿವೃದ್ಧಿಗೆ ಗ್ರಾಮಸ್ಥರ ಸಹಕಾರ ಅಗತ್ಯ: ಗ್ರಾ.ಪಂ ಅಧ್ಯಕ್ಷ ಮಣಿ ಅಭಿಮತ

ಸಿದ್ದಾಪುರ, ಜು.30- ಗ್ರಾಮದಲ್ಲಿ ಹಲವಾರು ಸಮಸ್ಯೆಗಳಿದ್ದು, ಶಾಶ್ವತವಾಗಿ ಬಗೆ ಹರಿಸಲು ಗ್ರಾಮಸ್ಥರ ಸಹಕಾರ ಅತ್ಯಗತ್ಯವಾಗಿದೆ ಎಂದು ಗ್ರಾ.ಪಂ ಅಧ್ಯಕ್ಷ ಎಂ.ಕೆ ಮಣಿ ಗ್ರಾಮಸ್ಥರಲ್ಲಿ ಮನವಿ ಮಾಡಿದರು.

ಗ್ರಾ.ಪಂ ಸಭಾಂಗಣದಲ್ಲಿ ನಡೆದ ಗ್ರಾಮ ಸಭೆಯ ಅಧ್ಯಕ್ಷತೆ ವಹಿಸಿ ಮಾತನಾಡಿದ ಅವರು, ನೂತನ ಆಡಳಿತ ಮಂಡಳಿಯಿಂದ ಗ್ರಾಮಸ್ಥರು ಹಲವು ಮೂಲ ಸೌಕರ್ಯಗಳನ್ನು ನಿರೀಕ್ಷಿಸುತ್ತಿದ್ದು, ಎಲ್ಲರ ಸಹಕಾರದೊಂದಿಗೆ ಮುಂದಿನ ದಿನಗಳಲ್ಲಿ ಶಾಶ್ವತವಾಗಿ ಸಮಸ್ಯೆಗಳನ್ನು ಬಗೆ ಹರಿಸಲು ಮುಂದಾಗುವುದಾಗಿ ಸಭೆಯ ಆರಂಭದಲ್ಲಿಯೇ ತಿಳಿಸಿದ ಅವರು, ಗ್ರಾಮದ ಅಭಿವೃದ್ಧಿಗಾಗಿ ಸಂಸದರು, ಶಾಸಕರು ಮತ್ತು ವಿಧಾನ ಪರಿಷತ್ ಸದಸ್ಯರುಗಳಿಂದ ಅನುದಾನ ಪಡೆದು ಮಾದರಿ ಗ್ರಾಮವನ್ನಾಗಿ ಮಾಡಲು ಚಿಂತಿಸಿದ್ದು, ಇಲ್ಲರೂ ಗ್ರಾಮದ ಅಭಿವೃದ್ಧಿ ಬಗ್ಗೆ ಅಗತ್ಯ ಸಲಹೆ ಸೂಚನೆಗಳನ್ನು ನೀಡಬೇಕೆಂದು ಹೇಳಿದರು.

ಸಭೆಯಲ್ಲಿ ಕಾಡಾನೆ ಹಾವಳಿ, ವಿದ್ಯುತ್ ಸಮಸ್ಯೆ, ಆಸ್ಪತ್ರೆಯಲ್ಲಿ ವೈದ್ಯರುಗಳ ಕೊರತೆ, ಆಂಬ್ಯುಲನ್ಸ್ ಸೇವೆ, ಶುಚಿತ್ವ, ಚರಂಡಿ ದುರಸ್ಥಿ, ಕಸ ವಿಲೇವಾರಿ, ರಸ್ತೆ ಅಗಲೀಕರಣ, ಶೌಚಾಲಯ, ಕುಡಿಯುವ ನೀರು ಸೇರಿದಂತೆ ಮೂಲ ಸೌಕರ್ಯಗಳನ್ನು ಒದಗಿಸಬೇಕೆಂದು ಗ್ರಾಮಸ್ಥರು ಒತ್ತಾಯಿಸಿದ್ದು ಕಂಡು ಬಂತು.

ಕಾರ್ಮಿಕ ಸಂಘಟನೆಯ ರಮೇಶ್ ಮಾತನಾಡಿ, ಕಾಡಾನೆ ಹಾವಳಿ ಮಿತಿಮೀರಿದ್ದು, ಸಾವು ನೋವುಗಳು ಹೆಚ್ಚಾಗಿ ಸಂಭವಿಸುತ್ತಿದೆ. ಕಾರ್ಮಿಕರು ಮತ್ತು ಶಾಲಾ ಮಕ್ಕಳು ಜೀವ ಭಯದಲ್ಲಿ ದಿನ ಕಳೆಯುತ್ತಿದ್ದಾರೆ. ಆನೆ ಹಾವಳಿಯನ್ನು ಶಾಶ್ವತವಾಗಿ ತಡೆಗಟ್ಟಬೇಕೆಂದರು.

ಅರಣ್ಯಾಧಿಕಾರಿ ದೇವಯ್ಯ ಮಾಹಿತಿ ನೀಡಿ, ಈಗಾಗಲೆ ಅರಣ್ಯ ಇಲಾಖೆಯಿಂದ ಸರ್ವೆ ಮಾಡಲಾಗಿದ್ದು, 65 ಕಾಡಾನೆಗಳು ತೋಟಗಳಲ್ಲಿ ಬೀಡು ಬಿಟ್ಟಿದೆ. ಒಟ್ಟಿಗೆ ಹಿಡಿಯಲು ಸಾದ್ಯವಾಗುತ್ತಿಲ್ಲ. ಸಮೀಪದ ಅವರೆಗುಂದದಿಂದ ಮತ್ತಿಕೋಡು ಮಾರ್ಗವಾಗಿ ಸೋಲಾರ್ ಬೇಲಿ ಮತ್ತು ರೈಲ್ವೆ ಕಂಬಿಗಳನ್ನು ಬಳಸಿ ಕಾಡಾನೆಗಳು ತೋಟಗಳಿಗೆ ಪ್ರವೇಶಿಸದಂತೆ ಕ್ರಮ ಕೈ ಗೊಳ್ಳಲು ಸರಕಾರಕ್ಕೆ 36 ಕೋಟಿಯ ಪ್ರಸ್ತಾವನೆ ಸಲ್ಲಿಸಲಾಗಿದೆ. ಈಗಾಗಲೆ 5 ಕೋಟಿಯ ಕಾಮಗಾರಿ ಪ್ರಾರಂಭಮಾಡಲಾಗಿದೆ ಎಂದ ಅವರು, ಕಾಡಾನೆಗಳನ್ನು ಕಾಡಿಗಟ್ಟಲು ತೋಟದ ಮಾಲಿಕರ ಸಹಕಾರ ಅಗತ್ಯವಾಗಿದ್ದು, ಮಾಲಿಕರು ಸಹಕರಿಸಬೇಕು ಎಂದರು.

ಬಿಜೆಪಿ ಸ್ಥಾನೀಯ ಸಮಿತಿ ಅಧ್ಯಕ್ಷ ವಿ. ಮನೋಹರ ಮಾತನಾಡಿ, ಈ ಭಗದ ಜನಪ್ರತಿನಿಧಿಗಳ ನಿರ್ಲಕ್ಷ್ಯದಿಂದ ಆಸ್ಪತ್ರೆ ಅವ್ಯವಸ್ಥೆಯಿಂದ ಕೂಡಿದ್ದು, ವೈದ್ಯರು, 108ರ ತುರ್ತು ವಾಹನ, ಡಿ ಗ್ರೂಪ್, ಶುಚಿತ್ವ ಸೇರಿದಂತೆ ರೋಗಿಗಳಿಗೆ ಮೂಲ ಸೌಕರ್ಯ ಸಿಗುತ್ತಿಲ್ಲ. ಇದರಿಂದ ಸಾಕಷ್ಟು ಸಾವು ನೋವುಗಳು ಸಂಭವಿಸುತ್ತಿದ್ದರೂ ಇತ್ತ ಕಡೆ ತಿರುಗಿಯೂ ನೋಡುತ್ತಿಲ್ಲ ಎಂದು ಆರೋಪಿಸಿದರು.

ಬೆಜೆಪಿ ಸ್ಥಾನೀಯ ಸಮಿತಿ ಪ್ರಧಾನ ಕಾರ್ಯದರ್ಶಿ ಪದ್ಮಯ್ಯ ಮಾತನಾಡಿ, ಚರಂಡಿಗಳು ಕಸದಿಂದ ಮುಚ್ಚಿ ಹೋಗಿದ್ದು, ಚರಂಡಿಯಲ್ಲಿ ಹರಿಯಬೇಕಾದ ಕೊಳಚೆ ನೀರು ರಸ್ತೆಯಲ್ಲಿ ಹರಿದಾಡುತ್ತಿದೆ ಇದರಿಂದ ಶಾಲಾ ವಿದ್ಯಾರ್ಥಿಗಳು ಹಾಗೂ ಸಾರ್ವಜನಿಕರಿಗೆ ತೊಂದರೆಯಾಗುತ್ತಿದೆ. ಸೊಳ್ಳೆಗಳು ಉತ್ಪತ್ತಿಯಾಗಿ ಸಾಂಕ್ರಾಮಿಕ ರೋಗಗಳು ಹರಡುತ್ತಿದೆ. ಕೂಡಲೆ ಚರಂಡಿಗಳ ದುರಸ್ಥಿ ಮಾಡಬೇಕೆಂದು ಒತ್ತಾಯಿಸಿದರು.

ಸ್ಥಳೀಯ ನಿವಾಸಿ ಅಜೀಜ್ ಮಾತನಾಡಿ, ಗ್ರಾ.ಪಂ ಗೆ ಹೆಚ್ಚು ಆದಾಯ ಸಿಗುವಂತ ಬಸ್ ನಿಲ್ಥಾಣದಲ್ಲಿರುವ ಮಳಿಗೆಗಳು ಕಳೆದ ಹಲವಾರು ವರ್ಷಗಳಿಂದಲೂ ಕಡಿಮೆ ಬಾಡಿಗೆ ನೀಡುತ್ತಿದ್ದು, ಇದರಿಂದ ಗ್ರಾ.ಪಂ ಗೆ ನಷ್ಟ ಉಂಟಾಗುತ್ತಿದೆ. ಅಂಗಡಿಯ ಕೆಲ ಮಾಲಿಕರು ಬೇರೆಯವರಿಗೆ ಹಸ್ತಾಂತರಿಸಿ ಹೆಚ್ಚು ಬಾಡಿಗೆ ಹಣ ವಸೂಲಿ ಮಾಡಿಕೊಳ್ಳುತ್ತಿದ್ದಾರೆ. ಮುಂದಿನ ದಿನಗಳಲ್ಲಿ ಮೂರು ವರ್ಷಕ್ಕೊಮ್ಮೆ ಹರಾಜು ಪ್ರಕ್ರಿಯೆ ಮಾಡಬೇಕೆಂದು ಸಲಹೆ ನೀಡಿದರು.

ಎಸ್‍ಡಿಪಿಐ ಪಕ್ಷದ ಮುಸ್ತಫ ಮಾತನಾಡಿ, ಸಿದ್ದಾಪುರ ಸುತ್ತ ಮುತ್ತಲಿನಲ್ಲಿ ಕಾರ್ಮಿಕರ ಮಕ್ಕಳೇ ಹೆಚ್ಚಾಗಿದ್ದು, ಹೆಚ್ಚಿನ ವಿದ್ಯಾಭ್ಯಾಸಕ್ಕಾಗಿ ದೂರದ ಊರುಗಳಿಗೆ ತೆರಳಿ ಕಲಿಯಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದ್ದು, ಕೆಲ ವಿದ್ಯಾರ್ಥಿಗಳು ಶಿಕ್ಷಣದಿಂದ ವಂಚಿತರಾಗಿ ತೋಟಗಳಲ್ಲಿ ಕೆಲಸ ಮಾಡುವಂತಾಗಿದೆ. ಸಿದ್ದಾಪುರದಲ್ಲಿ ಸರಕಾರಿ ಪದವಿ ಕಾಲೇಜು ಪ್ರಾರಂಭ ಮಾಡಬೇಕೆಂದು ಹೇಳಿದ ಅವರು, ಶಾಲೆ ಹಾಗೂ ಜನವಸತಿ ಪ್ರದೇಶಗಳಲ್ಲಿ ಮೊಬೈಲ್ ಟವರ್‍ಗಳಿದ್ದು, ಇದರಿಂದ ಶಾಲಾ ವಿದ್ಯಾರ್ಥಿಗಳು ಸೇರಿದಂತೆ ಮಕ್ಕಳ ದುಷ್ಪಪರಿಣಾಮ ಬೀರುತ್ತಿದೆ. ಕಳೆದ ಹಲವಾರು ವರ್ಷಗಳಿಂದಲೂ ಗ್ರಾ.ಪಂ ಹಲವು ಬಾರಿ ದೂರು ನೀಡಿದರೂ ಮೊಬೈಲ್ ಟವರ್‍ಗಳನ್ನು ತೆರವುಗಳಿಸಲು ಮುಂದಾಗಿಲ್ಲ. ಕೂಡಲೆ ತೆರವುಗೊಳಿಸಬೇಕು. ಸಿದ್ದಾಪುರ ಮಾರ್ಗವಾಗಿ ತೆರಳುತ್ತಿದ್ದ 10ಕ್ಕೂ ಹೆಚ್ಚು ಸರಕಾರಿ ಬಸ್ ಸೇವೆ ಸ್ಥಗಿತಗೊಂಡಿದ್ದು, ಸಾರ್ವಜನಿಕರಿಗೆ ಮತ್ತು ಶಾಲಾ ವಿದ್ಯಾರ್ಥಿಗಳಿಗೆ ತೊಂದರೆ ಉಂಟಾಗುತ್ತಿದೆ ಬಸ್‍ಗಳನ್ನು ಪುನರಾರಂಭಿಸಬೇಕೆಂದರು.

ಕರಡಿಗೋಡು ನಿವಾಸಿ ನಾಣಯ್ಯ ಮಾತನಾಡಿ, ಗ್ರಾಮದ ರಸ್ತೆ ಬದಿಗಳಲ್ಲಿ ಕಸದ ರಾಶಿಗಳಿದ್ದು, ದುರ್ವಾಸನೆ ಬೀರುತ್ತಿದೆ. ಕರಡಿಗೋಡು ಗ್ರಾಮಕ್ಕೆ ತೆರಳುವ ರಸ್ತೆ ಬದಿಯಲ್ಲಿ ಚರಂಡಿ ಇಲ್ಲದೆ ರಸ್ತೆ ಮೇಲೆ ಕೊಳಚೆ ನೀರು ಹರಿಯುತ್ತಿದ್ದು, ರಸ್ತೆ ಹದೆಗೆಟ್ಟಿದೆ. ಕೂಡಲೆ ಸರಪಡಿಸಬೇಕೆಂದರು.

ಗುಹ್ಯ ಗ್ರಾಮದ ನಿವಾಸಿ ಜಾನ್ಸನ್ ಮಾತನಾಡಿ, ಚೆಸ್ಕಾಂ ಇಲಾಖೆಯಿಂದ ವಿದ್ಯುತ್ ಸರಿಯಾಗಿ ಪೂರೈಕೆಯಾಗದೆ ಹಲವೆಡೆ ಗ್ರಾಮಸ್ಥರು ತೊಂದರೆಗೆ ಒಳಗಾಗಿದ್ದು, ಇದರಿಂದ ಕುಡಿಯುವ ನೀರಿನ ಸಮಸ್ಯೆ ಎದುರಾಗುತ್ತಿದೆ ಕೂಡಲೆ ವಿದ್ಯುತ್ ಸಮಸ್ಯೆ ಸರಿಪಡಿಸಬೇಕೆಂದರು.

ಅಭಿವೃದ್ಧಿ ಅಧಿಕಾರಿ ತಿಮ್ಮಯ್ಯ ಸಭೆಗೆ ಮಾಹಿತಿ ನೀಡಿ, ಈಗಾಗಲೆ ಸರಕಾರದಿಂದ ವಿವಿಧ ಯೋಜನೆಗಳ ಮೂಲಕ 36 ಮನೆಗಳು ಮಂಜೂರಾತಿಯಾಗಿದ್ದು, ಅರ್ಹ ಫಲಾನುಭವಿಗಳಿಗೆ ನೀಡಲು ಗ್ರಾ.ಪಂ ಮುಂದಾಗಿದೆ. ಕರಡಿಗೋಡು, ಗುಹ್ಯ ಮತ್ತು ಸಿದ್ದಾಪುರ ಭಾಗದಲ್ಲಿ ಹಲವಾರು ಏಕರೆ ಪೈಸಾರಿ ಜಾಗಗಳನ್ನು ಗುರುತಿಸಿದ್ದು, ಸರ್ವೆ ಕಾರ್ಯ ನಡೆಯುತ್ತಿದ್ದು, ಮುಂದಿನ ದಿನಗಳಲ್ಲಿ ಕಸ ವಿಲೇವಾರಿ, ಸ್ಮಶಾನ ಸೇರಿದಂತೆ ನಿವೇಶನ ರಹಿತರಿಗೆ ಹಂಚಲು ಆದ್ಯತೆ ನೀಡಲಾಗುವುದು ಎಂದರು.

ನೋಡೆಲ್ ಅಧಿಕಾರಿ ಡಾ. ತಮ್ಮಯ್ಯ ಸೇರಿದಂತೆ ವಿವಿಧ ಇಲಾಖಾಧಿಕಾರಿಗಳು ಹಾಗೂ ಗ್ರಾಮಸ್ಥರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿದ್ದು ವಿಶೇಷವಾಗಿತ್ತು.

ಸಭೆಯಲ್ಲಿ ಗ್ರಾ.ಪಂ ಉಪಾಧ್ಯಕ್ಷೆ ರಾಜೇಶ್ವರಿ, ತಾ.ಪಂ ಸದಸ್ಯ ಜಾನ್ಸನ್ ಮತ್ತು ಗ್ರಾ.ಪಂ ಸದಸ್ಯರುಗಳು ಹಾಜರಿದ್ದರು.

ನಾಲ್ಕು ಎಕರೆ ಕಬ್ಬು ನಾಶಗೊಳಿಸಿದ ರೈತ

ಮಳವಳ್ಳಿ, ಜು.30-ರೈತನೊಬ್ಬ ಎರಡು ಟ್ಯಾಕ್ಟರ್‍ನಿಂದ ನಾಲ್ಕು ಎಕರೆ ಕಬ್ಬನ್ನು ನಾಶ ಮಾಡಿರುವ ಘಟನೆ ತಾಲ್ಲೂಕಿನ ನೆಲ್ಲೂರು ಗ್ರಾಮದಲ್ಲಿ ನಡೆದಿದೆ.

ತಾಲ್ಲೂಕಿನ ನೆಲ್ಲೂರು ಗ್ರಾಮದ ನಾಗರಾಜು ಎಂಬ ರೈತನೇ ಕಬ್ಬನ್ನು ನಾಶ ಮಾಡಿಕೊಂಡನಾಗಿದ್ದು, ಈಗಾಗಲೇ ಕಬ್ಬಿಗೆ ಸೂಕ್ತ ಬೆಲೆ ಸಿಗದ ಕಾರಣ ಕಳೆದ ಐದು ತಿಂಗಳುನಿಂದ ಬೆಳೆದ ಕಬ್ಬಿಗೆ ಸರಿಯಾದ ಬೆಲೆ ಸಿಗುವುದಿಲ್ಲ ಜೊತೆಗೆ ಬೆಳೆಯುವ ಕಬ್ಬಿನ ನಿರ್ವಹಣೆ ಕಷ್ಟವಾಗುತ್ತದೆ ಎಂದು ಅರಿತು ಗದ್ದೆಯಲ್ಲಿ ಬೆಳೆಯಲಾಗುತ್ತಿದ್ದ ಬೆಳೆಗಳನ್ನು ಪೂಜ್ಯ ಭಾವನೆಯಲ್ಲಿ ಕಾಣುತ್ತಿದ್ದ ರೈತ ಇಂದು ಸ್ವತಃ ಮುಂದೆ ನಿಂತು ತಾನು ಬೆಳೆದಿದ್ದ ನಾಲ್ಕು ಎಕರೆ ಯಷ್ಟು ಕಬ್ಬು ಯನ್ನು ಎರಡು ಟ್ಯಾಕ್ಟರ್ ನಿಂದ ನಾಶ ಪಡಿಸುತ್ತಿದ್ದಾನೆ. ಇದು ರೈತನ ಆಕ್ರೋಶದ ಪ್ರತಿಭಟನೆಯ ಸಂಕೇತವಾಗಿದೆ.

ಈಗಗಲೇ 90 ಸಾವಿರ ರೂಗಳನ್ನು ಸಾಲಮಾಡಿ ವ್ಯವಸಾಯಕ್ಕೆ ಖರ್ಚುಮಾಡಿದ್ದು, ಬೆಳೆದಿದ್ದ ಬೆಳೆಗೆ ನೀರಿಲ್ಲದೇ ಕಬ್ಬು ಒಣಗುತ್ತಿರುವುದು ಒಂದಡೆಯಾದರೆ ಕಬ್ಬಿಗೆ ವೈಜ್ಞಾನಿಕ ಬೆಳೆ ಸಿಗದಿರುವುದು ಮತ್ತೊಂದು ಸಮಸ್ಯೆಯಿಂದ ಕಬ್ಬು ನಾಶ ಪಡಿಸುತ್ತಿರುವುದಾಗಿ ರೈತ ತನ್ನ ಆಳಲನ್ನು ತೊಡಿಕೊಂಡಿದ್ದಾರೆ.

ಆಗಸ್ಟ್ 10 ರಿಂದ ಅನಿರ್ದಿಷ್ಟಾವಧಿ ಮುಷ್ಕರ

ಮಳವಳ್ಳಿ, ಜು.30- ರೈತರ ವಿವಿಧ ಬೇಡಿಕೆಗಳನ್ನು ಈಡೇರಿಸಲು ಒತ್ತಾಯಿಸಿ ಆಗಸ್ಟ್ 10 ರಿಂದ ಅನಿರ್ದಿಷ್ಟಾವಧಿ ಮುಷ್ಕರ ಮಾಡುವುದಾಗಿ ಸಿಪಿಐ(ಎಂ) ತಾಲ್ಲೂಕು ಕಾರ್ಯದರ್ಶಿ ದೇವಿ ತಿಳಿಸಿದರು.

ಪಟ್ಟಣದ ಸಿಪಿಐ(ಎಂ) ಕಚೇರಿಯಲ್ಲಿ ಪತ್ರಿಕಾ ಗೋಷ್ಠಿ ನಡೆಸಿ ಮಾತನಾಡಿ ರೈತರು ಕಷ್ಟಪಟ್ಟು ಬೆಳೆದ ಬೆಳಗಳಿಗೆ ಸೂಕ್ತ ಬೆಲೆ ಸಿಗದೆ ಸಂಕಷ್ಟದಲ್ಲಿ ಜೀವನ ನಿರ್ವಹಣೆ ಮಾಡುತ್ತಿದ್ದು, ಕೆಲವರು ಸಾಲದ ಬಾದೆಗೆ ಹೆದರಿ ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದರೂ ರಾಜ್ಯ ಸರ್ಕಾರ ಯಾವುದಕ್ಕೂ ತಲೆ ಕೆಡಿಸಿಕೊಳ್ಳದೆ ಸತ್ತ ರೈತರ ಕುಟುಂಬಗಳಿಗೆ ಹತ್ತರಿಂದ ಇಪ್ಪತ್ತು ಸಾವಿರ ಹಣ ಕೊಟ್ಟು ಕೈತೊಳೆದುಕೊಳ್ಳುತ್ತಿದೆ ಇದರಿಂದ ಯಾವುದೇ ಪ್ರಯೋಜನವಾಗದೆ ರೈತರು ಕಂಗಾಲಗಿದ್ದು ಕೂಡಲೇ ಸರ್ಕಾರ ಎಚ್ಚೆತ್ತು ರೈತರು ಬೆಳಯುವ ಕಬ್ಬು,ಭತ್ತ,ರೇಷ್ಮೆ ಹಾಗೂ ಹೈನುಗಾರಿಕೆಯ ಹಾಲು ಉತ್ಪಾದನೆಗಳಿಗೆ ಸೂಕ್ತ ಬೆಲೆ ನಿಗದಿ ಪಡಿಸದಿದ್ದರೆ ಆ,10 ರಿಂದ ತಾಲೂಕು ಕಚೇರಿ ಮುಂಭಾಗ ಅನಿರ್ದಿಷ್ಟಾವದಿ ಧರಣಿ ಹಾಗೂ ಆ,14 ರಂದು ರಾತ್ರಿ ಮಂಡ್ಯ ಜಿಲ್ಲಾಧಿಕಾರಿಗಳ ಕಚೇರಿ ಮುಂಭಾಗ ಪಂಜಿನ ಮೆರವಣಿಗೆ ನಡೆಸಲಾಗುವುದು ಎಂದು ತಿಳಿಸಿದರು.

ಪ್ರಾಂತ ರೈತ ಸಂಘದ ಮುಖಂಡ ಭರತ್‍ರಾಜ್, ತಿಮ್ಮೇಗೌಡ,ಮಹದೇವಮ್ಮ,ಸುಶೀಲಾ,ಸುನಿತಾ ಇದ್ದರು.

ಪುಲುವಾರಿ ಅನಾಥಾಲಯಕ್ಕೆ ಸಂಗ್ರಹಿತ ಹಣ ನೀಡಿಕೆ

ಮೈಸೂರು.ಜು.30-ನಾಳೆ ಪ್ರತಿಷ್ಟಿತ ಬಿಗ್ ಬಜಾರ್ ನಲ್ಲಿ ಆಯಾಜಿಸಲಾಗಿರುವ 72 ನೇ ಅನ್ನಸಂತರ್ಪಣೆ ಸಂದರ್ಭದಲ್ಲಿ ಸಂಗ್ರಹವಾಗುವ ಹಣವನ್ನು ನಗರದ ಅಶೋಕ ರಸ್ತೆಯ ಪಶ್ಚಿಮ 19 ನೇ ಅಡ್ಡ ರಸ್ತೆಯಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಪುಲುವಾರಿ ಬಾಲಕಿಯರ ಅನಾಥಾಲಯಕ್ಕೆ ನೀಡಲಾಗುವುದೆಂದು ಬಿಗ್ ಬಜಾರ್ ನ ಅಸಿಸ್ಟೆಂಟ್ ಸ್ಟೋರ್ ವ್ಯವಸ್ಥಾಪಕ ಮುರುಳೀಧರ್ ತಿಳಿಸಿದರು.

ಅವರು ಇಂದು ಬಿಗ್ ಬಜಾರ್ ನಲ್ಲಿ ಕರೆಯಲಾಗಿದ್ದ ಪತ್ರಿಕಾಗೋಷ್ಟಿಯಲ್ಲಿ ಮಾತನಾಡುತ್ತಾ ಬಿಗ್ ಬಜಾರ್ ಸಂಸ್ಥೆಯು ಸಮಾಜದಲ್ಲಿ ಆರ್ಥಿಕವಾಗಿ ಮತ್ತು ಸಾಮಾಜಿಕವಾಗಿ ಹಿಂದುಳಿದ ವರ್ಗದವರ ಒಳಿತಿಗಾಗಿ ಶ್ರಮಿಸುತ್ತಿದೆ. ಈ ದಿಸೆಯಲ್ಲಿ ನಾಳೆ ನಡೆಯಲಿರುವ ಅನ್ನಸಂತರ್ಪಣೆ ಕಾರ್ಯಕ್ರಮ ಏರ್ಪಡಿಸಲಾಗಿದ್ದು ನಾಳೆ ಬಿಗ್ ಬಜಾರ್ ನಲ್ಲಿ ವ್ಯಾಪಾರ ಮಾಡುವ ಗ್ರಾಹಕರು ತಮ್ಮ ಇಚ್ಛಾನುಸಾರ ಹಣವನ್ನು ದಾನ ಮಾಡಬಹುದಾಗಿದೆ ಎಂದು ಮುರುಶೀಧರ್ ಹೇಳಿದರು.

ಈ ಸಂದರ್ಭದಲ್ಲಿ ಹಾಜರಿದ್ದ ಅನಾಥಾಲಯದ ಅಕೌಂಟೆಂಟ್ ಅಸ್ಟಾಕ್ ಅಹಮದ್ ಮಾತನಾಡಿ ಈ ಅನಾಥಾಲಯವು 1906 ರಲ್ಲಿ ಸ್ಥಾಪನೆಗೊಂಡು ಇದರಲ್ಲಿ 7 ವರ್ಷ ವಯೋಮಾನದ ಮುಸ್ಲಿಂ ಬಾಲಕರಿಗೆ ವಿದ್ಯಾಬ್ಯಾಸ, ಪ್ರಾಥಮಿಕ ಶಿಕ್ಷಣ, ಕಸೂತಿ, ಕಂಪ್ಯೂಟರ್ ಶಿಕ್ಷಣ ಸೇರಿದಂತೆ ಇನ್ನಿತರ ಚಟುವಟಿಕೆಗಳ ಬಗ್ಗೆ ತರಬೇತಿ ನೀಡಲಾಗುವುದು. ಇದಲ್ಲದೆ ಬಾಲಕಿಯರು ಹೆಚ್ಚುವರಿ ವಿದ್ಯಾಬ್ಯಾಸ ಬಯಸಿದಲ್ಲಿ ಅದಕ್ಕೂ ಸಹಕರಿಸುವುದಾಗಿ ಹೇಳಿದರಲ್ಲದೆ ಅನಾಥಾಲಯದಲ್ಲಿ ವಾಸ್ತವ್ಯ ಮಾಡಿರುವ ವಿದ್ಯಾರ್ಥಿನಿಯರ ಮದುವೆ ಆಗುವವರೆಗೂ ಅವರ ಎಲ್ಲಾ ಜವಾಬ್ದಾರಿಯನ್ನು ಅನಾಥಾಲಯವೇ ನೋಡಿಕೊಳ್ಳಲಿದೆ ಎಂದರು. ಹಾಲಿ ಅನಾಥಾಲಯದಲ್ಲಿ 186 ಮಂದಿ ಮುಸ್ಲಿಂ ಮಕ್ಕಳು ವಾಸ್ತವ್ಯ ಮಾಡಿರುತ್ತಾರೆ. ಇಂದಿನವರೆಗೆ ಅನಾಥಾಲಯದ ವತಿಯಿಂದ 329 ಮಂದಿ ಹೆಣ್ಣು ಮಕ್ಕಳಿಗೆ ಮದುವೆಯನ್ನು ಸಹಾ ಮಾಡಿಕೊಡಲಾಗಿದೆ ಎಂದು ಅಸ್ಟಾಕ್ ಅಹಮದ್ ವಿವರ ನೀಡಿದರು.

ಸುದ್ಧಿಗೋಷ್ಟಿಯಲ್ಲಿ ಬಿಗ್ ಬಜಾರ್ ನ ಗ್ರಾಹಕರ ಸೇವಾ ವಿಭಾಗದ ಡೆಸ್ಕ್ ವ್ಯವಸ್ಥಾಪಕ ನಂದಕುಮಾರ್, ಪುಲುವಾರಿ ಅನಾಥಾಲಯದ ಸಹಾಯಕ ಮಹಮದ್ದ್ ಮುಜಾಹಿಲ್ಲಾ ಉಪಸ್ಥಿತರಿದ್ದರು.

ಕಲಾಂ ನಿಧನಕ್ಕೆ ಜನಪರ ವೇದಿಕೆಯಿಂದ ಶ್ರದ್ಧಾಂಜಲಿ

ಪಾಂಡವಪುರ;ಜ.30- ಮಾಜಿ ರಾಷ್ಟ್ರಪತಿ, ಭಾರತ ರತ್ನ ಡಾ.ಎಪಿಜೆ ಅಬ್ದುಲ್ ಕಲಾಂ ಅವರ ನಿಧನಕ್ಕೆ ತಾಲ್ಲೂಕು ಜನಪರ ವೇದಿಕೆಯಿಂದ ಶ್ರದ್ಧಾಂಜಲಿ ಸಲ್ಲಿಸಲಾಯಿತು.

ಪಟ್ಟಣದ ಐದು ದೀಪದ ವೃತ್ತದಲ್ಲಿ ಕಲಾಂ ಅವರ ಬೃಹತ್ ಕಟೌಟ್‍ಗೆ ಪೂಜೆ ಸಲ್ಲಿಸಿದ ವೇದಿಕೆ ಪದಾಧಿಕಾರಿಗಳು ನಂತರ ಪುಷ್ಪಾರ್ಚನೆ ಸಲ್ಲಿಸಿದರು.

ನಂತರ ವೇದಿಕೆಯ ಪ್ರಧಾನ ಪೋಷಕರಾದ ಡೈರಿ ಹುಚ್ಚೇಗೌಡರು ಮಾತನಾಡಿ ಕಲಾಂ ಅವರು ಈ ದೇಶದ ದೊಡ್ಡ ಆಸ್ತಿ ಅವರು ರಾಷ್ಟ್ರಪತಿಯಾಗಿ ರಾಷ್ಟ್ರಪತಿ ಭವನ ಪ್ರವೇಶಿಸಿದಾಗ ಕೇವಲ ಒಂದು ಸೂಟ್‍ಕೇಸ್ ಬಟ್ಟೆಗಳನ್ನು ತಂದಿದ್ದರು. ನಂತರ ರಾಷ್ಟ್ರಪತಿ ಭವನ ಬಿಟ್ಟಾಗಲೂ ಒಂದೇ ಸೂಟ್‍ಕೇಸ್ ಹಿಡಿದು ವಾಪಸ್ ಹೋದಂತಹ ಅತ್ಯಂತ ಪ್ರಾಮಾಣಿಕ ಜನನಾಯಕರಾಗಿದ್ದವರು ಎಂದು ಶ್ಲಾಘಿಸಿದರು. ಕಾರ್ಯಾಧ್ಯಕ್ಷ ನಜೀರ್ ಅಹಮದ್ ಮಾತನಾಡಿ ಅತ್ಯಂತ ಬಡತನದಲ್ಲಿ ಹುಟ್ಟಿದ ಕಲಾಂ ಸರ್ ದಿನಪತ್ರಿಕೆ ಹಂಚುವ ಮೂಲಕ ತಮ್ಮ ವಿದ್ಯಾಭ್ಯಾಸಕ್ಕೆ ಹಣ ಕ್ರೂಢೀಕರಿಸಿಕೊಂಡು ದೇಶದ ಅತ್ಯಂತ ಮೇಧಾವಿ ವಿಜ್ಞಾನಿಯಾಗಿ ಕ್ಷಿಪಣಿಗಳ ಜನಕರಾಗಿ ದೇಶದ ರಾಷ್ಟ್ರಪತಿಯಂತಹ ಅತ್ಯುನ್ನತ ಹುದ್ದೆಯನ್ನು ಅಲಂಕರಿಸಿದವರು. ಇವರ ಸಾವಿನಿಂದ ದೇಶ ಒಬ್ಬ ಮಾರ್ಗದರ್ಶಕನನ್ನು ಕಳೆದುಕೊಂಡಿದೆ ಎಂದು ಸಂತಾಪ ವ್ಯಕ್ತಪಡಿಸಿದರು.

ವೇದಿಕೆ ಅಧ್ಯಕ್ಷ ಜಯಕುಮಾರ್, ಕಾರ್ಯದರ್ಶಿ ಮರಿಸ್ವಾಮಿಗೌಡ ಉಪಾಧ್ಯಕ್ಷರಾದ ಎನ್.ಇಂದ್ರಮ್ಮ, ಚುಂಚೇಗೌಡ, ಸೀತಾರಾಮು ವಕೀಲರಾದ ಕಣಿವೆ ಯೋಗೇಶ್, ರವೀಂದ್ರಕುಮಾರ್, ರಾಮಮೂರ್ತಿ, ಎಂ.ಮಂಜುನಾಥ್, ಗುಣಶೇಖರ್, ದಳವಾಯಿಗೌಡ, ಪಟೇಲ್ ಚಲುವೇಗೌಡ, ಮಹಾದೇವ, ನಾರಾಯಣಗೌಡ, ಕುಮಾರ್, ಪ್ರಕಾಶ್, ವಿಶ್ವನಾಥ್, ನಟರಾಜ್, ಭರತ್, ಸೇರಿದಂತೆ ಹಲವರು ಭಾಗವಹಿಸಿದ್ದರು.

ರೈತರ ಹೆಸರಲ್ಲಿ ರಮ್ಯ ರಾಜಕೀಯ - ಆರೋಪ

ಪಾಂಡವಪುರ:ಜು: 30- ಕಳೆದ ಭಾರಿಯ ಲೋಕಸಭಾ ಚುನಾವಣೆಯಲ್ಲಿ ಸೋತು ಹತಾಶೆಯಿಂದ ಮಂಡ್ಯವನ್ನು ಬಿಟ್ಟುಹೋಗಿದ್ದ ಮಾಜಿ ಸಂಸದೆ ರಮ್ಯಾ ಅವರು ಇದೀಗ ದಿಢೀರ್‍ನೆ ಮಂಡ್ಯದಲ್ಲಿ ರೈತರ ಮನೆಗೆ ಭೇಟಿಕೊಡುವ ಮೂಲಕ ರೈತರ ಹೆಸರಿನಲ್ಲಿ ರಾಜಕೀಯ ಮಾಡಲು ಹೊರಟಿದ್ದಾರೆ ಎಂದು ಜೆಡಿಎಸ್ ರಾಜ್ಯ ಉಪಾಧ್ಯಕ್ಷ ಕ್ಯಾತನಹಳ್ಳಿ ಗವೀಗೌಡ ಪ್ರವೀಣ್ ಆರೋಪಿಸಿದ್ದಾರೆ.

ಮಂಡ್ಯದಲ್ಲಿ ಮೊದಲ ಬಾರಿ ಸಂಸದೆಯಾಗಿ ಆಯ್ಕೆಯಾದ ಅವರು ಜಿಲ್ಲಾಧ್ಯಂತ ಪ್ರವಾಸ ಮಾಡಿ ನಾನು ಮಂಡ್ಯದಲ್ಲೇ ನೆಲೆಸಿ ಜನರ ಕಷ್ಟಕ್ಕೆ ಸ್ಪಂಧಿಸುತ್ತೇನೆ ಎನ್ನುವ ಮಾತುಗಳನ್ನಾಡಿ ಜನರನ್ನು ನಂಬಿಸಿದರು. ಆದರೆ, ಎರಡನೇ ಬಾರಿಗೆ ಸೋತಾಗ ಅದೇ ರಮ್ಯಾ ಹೇಳದೆ ಕೇಳದೆ ಮಂಡ್ಯದಿಂದ ಖಾಲಿ ಮಾಡಿದರು. ಆದಾದ ಬಳಿಕ ಮಂಡ್ಯಕಡೆ ತಲೆಯನ್ನೇ ಹಾಕಲಿಲ್ಲ. ಆದರೆ ಇದೀಗ ಆತ್ಮಹತ್ಯೆ ಮಾಡಿಕೊಂಡ ರೈತರ ಮನೆಗಳಿಗೆ ಭೇಟಿ ಕೊಡುವ ಮೂಲಕ ರೈತರ ಸಾವಿನ ಮನೆಯ ಮೂಲಕ ಮತ್ತೆ ರಾಜಕೀಯ ಮಾಡಲು ಹೊರಟಿದ್ದಾರೆ ಎಂದು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ಆದರೆ, ಜೆಡಿಎಸ್‍ನ ರಾಷ್ಟ್ರೀಯ ಅಧ್ಯಕ್ಷರು ಹಾಗೂ ಮಾಜಿ ಪ್ರಧಾನಿಗಳು ನಮ್ಮ ನಾಯಕರು ಆದ ಎಚ್.ಡಿ.ದೇವೇಗೌಡ ಮತ್ತು ಮಾಜಿ ಮುಖ್ಯಮಂತ್ರಿ ಎಚ್.ಡಿ ಕುಮಾರಸ್ವಾಮಿಯವರು ಅಂದಿನಿಂದಲೂ ರೈತ ರಪರವಾದ ಕೆಲಸಗಳು, ಹೋರಾಟಗಳನ್ನು ಮಾಡುವ ಮೂಲಕ ರೈತರ ಸಮಸ್ಯೆಗಳನ್ನು ಆಲಿಸುತ್ತಿದ್ದಾರೆ. ರಮ್ಯಾ ಅವರು ಒಮ್ಮೇ ಸೋತನಂತರ ಮಂಡ್ಯವೇ ಬೇಡ ಎಂದು ಹೋಗಿ ರೈತರು ಆತ್ಮಹತ್ಯೆ ಮಾಡಿಕೊಂಡ ತಿಂಗಳು ಬಿಟ್ಟು ಬಂದು ಅವರ ಕುಟುಂಬಕ್ಕೆ ಸಾಂತ್ವಾನ ಹೇಳಲು ಹೊರಟಿದ್ದಾರೆ. ರೈತರ ಹೆಸರಿನಲ್ಲಿ ರಾಜಕೀಯ ಮಾಡುವ ಕೆಟ್ಟ ರಾಜಕಾರಣಯಕ್ಕೆ ಜೆಡಿಎಸ್ ಎಂದಿಗೂ ಹೋಗಲ್ಲ. ನಿಮಗೆ ರೈತರ ಬಗ್ಗೆ ಅಷ್ಟೊಂದು ಕಾಳಜಿ ಇದ್ದರೆ ರಾಜ್ಯದಲ್ಲಿ ನಿಮ್ಮದೇ ಕಾಂಗ್ರೆಸ್ ಸರಕಾರ ಆಡಳಿತದಲ್ಲಿದೆ ಕಬ್ಬಿಗೆ ಸೂಕ್ತ 3500 ಬೆಲೆ ನಿಗಧಿಗೊಳಿಸಿ ಮತ್ತು ಕಾರ್ಖಾನೆಗಳು ಬಾಕಿ ಉಳಿಸಿಕೊಂಡಿರುವ ಹಣವನ್ನು ಕೊಡಿಸಿ ಆ ಮೇಲೆ ರೈತರ ಬಗ್ಗೆ ಮಾತನಾಡಿ ಅಲ್ಲಿಯ ವರೆಗೆ ನಿಮಗೆ ರೈತರು ಬಗ್ಗೆ ಮಾತನಾಡುವ ಯಾವದೇ ನೈತಿಕ ಹಕ್ಕಿಲ್ಲ ಎಂದು ಕ್ಯಾತನಹಳ್ಳಿ ಗವೀಗೌಡ ಪ್ರವೀಣ್ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ವಿಜೃಂಭಣೆಯ ಸ್ವಾಂತತ್ರ್ಯ ದಿನಾಚರಣೆ ಆಚರಿಸಲು ನಿರ್ಧಾರ

ಪಾಂಡವಪುರ: ಜು. 30- ಪಟ್ಟಣದ ಪಾಂಡವ ಕ್ರೀಡಾಂಗಣದಲ್ಲಿ ಆ. 15ರಂದು ಶನಿವಾರ ಪ್ರತಿ ವರ್ಷದಂತೆ ಈ ವರ್ಷವೂ ಸ್ವಾತಂತ್ರ್ಯ ದಿನಾಚರಣೆಯನ್ನು ಬಹಳ ವಿಜೃಂಭಣೆಯಿಂದ ಆಚರಿಸಲು ನಿರ್ಧರಿಸಲಾಯಿತು.

ಪಟ್ಟಣದ ತಾಲ್ಲೂಕು ಪಂಚಾಯಿತಿ ಸಭಾಂಗಣದಲ್ಲಿ ತಾಲ್ಲೂಕು ಅಡಳಿತ, ರಾಷ್ಟ್ರೀಯ ಹಬ್ಬಗಳ ಅಚರಣಾ ಸಮಿತಿಯಿಂದ ಶಾಸಕ ಕೆ.ಎಸ್.ಪುಟ್ಟಣ್ಣಯ್ಯ ಅವರ ಅಧ್ಯಕ್ಷತೆಯಲ್ಲಿ ನಡೆದ ಸ್ವಾತಂತ್ರ್ಯ ದಿನಾಚರಣೆಯ ಪೂರ್ವಭಾವಿ ಸಭೆಯಲ್ಲಿ ಈ ತೀರ್ಮಾನ ಕೈಗೊಳ್ಳಲಾಯಿತು.

ಅಂದು ಬೆಳಗ್ಗೆ 8 ಗಂಟೆಗೆ ಎಂದಿನಂತೆ ಪಟ್ಟಣದ ಮಿನಿ ವಿಧಾನಸೌಧದ ಆವರಣದಿಂದ ವಿವಿಧ ಶಾಲಾ-ಕಾಲೇಜುಗಳ ವಿದ್ಯಾರ್ಥಿಗಳ ಮೆರವಣಿಗೆ (ವಿವಿಧ ಜನಪದ ಕಲಾ ತಂಡಗಳು, ಸ್ತಬ್ದಚಿತ್ರಗಳೊಂದಿಗೆ) ಚಾಲನೆ ನೀಡಿದ ಬಳಿಕ ಪಟ್ಟಣದ ಪ್ರಮುಖ ಬೀದಿಗಳಲ್ಲಿ ಸಂಚರಿಸಿ, ಪುರಸಭೆ ಮೂಲಕ ಪಾಂಡವ ಕ್ರೀಡಾಂಗಣಕ್ಕೆ ಮೆರವಣಿಗೆ ತೆರಳುವುದು. ಅಲ್ಲಿ ಬೆಳಗ್ಗೆ 9 ಗಂಟೆಗೆ ಉಪವಿಭಾಗಾಧಿಕಾರಿ ಡಾ. ಎಚ್.ಎಲ್.ನಾಗರಾಜು ಅವರಿಂದ ರಾಷ್ಟ್ರ ಧ್ವಜಾರೋಹಣ ನೆರವೇರಿಸಿ ಧ್ವಜ ವಂದನೆ ಸ್ವೀಕರಿಸಿದ ಬಳಿಕ ಸ್ವಾತಂತ್ರ್ಯೋತ್ಸವ ಕುರಿತಂತೆ ಅವರು ಸಂದೇಶ ನೀಡಲಿದ್ದಾರೆ. ಬಳಿಕ ಶಾಲಾ ಮಕ್ಕಳಿಂದ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ನಡೆಸಲು ನಿರ್ಧರಿಸಲಾಯಿತು.

ಸ್ವಾತಂತ್ರ್ಯ ಹೊರಾಟಗಾರರಿಗೆ ಸನ್ಮಾನ:- ಸ್ವಾತಂತ್ರ್ಯ ದಿನಾಚರಣೆಯಲ್ಲಿ ಹಿರಿಯ ಸ್ವಾತಂತ್ರ್ಯ ಹೋರಾಟಗಾರರು ಹಾಗೂ ಮಾಜಿ ಯೋಧರು ಸೇರಿದಂತೆ ಹಲವರನ್ನು ಸನ್ಮಾನಿಸಲು ಸಭೆಯಲ್ಲಿ ತೀರ್ಮಾನಿಸಲಾಯಿತು. ಯಾವುದೇ ತೊಂದರೆ ಹಾಗೂ ಕೊರತೆ ಇಲ್ಲದಂತೆ ಸ್ವಾತಂತ್ರ್ಯೋತ್ಸವವನ್ನು ಬಹಳ ವಿಜೃಂಭಣೆಯಿಂದ ಆಚರಿಸುವಂತೆ ಶಾಸಕ ಕೆ.ಎಸ್.ಪುಟ್ಟಣ್ಣಯ್ಯ ತಾಲ್ಲೂಕು ಆಡಳಿತಕ್ಕೆ ಸೂಚಿಸಿದರು.

ಪೂರ್ವಭಾವಿ ಸಭೆಯಲ್ಲಿ ಉಪವಿಭಾಗಾಧಿಕಾರಿ ಡಾ. ಎಚ್.ಎಲ್.ನಾಗರಾಜು, ತಹಶೀಲ್ದಾರ್ ಬಿ.ಶಂಕರಯ್ಯ, ಜಿ.ಪಂ.ಸದಸ್ಯ ಎ.ಎಲ್.ಕೆಂಪೂಗೌಡ, ತಾ.ಪಂ. ಅಧ್ಯಕ್ಷೆ ಶೈಲಜಾಗೊವಿಂದರಾಜು, ಮನ್‍ಮುಲ್ ನಿರ್ದೇಶಕ ಜಿ.ಈ.ರವಿಕುಮಾರ್, ಸೇರಿದಂತೆ ತಾಲ್ಲೂಕು ಮಟ್ಟದ ಅಧಿಕಾರಿಗಳು ಹಾಜರಿದ್ದರು.

ಬಂಡವಾಳ ಶಾಹಿಗಳ ಕಪಿ ಮುಷ್ಟಿಯಲ್ಲಿ ಸರ್ಕಾರ-ಆರೋಪ

ತಿ.ನರಸೀಪುರ ಜು.30- ಭೂಸ್ವಾದೀನ ಸುಗ್ರಿವಾಜ್ಞೆ ಮೂಲಕ ರೈತರ ಭೂಮಿಯನ್ನು ಕಿತ್ತುಕೊಳ್ಳುತ್ತಿರುವ ಕೇಂದ್ರ ಸರ್ಕಾರ ನೆರೆ ರಾಷ್ಟ್ರದ ಬಂಡವಾಳ ಶಾಹಿಗಳ ಪರವಾಗಿ ಕೆಲಸ ನಿರ್ವಹಿಸುತ್ತಿದೆ ಎಂದು ಭಾರತ ಕಮ್ಯೂನಿಸ್ಟ್(ಮಾಕ್ರ್ಸ್‍ವಾದಿ) ಪಕ್ಷದ ಜಿಲ್ಲಾ ಕಾರ್ಯದರ್ಶಿ ಕೆ.ಬಸವರಾಜು ಆರೋಪಿಸಿದ್ದಾರೆ.

ಭಾರತ ಕಮ್ಯೂನಿಸ್ಟ್(ಮಾಕ್ರ್ಸ್‍ವಾದಿ) ಪಕ್ಷದ ವತಿಯಿಂದ ಸಮಸ್ಯೆಗಳ ನಿರ್ವಹಣೆ ಹಾಗೂ ಬೇಡಿಕೆಗಳ ನಿರ್ವಹಣೆ ಕುರಿತು ಆಗಸ್ಟ್ ಹಾಗೂ ಜುಲೈ ತಿಂಗಳಲ್ಲಿ ಹಮ್ಮಿಕೊಳ್ಳಲಾಗಿರುವ ಪ್ರಚಾರಾಂದೋಲನ ಮಾಸಾಚಾರಣೆ ಜಾಥಾದಲ್ಲಿ ಭಾಗವಹಿಸಿ ಪಟ್ಟಣದ ತಾಲ್ಲೂಕು ಕಛೇರಿ ಆವರಣದಲ್ಲಿ ಮಾತನಾಡಿದ ಅವರು ಅಧಿಕಾರಿ ಹಿಡಿಯುವ ಮುನ್ನ ಚುನಾವಣೆ ಪ್ರಣಾಳಿಕೆಯಲ್ಲಿ ಸ್ವಿಸ್ ಬ್ಯಾಂಕನಲ್ಲಿರುವ ಕಪ್ಪು ಹಣವನ್ನು ತಂದು ದೇಶದ ಅಭಿವೃದ್ದಿಪಡಿಸುವುದಾಗಿ ಹೇಳಿದ ನರೇಂದ್ರ ಮೋದಿಯವರು ಗ್ಯಾಸ್ ಸಬ್ಸಿಡಿ ಹಣವನ್ನು ಬಿಟ್ಟು ಕೊಟ್ಟು ದೇಶದ ಅಭಿವೃದ್ದಿಗೆ ಸಹಕಾರ ನೀಡುವಂತೆ ರೈತರಿಗೆ ಹೇಳುತ್ತಿರುವುದು ಸರಿಯಾದ ಕ್ರಮವಲ್ಲ.

ದೇಶದ ಪ್ರತಿಯೊಬ್ಬ ಜನ್‍ಧನ್ ಖಾತೆ ತೆರೆದಲ್ಲಿ ತಮ್ಮ ಖಾತೆಗೆ ಕೇಂದ್ರ ಸರ್ಕಾರದಿಂದ 15 ಸಾವಿರ ರೂಗಳನ್ನು ಹಣವನ್ನು ಜಮಾ ಮಾಡಲಾಗುವ್ಯದೆಂದು ಆಶ್ವಾಸನೆ ನೀಡಿ ತಿಂಗಳು ಕಳೆದರೂ ಸಹ ಯಾವುದೇ ರೀತಿಯ ಹಣವನ್ನು ಖಾತೆಗಳಿಗೆ ಜಮಾ ಮಾಡದೆ ರೈತರಿಗೆ ಅನ್ಯಾಯ ಮಾಡುತ್ತಿದ್ದಾರೆಂದು ಆರೋಪಿಸಿದರು.

ರೈತರು ಬೆಳೆದಂತ ಬೆಳೆಗೆ ಮಾರುಕಟ್ಟೆಯಲ್ಲಿ ಬೆಂಬಲ ಬೆಲೆ ಸಿಗದೇ ರೈತರು ಸಾಲದ ಭಾದೆಗೆ ಸಿಲುಕಿ ಆತ್ನಹತ್ಯೆಗೆ ಶರಣಾಗುತ್ತಿದ್ದರೂ ವಿದೇಶಿ ಬಂಡವಾಳದಾರರಿಗಾಗಿ ರೈತರ ಭೂಮಿಯನ್ನು ಕಿತ್ತುಕೊಂಡು ಬೀದಿಪಾಲು ಮಾಡುತ್ತಿರುವುದು ಎಷ್ಟರ ಮಟ್ಟಿಗೆ ಸರಿ ಎಂದು ಕೇಂದ್ರ ಸರ್ಕಾರವನ್ನು ಪ್ರಶ್ನಿಸಿದರು.

ಪಕ್ಷದ ಏಳ್ಗೆಗಾಗಿ ಭೂಕಬಳಿಕೆ ನಡೆಸಿ ಬಂಡವಾಳದಾರರ ಪರವಾಗಿ ಕೋಟಿ ಕೋಟಿ ರೂಗಳನ್ನು ಸುರಿಯುತ್ತಿರುವ ಕೇಂದ್ರ ಸರ್ಕಾರ ಕೃಷಿ ಬಿಕ್ಕಟ್ಟು ತೀವ್ರವಾಗಿ ರೈತರು ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದರೂ ಸಹ ಯಾವುದೇ ರೀತಿಯ ನೆರವಿಗೆ ದಾವಿಸಿಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಈ ಸಂದರ್ಭದಲ್ಲಿ ಡಿವೈಎಫ್‍ಐ ಮುಖಂಡ ಪುಟ್ಟಮಲ್ಲಯ್ಯ, ರೈತ ಸಂಘದ ಅಧ್ಯಕ್ಷ ಮಹದೇವು, ಶಕುಂತಲಾ, ಕಾಮಾಕ್ಷಮ್ಮ, ಸವಿತಾ, ಉಮಾ, ಮತ್ತಿತರರು ಭಾಗವಹಿಸಿದ್ದರು.