ಬ್ಲ್ಯಾಕ್ ಮೇಲ್ ಜಾಲ: ಎಂಟು ಜನರ ಸೆರೆ

ಮುಸ್ಲಿಂ ಯುವತಿಯನ್ನು ಬಳಸಿಕೊಂಡು ನಡೆಸಿದ ಕೃತ್ಯ * ತಲೆಮರೆಸಿಕೊಂಡಿರುವ ಇನ್ನೂ ನಾಲ್ವರಿಗಾಗಿ ಶೋಧ

ಮಂಗಳೂರು, ಆ.೧- ಯುವತಿಯನ್ನು ಬಳಸಿಕೊಂಡು ವ್ಯಕ್ತಿಯೋರ್ವರಿಂದ ಹಣ ದೋಚಲು ಯತ್ನಿಸಿದ್ದ ಆರೋಪದ ಹಿನ್ನೆಲೆಯಲ್ಲಿ ಯುವತಿ ಸೇರಿದಂತೆ ಎಂಟು ಮಂದಿಯನ್ನು ಪೊಲೀಸರು ಬಂಧಿಸಿದ್ದಾರೆ.

ನಗರದಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಎಸ್ ಪಿ ಡಾ.ಶರಣಪ್ಪ ಈ ಬಗ್ಗೆ ಮಾಹಿತಿ ನೀಡಿದರು.

ಬಂಧಿತರನ್ನು ಬೆಳ್ತಂಗಡಿ ತಾಲೂಕಿನ ಕುಕ್ಕೇಡಿ ಗ್ರಾಮದ ಗೋಳಿಯಂಗಡಿ ನಿವಾಸಿ ಮಹಮ್ಮದ್ ಆಸಿಫ್ ಯಾನೆ ಆಸಿಫ್ (25), ಪಾದೊಟ್ಟು ನಿವಾಸಿ ಅಬ್ದುಲ್ ಲತೀಫ್ ಯಾನೆ ಅಬ್ದುಲ್ಲಾ (36), ಪಣಕಜೆ ಮುದ್ದಡ್ಕ ಸಬರಬೈಲು ಮನೆ ನಿವಾಸಿ ಸಾವಿರ್ (25), ಉಳ್ತೂರು ನಿವಾಸಿ ಅಬೂಬಕ್ಕರ್ ಸಿದ್ದೀಕ್ (21), ಕನ್ನಡಿಕಟ್ಟೆ ಅನಿಲಮನೆ ನಿವಾಸಿ ಸುಲೈಮಾನ್ (35), ನಿಟ್ಟೆಡೆ ಗ್ರಾಮದ ಗೋಳಿಯಂಗಡಿ ಮನೆ ನಿವಾಸಿ ಅಬ್ದುಲ್ ಮಜೀದ್ (22), ಕುಕ್ಕೇಡಿಯ ಉಳ್ತೂರು ಮನೆ ನಿವಾಸಿ ಹಾಸಿಮ್ (25) ಹಾಗೂ ಉರುವಾಲು ಗ್ರಾಮದ ನೆಕ್ಕಿಲು ಮನೆ ನಿವಾಸಿ ಯುವತಿ ಝರೀನಾ (27) ಬಂಧಿತ ಆರೋಪಿಗಳು ಎಂದು ಅವರು ಮಾಹಿತಿ ನೀಡಿದರು. ಪ್ರಕರಣದಲ್ಲಿ 12 ಮಂದಿಯ ತಂಡ ಭಾಗಿಯಾಗಿದ್ದು, ಉಳಿದ ನಾಲ್ವರು ಆರೋಪಿಗಳ ಬಂಧನ ಆಗಬೇಕಿದೆ ಎಂದು ಡಾ.ಶರಣಪ್ಪ ತಿಳಿಸಿದರು.

ಆರೋಪಿ ಗೋಳಿಯಂಗಡಿಯ ಮಹಮ್ಮದ್ ಆಸೀಫ್ ತನ್ನ ಪರಿಚಯದ ಅಬ್ದುಲ್ ಬಶೀರ್ ಎಂಬವರಿಗೆ ದೂರವಾಣಿ ಮೂಲಕ ಕರೆ ಮಾಡಿದ್ದು, ತನ್ನ ಪರಿಚಯದ ಯುವತಿಯೋರ್ವಳನ್ನು ಲಾಯಿಲದಿಂದ ಉಜಿರೆಯವರೆಗೆ ಕರೆದೊಯ್ಯುವಂತೆ ತಿಳಿಸಿದ್ದ. ಬಶೀರ್ ಆತನ ಮಾತನ್ನು ನಂಬಿಕೊಂಡು ತನ್ನ ಸಂಬಂಧಿ ಹ್ಯಾರಿಸ್ ಎಂಬವರ ಆಟೋ ರಿಕ್ಷಾದಲ್ಲಿ ಯುವತಿಯನ್ನು ಉಜಿರೆಗೆ ಕರೆದುಕೊಂಡು ಹೋಗುತ್ತಿದ್ದ ವೇಳೆ ದಾರಿ ಮಧ್ಯೆ ಮಹಮ್ಮದ್ ಆಸಿಫ್ ಮತ್ತು ಆತನ ತಂಡ ರಿಕ್ಷಾವನ್ನು ಅಡ್ಡಗಟ್ಟಿ ಅದರಲ್ಲಿದ್ದವರನ್ನು ಬಲವಂತವಾಗಿ ತಮ್ಮ ಕಾರಿನಲ್ಲಿ ಅಪಹರಿಸಿ ವೇಣೂರಿನ ನೈನಾಡ್ ಎಂಬಲ್ಲಿನ ಮನೆಯೊಂದರಲ್ಲಿ ಕೂಡಿ ಹಾಕಿದ್ದರು. ಬಳಿಕ 10 ಲಕ್ಷ ರೂ. ನೀಡುವಂತೆ ಬಶೀರ್ ಅವರನ್ನು ಸತಾಯಿಸಲಾರಂಭಿಸಿದ್ದರು.

ಈ ನಡುವೆ ಆರೋಪಿಗಳು ಬಶೀರ್ ಹಾಗೂ ಹ್ಯಾರಿಸ್ ಅವರು ಯುವತಿಯ ಜತೆಗಿದ್ದ ಫೋಟೋ ತೆಗೆದಿದ್ದು, ಹಣ ನೀಡದಿದ್ದರೆ ಫೋಟೋವನ್ನು ಸಾಮಾಜಿಕ ಜಾಲತಾಣಗಳಿಗೆ ಹಾಕುವುದಾಗಿ ಬಶೀರ್ ಅವರನ್ನು ಬ್ಲ್ಯಾಕ್ ಮೇಲ್ ಮಾಡುತ್ತಿದ್ದರು.

ಇತ್ತೀಚೆಗಷ್ಟೇ ವಿದೇಶದಿಂದ ಬಂದಿದ್ದ ಬಶೀರ್ ಅವರಲ್ಲಿ ಹಣ ಇರಬಹುದೆಂಬ ಕಾರಣದಿಂದ ಆರೋಪಿಗಳು ಈ ತಂತ್ರ ರೂಪಿಸಿದ್ದರು ಎಂದು ವಿಚಾರಣೆ ವೇಳೆ ತಿಳಿದುಬಂದಿದೆ.

Post Title

ಈ ರಸ್ತೆಗೆ ಅಪ್ಪ ಯಾರು ಮಾರಾಯ್ರೇ...?

ಇದು ಆಕ್ರೋಶಿತ ಬಜ್ಪೆ ನಿವಾಸಿಗಳ ಪ್ರಶ್ನೆ

ಬಜ್ಪೆ, ಆ.1- `ಈ ರೋಡ್ ಪಿಡಬ್ಲ್ಯುಡಿ, ವಿಮಾನ ನಿಲ್ದಾಣ ಪ್ರಾಧಿಕಾರ, ಗ್ರಾಮ ಪಂಚಾಯತ್ ಯಾರಿಗೂ ಸೇರಿಲ್ಲ ಅಂತಾದ್ರೆ ಈ ರೋಡಿಗೆ ಅಪ್ಪ ಯಾರು ಮಾರಾಯ್ರೇ? ಈ ರಸ್ತೆಯನ್ನು ಯಾರೋ ಕೇಳೋರಿಲ್ಲವೇ? ದಿನನಿತ್ಯ ಇಲ್ಲಿ ನಾಗರಿಕರು ಸಂಚರಿಸಲು ಪರದಾಡುತ್ತಿದ್ದರೆ ಜನಪ್ರತಿನಿಧಿಗಳು ಸುಮ್ಮನಿದ್ದು ಚಂದ ನೋಡ್ತಾ ಇದ್ದಾರೆ. ಹೀಗೆಯೇ ನಿರ್ಲಕ್ಷ್ಯ ಮುಂದುವರಿದ್ರೆ ಮುಂದೆ ಬಜ್ಪೆಯನ್ನು ಬಂದ್ ಮಾಡಿ ಪ್ರತಿಭಟನೆ ನಡೆಸುತ್ತೇವೆ' ಇದು ಶುಕ್ರವಾರ ಮುಂಜಾನೆ ಬಜ್ಪೆ ಸಮೀಪದ ಮುರನಗರ ಜಂಕ್ಷನ್‍ಲ್ಲಿ ನಾಗರಿಕ ಸಮಿತಿ ಬಜ್ಪೆ ವತಿಯಿಂದ ನಡೆದ ರಸ್ತೆತಡೆ ಪ್ರತಿಭಟನೆಯಲ್ಲಿ ಕೇಳಿಬಂದ ಆಕ್ರೋಶದ ಮಾತು.

ಮುರನಗರದಿಂದ ಬಜ್ಪೆ ಹಳೇ ವಿಮಾನ ನಿಲ್ದಾಣಕ್ಕೆ ತೆರಳುವ ರಸ್ತೆ ಹಾಗೂ ಬಜ್ಪೆ ಪೊಲೀಸ್ ಸ್ಟೇಷನ್‍ಗೆ ಹೋಗುವ ರಸ್ತೆ ಸಂಪೂರ್ಣ ಹದಗೆಟ್ಟಿದ್ದು, ಈ ರಸ್ತೆಗಳಲ್ಲ ವಾಹನ ಸಂಚಾರಕ್ಕೆ ಸಮಸ್ಯೆ ಎದುರಾಗಿದೆ. ಇನ್ನು ಬಜ್ಪೆ ಜಂಕ್ಷನ್‍ನಲ್ಲಿ ನಡೆಯುತ್ತಿರುವ ಸೇತುವೆ ಕಾಮಗಾರಿ ಕೂಡಾ ತೆವಳುತ್ತ ಸಾಗುತ್ತಿದೆ. ಈ ನಿಟ್ಟಿನಲ್ಲಿ ಬಜ್ಪೆ ನಾಗರಿಕ ಸಮಿತಿ, ಡಿವೈಎಫ್‍ಐ, ಚೈತನ್ಯ ಮಹಿಳಾ ಮಂಡಳಿ, ಅಟೋರಿಕ್ಷಾ ಚಾಲಕ-ಮಾಲಕ ಸಂಘದ ವತಿಯಿಂದ ರಸ್ತೆ ತಡೆದು ಪ್ರತಿಭಟನಾ ಕಾರ್ಯಕ್ರಮವನ್ನು ಆಯೋಜಿಸಲಾಗಿತ್ತು.

ಪ್ರತಿಭಟನೆಯನ್ನು ಉದ್ದೇಶಿಸಿ ಮಾತಾಡಿದ ನಾಗರಿಕ ಸಮಿತಿ ಅಧ್ಯಕ್ಷ ಮುಹಮ್ಮದ್ ಶಾಲಿ ಅವರು, `ರಸ್ತೆಯಲ್ಲಿ ಗುಂಡಿಗಳೆದ್ದು ನಾಗರಿಕರ ಸಂಚಾರಕ್ಕೆ ಕಂಟಕ ಎದುರಾಗಿದೆ. ನಮ್ಮನ್ನಾಳುತ್ತಿರುವ ಜನಪ್ರತಿನಿಧಿಗಳು ಕಣ್ಮುಚ್ಚಿ ಕೂಳಿತ್ತಿದ್ದಾರೆ. ಇಂದು ನಡೆಸುತ್ತಿರುವ ಪ್ರತಿಭಟನೆಯನ್ನು ನಗಣ್ಯವಾಗಿ ಕಾಣದೆ ಕೂಡಲೇ ಸೂಕ್ತ ಕ್ರಮ ಜರುಗಿಸಬೇಕು' ಎಂದು ಆಗ್ರಹಿಸಿದರು. ಡಿವೈಎಫ್‍ಐ ಸಂಘಟನೆಯ ಪ್ರಮುಖ ಬಿ.ಕೆ.ಇಮ್ತಿಯಾಝ್ ಮಾತನಾಡಿ, `ಸದ್ರಿ ರಸ್ತೆಯನ್ನು ವಿಮಾನ ನಿಲ್ದಾಣ ಪ್ರಾಧಿಕಾರ ನಮಗೆ ಸೇರಿದ್ದಲ್ಲ ಎಂದರೆ ಪಿಡಬ್ಲ್ಯುಡಿ ಇಲಾಖೆ ನಮ್ಮದಲ್ಲ ಎನ್ನುತ್ತಿದೆ. ಈ ಮೂಲಕ ಜವಾಬ್ದಾರಿಯಿಂದ ಜನಪ್ರತಿನಿಧಿಗಳು ನುಣುಚಿಕೊಳ್ಳುವುದು ಬೇಡ.' ಎಂದರು.

ಮುಂಜಾನೆ 9 ಗಂಟೆಯಿಂದ 11 ಗಂಟೆಯವರೆಗೆ ಬಜ್ಪೆ-ಮುರನಗರ, ಪೊಲೀಸ್ ಸ್ಟೇಷನ್-ಮುರನಗರ ರಸ್ತೆಯಲ್ಲಿ ವಾಹನ ತಡೆದು ಪ್ರತಿಭಟನೆ ನಡೆಸಲಾಗಿತ್ತು. ಮಹಿಳೆಯರು, ಮಕ್ಕಳೆನ್ನದೆ ನೂರಾರು ಸಂಖ್ಯೆಯ ನಾಗರಿಕರು ಸುರಿವ ಮಳೆಯನ್ನೂ ಲೆಕ್ಕಿಸದೆ ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು. ಡಿವೈಎಫ್‍ಐ ಪ್ರಮುಖ ಯಾದವ ಶೆಟ್ಟಿ, ಸಂತೋಷ್ ಬಜಾಲ್, ನಾಗರಿಕ ಸಮಿತಿ ಉಪಾಧ್ಯಕ್ಷ ಭಾಸ್ಕರ್, ಪ್ರಧಾನ ಕಾರ್ಯದರ್ಶಿ ಶಶಿಕಲಾ, ವಿವಿಧ ಸಂಘಟನೆಗಳ ಪ್ರಮುಖರಾದ ದೇವದಾಸ್ ಬಿ., ನಾಸಿರ್ ಬಜ್ಪೆ, ನಿವೇದಿತಾ ಶೆಣೈ ಮುಂತಾದವರು ಪಾಲ್ಗೊಂಡಿದ್ದರು. ಬಜ್ಪೆ ಹಾಗೂ ಮೂಡಬಿದ್ರೆ ಠಾಣಾ ಪೊಲೀಸರು ಬಂದೋಬಸ್ತ್ ಕೈಗೊಂಡಿದ್ದರು.

ಪಿಡಬ್ಲ್ಯುಡಿ ಅಧಿಕಾರಿಯ ತರಾಟೆ!

ಪ್ರತಿಭಟನೆ ನಡೆಯುತ್ತಿದ್ದಲ್ಲಿಗೆ ಆಗಮಿಸಿದ ಪಿಡಬ್ಲ್ಯುಡಿ ಸಹಾಯಕ ಇಂಜಿನಿಯರ್ ಶ್ರೀಧರ್ ಅವರು, ರಸ್ತೆಯನ್ನು ಮೇಲ್ದರ್ಜೆಗೇರಿಸಲು ಶಾಸಕ ಮೊೈದೀನ್ ಬಾವಾ ಮೂರು ಲಕ್ಷ ರೂ. ಹಾಗೂ ಅಭಯಚಂದ್ರ ಜೈನ್ ಅವರು ಅನುದಾನ ಬಿಡುಗಡೆ ಮಾಡಿದ್ದಾರೆ ಎಂದು ಹೇಳಿದರು. ಈ ವೇಳೆ ನಾಗರಿಕರು ಅಧಿಕಾರಿಯನ್ನು ತರಾಟೆಗೆ ತೆಗೆದುಕೊಂಡಿದ್ದಲ್ಲದೆ ನಿಮ್ಮಲ್ಲಿ ಅನುದಾನ ಬಿಡುಗಡೆಯಾಗಿದೆ ಎನ್ನಲು ಏನು ದಾಖಲೆ ಇದೆ ಎಂದು ಕೇಳಿದಾಗ ಅಧಿಕಾರಿ `ದಾಖಲೆ ಇಲ್ಲ' ಎನ್ನುವ ಮೂಲಕ ಗೊಂದಲದ ವಾತಾವರಣಕ್ಕೆ ಕಾರಣರಾದರು. ಬಜ್ಪೆ ಪೆಟ್ರೋಲ್ ಪಂಪ್‍ನಿಂದ ಮುರನಗರ ಜಂಕ್ಷನ್‍ಗೆ ಬರುವ ರಸ್ತೆ ಪಿಡಬ್ಲ್ಯುಡಿ ಇಲಾಖೆಗೆ ಸೇರಿದ್ದು, ಮುರನಗರದಿಂದ ಪೊಲೀಸ್ ಠಾಣೆ ಕಡೆ ಸಾಗುವ ರಸ್ತೆ ಯಾವ ಇಲಾಖೆಗೆ ಸೇರಿದ್ದು ಎನ್ನುವುದು ಇನ್ನೂ ಗೊತ್ತಾಗಿಲ್ಲ ಎಂದಾಗ ನಾಗರಿಕರು ಅಧಿಕಾರಿಯನ್ನು ಮುತ್ತಿಗೆ ಹಾಕಿ ತರಾಟೆಗೆ ತೆಗೆದುಕೊಂಡರು. ಕೊನೆಗೆ ಅಧಿಕಾರಿ ರಸ್ತೆಯನ್ನು ಸರಿಪಡಿಸಲು ಇಲಾಖೆ ಶ್ರಮಿಸುತ್ತಿದೆ, ಅನಾನುಕೂಲ ಆಗುತ್ತಿರುವುದಕ್ಕೆ ಕ್ಷಮಿಸಿ ಎಂದು ಸ್ಥಳದಿಂದ ಕಾಲ್ಕಿತ್ತರು.

ವಕೀಲರ ಮೇಲೆ ಹಲ್ಲೆ : ಕದ್ರಿ ಇನ್ ಸ್ಪೆಕ್ಟರ್ ಅಮಾನತು

ಮಂಗಳೂರು, ಆ.೧- ವಂಚನೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕಕ್ಷಿದಾರರ ಜೊತೆ ಠಾಣೆಗೆ ತೆರಳಿದ್ದ ವಕೀಲರೋರ್ವರ ಮೇಲೆ ಕದ್ರಿ ಪೊಲೀಸ್ ಠಾಣೆಯ ನಿರೀಕ್ಷಕ ಟಿ.ಡಿ. ನಾಗರಾಜ್ ಹಲ್ಲೆ ನಡೆಸಿದ್ದು, ಅವರನ್ನು ಮಂಗಳೂರು ಪೊಲೀಸ್ ಆಯುಕ್ತ ಎಸ್. ಮುರುಗನ್ ಕರ್ತವ್ಯದಿಂದ ಅಮಾನತುಗೊಳಿಸಿದ್ದಾರೆ.

ವಕೀಲ ಉತ್ತಮ್ ರೈ ಎಂಬವರು ಹಲ್ಲೆಗೊಳಗಾಗಿರುವವರು.

ಅವರು ತನ್ನ ಕಕ್ಷೀದಾರ ರತ್ನಾಕರ್ ಜೊತೆ ವಂಚನೆ ಪ್ರಕರಣವೊಂದಕ್ಕೆ ಸಂಬಂಧಿಸಿದಂತೆ ಕದ್ರಿ ಪೊಲೀಸ್ ಠಾಣೆಗೆ ತೆರಳಿದ್ದರು. ಇನ್ ಸ್ಪೆಕ್ಟರ್ನಾಗರಾಜ್ ಅವರು ರತ್ನಾಕರ ಅವರ ವಿಚಾರಣೆ ನಡೆಸುತ್ತಿದ್ದು, ಈ ವೇಳೆ ವಕೀಲರು ಮಧ್ಯೆ ಪ್ರವೇಶಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ನಿರೀಕ್ಷಕರು ಹಲ್ಲೆ ನಡೆಸಿದ್ದಾರೆ ಎಂದು ವಕೀಲ ಉತ್ತಮ್ ಆರೋಪಿಸಿದ್ದಾರೆ.

ವಿಚಾರಣೆ ವೇಳೆ ಆರೋಪಿ ಬದಲಾಗಿ ವಕೀಲರೇ ಉತ್ತರಿಸುತ್ತಿದ್ದು, ರತ್ನಾಕರನಿಗೆ ಮಾತನಾಡಲು ಬಿಡಿ ಎಂದು ಹೇಳಿದಾಗ ವಕೀಲ ಉತ್ತಮ್ ಉಡಾಫೆಯಿಂದ ವರ್ತಿಸಿದ್ದಲ್ಲದೆ ಹಲ್ಲೆಗೆ ಮುಂದಾದರು ಎಂದು ನಿರೀಕ್ಷಕ ನಾಗರಾಜ್ ಪ್ರತ್ಯಾರೋಪ ಮಾಡಿದ್ದಾರೆ. ಮಧ್ಯಾಹ್ನ ಊಟದ ವೇಳೆ ಮೀರಿದ ಹಿನ್ನೆಲೆಯಲ್ಲಿ ರತ್ನಾಕರ ಅವರಿಗೆ ಸಂಜೆ ಬರುವಂತೆ ತಿಳಿಸಿದ್ದು, ಇದಕ್ಕೆ ನಿರಾಕರಿಸಿದ ವಕೀಲರು ತನ್ನ ಮೇಜಿನ ಬಳಿ ಬಂದು ಬಾಗಿಲಿಗೆ ಅಡ್ಡಲಾಗಿ ನಿಂತರು. ಈ ವೇಳೆ ತಳ್ಳಾಟ ನಡೆದು, ವಕೀಲ ತನ್ನ ಮೇಲೆ ಹಲ್ಲೆಗೈದು, ದೌರ್ಜನ್ಯ ನಡೆಸಿದ್ದಾರೆ. ಕರ್ತವ್ಯ ನಿರತ ಪೊಲೀಸ್ ಮೇಲೆ ಹಲ್ಲೆ ನ‌ಡೆಸಿ ಕಾರಣಕ್ಕೆ ವಕೀಲರನ್ನು ವಶಕ್ಕೆ ಪಡೆಯಲಾಯಿತು ಎನ್ನುವುದು ನಾಗರಾಜ್ ಅವರ ವಾದ.

ವಿಷಯ ತಿಳಿಯುತ್ತಿದ್ದಂತೆಯೇ ವಕೀಲರ ಸಂಘದ ಅಧ್ಯಕ್ಷ ಎಸ್.ಪಿ. ಚಂಗಪ್ಪ ಅವರೊಂದಿಗೆ ಹಲವು ವಕೀಲರು ಸೇರಿಕೊಂಡು ಕದ್ರಿ ಪೊಲೀಸ್ ಠಾಣೆಯ ಹೊರಗಡೆ ಪ್ರತಿಭಟನೆ ನಡೆಸಿದರು. ಅಲ್ಲದೇ, ಠಾಣಾಧಿಕಾರಿಯವರನ್ನು ಕೂಡಲೇ ಅಮಾನತುಗೊಳಿಸುವಂತೆ ಪಟ್ಟು ಹಿಡಿದರು. ಸ್ಥಳಕ್ಕಾಗಮಿಸಿದ ಕಾನೂನು ಪಾಲನೆ ಡಿಸಿಪಿ ಶಾಂತಾರಾಂ ಅವರು, ಪ್ರತಿಭಟನೆ ಹಿಂಪಡೆಯುವಂತೆ ಮನವಿ ಮಾಡಿದರು. ಠಾಣೆಯಲ್ಲಿ ನಡೆದಿರುವ ಪ್ರಕರಣಕ್ಕೆ ಸಂಬಂಧಿಸಿದಂತೆ ನಿರೀಕ್ಷಕ ನಾಗರಾಜ್ ಅವರನ್ನು ಅಮಾನತುಗೊಳಿಸಲಾಗಿದ್ದು, ಈ ಕುರಿತು ದೂರು ಕೂಡಾ ದಾಖಲಾಗಿದೆ ಎಂದು ಮಂಗಳೂರು ಪೊಲೀಸ್ ಆಯುಕ್ತ ಎಸ್. ಮುರುಗನ್ ತಿಳಿಸಿದ್ದಾರೆ.

ಈ ಮೃತದೇಹದ ವಾರಸುದಾರರಾರು?

ಮಂಗಳೂರು, ಆ.೧- ನಗರದ ಪುರಭವನದ ಪರಿಸರದ ಅಂಗಡಿಯೊಂದರ ಮುಂಭಾಗ ಅಪರಿಚಿತ ವ್ಯಕ್ತಿಯೋರ್ವರು ಮೃತಪಟ್ಟಿದ್ದು, ಈ ವ್ಯಕ್ತಿಯ ವಾರಸುದಾರರಿದ್ದಲ್ಲಿ ಪಾಂಡೇಶ್ವರ ಠಾಣೆಯನ್ನು ಸಂಪರ್ಕಿಸುವಂತೆ ಪೊಲೀಸರು ತಿಳಿಸಿದ್ದಾರೆ.

ಸುಮಾರು 55ರಿಂದ 60 ವರ್ಷ ವಯಸ್ಸಿನ ಈ ವ್ಯಕ್ತಿ ಐದು ಅಡಿ ಏಳು ಇಂಚು ಎತ್ತರವಿದ್ದು, ಗೋಧಿ ಮೈ ಬಣ್ಣ, ಎದೆಯ ಬಲಕ್ಕೆ ಹಾಗೂ ಹೊಟ್ಟೆಯ ಮೇಲೆ ಕಪ್ಪು ಮಚ್ಚೆ ಹೊಂದಿದ್ದಾರೆ. ಮಾಹಿತಿ ಉಳ್ಳವರು ಪಾಂಡೇಶ್ವರ ಠಾಣೆ (0824-2220518) ಅಥವಾ ನಿಯಂತ್ರಣ ಕೊಠಡಿ (2220518) ಸಂಪರ್ಕಿಸಬಹುದು.

ಅಕ್ರಮವಾಗಿ ಎತ್ತು ಸಾಗಿಸುತ್ತಿದ್ದ ವಾಹನ ವಶ: ಆರೋಪಿ ಸೆರೆ

ಬಂಟ್ವಾಳ, ಆ.೧- ಕಸಾಯಿಖಾನೆಗೆ ಅಕ್ರಮವಾಗಿ ಎತ್ತೊಂದನ್ನು ಸಾಗಿಸುತ್ತಿದ್ದ ವಾಹನವೊಂದನ್ನು ಬಡಕಬೈಲು ಎಂಬಲ್ಲಿ ವಶಪಡಿಸಿಕೊಂಡಿರುವ ಪೊಲೀಸರು ಆರೋಪಿಯನ್ನು ಬಂಧಿಸಿದ್ದಾರೆ.

ಬಂಧಿತ ಆರೋಪಿಯನ್ನು ಕೊಳತ್ತಮಜಲು ನಿವಾಸಿ ವಾಮನ ಎಂದು ಹೆಸರಿಸಲಾಗಿದೆ. ಈತ ನಿನ್ನೆ ವಾಹನದಲ್ಲಿ ಎತ್ತೊಂದನ್ನು ಕೊಳತ್ತಮಜಲಿನಿಂದ ಅಡ್ಡೂರು ಕಸಾಯಿಖಾನೆಗೆ ಸಾಗಿಸುತ್ತಿದ್ದ ಬಗ್ಗೆ ಮಾಹಿತಿ ಪಡೆದಿದ್ದ ಹಿಂದು ಸಂಘಟನೆಯೊಂದರ ಕಾರ್ಯಕರ್ತರು ವಾಹನವನ್ನು ತಡೆದು ನಿಲ್ಲಿಸಿ ಪೊಲೀಸರಿಗೆ ಸುದ್ದಿ ಮುಟ್ಟಿಸಿದ್ದರು. ಸ್ಥಳಕ್ಕೆ ಧಾವಿಸಿದ ಪೊಲೀಸರು ಎತ್ತು ಮತ್ತು ವಾಹನವನ್ನು ವಶಪಡಿಸಿಕೊಂಡು ಆರೋಪಿಯನ್ನು ಬಂಧಿಸಿದ್ದಾರೆ.

ಈ ಬಗ್ಗೆ ಪ್ರಕರಣ ದಾಖಲಾಗಿದ್ದು, ಮುಂದಿನ ತನಿಖೆ ನಡೆಯುತ್ತಿದೆ.

ಚಿನ್ನ ತೊಳೆದುಕೊಡುವ ನೆಪದಲ್ಲಿ ವಂಚನೆ: ಆರೋಪಿಗಳಿಬ್ಬರ ಸೆರೆ

ಬಂಟ್ವಾಳ, ಆ.೧- ಚಿನ್ನವನ್ನು ತೊಳೆದುಕೊಡುವ ನೆಪದಲ್ಲಿ ಸುಮಾರು 10,000 ರೂ. ಮೌಲ್ಯದ ಚಿನ್ನವನ್ನು ಎಗರಿಸಿದ್ದ ಉತ್ತರ ಭಾರತ ಮೂಲದ ಖದೀಮರಿಬ್ಬರನ್ನು ಬಂಟ್ವಾಳ ಗ್ರಾಮಾಂತರ ಠಾಣಾ ಪೊಲೀಸರು ಬಂಧಿಸಿದ್ದಾರೆ.

ಬಂಧಿತ ಆರೋಪಿಗಳನ್ನು ಉತ್ತರ ಭಾರತ ಮೂಲದ ಸಂತೋಷ್ ಕುಮಾರ್ ಮತ್ತು ಸುರೇಂದ್ರ ಕುಮಾರ್ ಎಂದು ಹೆಸರಿಸಲಾಗಿದೆ.

ಉಳಿಗ್ರಾಮದ ಆಯಿಷಾ ಬಾನು ಎನ್ನುವವರ ಮನೆಗೆ ತೆರಳಿ ಆರೋಪಿಗಳು ಚಿನ್ನವನ್ನು ತೊಳೆದುಕೊಡುವುದಾಗಿ ಹೇಳಿ ಅವರಿಂದ ಚಿನ್ನಾಭರಣ ಪಡೆದುಕೊಂಡಿದ್ದರು. ಅವುಗಳನ್ನು ಯಾವುದೋ ದ್ರಾವಣದಲ್ಲಿ ಮುಳುಗಿಸಿ ತೊಳೆದುಕೊಟ್ಟಿದ್ದು, ಪರಿಶೀಲಿಸಿದಾಗ ಸುಮಾರು 10,000 ರೂ. ಮೌಲ್ಯದ ಚಿನ್ನ ವನ್ನು ದ್ರಾವಣದಲ್ಲಿ ಕರಗಿಸಿ ವಂಚಿಸಿರುವುದು ಬೆಳಕಿಗೆ ಬಂದಿತ್ತು.

ಈ ಬಗ್ಗೆ ಪ್ರಕರಣವನ್ನು ದಾಖಲಿಸಿಕೊಂಡಿರುವ ಬಂಟ್ವಾಳ ಗ್ರಾಮಾಂತರ ಪೊಲೀಸರು ಆರೋಪಿಗಳನ್ನು ನ್ಯಾಯಾಲಯದಲ್ಲಿ ಹಾಜರು ಪಡಿಸಿದ್ದು, 15 ದಿನಗಳ ನ್ಯಾಯಾಂಗ ಬಂಧನ ವಿಧಿಸಲಾಗಿದೆ.

ರೈಲಿನಲ್ಲಿ ಪ್ರಯಾಣಿಸುತ್ತಿದ್ದ ಮಹಿಳೆಯ 2.3 ಲ.ರೂ.ಗಳ ಚಿನ್ನಾಭರಣ ಕಳವು

ಉಡುಪಿ, ಆ.೧- ರೈಲಿನಲ್ಲಿ ಮುಂಬೈನಿಂದ ಮೂಲ್ಕಿಗೆ ಪ್ರಯಾಣಿಸುತ್ತಿದ್ದ ಮಹಿಳೆಯೋರ್ವರ ಬ್ಯಾಗಿನಲ್ಲಿರಿಸಿದ್ದ ಸುಮಾರು 2.30 ಲ.ರೂ. ಮೌಲ್ಯದ ಚಿನ್ನಾಭರಣಗಳನ್ನು ಯಾರೋ ಕಳ್ಳತನ ಮಾಡಿರುವ ಬಗ್ಗೆ ತಡವಾಗಿ ದೂರು ದಾಖಲಾಗಿದೆ.

ಮುಂಬೈ ಚೆಂಬೂರಿನ ತಿಲಕನಗರದ ಸಿಎಚ್ಎಸ್ ಸೊಸೈಟಿಯ ಸುಖ್ ಸಾಗರ್ ನಿವಾಸಿ ಸುರೇಶ್ ಶೆಟ್ಟಿಯವರ ಪತ್ನಿ ವೇದಾವತಿ ಶೆಟ್ಟಿ ಅವರು ಏ.17ರಂದು ಲೋಕಮಾನ್ಯ ತಿಲಕ್ ಎಕ್ಸ್ ಪ್ರೆಸ್ ರೈಲಿನಲ್ಲಿ ಮುಂಬೈನಿಂದ ಹೊರಟು ಏ.18ರಂದು ಬೆಳಿಗ್ಗೆ ಮೂಲ್ಕಿ ನಿಲ್ದಾಣದಲ್ಲಿ ಇಳಿದಿದ್ದರು. ಮನೆಗೆ ತೆರಳಿ ಬ್ಯಾಗ್ ತೆರೆದು ನೋಡಿದಾಗ ಅದರಲ್ಲಿದ್ದ ಒಟ್ಟೂ 14.5 ಪವನ್ ತೂಕದ 2.30 ಲ.ರೂ. ಮೌಲ್ಯದ ಚಿನ್ನಾಭರಣಗಳನ್ನು ಯಾರೋ ಎಗರಿಸಿರುವುದು ಬೆಳಕಿಗೆ ಬಂದಿದೆ.

ಈ ಬಗ್ಗೆ ವೇದಾವತಿ ಶೆಟ್ಟಿ ನಿನ್ನೆ ಮಣಿಪಾಲ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಮುಂದಿನ ತನಿಖೆ ನಡೆಯುತ್ತಿದೆ.

ಯಾಕೂಬ್ ಗೆ ಗಲ್ಲು ಹಿನ್ನೆಲೆಯಲ್ಲಿ ದ.ಕ.ಜಿಲ್ಲೆಯಾದ್ಯಂತ ಕಟ್ಟೆಚ್ಚರ

ಮಂಗಳೂರು, ಆ.೧- 1993ರ ಮುಂಬೈ ಸರಣಿ ಸ್ಫೋಟ ಪ್ರಕರಣದಲ್ಲಿ ಅಪರಾಧಿ ಯಾಕೂಬ್ ಮೆಮನ್ ನನ್ನು ಗಲ್ಲಿಗೇರಿಸಿರುವುದಕ್ಕೆ ಪ್ರತೀಕಾರವಾಗಿ ಯಾವುದೇ ಸಂಭಾವ್ಯ ಅಹಿತಕರ ಘಟನೆಗಳನ್ನು ತಡೆಯಲು ಮುಂಜಾಗ್ರತಾ ಕ್ರಮವಾಗಿ ದಕ್ಷಿಣ ಕನ್ನಡ ಜಿಲ್ಲೆಯಾದ್ಯಂತ ಕಟ್ಟೆಚ್ಚರವನ್ನು ಘೋಷಿಸಲಾಗಿದೆ.

ನಗರದ ಬಸ್ ನಿಲ್ದಾಣಗಳು, ರೈಲ್ವೆ ನಿಲ್ದಾಣಗಳಲ್ಲಿ ಪೊಲೀಸರನ್ನು ನಿಯೋಜಿಸಲಾಗಿದೆ. ಅಗತ್ಯ ಕಂಡು ಬಂದರೆ ಪ್ರಯಾಣಿಕರ ಲಗೇಜ್ ಗಳನ್ನು ತಪಾಸಣೆಗೊಳಪಡಿಸಲಾಗುತ್ತಿದೆ. ಶ್ವಾನದಳ ಮತ್ತು ಬಾಂಬ್ ನಿಷ್ಕ್ರಿಯ ತಂಡವನ್ನು ರೈಲ್ವೆ ನಿಲ್ದಾಣದಲ್ಲಿ ವ್ಯವಸ್ಥೆಗೊಳಿಸಲಾಗಿದೆ. ಶಂಕಾಸ್ಪದ ಚಲನವಲನಗಳು ಕಂಡು ಬಂದಲ್ಲಿ ಪ್ರಯಾಣಿಕರನ್ನು ವಿಚಾರಣೆಗೊಳಪಡಿಸಲಾಗುತ್ತಿದೆ.

ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಮತ್ತು ನವ ಮಂಗಳೂರು ಬಂದರು ಪ್ರದೇಶದಲ್ಲಿಯೂ ಕಟ್ಟೆಚ್ಚರವನ್ನು ವಹಿಸಲಾಗಿದೆ. ಸಾರ್ವಜನಿಕರು ಸಹಕರಿಸುವಂತೆ ಪೊಲೀಸರು ಕೋರಿದ್ದಾರೆ.

ಶಾಲಾ ಶಿಕ್ಷಕಿಗೆ ಲೈಂಗಿಕ ಕಿರುಕುಳ: ಆರೋಪಿಯ ಬಂಧನ

ಕುಂದಾಪುರ, ಆ. ೧- ತಾಲೂಕಿನ ಸಿದ್ದಾಪುರದಲ್ಲಿ ಬಸ್ ಗಾಗಿ ಕಾಯುತ್ತಿದ್ದ ಶಾಲಾ ಶಿಕ್ಷಕಿಯೋರ್ವರಿಗೆ ಲೈಂಗಿಕ ಕಿರುಕುಳ ನೀಡುತ್ತಿದ್ದ ಹರಾಮಿಯೋರ್ವನನ್ನು ಸಾರ್ವಜನಿಕರು ಹಿಡಿದು, ನಾಲ್ಕು ಧರ್ಮದೇಟುಗಳನ್ನು ನೀಡಿ ಪೊಲೀಸರಿಗೊಪ್ಪಿಸಿದ್ದಾರೆ.

ಉಳ್ಳೂರು -74ನೇ ಗ್ರಾಮದ ತೆಂಕೂರು ನಿವಾಸಿ ಉಮೇಶ ಬೋವಿ (26) ಬಂಧಿತ ಆರೋಪಿ. ಶಾಲಾಶಿಕ್ಷಕಿಯನ್ನು ಈತ ಹಲವು ದಿನಗಳಿಂದ ಹಿಂಬಾಲಿಸುತ್ತಿದ್ದ ಎನ್ನಲಾಗಿದೆ. ಮೊನ್ನೆ ಸದ್ರಿ ಶಿಕ್ಷಕಿ ಸಿದ್ದಾಪುರ ಬಸ್ ನಿಲ್ದಾಣದಲ್ಲಿ ಬಸ್ ಗಾಗಿ ಕಾಯುತ್ತ ನಿಂತಿದ್ದಾಗ ಅವರನ್ನು ಹಿಂಬಾಲಿಸಿಕೊಂಡು ಬಂದಿದ್ದ ಆರೋಪಿ ಅಸಭ್ಯವಾಗಿ ಚುಡಾಯಿಸುತ್ತ ಲೈಂಗಿಕ ಕಿರುಕುಳ ನೀಡಲು ಮುಂದಾಗಿದ್ದು, ಇದನ್ನು ಗಮನಿಸಿದ ಸಾರ್ವಜನಿಕರು ಆತನನ್ನು ಹಿಡಿದು ಖರ್ಚಿಗೆ ನಾಲ್ಕು ಏಟು ಕೊಟ್ಟು ಪೊಲೀಸರಿಗೆ ಮಾಹಿತಿ ನೀಡಿದ್ದರು. ಸ್ಥಳಕ್ಕೆ ಧಾವಿಸಿದ ಪೊಲೀಸರು ಆರೋಪಿಯನ್ನು ಬಂಧಿಸಿ ನ್ಯಾಯಾಲಯದಲ್ಲಿ ಹಾಜರುಪಡಿಸಿದ್ದು, ನ್ಯಾಯಾಂಗ ಬಂಧನ ವಿಧಿಸಲಾಗಿದೆ.

ಈ ಬಗ್ಗೆ ಶಂಕರನಾರಾಯಣ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಮುಂದಿನ ತನಿಖೆ ನಡೆಯುತ್ತಿದೆ.

ನಕಲಿ ಚಿನ್ನಾಭರಣ ಅಡವಿರಿಸಿ ಫೈನಾನ್ಸ್ ಗೆ ವಂಚಿಸಿದ್ದ ಆರೋಪಿ ಸೆರೆ

ಉಡುಪಿ, ಆ. ೧- ಖಾಸಗಿ ಹಣಕಾಸು ಸಂಸ್ಥೆಯಲ್ಲಿ ನಕಲಿ ಚಿನ್ನಾಭರಣಗಳನ್ನು ಅಡವಿರಿಸಿ ಸಾಲ ಪಡೆದುಕೊಂಡು ವಂಚಿಸಿದ್ದ ಆರೋಪಿಯನ್ನು ಬೆಂಗಳೂರಿನಲ್ಲಿ ಬಂಧಿಸುವುದರಲ್ಲಿ ಮಲ್ಪೆ ಪೊಲೀಸರು ಯಶಸ್ವಿಯಾಗಿದ್ದಾರೆ.

ಬಂಧಿತ ಆರೋಪಿಯನ್ನು ಉಡುಪಿ ತಾಲೂಕು ಪಂದುಬೆಟ್ಟು ರುಬೀನಾ ಕಾಂಪ್ಲೆಕ್ಸ್ ನಿವಾಸಿ ಅಬ್ದುಲ್ ಮಜೀದ್ (32) ಎಂದು ಹೆಸರಿಸಲಾಗಿದೆ. ಈತ ಮಲ್ಪೆಯ ಮಣಪ್ಪುರಂ ಫೈನಾನ್ಸ್ ನಲ್ಲಿ ಅಸಲಿ ಚಿನ್ನಾಭರಣ ಎಂದು ನಂಬಿಸಿ ನಕಲಿ ಚಿನ್ನಾಭರಣಗಳನ್ನು ಅಡವಿರಿಸಿ 93,000 ರೂ. ಸಾಲ ಪಡೆದುಕೊಂಡು ವಂಚಿಸಿದ್ದ. ಈ ಬಗ್ಗೆ ಪ್ರಕರಣ ದಾಖಲಿಸಿಕೊಂಡಿದ್ದ ಮಲ್ಪೆ ಪೊಲೀಸರು ಲಭ್ಯ ಸುಳಿವುಗಳ ಆಧಾರದಲ್ಲಿ ಬೆಂಗಳೂರಿಗೆ ತೆರಳಿ ಅಲ್ಲಿಯ ಮೆಜೆಸ್ಟಿಕ್ ನ ಆನಂದ ರಾವ್ ಸರ್ಕಲ್ ಬಳಿ ಆರೋಪಿಯನ್ನು ಬಂಧಿಸಿದ್ದಾರೆ. ಬಂಧಿತನನ್ನು ಉಡುಪಿ ನ್ಯಾಯಾಲಯದಲ್ಲಿ ಹಾಜರುಪಡಿಸಲಾಗಿದ್ದು, 15 ದಿನಗಳ ನ್ಯಾಯಾಂಗ ಬಂಧನ ವಿಧಿಸಲಾಗಿದೆ. ಈ ಬಗ್ಗೆ ತನಿಖೆ ಮುಂದುವರಿದಿದೆ.

ಮುಡ್ರಾಲು ದೇವಸ್ಥಾನದಿಂದ 1.25 ಲ.ರೂ.ಗಳ ಸೊತ್ತು ಕಳವು

ಕಾರ್ಕಳ, ಆ. ೧- ತಾಲೂಕಿನ ಮುಡಾರು ಗ್ರಾಮದ ದೇವಸ್ಥಾನಕ್ಕೆ ನುಗ್ಗಿದ ಕಳ್ಳರು ದೇವಿಯ ವಿಗ್ರಹ ಸೇರಿದಂತೆ ಸುಮಾರು 1.25 ಲ.ರೂ. ಮೌಲ್ಯದ ಸೊತ್ತುಗಳನ್ನು ಎಗರಿಸಿದ್ದಾರೆ.

ಮುಡಾರು ಗ್ರಾಮದ ಮುಡ್ರಾಲು ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನದಲ್ಲಿ ಈ ಕಳ್ಳತನ ನಡೆದಿದೆ. ಅರ್ಚಕರು ಮೊನ್ನೆ ರಾತ್ರಿ 8 ಗಂಟೆಗೆ ಬಾಗಿಲು ಮುಚ್ಚಿ ಮನೆಗೆ ತೆರಳಿದ್ದು, ನಿನ್ನೆ ಬೆಳಿಗ್ಗೆ 6ಗಂಟೆಗೆ ವಾಪಸ್ ಬಂದಾಗ ಕಳ್ಳತನ ನಡೆದಿರುವುದು ಬೆಳಕಿಗೆ ಬಂದಿದೆ. ಹೆಬ್ಬಾಗಿಲಿನ ಬೀಗವನ್ನು ಮುರಿದು ದೇವಸ್ಥಾನದೊಳಗೆ ನುಗ್ಗಿದ ಕಳ್ಳರು ಗರ್ಭಗುಡಿಯ ಒಳಗಿದ್ದ 9 ಇಂಚು ಎತ್ತರದ ಸಿಂಹಾರೂಢ ದೇವಿಯ ಪಂಚಲೋಹದ ಬಲಿಮೂರ್ತಿ, ಪ್ರಭಾವಳಿ ಮತ್ತು ಮೂಲಮೂರ್ತಿಯ ಬೆಳ್ಳಿಯ ದೃಷ್ಟಿಯನ್ನು ದೋಚಿದ್ದಾರೆ. ಇವುಗಳ ಮೌಲ್ಯ 1.25 ಲ.ರೂ.ಗಳೆಂದು ಅಂದಾಜಿಸಲಾಗಿದೆ.

ಈ ಬಗ್ಗೆ ಕಾರ್ಕಳ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ನೇಣು ಬಿಗಿದುಕೊಂಡು ಆತ್ಮಹತ್ಯೆ

ಉಡುಪಿ, ಆ.೧- ಮಾನಸಿಕ ಖಿನ್ನತೆಗೊಳಗಾಗಿದ್ದ ವ್ಯಕ್ತಿಯೋರ್ವರು ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಶರಣಾದ ಘಟನೆ ನಗರದ ಕುತ್ಪಾಡಿಯಲ್ಲಿ ಸಂಭವಿಸಿದೆ. ಕುತ್ಪಾಡಿ ಜನತಾ ಕಾಲನಿಯ ರಾಜಕಮಲ ನಿಲಯದ ನಿವಾಸಿ ಸುಧಾಕರ (50) ಮೃತ ವ್ಯಕ್ತಿ.

ವಿಪರೀತ ಶರಾಬು ಸೇವನೆಯ ಚಟ ಹೊಂದಿದ್ದ ಅವರು ಅನಾರೋಗ್ಯದಿಂದ ಬಳಲುತ್ತಿದ್ದು, ಮಾನಸಿಕ ಖಿನ್ನತೆಗೊಳಗಾಗಿದ್ದರು. ಈ ಕಾರಣದಿಂದ ಜೀವನದಲ್ಲಿ ಜುಗುಪ್ಸೆಗೊಂಡ ಅವರು ನಿನ್ನೆ ಅಡುಗೆಮನೆಯ ಮಾಡಿನ ಪಕ್ಕಾಸಿಗೆ ಲುಂಗಿಯಿಂದ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಈ ಬಗ್ಗೆ ಮೃತರ ಮಾವ ರಾಜ ಸುವರ್ಣರ ದೂರಿನ ಮೇರೆಗೆ ಪ್ರಕರಣವನ್ನು ದಾಖಲಿಸಿಕೊಂಡಿರುವ ಉಡುಪಿ ನಗರ ಠಾಣಾ ಪೊಲೀಸರು ಮುಂದಿನ ತನಿಖೆ ನಡೆಸುತ್ತಿದ್ದಾರೆ.

ಗ್ರಾಹಕರ ಸೋಗಿನಲ್ಲಿ ಅಂಗಡಿಗೆ ಬಂದಿದ್ದ ವ್ಯಕ್ತಿಗಳಿಂದ 22,800 ರೂ. ಅಪಹರಣ

ಕುಂದಾಪುರ, ಆ.೧- ಗ್ರಾಹಕರ ಸೋಗಿನಲ್ಲಿ ಬಂದಿದ್ದ ಅಪರಿಚಿತ ವ್ಯಕ್ತಿಗಳಿಬ್ಬರು ನಗದು ಹಣವಿರಿಸಿದ್ದ ಬ್ಯಾಗ್ ನ್ನು ಲಪಟಾಯಿಸಿಕೊಂಡು ಪರಾರಿಯಾದ ಘಟನೆ ತಾಲೂಕಿನ ಶಿರೂರು ಗ್ರಾಮದಲ್ಲಿ ನಡೆದಿದೆ.

ಶಿರೂರು ನಿವಾಸಿ ವೆಂಕಟೇಶ ಪೈ ಅವರು ಶಿರೂರು ಮಾರ್ಕೆಟ್ ನಲ್ಲಿ ಜನರಲ್ ಸ್ಟೋರ್ ನಡೆಸುತ್ತಿದ್ದಾರೆ. ಮೊನ್ನೆ ಬೆಳಿಗ್ಗೆ ಅಂಗಡಿಗೆ ಬಂದಿದ್ದ ಅವರಿಚಿತ ವ್ಯಕ್ತಿಗಳು ಚಾಪೆ ಮತ್ತು ಡ್ರಾಮ್ ಬೇಕೆಂದು ಹೇಳಿದ್ದರು. ಅಂಗಡಿಯ ಹೊರಗಿರಿಸಿದ್ದ ವಸ್ತುಗಳನ್ನು ಅವರಿಗೆ ತೋರಿಸಲು ವೆಂಕಟೇಶ ಪೈಯವರು ಹೊರಕ್ಕೆ ಬಂದಿದ್ದು, ಈ ವೇಳೆ ಒಬ್ಬ ಒಳಗೆ ಇದ್ದು, ಇನ್ನೋರ್ವ ವಸ್ತುಗಳನ್ನು ನೋಡಿ ಇಷ್ಟವಿಲ್ಲ ಎಂದು ಹೇಳಿ ಇಬ್ಬರೂ ಅಲ್ಲಿಂದ ಮರಳಿದ್ದರು. ವೆಂಕಟೇಶ ಪೈ ಒಳಗೆ ಬಂದು ನೋಡಿದಾಗ ಕುರ್ಚಿಯ ಮೇಲಿರಿಸಿದ್ದ 22,800 ರೂ. ನಗದು ಮಾತ್ರ ಇತರ ದಾಖಲಾತಿಗಳಿದ್ದ ಬ್ಯಾಗ್ ನ್ನು ಅಪರಿಚಿತರು ದೋಚಿರುವುದು ಬೆಳಕಿಗೆ ಬಂದಿದೆ.

ಈ ಬಗ್ಗೆ ಬೈಂದೂರು ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಮುಂದಿನ ತನಿಖೆ ನಡೆಯುತ್ತಿದೆ.

ಆ.4: ಸಹಕಾರಿ ಪಿತಾಮಹ ಮೊಳಹಳ್ಳಿ ಶಿವರಾವ್ ಜನ್ಮದಿನಾಚರಣೆ

ಮಂಗಳೂರು. ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ನಿ. ಮಂಗಳೂರು, ಕರ್ನಾಟಕ ರಾಜ್ಯ ಸಹಕಾರ ಮಹಾಮಂಡಲ ನಿ, ಬೆಂಗಳೂರು ಹಾಗೂ ದಕ್ಷಿಣ ಕನ್ನಡ ಜಿಲ್ಲಾ ಸಹಕಾರಿ ಯೂನಿಯನ್ ಲಿ, ಮಂಗಳೂರು ಇವುಗಳ ಸಂಯುಕ್ತ ಆಶ್ರಯದಲ್ಲಿ ಸಹಕಾರಿ ಪಿತಾಮಹ ಮೊಳಹಳ್ಳಿ ಶಿವರಾವ್ ಅವರ 135ನೇ ಜನ್ಮ ದಿನಾಚರಣೆ ಆ.4ರಂದು ಎಸ್‍ಸಿಡಿಸಿಸಿ ಬ್ಯಾಂಕಿನ "ಉತ್ಕ್ರಷ್ಟ ಸಹಕಾರಿಸೌಧ"ದಲ್ಲಿರುವ ಮೊಳಹಳ್ಳಿ ಶಿವರಾವ್ ಸಭಾಭವನದಲ್ಲಿ ನಡೆಯಲಿದೆ.

ಪೂರ್ವಾಹ್ನ 11.30ಘಂಟೆಗೆ ಜನ್ಮ ದಿನಾಚರಣೆಯ ಸಭಾ ಕಾರ್ಯಕ್ರಮ ನಡೆಯಲಿದ್ದು, ಉದ್ಘಾಟನೆಯನ್ನು ಎಸ್‍ಸಿಡಿಸಿಸಿ ಬ್ಯಾಂಕಿನ ಅಧ್ಯಕ್ಷರಾದ ಡಾ. ಎಂ.ಎನ್ ರಾಜೇಂದ್ರಕುಮಾರ್ ಅವರು ನೆರೆವೇರಿಸಲಿರುವರು. ಅಧ್ಯಕ್ಷತೆಯನ್ನು ದಕ್ಷಿಣ ಕನ್ನಡ ಜಿಲ್ಲಾ ಸಹಕಾರಿ ಯೂನಿಯನ್ ಅಧ್ಯಕ್ಷ ಹರೀಶ್ ಆಚಾರ್ ವಹಿಸಲಿರುವರು.

ಮುಖ್ಯ ಅತಿಥಿಗಳಾಗಿ ಕ್ಯಾಂಪ್ಕೋ ಸಂಸ್ಥೆಯ ಅಧ್ಯಕ್ಷ ಕೊಂಕೋಡಿ ಪದ್ಮನಾಭ, ದಕ್ಷಿಣ ಕನ್ನಡ ಸಹಕಾರಿ ಹಾಲು ಉತ್ಪಾದಕರ ಒಕ್ಕೂಟದ ಅಧ್ಯಕ್ಷ ರವಿರಾಜ ಹೆಗ್ಡೆ, ಸ್ಕ್ಯಾಡ್ಸ್ ಸಂಸ್ಥೆಯ ಅಧ್ಯಕ್ಷ ರವೀಂದ್ರ ಕಂಬಳಿ ಹಾಗೂ ಸಹಕಾರ ಸಂಘಗಳ ಉಪನಿಬಂಧಕ ಬಿ.ಕೆ ಸಲೀಂ ಭಾಗವಹಿಸಲಿರುವರು. ಈ ಸಂದರ್ಭದಲ್ಲಿ ವೃತ್ತಿಪರ ಆಡಳಿತ ನಿರ್ವಹಣೆ ಬಗ್ಗೆ ಮಂಗಳೂರು ಬೆಸೆಂಟ್ ಕಾಲೇಜಿನ ಪ್ರಾಂಶುಪಾಲೆ ಡಾ. ಸುಧಾ.ಕೆ ಅವರು ವಿಶೇಷ ಉಪನ್ಯಾಸ ನೀಡಲಿರುವರು.

ಉಚಿತ ವೈದ್ಯಕೀಯ ಶಿಬಿರ:

ಶಿವರಾವ್ ಅವರ ಜನ್ಮದಿನದಂದು ಸಹಕಾರಿ ಸಿಬ್ಬಂದಿಗಳಿಗೆ ಉಚಿತ ವೈಧ್ಯಕೀಯ ಶಿಬಿರ ಬೆಳಿಗ್ಗೆ 10 ಗಂಟೆಯಿಂದ ಮಧ್ಯಾಹ್ನ 3ಗಂಟೆಯವರಿಗೆ ನಡೆಯಲಿದೆ. ಇಪ್ಕೋ ಟೋಕಿಯೋ ಜನರಲ್ ಇನ್ಸೂರೆನ್ಸ್ ಕಂಪೆನಿ ನಿ. ಮತ್ತು ರಕ್ಷಾ ಟಿಪಿಎ ಸಂಸ್ಥೆಗಳ ಸಹಯೋಗದಲ್ಲಿ ಈ ವೈದ್ಯಕೀಯ ಶಿಬಿರವನ್ನು ಹಮ್ಮಿಕೊಳ್ಳಲಾಗಿದೆ.

ಚರ್ಚಾಸ್ವರ್ಧೆ:

ಶಿವರಾವ್ ಅವರ ಜನ್ಮ ದಿನಾಚರಣೆಯನ್ನು ಅರ್ಥಪೂರ್ಣವನ್ನಾಗಿಸುವ ಉದ್ದೇಶದಿಂದ "ಸಹಕಾರಿ ಕ್ಷೇತ್ರದಲ್ಲಿ ವೃತ್ತಿಪರತೆ ಕಾರ್ಯ ಸಾಧ್ಯವೇ?" ಎಂಬ ವಿಷಯದ ಬಗ್ಗೆ ಅಂತರ್ ಕಾಲೇಜು ಪದವಿ ವಿದ್ಯಾರ್ಥಿಗಳಿಗೆ ಚರ್ಚಾ ಸ್ವರ್ಧೆಯನ್ನು ಹಮ್ಮಿಕೊಳ್ಳಲಾಗಿದೆ. ಬೆಳಿಗ್ಗೆ 10.30 ರಿಂದ 11.30ರ ವರೆಗೆ ಈ ಚರ್ಚಾ ಸ್ಪರ್ಧೆ ನಡೆಯಲ್ಲಿದ್ದು, ಮಂಗಳೂರು ವಿಶ್ವವಿದ್ಯಾನಿಲಯ ಕಾಲೇಜಿನ ಅರ್ಥಶಾಸ್ತ್ರ ವಿಭಾಗದ ಸಹ ಪ್ರಾಧ್ಯಾಪಕ ಜಯವಂತ ನಾಯಕ್ ಅವರು ಸಂಯೋಜಕರಾಗಿ ಕಾರ್ಯನಿರ್ವಹಿಸಲಿರುವರು ಎಂದು ಎಸ್‍ಸಿಡಿಸಿಸಿ ಬ್ಯಾಂಕಿನ ಪ್ರಕಟನೆ ತಿಳಿಸಿದೆ.