ಅಫಜಲಪೂರ ತಾಲೂಕನ್ನು ಬರಗಾಲಪೀಡಿತ ಪ್ರದೇಶ ಎಂದು ಘೋಷಿಸಲು ಆಗ್ರಹ

ಅಫಜಲಪುರ: ಅ.05:- ಅಫಜಲಪೂರ ತಾಲೂಕಿನಲ್ಲಿ ಕಳೆದ ಮೂರು ವರ್ಷಗಳಿಂದ ಸಮರ್ಪಕವಾಗಿ ಮಳೆಯಾಗುತ್ತಿಲ್ಲ. ಪ್ರಸ್ತುತ ವರ್ಷವೂ ಕೂಡಾ ಸರಿಯಾದ ಸಮಯಕ್ಕೆ ಮಳೆ ಬಾರದ ಕಾರಣ ಅಫಜಲಪೂರ ತಾಲೂಕಿನ ಸಮಸ್ತ ರೈತರು ಬರದಿಂದಾಗಿ ತತ್ತರಿಸಿದ್ದಾರೆ ಎಂದು ಕರವೇ ಜಿಲ್ಲಾಧ್ಯಕ್ಷ ಶಿವಕುಮಾರ ನಾಟೀಕಾರ ಹೇಳಿದರು.

ರೈತರ ವಿವಿಧ ಬೇಡಿಕೆಗಳಿಗೆ ಹಾಗೂ ಮಳೆಗೆ ಸಂಬಂಧಿಸಿದ ಸಮಸ್ಯೆಗೆ ಆಗ್ರಹಿಸಿ ಪಟ್ಟಣದ ಬಸವೇಶ್ವರ ವೃತ್ತದಿಂದ ತಹಸೀಲ ಕಛೇರಿಯವರೆಗೆ ಪ್ರತಿಭಟನೆಯನ್ನು ಹಮ್ಮಿಕೊಂಡು ತಹಸೀಲ್ದಾರರಿಗೆ ಮನವಿ ಪತ್ರ ಸಲ್ಲಿಸಿ ಮಾತನಾಡಿದ ಅವರು ಈ ಬಾರಿ ರೈತರು ತಮ್ಮ ಜಮೀನುಗಳಿಗೆ ಮುಂಗಾರು ಬಿತ್ತನೆ ಸಹ ಮಾಡಿಲ್ಲ ಈ ಕೂಡಲೆ ಈ ಪ್ರದೇಶವನ್ನು ಬರಗಾಲ ಪೀಡಿತ ಪ್ರದೇಶ ಎಂದು ಘೋಷಿಸುವಂತೆ ಒತ್ತಾಯಿಸಿದರು.

ಅಧಿಕೃತವಾಗಿ ಕೃಷಿ ಇಲಾಖೆ ಹಾಗೂ ಕಂದಾಯ ಇಲಾಖೆಯಿಂದ ಸರಕಾರಕ್ಕೆ ಈ ಬಾರಿ ತಾಲೂಕಿನಲ್ಲಿ ಶೇ%40 ರಷ್ಟು ಪ್ರಮಾಣದ ಮಳೆಯಾಗಿದೆ ಎಂದು ಹುಸಿ ಮಾಹಿತಿ ಸಲ್ಲಿಕೆಯಾಗಿರುತ್ತದೆ. ತಾಲೂಕಿನಲ್ಲಿ ಪ್ರತಿ ವರ್ಷ ಮುಂಗಾರು ಮಳೆ ಕೊರತೆಯಿಂದಾಗಿ ರೈತರಿಗೆ ಆಗುತ್ತಿರುವ ಬೆಳೆ ನಷ್ಟದ ಬಗ್ಗೆ ಕೃಷಿ ಇಲಾಖೆಯವರು ಹಾಗೂ ಕಂದಾಯ ಇಲಾಖೆಯವರು ರೈತರ ಜಮೀನುಗಳಿಗೆ ಭೇಟಿ ನೀಡದೆ ಈ ಹುಸಿ ವರದಿಯನ್ನು ಸರಕಾರಕ್ಕೆ ಸಲ್ಲಿಕೆ ಮಾಡಿರುತ್ತಾರೆ. ಕಳೆದ ಮೂರು ವರ್ಷಗಳಿಂದ ತಾಲೂಕಿನಲ್ಲಿ ಇದೆ ತೆರನಾದ ಪರಿಸ್ಥಿತಿ ಮುಂದುವರೆದಿದೆ. ಕೃಷಿ ಅಧಿಕಾರಿಗಳ ಹಾಗೂ ಕಂದಾಯ ಇಲಾಖೆಯವರ ಬೇಜವಾಬ್ದಾರಿತನದಿಂದ ತಾಲೂಕಿನ ರೈತರಿಗೆ ಅನ್ಯಾಯ ಹಾಗೂ ಭರಿಸಲಾಗದ ನಷ್ಟವಾಗಿದೆ. ಹಾಗೂ ಮಳೆಯ ಕಾರಣ ಭೀಮಾ ನದಿಯೂ ಸಹ ಬತ್ತಿ ಹೋಗಿದ್ದು, ನೀರಿನ ಕೊರತೆಯಿಂದ ರೈತರ ಕಬ್ಬು ಸಂಪೂರ್ಣ ಪ್ರಮಾಣದಲ್ಲಿ ಒಣಗಿದೆ. ಅದಕ್ಕಾಗಿ ಅಫಜಲಪೂರ ತಾಲೂಕನ್ನು ಶೀಘ್ರದಲ್ಲಿ ಬರಗಾಲ ಪ್ರದೇಶ ಎಂದು ಘೋಷಣೆ ಮಾಡಬೇಕೆಂದು ಬೇಡಿಕೆ ಇತ್ತರು.

ಮುಂಗಾರು ಮಳೆ ಸರಿಯಾದ ಸಮಯಕ್ಕೆ ಕೈ ಕೊಟ್ಟಿದ್ದರಿಂದ ರೈತರು ಕಂಗಾಲಾಗಿದ್ದಾರೆ. ಒಂದು ಕಡೆ ಬ್ಯಾಂಕ ಹಾಗೂ ಖಾಸಗಿ ಸಾಲ ಮಾಡಿಕೊಂಡು, ಕಬ್ಬು ಬಿತ್ತನೆ ಮಾಡಿದ ರೈತರು, ಸಾಲವನ್ನು ಭರಿಸಲಾಗದೆ ಸಾವಿನ ತುತ್ತ ತುದಿಯ ಹಂತಕ್ಕೆ ತಲುಪಿದ್ದಾರೆ. ಮಗದೊಂದು ಕಡೆ ಆರ್ಥಿಕ ಸ್ಥಿತಿವಂತರಲ್ಲದ ರೈತರು ತಮ್ಮ ಉಪ ಜೀವನವನ್ನು ಸಾಗಿಸಲಾಗದೆ ಉಪವಾಸ ಬೀಳುವ ಪರಿಸ್ಥಿತಿ ಎದುರಾಗಿದೆ. ಇದನ್ನು ಸರಕಾರ ಈ ಕೂಡಲೆ ತಾಲೂಕಿನ ಸಮಸ್ತ ರೈತರ ಸಮಸ್ಯೆಗಳನ್ನು ಗಂಭೀರವಾಗಿ ಪರಿಗಣಿಸಿ ಕೃಷಿ ಸಾಲವನ್ನು ಮನ್ನಾ ಮಾಡಬೇಕೆಂದು ಸರಕಾರಕ್ಕೆ ಆಗ್ರಹಿಸಿದರು.

ಕಳೆದ ವರ್ಷ ರೈತರಿಂದ ಕಬ್ಬನ್ನು ತೆಗೆದುಕೊಂಡ ಶ್ರೀ. ರೇಣುಕಾ ಸಕ್ಕರೆ ಕಾರ್ಖಾನೆಯವರು ಸುಮಾರು ನಾಲ್ಕೈದು ತಿಂಗಳಾದರೂ ಈವರೆಗೂ ಕಬ್ಬಿನ ದರವನ್ನು ರೈತರಿಗೆ ಪಾವತಿ ಮಾಡಿಲ್ಲ. ಅಲ್ಲದೆ ಕಾರ್ಖಾನೆ ವತಿಯಿಂದ ತಾಲೂಕಿನ ಕಬ್ಬು ಬೆಳೆದ ರೈತರಿಗೆ 22 ಕೋಟಿ ರೂಪಾಯಿ ಹಣವು ಸಂದಾಯವಾಗಬೇಕಿದ್ದು, ಇನ್ನೂ ಕಾರ್ಖಾನೆಯವರ ಬೊಕ್ಕಸದಲ್ಲೆ ಉಳಿದಿದೆ. ರೈತರ ಬಾಕಿ ಹಣ ಸಂದಾಯ ಮಾಡದ ಹಿನ್ನೆಲೆಯಲ್ಲಿ ತಮ್ಮ ಉಪಜೀವನ ಹಾಗೂ ಮಕ್ಕಳ ಶಿಕ್ಷಣಕ್ಕಾಗಿ ಈಗಾಗಲೆ ಬೇಸತ್ತ ರೈತರು ಹಣಕ್ಕಾಗಿ ಮತ್ತೆ ಬ್ಯಾಂಕ್ ಮತ್ತು ಖಾಸಗಿ ಬ್ಯಾಂಕಗಳ ಹಾಗೂ ತಮ್ಮ ಗೆಳೆಯ, ಬಂಧು, ಬಳಗದವರ ಮೊರೆ ಹೋಗುವ ಸಂದರ್ಭ ಒದಗಿ ಬಂದಿದೆ. ಹೀಗಾಗಿ ರೈತರು ಅಸಹಾಯಕ ಪರಿಸ್ಥಿತಿಯಲ್ಲಿದ್ದಾರೆ. ಕೂಡಲೇ ಕಬ್ಬು ಬೆಳೆಗಾರರ ಕಬ್ಬಿನ ಹಣವನ್ನು ಶೀಘ್ರದಲ್ಲಿ ರೈತರಿಗೆ ಪಾವತಿಸುವಂತೆ ಸರಕಾರದ ಮೇಲೆ ಒತ್ತಡ ಹೇರಿದರು.

ಮುಖ್ಯಮಂತ್ರಿಗಳಿಗೆ ಬರೆದ ಮನವಿ ಪತ್ರವನ್ನು ಗ್ರೇಡ್-2 ತಹಸೀಲ್ದಾರ ಪಿ.ಜಿ. ಪವಾರ ಅವರಿಗೆ ಸಲ್ಲಿಸಲಾಯಿತು. ಪ್ರತಿಭಟನೆಯಲ್ಲಿ ತಾಲೂಕಾ ಕರವೇ ಅಧ್ಯಕ್ಷ ರಾಜು ಉಕ್ಕಲಿ, ಶ್ರೀಕಾಂತ ದಿವಾಣಜಿ, ಮಂಜುನಾಥ ನಾಯ್ಕೋಡಿ ಪ್ರತಿಭಟನೆಯನ್ನುದ್ದೇಶಿಸಿ ಮಾತನಾಡಿದರು.

ಈ ಸಂದರ್ಭದಲ್ಲಿ ಸಿದ್ದು ಚೌಕಿಮಠ, ಶ್ರೀಶೈಲಗೌಡ ಪಾಟೀಲ, ಕೃಷ್ಣಪ್ಪಾ ನಿಂಬರ್ಗಿ, ಅಮುಲ್ ಮೋರೆ, ಶಿವುಗೌಡ ಪಾಟೀಲ, ಅಶೋಕ ಸಿಂಗೆ, ಸತೀಶ ಶಿವಪೂರ, ಮಲ್ಲು ಆಲಮೇಲಕರ, ಚಿದಾನಂದ ಬಂಡಗಾರ, ದೊಂಡಿಬಾ ವನಮನ, ಶೌಕತಲಿ ಮಡ್ಡಿ, ರೇವಣ್ಣ ಅಂಜುಟಗಿ ಇತರರಿದ್ದರು.

Post Title

ಜಿಲ್ಲೆಯ ಅನ್ನದಾತನ ರಕ್ಷಣೆ ಮಾಡುವುದೆ ಜಿಲ್ಲಾಡಳಿತದ ಪರಮ ಧ್ಯೇಯ: ಡಿ.ಸಿ. ತಿವಾರಿ

ಬೀದರ: ಜಿಲ್ಲೆಯ ಅನ್ನದಾತನ ರಕ್ಷಣೆ ಮಾಡುವಲ್ಲಿ ಕೇಂದ್ರ, ರಾಜ್ಯ ಸರ್ಕಾರಗಳು ಹಾಗೂ ಜಿಲ್ಲಾಡಳಿತ ಸದಾ ಸಿದ್ಧವಾಗಿದೆ ಎಂದು ಜಿಲ್ಲಾಧಿಕಾರಿ ಅನುರಾಗ ತಿವಾರಿ ಸ್ಪಷ್ಟಪಡಿಸಿದರು.

ನಗರದ ಜಿಲ್ಲಾಧಿಕಾರಿ ಕಚೇರಿ ಅವರಣದಲ್ಲಿ ಜಿಲ್ಲಾ ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆಯಿಂದ ಇಂದಿನಿಂದ ಮುಂದಿನ ಇಪ್ಪತ್ತು ದಿನಗಳ ವರೆಗೆ ಜಿಲ್ಲೆಯಲ್ಲಿ ರೈತರಲ್ಲಿ ಆತ್ಮಸ್ಥೈರ್ಯ ತುಂಬಲು ವಾರ್ತಾ ಇಲಾಖೆಯಿಂದ ಹೊರಟ ವಾಹನ, ಎತ್ತಿನ ಬಂಡಿ ಹಾಗೂ ಟ್ರಾಕ್ಟರ್ ಮೂಲಕ ಸಾಂತ್ವನ ಯಾತ್ರೆಗೆ ಚಾಲನೆ ನೀಡಿ ಮಾತನಾಡಿದರು.

ರಾಜ್ಯದ ನಾನಾ ಕಡೆಗಳಲ್ಲಿ ರೈತರ ಆತ್ಮಹತ್ಯೆ ಪ್ರಕರಣಗಳು ವರದಿಯಾಗುತ್ತಿರುವ ಹಿನ್ನೆಲೆಯಲ್ಲಿ ಅದನ್ನು ತಡೆಯಲು, ರೈತರಲ್ಲಿ ಬದುಕುವ ಧೈರ್ಯ ತುಂಬಲು ರಾಜ್ಯದಲ್ಲಿ 'ಬದುಕು ಬೇಸಾಯ' ಎಂಬ ಹೆಸರಿನಲ್ಲಿ ರೈತರ ಸಾಂತ್ವನ ಯಾತ್ರೆ ಕೈಗೊಳ್ಳಲಾಗಿದ್ದು, ರೈತರ ರಕ್ಷಣೆ ಮಾಡುವ ಧೈಯ್ಯ ಜಿಲ್ಲಾಡಳಿತ ಹೊಂದಿದ್ದು, ಇನ್ನು ಮುಂದೆ ರೈತರು ಎದೆಗುಂದದೆ, ಸರ್ಕಾರದಿಂದ ಸಿಗುವ ಸೌಲತ್ತು ಪಡೆಯಲು ಮುಂದೆ ಬರುವಂತೆ ಈ ಮೂಲಕ ಮನವಿ ಮಾಡಿದರು.

ಈ ಸಾಂತ್ವನ ಯಾತ್ರೆಯು ಪ್ರತಿ ದಿವಸ 20 ಗ್ರಾಮಗಳಂತೆ ಜಿಲ್ಲೆಯ ಸುಮಾರು 200 ಹಳ್ಳಿಗಳಿಗೆ ಈ ಯಾತ್ರೆ ಸಂಚರಿಸಿ, ರೈತರಲ್ಲಿ ಆತ್ಮಸ್ಥೈರ್ಯ ತುಂಬುವ ಕಾರ್ಯ ನಡೆಯಲಿದೆ ಎಂದವರು ಹೇಳಿದರು.

ಜಿಲ್ಲೆಯಲ್ಲಿ ಈಗಾಗಲೆ 175 ಗ್ರಾಮಗಳಲ್ಲಿ ಕುಡಿಯುವ ನೀರಿನ ಸಮಸ್ಯೆ ಉಂಟಾಗಿರುವ ಬಗ್ಗೆ ವರದಿಯಾಗಿದ್ದು, ನಿನ್ನೆ ಜಿಲ್ಲಾ ಉಸ್ತುವಾರಿ ಕಾರ್ಯದರ್ಶಿಗಳ ಅಧ್ಯಕ್ಷತೆಯಲ್ಲಿ ಸಭೆ ನಡೆಸಲಾಗಿದೆ. ಕುಡಿಯುವ ನೀರಿನ ಸಮಸ್ಯೆ ನಿವಾರಣೆಗೆ ಬೇಕಾಗುವ ಅಗತ್ಯ ಕ್ರಮಗಳನ್ನು ಕೈಗೊಳ್ಳಲು ಜಿಲ್ಲಾಡಳಿತ ಸಜ್ಜಾಗಿದೆ ಎಂದರು.

ಜಿಲ್ಲೆಯ ಬೀದರ, ಹುಮನಾಬಾದ್, ಚಿಟಗುಪ್ಪ ಹಾಗೂ ಭಾಲ್ಕಿ ಪಟ್ಟಣಗಳಿಗೆ ಕಾರಂಜಾದಿಂದ ನೀರು ಸರಬರಾಜು ಆಗುತ್ತಿದ್ದು, ಕಾರಂಜಾದಲ್ಲಿ ನೀರಿನ ಪ್ರಮಾಣ ಕಡಿಮೆಯಾಗಿದ್ದು, ಈ ಭೀಕರ ಸಮಸ್ಯೆಗೆ ಜಿಲ್ಲಾಡಳಿತ ಅಗತ್ಯ ಕ್ರಮ ಕೈಗೊಳ್ಳುತ್ತಿದೆ ಎಂದವರು ಹೇಳಿದರು.

ಜಿಲ್ಲೆಯನ್ನು ಬರಗಾಲ ಪೀಡಿತ ಜಿಲ್ಲೆಯನ್ನಾಗಿ ಘೋಷಿಸುವ ಜವಾಬ್ದಾರಿ ರಾಜ್ಯ ಸರ್ಕಾರದ್ದಾಗಿದ್ದು, ಈ ವಿಚಾರವಾಗಿ ಏನನ್ನೂ ಹೇಳುವುದಿಲ್ಲವೆಂದು ತಿಳಿಸಿದ ಅವರು, ಒಟ್ಟಾರೆ ಜಿಲ್ಲೆಯ ರೈತರಿಗೆ ಯಾವುದೆ ಅನಾನುಕುಲವಾದರೆ ಅಲ್ಲಿ ಜಿಲ್ಲಾಡಳಿತ ಹಾಜರಿರುತ್ತದೆ, ಜೊತೆಗೆ ನಮ್ಮ ದಿನದ ಇಪ್ಪತ್ತುನಾಲ್ಕು ತಾಸುಗಳ ಕಾಲ ಸಹಾಯವಾಣಿ ಕಾರ್ಯ ಮಾಡುತ್ತದೆ ಎಂದರು.

ಈ ಸಂದರ್ಭದಲ್ಲಿ ಕೃಷಿ ಇಲಾಖೆಯ ಸಹಾಯಕ ನಿರ್ದೇಶಕಿ ಅನುಷಯಾ ಹೂಗಾರ್, ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆಯ ಸಹಾಯಕ ನಿರ್ದೇಶಕ ರವಿರಾಜ್.ಹೆಚ್.ಜಿ, ಕಲಾವಿದರುಗಳಾದ ವಿಜಯಕುಮಾರ ಸೋನಾರೆ, ಸುನಿಲ ಕಡ್ಡೆ, ದೇವಿದಾಸ್ ಚಿಮಕೊಡೆ, ಐಸುದಾಸ್ ಅಲಿಯಂಬರ್ ಸೇರಿದಂತೆ ಇತರಿದ್ದರು.

ವೈಜ್ಞಾನಿಕ ಮನೋಭಾವ ಬೆಳೆಸಿಕೊಳ್ಳಲು ವಿದ್ಯಾರ್ಥಿಗಳಿಗೆ ಕರೆ

ಕಲಬುರಗಿ,ಆ.5-ವಿದ್ಯಾರ್ಥಿಗಳು ಓದಿನ ಜೊತೆಗೆ ವೈಜ್ಞಾನಿಕ ಮನೋಭಾವ ಬೆಳೆಸಿಕೊಳ್ಳಬೇಕು ಎಂದು ಗುಲಬರ್ಗಾ ವಿಶ್ವವಿದ್ಯಾಲಯದ ಸಿಂಡಿಕೇಟ್ ಸದಸ್ಯ ಎನ್.ಎಂ.ಕಾಳೆ ಕರೆ ನೀಡಿದರು.

ನಗರದ ಸಂತ ಜೋಸೆಫ್ ಪಿಯು ಕಾಲೇಜಿನಲ್ಲಿ ಇತ್ತೀಚೆಗೆ ಹಮ್ಮಿಕೊಂಡಿದ್ದ ಪ್ರಥಮ ವರ್ಷದ ವಿದ್ಯಾರ್ಥಿಗಳಿಗೆ ಸ್ವಾಗತ ಸಮಾರಂಭ ಮತ್ತು ಮಾರ್ಚನಲ್ಲಿ ನಡೆದ ಪಿಯು ಪರೀಕ್ಷೆಯಲ್ಲಿ ಉಚ್ಛಶ್ರೇಣಿಯಲ್ಲಿ ತೇರ್ಗಡೆಯಾದ ವಿದ್ಯಾರ್ಥಿನಿಯರಿಗೆ ಪ್ರತಿಭಾ ಪುರಸ್ಕಾರ ಸಮಾರಂಭವನ್ನು ಜ್ಯೋತಿ ಬೆಳಗಿಸಿ ಉದ್ಘಾಟಿಸಿ ಅವರು ಮಾತನಾಡುತ್ತಿದ್ದರು.

ಸಂತ ಜೋಸೆಫ್ ಕಾಲೇಜು ನಗರದ ಅತ್ಯುತ್ತಮ ಕಾಲೇಜುಗಳಲ್ಲೊಂದಾಗಿದ್ದು, ಇಂದಿನ ವೈಜ್ಞಾನಿಕ ಯುಗದಲ್ಲಿ ವಿದ್ಯಾರ್ಥಿಗಳು ಓದಿನ ಜೊತೆಗೆ ವೈಜ್ಞಾನಿಕ ಮನೋಭಾವ ಬೆಳೆಸಿಕೊಳ್ಳಬೇಕು ಎಂದು ಕರೆ ನೀಡಿದರು.

ಮುಖ್ಯ ಅತಿಥಿಗಳಾಗಿ ಆಗಮಿಸಿದ್ದ ಸಂಗೀತಾ ಕಟ್ಟಿಮನಿ ಅವರು ಮಾತನಾಡುತ್ತ, ವಿದ್ಯಾರ್ಥಿಗಳು ಉತ್ತಮ ಭವಿಷ್ಯ ರೂಪಿಸಿಕೊಳ್ಳಲು ಆಸಕ್ತಿಯಿಂದ ಸತತವಾಗಿ ಅಭ್ಯಾಸದಲ್ಲಿ ತೊಡಗಬೇಕು ಎಂದು ಕರೆ ನೀಡಿದರು.

ಕಾಲೇಜಿನ ಪ್ರಾಚಾರ್ಯರು ಕಾಲೇಜು ಚುನಾವಣೆಯಲ್ಲಿ ಆಯ್ಕೆಯಾದ ವಿದ್ಯಾರ್ಥಿನಿಯರಿಗೆ ಪ್ರತಿಜ್ಞಾವಿಧಿ ಬೋಧಿಸಿದರು. 2015 ಮಾರ್ಚ ತಿಂಗಳಲ್ಲಿ ಜರುಗಿದ ದ್ವಿತೀಯ ಪಿಯುಸಿ ವಾರ್ಷಿಕ ಪರೀಕ್ಷೆಯಲ್ಲಿ ಉಚ್ಛಶ್ರೇಣಿಯಲ್ಲಿ ತೇರ್ಗಡೆಯಾದ 22 ವಿದ್ಯಾರ್ಥಿನಿಯರಿಗೆ ಪ್ರೋತ್ಸಾಹಧನ ಮತ್ತು ನೆನಪಿನ ಕಾಣೆಗೆ ನೀಡಿ ಗೌರವಿಸಲಾಯಿತು. ಗುವಿವಿ ನೂತನ ಸಿಂಡಿಕೇಟ್ ಸದಸ್ಯರಾಗಿ ನೇಮಕಗೊಂಡ ಎನ್.ಎಂ.ಕಾಳೆ ಅವರನ್ನು ಸಂಸ್ಥೆಯ ವತಿಯಿಂದ ಸನ್ಮಾನಿಸಿ ಅಭಿನಂದಿಸಲಾಯಿತು. ಆಡಳಿತ ಮಂಡಳಿಯ ಮ್ಯಾನೇಜರ್ ಸಿಸ್ಟರ್ ಜಸ್ವಿಟಾ, ಸಿಸ್ಟರ್ ವೆನ್ನಿಸಾ, ಸಿಸ್ಟರ್ ಕ್ಯಾಂಡಿಡಾ, ಸಿಸ್ಟರ್ ಅಮಿತಾ, ಪ್ರಾಂಶುಪಾಲರಾದ ಸಿಸ್ಟರ್ ಪ್ರಫುಲಾ ಉಪಸ್ಥಿತರಿದ್ದರು. ಪ್ರಾರಂಭದಲ್ಲಿ ಕನ್ನಡ ಉಪನ್ಯಾಸಕರಾದ ಡಾ.ಚಿ.ಸಿ.ನಿಂಗಣ್ಣ ಸ್ವಾಗತಿಸಿದರು. ಜೆಭಾ ಕುಲ್ಸುಮ್ ಕಾರ್ಯಕ್ರಮ ನಿರೂಪಿಸಿದರು. ಉಪನ್ಯಾಸಕರಾದ ನಿರೂಪಮಾ ವಂದಿಸಿದರು.

ಕಲಬುರಗಿ : ಬರ ಪೀಡಿತ ಜಿಲ್ಲೆ ಘೋಷಣೆಗೆ ಆಗ್ರಹಿಸಿ ಬೃಹತ್ ಪ್ರತಿಭಟನಾ ಮೆರವಣಿಗೆ

ಕಲಬುರಗಿ,ಆ.5-ಕಲಬುರಗಿ ಜಿಲ್ಲೆಯನ್ನು ಬರ ಪೀಡಿತ ಎಂದು ಕೂಡಲೇ ಘೋಷಣೆ ಮಾಡುವಂತೆ ಆಗ್ರಹಿಸಿ ರೈತ ಸಂಘಟನೆಗಳ ಜಂಟಿ ಕ್ರೀಯಾ ಸಮಿತಿ ನೇತೃತ್ವದಲ್ಲಿ ನಗರದ ಜಗತ್ ವೃತ್ತದಿಂದ ಜಿಲ್ಲಾಧಿಕಾರಿಗಳ ಕಚೇರಿಯವರೆಗೆ ಇಂದು ಬೃಹತ್ ಪ್ರತಿಭಟನಾ ಮೆರವಣಿಗೆ ನಡೆಸಲಾಯಿತು.

ಮಾಜಿ ಸಚಿವ ಎಸ್.ಕೆ.ಕಾಂತಾ, ಶಾಸಕ ಬಿ.ಆರ್.ಪಾಟೀಲ, ಮಾಜಿ ಸಚಿವ ಬಾಬುರಾವ ಚವ್ಹಾಣ, ಮಾಜಿ ಶಾಸಕ ಎಂ.ವೈ.ಪಾಟೀಲ, ಜಿಲ್ಲಾ ರೈತ ಹೋರಾಟ ಸಮಿತಿ ಅಧ್ಯಕ್ಷ ಕೇದಾರಲಿಂಗಯ್ಯ ಹಿರೇಮಠ, ರಾಜ್ಯ ತೊಗರಿ ಬೆಳೆಗಾರರ ಸಂಘದ ಅಧ್ಯಕ್ಷ ಬಸವರಾಜ ಇಂಗಿನ್, ಜಿಲ್ಲಾ ಕೃಷಿಕ ಸಮಾಜದ ಅಧ್ಯಕ್ಷ ಸಿದ್ರಾಮಪ್ಪ ಪಾಟೀಲ ಧಂಗಾಪೂರ, ಜಿಲ್ಲಾ ಕಬ್ಬು ಬೆಳೆಗಾರರ ಸಂಘದ ಅಧ್ಯಕ್ಷ ಜಗದೀಶ ಪಾಟೀಲ, ಹೈದ್ರಾಬಾದ ಕರ್ನಾಟಕ ರೈತ ಸಂಘದ ಅಧ್ಯಕ್ಷ ದಯಾನಂದ ಪಾಟೀಲ, ರೈತ ಮುಖಂಡರಾದ ಧರ್ಮರಾಜ ಸಾಹು, ಅಸ್ಲಂ ಕಲ್ಯಾಣಿ, ಸೋಮಣ್ಣಗೌಡ ಬಳಬಟ್ಟಿ, ಸಿದ್ದರಾಮ ಪ್ಯಾಟಿ ಅವರ ನೇತೃತ್ವದಲ್ಲಿ ನಡೆದ ಬೃಹತ್ ಪ್ರತಿಭಟನಾ ಮೆರವಣಿಗೆಯಲ್ಲಿ ರೈತ ಮುಖಂಡರು ಮತ್ತು ರೈತರು ಬೃಹತ್ ಸಂಖ್ಯೆಯಲ್ಲಿ ಪಾಲ್ಗೊಂಡಿದ್ದರು.

ಎಲ್ಲ ಬೆಳೆಗಳಿಗೂ ಬೆಳೆ ವಿಮೆ ನೀಡಬೇಕು, ಪ್ರತಿ ಎಕರೆಗೆ 20 ಸಾವಿರ ರೂಪಾಯಿ ಪರಿಹಾರ ಧನ ನೀಡಬೇಕು, ರೈತರ ಸಾಲ ಮನ್ನಾ ಮಾಡಬೇಕು, ಜಾನುವಾರುಗಳಿಗಾಗಿ ಗೋಶಾಲೆ ತರೆಯಬೇಕು ಹಾಗೂ ಮೇವಿನ ಬ್ಯಾಂಕ್ ಪಂಚಾಯತಿ ಮಟ್ಟದಲ್ಲಿ ಪ್ರಾರಂಭಿಸಬೇಕು, ಜನ ಮತ್ತು ಜಾನುವಾರುಗಳಿಗಾಗಿ ಕುಡಿಯುವ ನೀರಿನ ಶಾಶ್ವತ ವ್ಯವಸ್ಥೆ ಕಲ್ಪಿಸಬೇಕು ಎಂದು ಪ್ರತಿಭಟನಾಕಾರರು ಆಗ್ರಹಿಸಿದರು.

ಪ್ರತಿಭಟನೆಯ ನಂತರ ಜಿಲ್ಲಾಧಿಕಾರಿಗಳ ಮುಖಾಂತರ ಮುಖ್ಯಮಂತ್ರಿಗಳಿಗೆ ಮನವಿಪತ್ರ ಸಲ್ಲಿಸಲಾಯಿತು.

ಬರಪರಿಹಾರದಲ್ಲಿ ಅವ್ಯವಹಾರ: ಬಿಜೆಪಿ ಆರೋಪ

ಯಾದಗಿರಿ, ಅ. 5: ಜಿಲ್ಲೆಯಲ್ಲಿ ಬರಗಾಲದಿಂದ ಜನಕಂಗೆಟ್ಟು ಹೋಗಿದ್ದಾರೆ. ಜನಜಾನುವಾರಗಳಿಗೆ ಕುಡಿಯಲು ನೀರು ಸಿಗುತ್ತಿಲ್ಲ. ಸರ್ಕಾರ ನೀಡಿರುವ ಬರಪರಿಹಾರದಲ್ಲಿ ಅವ್ಯವಹಾರ ನಡೆದಿದೆ ಎಂದು ಬಿಜೆಪಿ ಜಿಲ್ಲಾ ಅಧ್ಯಕ್ಷ ವೆಂಕಟರೆಡ್ಡಿ ಮುದ್ನಾಳ ಆರೋಪಿಸಿದರು.

ಅವರು ಇಂದು ಮಾಧ್ಯಮಗೋಷ್ಠಿಯಲ್ಲಿ ಮಾತನಾಡಿ ಮಳೆಯ ಕೊರತೆಯಿಂದಾಗಿ ಬೆಳೆ ಸಂಪೂರ್ಣ ಹಾಳಾಗಿದೆ. ನೀರಿನ ಮೂಲ ಬತ್ತಿಹೋಗಿದ್ದರಿಂದಾಗಿ ಜನಜಾನುವಾರುಗಳಿಗೆ ಕುಡಿಯುವ ನೀರಿನ ತೀವ್ರ ತೊಂದರೆ ಅನುಭವಿಸುಂತಾಗಿದೆ. ಸರ್ಕಾರವು ಬರಪರಿಹಾರಕ್ಕಾಗಿ ಹಣ ಬಿಡುಗಡೆ ಮಾಡಿದೆ ಎಂದು ಹೇಳಲಾಗುತ್ತಿದೆ. ತಾಲೂಕಿನ ಕೌಳುರು ಗ್ರಾಮದಲ್ಲಿ ಶೇ. 70 ರಷ್ಟು ಬರಪರಿಹಾರ ವಿತರಿಸಲಾಗಿದೆ ಎಂದ ಹೇಳುವ ಜಿಲ್ಲಾ ಉಸ್ತುವಾರಿ ಸಚಿವರು ಆಂದ್ರದಿಂದ ವಲಸೆ ಬಂದ ರೈತರಿಗೆ ನೀಡಿದ್ದಾರೆ ಎಂದು ಆರೋಪಿಸಿದರು.

ಜಿಲ್ಲೆಯಲ್ಲಿ ಶುದ್ಧ ಕುಡಿಯುವ ನೀರಿಗಾಗಿ ಆರ್‍ಓ ಪ್ಲಾಂಟ್ ಸ್ಥಾಪನೆ ಮಾಡಲಾಗಿದೆ. ಇದರಲ್ಲಿಯೂ ಕೂಡ ಅವ್ಯವಹಾರ ನಡೆದಿರುವ ಕುರಿತು ದಾಖಲೆಗಳನ್ನು ಪ್ರದರ್ಶಿಸಿದರು. ಪ್ರಕರಣ ಕುರಿತು ಉನ್ನತ ಮಟ್ಟದ ತಿನಿಖೆಗೆ ಆಗ್ರಹಿಸಿ ಪ್ರತಿಭಟನೆ ಹಮ್ಮಿಕೊಳ್ಳಲಾಗಿದೆ ಎಂದು ವಿವರಿಸಿದರು.

ಸುದ್ದಿಗೋಷ್ಠಿಯಲ್ಲಿ ಬಿಜೆಪಿ ಮುಖಂಡರಾದ ರಾಮರೆಡ್ಡಿ ಕಾಸಪನಳ್ಳಿ, ಸಾಯಿಬಣ್ಣ ಬೊರಬಂಡ, ವೆಂಕಟರೆಡ್ಡಿ, ಶರಣಗೌಡ ಎಲ್ಹೇರಿ, ವೆಂಕಟರೆಡ್ಡಿ, ಭೀಮು ರಾಠೋಡ, ಶಿವಪ್ಪ ಕಡೆಚೂರ ಹಾಗೂ ಇತರರು ಇದ್ದರು.

ಒಂದು ಕ್ವಾಟರ್‍ಗೆ ಮಾರಿ ಹೋಗುತ್ತಿದ್ದ 2 ಮಕ್ಕಳ ರಕ್ಷಣೆ

ಬೀದರ: ಕುಡಿದ ಅಮಲಿನಲ್ಲಿ ತಾನು ಹಡೆದ ತನ್ನ ಸ್ವಂತ ಮಕ್ಕಳನ್ನು ಬರೀ ಒಂದು ಕ್ವಾಟರ್ ಬೆಲೆ ಮೂವತೈದು ರೂಪಾಯಿಗೆ ಮಾರಲು ಮುಂದಾಗಿದ್ದ ಮಹಿಳೆಯಿಂದ ಬರೀ ನಾಲ್ಕು ತಿಂಗಳ ಒಂದು ಗಂಡು ಹಾಗೂ ಒಂದು ವರೆ ವರ್ಷದ ಒಂದು ಹೆಣ್ಣು ಮಗುವನ್ನು ಕರ್ಬಾಟಕ ಬಾಲವಿಕಾಸ ಅಕಾಡೆಮಿ, ಜಿಲ್ಲಾ ಮಕ್ಕಳ ರಕ್ಷಣಾ ಘಟಕ ಹಾಗೂ ಜಿಲ್ಲಾ ಮಕ್ಕಳ ರಕ್ಷಣಾ ಸಮಿತಿ ಸದಸ್ಯರು ವಶಕ್ಕೆ ತೆಗೆದುಕೊಂಡ ಅಪರೂಪದ ಘಟನೆ ನಗರದ ರೈಲ್ವೆ ನಿಲ್ದಾಣದ ಬಳಿ ಮಂಗಳವಾರ ಸಂಜೆ ನಡೆದು ಹೋಯಿತು.

ಕಲಬುರ್ಗಿ ಜಿಲ್ಲೆಯ ಸೇಡಂ ನಗರದ ನಿವಾಸಿ ಲಕ್ಷ್ನೀ ಗಂಡ ರಾಮಚಂದ್ರ ಎಂಬ ಮೂವತ್ತು ವರ್ಷದ ಯುವತಿ ಕಂಠ ಪೂರ್ತಿ ಕುಡಿದು ರೈಲ್ವೆ ನಿಲ್ದಾಣದಲ್ಲಿ ಚೀರಾಟ ಮಾಡುತ್ತಿರುವುದನ್ನು ರೈಲ್ವೆ ಪೋಲಿಸ್‍ರು ಮನಗಂಡು ಆಕೆಯನ್ನು ಸ್ಟೇಶನ್‍ನಿಂದ ಹೋರಗೆ ತಂದು ಬಿಟ್ಟಾಗ ಆಕ್ರೋಶಗೊಂಡ ಆ ಯುವತಿ ತನ್ನ ಸ್ವಂತ ಎರಡು ಮಕ್ಕಳನ್ನೆ ಹೊಡಿದು, ಬಡಿದು ಹಿಂಸಿಸುತ್ತಿರುವಾಗ ಕರ್ನಾಟಕ ಬಾಲವಿಕಾಸ ಅಕಾಡೆಮಿ ಹಾಗೂ ಜಿಲ್ಲಾ ಮಕ್ಕಳ ರಕ್ಷಣಾ ಸಮಿತಿ ಸದಸ್ಯರು ಆ ಎರಡು ಮಕ್ಕಳನ್ನು ಆಕೆಯಿಂದ ವಶಕ್ಕೆ ಪಡೆದು ಅಲ್ಲಿಯ ಇದ್ದ ಕಸ್ತುರಿಬಾಯಿ ಬಾವಗಿ ಎಂಬಾಕೆಗೆ ತಾತ್ಕಾಲಿಕ ಉಪಚಾರಕ್ಕಾಗಿ ಒಪ್ಪಿಸಿ, ನಂತರ ಜಿಲ್ಲಾ ಮಕ್ಕಳ ರಕ್ಷಣಾಧಿಕಾರಿ ಪಿ.ಎಸ್.ಇಟಕಂಪಳ್ಳಿ ಅವರಿಗೆ ಆ ಎರಡು ಮಕ್ಕಳನ್ನು ಒಪ್ಪಿಸಲಾಯಿತು. ಜೊತೆಗೆ ನ್ಯು ಟೌನ್ ಪೋಲಿಸ್ ಠಾಣೆಯ ಅಪರಾಧ ದಳದ ಪಿ.ಎಸ್.ಐ ಶ್ರೀಮಂತ ಎಲ್ಲಾಳ್‍ರಿಗೆ ಹೆಚ್ಚಿನ ವಿಚಾರಣೆಗಾಗಿ ಆ ಯುವತಿಯನ್ನು ಠಾಣೆಗೆ ಕಳುಹಿಸಲಾಯಿತು.

ಕಳೆದ ಐದಾರು ತಿಂಗಳ ಹಿಂದೆ ತನ್ನ ಪತಿ ರಾಮಚಂದ್ರ ತನ್ನನ್ನು ಬಿಟ್ಟು ಓಡಿ ಹೋಗಿದ್ದು, ಬದುಕಲು ದಿಕ್ಕು ಕಾಣದೆ ಈ ಆಲೋಚನೆಗೆ ಇಳಿದಿರುವುದಾಗಿ ತಿಳಿಸಿದ ಲಕ್ಷ್ಮೀ, ತನ್ನ ಗಂಡನ ಬಳಿ ತನ್ನ ಮತ್ತೊಂದು ನಾಲ್ಕು ವರ್ಷದ ಗಂಡು ಮಗು ಸಹ ಇರುವುದನ್ನು ಈ ಸಂದರ್ಭದಲ್ಲಿ ತಿಳಿಸಿದ್ದಾಳೆ. ನಗರದ ನ್ಯು ಟೌನ್ ಪೋಲಿಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು ತನಿಖೆ ಕೈಗೊಂಡಿದ್ದಾರೆ.

ಈ ಸಂದರ್ಭದಲ್ಲಿ ಕರ್ನಾಟಕ ಬಾಲವಿಕಾಸ ಅಕಾಡೆಮಿ ಸದಸ್ಯರುಗಳಾದ ಶಂಭುಲಿಂಗ ವಾಲ್ದೊಡ್ಡಿ, ಮಹೇಶ ಗೋರನಾಳಕರ್, ಶಿವಕುಮಾರ ಸ್ವಾಮಿ, ಜಿಲ್ಲಾ ಮಕ್ಕಳ ರಕ್ಷಣಾ ಸಮಿತಿ ಅಧ್ಯಕ್ಷ ಸಂಜೀವಕುಮಾರ ಡಾಕುಳಗಿ, ಜಿಲ್ಲಾ ಮಕ್ಕಳ ರಕ್ಷಣಾ ಸಿಬ್ಬಂದಿ ಪ್ರಶಾಂತ, ಡಾನ್ ಬಾಸ್ಕೋ ಸಂಸ್ಥೆಯ ಜಾನ್ಸನ್ ಸೇರಿದಂತೆ ಜಿಲ್ಲೆಯ ಇತರೆ ಸಂಘಟನೆಗಳ ಪ್ರಮುಖರು ಉಪಸ್ಥಿತರಿದ್ದರು.

ವರದಕ್ಷಿಣೆ ಕಿರುಕುಳ ವಿಷ ಕುಡಿಸಿ ಹತ್ಯೆ

ಚಿಂಚೋಳಿ ಃ ತಾಲೂಕೀನ ನರನಾಳ ಗ್ರಾಮದಲ್ಲಿ ರೇಣುಕಾ (25) ಎಂಬ ಮಹಿಳೆಗೆ ವರದಕ್ಷಿಣೆ ಕಿರುಕುಳ ನೀಡಿ ವಿಷ ಕುಡಿಸಿ ಗಂಡನ ಮನೆಯವರು ಹತೈ ಗೈದಿದ್ದಾರೆ ಎಂದು ತಿಳಿದು ಬಂದಿದೆ.

ಎರಡು ತಿಂಗಳ ಹಿಂದೆ ಮದುವೆಯಾದ ನವ ವಿವಾಹಿತೆ ರೇಣುಕಾ ಗಂಡ ಗಣೇಶ ಕೋಲಿ ಎಂಬ ಮಹಿಳೆಗೆ ತನ್ನ ತವರು ಮನೆಯಿಂದ ಹಣ ತರುವಂತೆ ನಿತ್ಯವು ಅತ್ತೆ ಮಾವ ಮೈದುನ ಹಾಗೂ ಗಂಡ ಗಣೇಶ ಎನ್ನುವವರು ನಿತ್ಯವು ಹೊಡೆ ಬಡೆ ಮಾಡುವುದಲ್ಲದೆ ಮಾನಸಿಕವಾಗಿ ದೈಹಿಕವಾಗಿ ಕಿರುಕುಳ ನೀಡುತ್ತಿದ್ದರು ಹಣ ತರಲು ನಿರಾಕರಿಸಿದ್ದಕ್ಕೆ ವಿಷ ಕುಡಿಸಿ ಹತೈ ಮಾಡಿದ್ದಾರೆ ಎಂದು ಮೃತಳ ತಂದೆ ದೂರಿನ ಹಿನ್ನಲೆ ಚಿಂಚೋಳಿ ಪೋಲಿಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ ಎಂದು ಪಿಎಸ್‍ಐ ಎಎಸ್ ಪಟೇಲ್ ತಿಳಿಸಿದ್ದಾರೆ.

ಘಟನಾ ಸ್ಥಳಕ್ಕೆ ಪಿಎಸ್‍ಐ ಎಎಸ್ ಪಟೇಲ್ ಭೇಟಿ ನೀಡಿ ಮೃತಳ ಗಂಡ ಗಣೇಶ ಎಂಬಾತನನ್ನು ಬಂಧಿಸಲಾಗಿದ್ದು. ಅತ್ತೆ, ಮಾವ, ಮೈದುನ ಪರಾರಿಯಾಗಿದ್ದು ಬಂಧನಕ್ಕಾಗಿ ಶೋಧ ಕಾರ್ಯ ನಡೆಸಲಾಗುತ್ತಿದೆ ಎಂದು ತಿಳಿದು ಬಂದಿದೆ.

ಜಯತೀರ್ಥರ ಆರಾಧನೆ

ಕಲಬುರಗಿ,ಆ.4-ನಗರದ ಬಿದ್ದಾಪುರ ಕಾಲೋನಿಯ ನಂಜನಗೂಡು ರಾಘವೇಂದ್ರ ಸ್ವಾಮಿಗಳವರ ಮಠದಲ್ಲಿ ವರ್ಧಂತಿ ಉತ್ಸವ ಹಾಗೂ ಜಯತೀರ್ಥರ ಆರಾಧನೆಯಯನ್ನು ವೈಭವದಿಂದ ನಡೆಸಲಾಯಿತು.

ಬೆಳಿಗ್ಗೆ ಫಲಪಂಚಾಮೃತ ಅಭಿಷೇಕ, ಅಷ್ಟೋತ್ತರ, ವಿಶೇಷ ಅಲಂಕಾರ ಮಾಡಲಾಯಿತು. ಬೆಂಗಳೂರಿನ ರಾಘವೇಂದ್ರ ಗುಡಿ ಅವರಿಂದ ದಾಸವಾಣಿ ಕಾರ್ಯಕ್ರಮ ನಡೆಯಿತು. ಅವರೊಂದಿಗೆ ರವಿ ತಬಲಾ, ಸುಧೀರ ಕುಲಕರ್ಣಿ, ವಾಸುದೇವಾಚಾರ್ಯ, ಪಪ್ಪು ರಾಮಾಚಾರ್ಯ, ಮಹಿಳಾ ಭಜನಾ ಮಂಡಳಿಯ ಕಟ್ಟಿ ಆಚಾರ್ಯ ಸೇರಿದಂತೆ ಇತರರು ಇದ್ದರು. ನವಲಿ ಕೃಷ್ಣಾಚಾರ್ಯರ ಅಧ್ಯಕ್ಷತೆಯಲ್ಲಿ ಕಾರ್ಯಕ್ರಮ ನಡೆಯಿತು. ಬಂದ ಭಕ್ತಾಧಿಗಳಿಗೆ ತೀರ್ಥ ಪ್ರಸಾದ ವ್ಯವಸ್ಥೆ ಮಾಡಲಾಯಿತು.

ರೈತರ ಆತ್ಮಹತ್ಯೆ ತಡೆಯಲು ಜನಜಾಗೃತಿ ಪಾದಯಾತ್ರೆ 7 ರಂದು

ಕಲಬುರಗಿ,ಆ.5-ಪ್ರಗತಿಪರ ಮಠಾಧೀಶರ ವೇದಿಕೆ ನೇತೃತ್ವದಲ್ಲಿ ಆಗಸ್ಟ್ 7 ರಂದು ಬೆಳಿಗ್ಗೆ 10 ಗಂಟೆಗೆ ನಗರದ ಸರ್ದಾರ ವಲ್ಲಭಭಾಯಿ ಪಟೇಲ್ ವೃತ್ತದಿಂದ ಜಿಲ್ಲಾಧಿಕಾರಿಗಳ ಕಚೇರಿಯವರೆಗೆ ರೈತರ ಆತ್ಮಹತ್ಯೆ ತಡೆಯಲು ಜನಜಾಗೃತಿ ಪಾದಯಾತ್ರೆ ಹಮ್ಮಿಕೊಳ್ಳಲಾಗಿದೆ.

ಈ ಪಾದಯಾತ್ರೆಯಲ್ಲಿ ಮಠಾಧೀಶರು, ಸರ್ವಧರ್ಮ ಗುರುಗಳು, ರಾಜಕೀಯ ಮುಖಂಡರು ಮತ್ತು ಕನ್ನಡ ಪರ ಸಂಘಟನೆಗಳ ಮುಖಂಡರು ಭಾಗವಹಿಸಲಿದ್ದಾರೆ.

ಪ್ರಗತಿಪರ ಮಠಾಧೀಶರ ವೇದಿಕೆ ರಾಜ್ಯ ಕಾರ್ಯಾಧ್ಯಕ್ಷರಾದ ಶ್ರೀಶೈಲಂ ಸಾರಂಗ ಮಠದ ಹಾಗೂ ಶಹಾಬಜಾರ ಸುಲಫಲ ಮಠಜ ಜಗದ್ಗುರು ಡಾ.ಸಾರಂಗಧರ ದೇಶಿಕೇಂದ್ರ ಮಹಾಸ್ವಾಮಿಗಳ ನೇತೃತ್ವದಲ್ಲಿ, ಶಹಾಬಜಾರ ಚೌದಾಪುರಿ ಹಿರೇಮಠದ ರಾಜಶೇಖರ ಶಿವಾಚಾರ್ಯರ ಸಮ್ಮುಖದಲ್ಲಿ ಪಾದಯಾತ್ರೆ ನಡೆಯಲಿದೆ.

ಮಾರಕಾಸ್ತ್ರ ತೋರಿಸಿ ಜೀವ ಬೆದರಿಕೆ ಹಾಕಿ ದರೋಡೆ: ನಾಲ್ವರ ಬಂಧನ

ಕಲಬುರಗಿ,ಆ.5-ಹತ್ತೊಂಬತ್ತರಿಂದ ಇಪ್ಪತ್ತು ವರ್ಷ ವಯಸ್ಸಿನ 6 ಜನರಿದ್ದ ಯುವಕರ ಗುಂಪೊಂದು ತಲವಾರ ತೋರಿಸಿ ಜೀವ ಬೆದರಿಕೆ ಹಾಕಿ ದರೋಡೆ ನಡೆಸಿದ ಘಟನೆ ಗ್ರಾಮೀಣ ಪೊಲೀಸ್ ಠಾಣೆ ವ್ಯಾಪ್ತಿಯ ಮಿಲ್ಲತ್ ನಗರದ ದಾವಲ್ ಮಲಿಕ್ ಚಿಲ್ಲಾ ಹತ್ತಿರ ನಡೆದಿದ್ದು, ಈ ಸಂಬಂಧ ನಾಲ್ವರನ್ನು ಪೊಲೀಸರು ಬಂಧಿಸಿದ್ದಾರೆ.

ನಗರದ ಎಂ.ಎಸ್.ಕೆ.ಮಿಲ್ ಬಡಾವಣೆಯ ಜಿಲಾನಾಬಾದನ ಸಲಾವುದ್ದೀನ್ ಸಾಹೇಬಪಟೇಲ್ (22), ಮದಿನಾ ಕಾಲೋನಿಯ ಮಹಿಬೂಬ್ ಹುಸೇನ್ ಸಾಬ ನದಾಫ್, ಮಿಜ್ಬಾ ನಗರದ ಅಬ್ದುಲ್ ಕರೀಂ ಅಬ್ದುಲ್ ರಹಿಮಾನ್ ಶೇಖ್, ಶೇಖ್ ಇರ್ಫಾನ್ ಶೇಖ್ ಅಬ್ದುಲ್ ಸೌದಾಗರ ಎಂಬುವವರನ್ನು ಇಂದು ಬೆಳಿಗ್ಗೆ ನಗರದ ಚೋರ್ ಗುಂಬಜ್ ಹತ್ತಿರ ಬಂಧಿಸಿ 18 ಸಾವಿರ ರೂಪಾಯಿ ನಗದು, 2 ಮೊಬೈಲ್, 2 ಬೈಕ್ ಮತ್ತು 3 ತಲವಾರ ಸೇರಿದಂತೆ ಸುಮಾರು 70 ಸಾವಿರ ರೂಪಾಯಿ ಮೌಲ್ಯದ ವಸ್ತುಗಳನ್ನು ಜಪ್ತಿ ಮಾಡಿದ್ದಾರೆ.

ಎಸ್ಪಿ ಅಮಿತ್ ಸಿಂಗ್, ಹೆಚ್ಚುವರಿ ಎಸ್ಪಿ ಜಯಪ್ರಕಾಶ, ಗ್ರಾಮೀಣ ಡಿಎಸ್ಪಿ ವಿಜಯ್ ಅಂಚಿ ಮಾರ್ಗದರ್ಶನದಲ್ಲಿ ಸಿಪಿಐ ಎ.ವಾಜಿದ್ ಪಟೇಲ್ ನೇತೃತ್ವದಲ್ಲಿ ಪಿಎಸ್ಐ ಉದ್ದಂಡಪ್ಪ ಮಣ್ಣೂರಕರ್ ಹಾಗೂ ಶರಣಬಸಪ್ಪ ಕೆ., ಸಿಬ್ಬಂದಿಗಳಾದ ಹುಸೇನ್ ಭಾಷಾ, ರಾಜಕುಮಾರ, ವಿಶ್ವನಾಥ, ಅಂಬಾಜಿ, ಕೇಶವ, ಕಂಠೆಪ್ಪ, ಶಿವಶರಣಪ್ಪ, ಈರಣ್ಣ, ಜೀಪ್ ಚಾಲಕ ಬಂಡಪ್ಪ ಅವರು ದಾಳಿ ನಡೆಸಿ ದರೋಡೆಕೋರರನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಈ ದರೋಡೆಕೋರರರು ಏಜಾಜ್ ಪಟೇಲ್ ತಂದೆ ಖಾಜಾ ಪಟೇಲ್ ಮತ್ತು ಆತನ ಗೆಳೆಯರಾದ ಅಬ್ದುಲ್ ಮತೀನ್ ತಂದೆ ಅಬ್ದುಲ್ ಸಮದ್, ಅಬ್ಬಾಸ ಅಲಿ ತಂದೆ ಲಾಲ್ ಅಹ್ಮದ್, ಶಾರೂಖ್ ಶೇಖ್ ತಂದೆ ಮಶಾಕ್, ಸಲೀಂ ತಂದೆ ಕರೀಂಸಾಬ್ ಮತ್ತು ಸೈಯದ್ ಜಾಕೀರ್ ತಂದೆ ಸೈಯದ್ ಮೈನೋದ್ದೀನ್ ಎಂಬುವವರು ಮಿಲ್ಲತ್ ನಗರದ ದಾವಲ್ ಮಲಿಕ್ ಚಿಲ್ಲಾ ಹತ್ತಿರದ ಹುಣಸೆ ಮರದ ಕೆಳಗೆ ಕುಳಿತು ಊಟ ಮಾಡುತ್ತಿದ್ದಾಗ ಎರಡು ಬೈಕ್ ಮೇಲೆ ಬಂದು ತಲವಾರ ತೋರಿಸಿ ಜೀವ ಬೆದರಿಕೆ ಹಾಕಿ 18000 ರೂ. ನಗದು ಮತ್ತು 1 ಸಾವಿರ ರೂಪಾಯಿ ಮೌಲ್ಯದ 2 ಮೊಬೈಲ್ ಸೇರಿದಂತೆ ಸುಮಾರು 19 ಸಾವಿರ ರೂಪಾಯಿ ಮೌಲ್ಯದ ನಗದು ಮತ್ತು ಮೊಬೈಲ್ ದೋಚಿಕೊಂಡು ಹೋಗಿದ್ದರು.

ಈ ಬಗ್ಗೆ ಗ್ರಾಮೀಣ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಪ್ರಕರಣದ ತನಿಖೆ ಕೈಗೊಂಡ ಪೊಲೀಸರು ನಾಲ್ವರು ದರೋಡೆಕೋರರನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದು, ಇನ್ನಿತರರ ಬಂಧನಕ್ಕೆ ಜಾಲಬೀಸಿದ್ದಾರೆ.

ದರೋಡೆಗೆ ಹೊಂಚು : ಮೂವರ ಬಂಧನ, ಮೂವರು ಪರಾರಿ

ಕಲಬುರಗಿ,ಆ.5-ನಗರದ ರಾಮ ಮಂದಿರ ಸರ್ಕಲ್ ಹತ್ತಿರ 6 ಜನರು ಮಾರಕಾಸ್ತ್ರ ಮತ್ತು ಖಾರದ ಪುಡಿ, ಹಗ್ಗ ತೆಗೆದುಕೊಂಡು ದರೋಡೆಗೆ ಹೊಂಚು ಹಾಕಿ ಕುಳಿತಿದ್ದಾರೆ ಎಂಬ ಖಚಿತ ಮಾಹಿತಿ ಮೇಲೆ ದಾಳಿ ನಡೆಸಿದ ಅಶೋಕ ನಗರ ಠಾಣೆ ಪೊಲೀಸರು ಮೂವರನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದು, ಇನ್ನೂ ಮೂವರು ಪರಾರಿಯಾಗಿದ್ದಾರೆ.

ಅಶೋಕನಗರ ಪೊಲೀಸ್ ಠಾಣೆ ಪಿಐ ಸುಧಾ ಆದಿ ಮತ್ತು ಸಿಬ್ಬಂದಿ ದಾಳಿ ನಡೆಸಿ ಸಂಜೀವ ನಗರದ ಗಿರೀಶ್ ಅಣ್ಣಪ್ಪ ಕಲ್ಮೂಡಕರ್, ಭವಾನಿ ನಗರದ ಶರಣು ನಿಂಗಣ್ಣ ಗುಗ್ರಿ ಮತ್ತು ರಾಮನಗರದ ಶ್ರೀಕಾಂತ ಅನಂತಯ್ಯ ಗುತ್ತೇದಾರ ಎಂಬುವವರನ್ನು ಬಂಧಿಸಿ 2 ತಲವಾರ, ಖಾರದ ಪುಡಿ ಮತ್ತು ಹಗ್ಗ ಜಪ್ತಿ ಮಾಡಿದ್ದಾರೆ.

ಇವರಲ್ಲಿ ಗಿರೀಶ್ ಎಂಬಾತ ಪಾಪ್ಯಾ ಎಂಬಾತನ ಕೊಲೆ ಪ್ರಕರಣದಲ್ಲಿ ಆರೋಪಿಯಾಗಿದ್ದು, ಜಾಮೀನಿನ ಮೇಲೆ ಹೊರ ಬಂದಿದ್ದ ನ್ಯಾಯವಾದಿಗೆ ಶುಲ್ಕ ಪಾವತಿಸುವ ಸಂಬಂಧ ಮತ್ತು ಖರ್ಚಿಗೆ ಹಣ ಇಲ್ಲದ ಕಾರಣ ದರೋಡೆಗೆ ಸಂಚು ರೂಪಿಸಿದ್ದಾಗಿ ವಿಚಾರಣೆ ವೇಳೆ ತಿಳಿಸಿದ್ದಾನೆ ಎಂದು ತಿಳಿದುಬಂದಿದೆ.

ಇನ್ನೂ ಮೂವರು ಪರಾರಿಯಾಗಿದ್ದು, ಅವರ ಬಂಧನಕ್ಕೆ ಪೊಲೀಸರು ಜಾಲ ಬೀಸಿದ್ದಾರೆ. ಅಶೋಕ ನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ನಡೆದಿದೆ.

ಹೈಕ ಅಭ್ಯರ್ಥಿಗಳಿಗೆ ಟಿಇಟಿ ವಿನಾಯ್ತಿಗಾಗಿ ಅ.9ರಂದು ಸಭೆ:ಅಂಬಲಗಿ

ಕಲಬುರಗಿ,ಅ.5- ಹಿಂದುಳಿದ ಹೈದ್ರಾಬಾದ್ ಕರ್ನಾಟಕ ಪ್ರದೇಶಕ್ಕೆ ಕಲಂ.371(ಜೆ)ಯಡಿ ನೀಡುವ ಮೀಸಲಾತಿ ಸೌಲಭ್ಯಗಳೊಂದಿಗೆ ಈ ಭಾಗದ ಅಭ್ಯರ್ಥಿಗಳಿಗೆ ಟಿಇಟಿ ಪರೀಕ್ಷೆಯಿಂದ ವಿನಾಯಿತಿ ನೀಡಬೇಕು ಎಂದು ಈಶಾನ್ಯ ವಲಯದ ಶಿಕ್ಷಕರ ವೇದಿಕೆ ಅಧ್ಯಕ್ಷ ಪ್ರೊ.ಎಂಬಿ ಅಂಬಲಗಿ ಅವರು ಸರ್ಕಾರಕ್ಕೆ ಒತ್ತಾಯಿಸಿದ್ದಾರೆ.

ಇದೇ ಅ.9ರ ಬೆಳಿಗ್ಗೆ 11ಕ್ಕೆ ನಗರದ ಕನ್ನಡ ಭವನದಲ್ಲಿ ಮಾಜಿ ಸಚಿವರು, ಹೈಕ ಹೋರಾಟಗಾರರಾದ ವೈಜನಾಥ್ ಪಾಟೀಲ್ ನೇತೃತ್ವದಲ್ಲಿ ಹೈದ್ರಾಬಾದ್ ಕರ್ನಾಟಕ ಪ್ರದೇಶದ ಬಿಇಡಿ, ಡಿಇಡಿ ಅಭ್ಯರ್ಥಿಗಳ ಸಭೆ ಕರೆಯಲಾಗಿದೆ ಎಂದು ಪ್ರಕಟಣೆಯಲ್ಲಿ ತಿಳಿಸಿರುವ ಅವರು, ಟಿಇಟಿ ಪರೀಕ್ಷೆಗೆ ನಿಗದಿಪಡಿಸಿರುವ ಮಾನದಂಡ ಅವೈಜ್ಞಾನಿಕವಾಗಿದೆ, ಎಸ್ಸಿ, ಎಸ್ಟಿ ಮತ್ತು ಪ್ರವರ್ಗದವರಿಗೆ ಶೇ.55 ಅಂಕ ಮತ್ತು ಉಳಿದವರಿಗೆ ಶೇ.60 ಅಂಕ ನಿಗದಿಪಡಿಸಿದ್ದನ್ನು ಕೈಬಿಡಬೇಕು ಎಂದಿರುವ ಅವರು, ಹಿಂದುಳಿದ ವರ್ಗ ಮತ್ತು ಅಲ್ಪಸಂಖ್ಯಾತ ವರ್ಗ, 2ಎ, 2ಬಿ, 3ಎ ಮತ್ತು 3ಬಿ ಅಭ್ಯರ್ಥಿಗಳಿಗೆ ಈ ಭಾಗದ ಹೈದ್ರಾಬಾದ ಕರ್ನಾಟಕ ಪ್ರದೇಶದಲ್ಲಿನ ಖಾಲಿ ಹುದ್ದೆಗಳಿ ಮೀಸಲಾತಿ ಕಲ್ಪಿಸಿಲ್ಲ ಎಂದು ಆರೋಪಿಸಿದ್ದಾರೆ.

ಕಲಂ 371(ಜೆ) ಮೀಸಲಾತಿಯಡಿ ಹೈಕ ಪ್ರದೇಶದ ಅಭ್ಯರ್ಥಿಗಳಿಗೆ ಟಿಇಟಿಯಿಂದ ಸಂಪೂರ್ಣ ವಿನಾಯಿತಿ ನೀಡಬೇಕು, ನೇರವಾಗಿ ಸಿಇಟಿ ಬರೆಯಲು ಅವಕಾಶ ಕಲ್ಪಿಸುವ ಸಂಬಂಧ ಅ.9ರಂದು ಮಾಜಿ ಸಚಿವರಾದ ವೈಜನಾಥ ಪಾಟೀಲ್ ನೇತೃತ್ವದಲ್ಲಿ ನಡೆಯುವ ಬಿಇಡಿ, ಡಿಇಡಿ ಅಭ್ಯರ್ಥಿಗಳ ಸಭೆಗೆ ಎಲ್ಲ ಅಭ್ಯರ್ಥಿಗಳು ಭಾಗವಹಿಸಿ ತಮ್ಮ ಅನಿಸಿಕೆಗಳನ್ನು ಮತ್ತು ಅಭಿಪ್ರಾಯಗಳನ್ನು ನೀಡಬೇಕು ಎಂದು ಮನವಿ ಮಾಡಿರುವ ಅಂಬಲಗಿ ಅವರು, ಹೆಚ್ಚಿನ ಮಾಹಿತಿಗಾಗಿ ಮೊ- 9880169907 ಸಂಪರ್ಕಿಸುವಂತೆ ಪ್ರಕಟಣೆಯಲ್ಲಿ ಕೋರಿದ್ದಾರೆ.

ಉಜ್ಜಯನಿ ಜಗದ್ಗುರುಗಳಿಂದ ಸಾಧಕರಿಗೆ ಅ.8ರಂದು ಪ್ರಶಸ್ತಿ ಪ್ರದಾನ

ಕಲಬುರಗಿ,ಅ.5- ಉಜ್ಜಯನಿ ಪೀಠದ ಸಧರ್ಮ ಸಿಂಹಾಸನಾಧೀಶ್ವರ ಜಗದ್ಗುರು ಸಿದ್ದಲಿಂಗ ರಾಜದೇಶಿಕೇಂದ್ರ ಶಿವಾಚಾರ್ಯ ಭಗವತ್ಪಾದರ ಅಮೃತ ಹಸ್ತದಿಂದ ಉಜ್ಜಯನಿ ಪೀಠದವತಿಯಿಂದ ನಾಡು, ನುಡಿ ಹಾಗೂ ಧಾರ್ಮಿಕ, ಸಮಾಜಿಕ, ಸಾಂಸ್ಕೃತಿಕ ಪತ್ರಿಕಾ ಮಾಧ್ಯಮ ಸೇವೆ, ಕಲಾ ಸೇವೆ ಹಾಗೂ ಧರ್ಮಸಂಸ್ಕೃತಿ ರಕ್ಷೀಸಕೊಂಡು ಬರುತ್ತಿರುವ ವಿವಿಧ ಗಣ್ಯರಿಗೆ ಸಾಧಕರಿಗೆ ಇದೇ ಅ.8ರಂದು ಸೊಗಸನಗೇರಿಯ ಶ್ರೀಶಾಂತಲಿಂಗೇಶ್ವರ ಕಲ್ಯಾಣ ಮಂಟಪದಲ್ಲಿ ಅಂದು ಸಂಜೆ 7ಗಂಟೆಗೆ ನಡೆಯಲಿರುವ ಧರ್ಮ ಸಭೆಯಲ್ಲಿ ಸಾಧಕರಿಗೆ ಪ್ರಶಸ್ತಿ ನೀಡಿ ಗೌರವಿಸಲಾಗುವದು ಎಂದು ಪಂಚಪೀಠದ ವಾರ್ತಾಧಿಕಾರಿ ಸಿದ್ರಾಮಪ್ಪಾ ಆಲಗೂಡಕರ್ ಅವರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ವಿವಿಧ ಕ್ಷೇತ್ರಗಳಲ್ಲಿ ಗಣನೀಯ ಸೇವೆ ಸಲ್ಲಿಸಿದ ಸಾದಕರಾದ ಹೈಕ ಜನಪರ ಹೋರಾಟ ಸಮಿತಿ ಅಧ್ಯಕ್ಷರಾದ ಲಕ್ಷ್ಮಣ ದಸ್ತಿ ಅವರಿಗೆ ಸಮಾಜ ಸುಧಾರಣಾ ಧುರೀಣ ಪ್ರಶಸ್ತಿ, ವಕ್ತಾರ ನಾಗಲಿಂಗಯ್ಯ ಮಠಪತಿ ಅವರಿಗೆ ಸಂಘಟನಾ ದುರಂಧರ ಪ್ರಶಸ್ತಿ, ಪತ್ರಕರ್ತ ವಿಜಯೇಂದ್ರ ಕುಲಕರ್ಣಿ ಅವರಿಗೆ ವಾರ್ತಶ್ರೀ ಪ್ರಶಸ್ತಿ, ಕರವೇ ಅಧ್ಯಕ್ಷ ಶರಣು ಗದ್ದುಗೆ ಅವರ ಉತ್ತರ ಕರ್ನಾಟಕ ಗಡಿನಾಡು ಹೋರಾಟದ ಸೇವೆಗಾಗಿ ಸಮಾಜ ಚೈತನ್ಯ ಶಕ್ತಿ ಪ್ರಶಸ್ತಿ, ವೆಂಕಟೇಶ ಗುಪ್ತಾ ಅವರಿಗೆ ವಾರ್ತಾ ಭೂಷಣ ಪ್ರಶಸ್ತಿ, ಕಲಾವಿದ ಬಾಬುರಾವ ಅವರಿಗೆ ಸಂಗಿತ ರತ್ನ ಪ್ರಶಸ್ತಿ, ಮಾಜಿ ಮೇಯರ ಧರ್ಮಪ್ರಕಾಶ ಪಾಟೀಲ್ ಅವರಿಗೆ ಸಮಾಜ ರತ್ನ ಪ್ರಶಸ್ತಿ, ಸಿದ್ಧಣ್ಣಗೌಡ ಪಾಟೀಲ್ ಕಣ್ಣಿ ಅವರಿಗೆ ಧರ್ಮ ಭೂಷಣ ಪ್ರಶಸ್ತಿ, ಬಸವರಾಜ ನಿಲೂರ ಅವರಿಗೆ ಸಮಾಜ ಸೇವಾ ಧುರಂಧರ ಪ್ರಶಸ್ತಿ, ವೆಂಕಟೇಶ ಕಡೂಣ ಅವರಿಗೆ ವಾರ್ತಾ ಚತುರ ಪ್ರಶಸ್ತಿ, ಬಸವರಾಜ ಶೀಲವಂತ ಅವರಿಗೆ ಗುರುಸೇವಾ ದುರಂಧರ ಪ್ರಶಸ್ತಿ, ಅಂಬಾರಾಯ ಕೋಣೆ ಅವರಿಗೆ ಗುರುಸೇವಾ ನಿಷ್ಠೆ ಪ್ರಶಸ್ತಿ, ವೇ.ಸಿದ್ದಯ್ಯಾ ಶಾಸ್ತ್ರಿ ಅವರಿಗೆ ಜ್ಯೋತಿಷ್ಯ ಪಂಡಿತ ಪ್ರಶಸ್ತಿ, ಸಂಗೀತಗಾರ ಶಿವಶಂಕರ ಬಿರಾದಾರ ಅವರಿಗೆ ಸಂಗೀತ ಧುರಂಧರ ಪ್ರಶಸ್ತಿ ನೀಡಿ ಗೌರವಿಸಲಾಗುವದು.

ಈ ಭವ್ಯ ಕಾರ್ಯಕ್ರಮ ಕಡಗಂಚಿಯ ವೀರಭದ್ರ ಶಿವಾಚಾರ್ಯರ ನೇತೃತ್ವದಲ್ಲಿ ಮತ್ತು ಜೈನಾಪೂರದ ರೇಣುಕಾ ಶಿವಾಚಾರ್ಯರು ಸಮ್ಮುಖದಲ್ಲಿ ಪ್ರಶಸ್ತಿ ಪ್ರದಾನ ನಡೆಯಲಿದೆ ಎಂದು ತಿಳಿಸಿರುವ ಆಲಗೂಡಕರ್ ಅವರು, ಈ ಸಮಾರಂಭದಲ್ಲಿ ಜಗದ್ಗುಗಳ ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಳ್ಳುವಂತೆ ಮನವಿ ಮಾಡಿದ್ದಾರೆ.