ಬಿಹಾರ ಮೈತ್ರಿ ಭಂಗ

ನವದೆಹಲಿ, ಸೆ. ೩ - ಮುಂಬರುವ ಬಿಹಾರ ವಿಧಾನಸಭೆ ಚುನಾವಣೆಗಳಲ್ಲಿ ತಮ್ಮ ಪಕ್ಷವು ಏಕಾಂಗಿಯಾಗಿ ಸ್ಪರ್ಧಿಸಲಿದೆ ಎಂದು ಸಮಾಜವಾದಿ ಪಕ್ಷದ ಪ್ರಧಾನ ಕಾರ್ಯದರ್ಶಿ ರಾಮಗೋಪಾಲ್ ಯಾದವ್ ಅವರು ಇಂದು ಪ್ರಕಟಿಸಿದ್ದಾರೆ.

ಇದರಿಂದಾಗಿ ಬಿಜೆಪಿಯನ್ನು `ಮಟ್ಟ ಹಾಕಲು` ಆರು ಪಕ್ಷಗಳು ಮಾಡಿಕೊಂಡಿದ್ದ ಮಹಾ ಮೈತ್ರಿಕೂಟಕ್ಕೆ ಬಲವಾದ ಪೆಟ್ಟು ಬಿದ್ದಂತಾಗಿದೆ.

ಬಿಹಾರ ವಿಧಾನಸಭೆ ಚುನಾವಣೆಗಳನ್ನು ಸ್ವತಂತ್ರವಾಗಿ ಸ್ಪರ್ಧಿಸಬೇಕೆಂದು ಸಮಾಜವಾದಿ ಪಕ್ಷದ ಸಂಸದೀಯ ಮಂಡಳಿಯು ತೀರ್ಮಾನಿಸಿದೆ.

ಅಗತ್ಯ ಬಿದ್ದಲ್ಲಿ ಬೆಂಬಲ ಕೋರಿ ಇತರ ಪಕ್ಷಗಳ ಜತೆ ಮಾತುಕತೆ ನಡೆಸಲಾಗುವುದು. ಆದರೆ, ಸದ್ಯಕ್ಕೆ ಅಂಥ ಪ್ರಸ್ತಾವನೆ ಪಕ್ಷದ ಮುಂದಿಲ್ಲ ಎಂದು ರಾಮಗೋಪಾಲ್ ಯಾದವ್ ಹೇಳಿದ್ದಾರೆ.

ಲಾಲೂ, ನಿತೀಶ್‌ರಿಂದ ಅಪಮಾನ

ಇಂಥ ಮಹತ್ವದ ಚುನಾವಣೆಗಳಲ್ಲಿ ಒಂಟಿಯಾಗಿ ಸ್ಪರ್ಧಿಸುವ ಔಚಿತ್ಯ ಕುರಿತು ಪ್ರಶ್ನಿಸಿದಾಗ, ಅವರು `ಸ್ಥಾನ ಹೊಂದಾಣಿಕೆ ಕುರಿತಂತೆ ನಮ್ಮೊಂದಿಗೆ ಸಮಾಲೋಚನೆ ನಡೆಸಲಿಲ್ಲ. ಲಾಲೂ ಹಾಗೂ ನಿತೀಶ್ ಅವರ ತಂತ್ರಗಾರಿಕೆಯಿಂದ ನಮ್ಮನ್ನು ಅಪಮಾನ ಮಾಡಲಾಗಿದೆ` ಎಂದು ಆರೋಪಿಸಿದ್ದಾರೆ.

ದಕ್ಕಿದ್ದು ಬರಿ ಐದು ಸ್ಥಾನ

ಬಿಹಾರ ರಾಷ್ಟ್ರೀಯ ಜನತಾದಳದ ಅಧ್ಯಕ್ಷ ಲಾಲೂ ಪ್ರಸಾದ್ ಯಾದವ್ ಹಾಗೂ ಆ ರಾಜ್ಯದ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರು ಸಮಾಜವಾದಿ ಪಕ್ಷಕ್ಕೆ ಕೇವಲ 5 ಸ್ಥಾನ ನೀಡಿದ್ದರು. ಈ ಕ್ರಮ ಪ್ರತಿಭಟಿಸಿ ಕಳೆದ ಆಗಸ್ಟ್ 30 ರಂದ ಪಾಟ್ನಾದಲ್ಲಿ ನಡೆದ ಮಹಾಘಟಬಂಧನ ಱ್ಯಾಲಿಯಲ್ಲಿ ಸಮಾಜವಾದಿ ಪಕ್ಷದ ಅಧ್ಯಕ್ಷ ಮುಲಾಯಂ ಸಿಂಗ್ ಯಾದವ್ ತಪ್ಪಿಸಿಕೊಂಡಿದ್ದರು.

`5 ಸ್ಥಾನ ಕೊಡೋಣ`

ಬಿಹಾರ ವಿಧಾನಸಭೆ ಚುನಾವಣೆಗಳಿಗೆ ಸಂಬಂಧಿಸಿದ ಮಹಾ ಮೈತ್ರಿಕೂಟದ ಪಾಲುದಾರ ಪಕ್ಷವಾಗಿರುವ ಸಮಾಜವಾದಿ ಪಕ್ಷಕ್ಕೆ ಐದು ಸ್ಥಾನ ನೀಡುವುದಾಗಿ ಆರ್.ಜೆ.ಡಿ. ವರಿಷ್ಠ ಲಾಲೂ ಪ್ರಸಾದ್ ಯಾದವ್ ಅವರು ಈಚೆಗೆ ಘೋಷಿಸಿದ್ದರು.

ಆಗಸ್ಟ್ 12 ರಂದು ಏರ್ಪಡಿಸಿದ್ದ ಜನತಾದಳ (ಯು), ಆರ್.ಜೆ.ಡಿ. ಹಾಗೂ ಕಾಂಗ್ರೆಸ್ ಪಕ್ಷಗಳ ಜಂಟಿ ಪತ್ರಿಕಾಗೋಷ್ಠಿಯಲ್ಲಿ ಮೈತ್ರಿಕೂಟಕ್ಕೆ ಸೇರಿದ ಪಕ್ಷಗಳಿಗೆ ಸ್ಥಾನಗಳನ್ನು ಬಿಹಾರ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಪ್ರಕಟಿಸಿದ್ದರು.

ಈ ಪ್ರಕಟಣೆಯಲ್ಲಿ ಆರ್.ಜೆ.ಡಿ. ಹಾಗೂ ಜೆ.ಡಿ.(ಯು)ಗೆ ತಲಾ ನೂರು ಸ್ಥಾನಗಳನ್ನು ಕಾದಿರಿಸಲಾಗಿತ್ತು. ಕಾಂಗ್ರೆಸ್ ಪಕ್ಷಕ್ಕೆ 40 ಸ್ಥಾನಗಳನ್ನು, ಎನ್.ಸಿ.ಪಿ.ಗೆ ಮೂರು ಸ್ಥಾನಗಳನ್ನು ನೀಡಲಾಗಿತ್ತು.

ಕೇವಲ ಐದು ಸ್ಥಾನಗಳು ಲಭಿಸಿದ್ದಕ್ಕೆ ಆಕ್ರೋಶ ವ್ಯಕ್ತಪಡಿಸಿ ಸಮಾಜವಾದಿ ಪಕ್ಷವು ನಾಲ್ಕು ದಿನಗಳ ಕಾಲ ಧರಣಿ ನಡೆಸಿತ್ತು. ಪಕ್ಷದ ಪ್ರಧಾನ ಕಾರ್ಯದರ್ಶಿ ಕಿರಣ್ಮೊಯ್ ನಂದಾ ಅವರ ಮಧ್ಯಸ್ಥಿಕೆಯಿಂದಾಗಿ ಧರಣಿಯನ್ನು ಹಿಂತೆಗೆದುಕೊಳ್ಳಲಾಯಿತು.

ಆರು ಪಕ್ಷಗಳ ಮೈತ್ರಿಕೂಟ

ಜನತಾ ಪರಿವಾರದ ಮೈತ್ರಿಕೂಟವನ್ನು ಆರು ಪಕ್ಷಗಳೊಂದಿಗೆ ಘೋಷಿಸಲಾಗಿತ್ತು. ಸಮಾಜವಾದಿ ಪಕ್ಷ, ಜೆಡಿ(ಯು), ಆರ್.ಜೆ.ಡಿ ಐ.ಎನ್.ಎಲ್.ಡಿ., ಎಸ್.ಜೆ.ಪಿ. ಹಾಗೂ ಕಾಂಗ್ರೆಸ್ ಈ ಮೈತ್ರಿಕೂಟ ಪ್ರಯೋಗದ ಘಟಕ ಪಕ್ಷಗಳಾಗಿದ್ದವು.

ಆದರೆ, ರಾಮಗೋಪಾಲ್ ಯಾದವ್ ಅವರ ತೀವ್ರ ವಿರೋಧದ ಪರಿಣಾಮವಾಗಿ ಜನತಾ ಪರಿವಾರದ ವಿಲೀನ ಕನಸು ಛಿದ್ರಗೊಂಡಿತು.

Post Title

ಪೀಟರ್ ಮುಖರ್ಜಿಗೆ ಪ್ರಶ್ನೆಪತ್ರಿಕೆ

ಶೀನಾ ಬೋರಾ ಹತ್ಯೆ ಪ್ರಕರಣ ವಿಚಾರಣೆ

ಮುಂಬೈ,ಸೆ.3: ಸ್ಟಾರ್ ಇಂಡಿಯಾದ ಮಾಜಿ ಸಿಇಒ ಪೀಟರ್ ಮುಖರ್ಜಿಯವರನ್ನು ಶೀನಾ ಬೋರಾ ಕೊಲೆ ಪ್ರಕರಣ ಸಂಬಂಧ ಖಾರ್ ಪೊಲೀಸರು ನಿನ್ನೆ ಸತತ 12 ಗಂಟೆಗಳ ಕಾಲ ವಿಚಾರಣೆಗೊಳಪಡಿಸಿದ್ದು, ಇಂದೂ ಸಹ ವಿಚಾರಣೆ ಮುಂದುವರೆಸಿದ್ದಾರೆ. ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಇಂದ್ರಾಣಿ ಮುಖರ್ಜಿ ಕಳೆದ ಆ.25ರಂದು ಬಂಧನಕ್ಕೊಳಗಾಗಿದ್ದು, ಪೀಟರ್ ಈಕೆಯ ಹಾಲಿ ಪತಿಯಾಗಿದ್ದಾರೆ.

ನಿನ್ನೆ ತನ್ನ ಸಹೋದರ ಗೌತಮ್ ಮುಖರ್ಜಿಯೊಂದಿಗೆ ಬೆಳಗ್ಗೆ 10.30ರ ಸಮಯಕ್ಕೆ ಪೊಲೀಸ್ ಠಾಣೆಗೆ ತೆರಳಿ ರಾತ್ರಿ 10.45ಕ್ಕೆ ವಾಪಾಸ್ಸಾಗಿದ್ದಾರೆ. ಪೊಲೀಸರು ಇಂದ್ರಾಣಿ ಮುಖರ್ಜಿ ವಾಸವಿದ್ದ ವೋರ್ಲಿ ಫ್ಲಾಟ್ ಶೋಧಿಸಿದ್ದು, ಕೆಲ ದಾಖಲೆ ಹಾಗೂ ಲ್ಯಾಪ್ ಟಾಪ್‍ಗಳನ್ನು ವಶಪಡಿಸಿಕೊಂಡಿದ್ದಾರೆ.

ಪೀಟರ್ ಮುಖರ್ಜಿಯವರಿಗೆ ಮೊದಲಿಗೆ 25ಪ್ರಶ್ನೆಗಳ ಪತ್ರಿಕೆ ನೀಡಲಾಗಿತ್ತು. ಈ ಪ್ರಶ್ನೆಗಳಿಗೆ ಉತ್ತರ ನೀಡುವ ಸಂದರ್ಭದಲ್ಲಿ ಗೌತಮ್ ಅವರನ್ನು ಬೇರೊಂದು ಕೊಠಡಿಯಲ್ಲಿರಿಸಲಾಗಿತ್ತು. ಲಿಖಿತ ಪ್ರಶ್ನೆಗಳಿಗೆ ಉತ್ತರಿಸಿದ ನಂತರ ವಿಚಾರಣೆ ಆರಂಭಿಸಲಾಗಿತ್ತು. ಇಂದು ಅವರ ಹೇಳಿಕೆಗಳನ್ನು ರೆಕಾರ್ಡ್ ಮಾಡಿಕೊಳ್ಳಲಾಗುವುದು ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.

ಪೀಟರ್ ಮುಖರ್ಜಿಗೆ ನೀಡಲಾದ ಪ್ರಶ್ನೆ ಪತ್ರಿಕೆಯನ್ನೇ ಬಾಂದ್ರಾ ಜೈಲಿನಲ್ಲಿರುವ ಆರೋಪಿ ಇಂದ್ರಾಣಿಗೂ ನೀಡಲಾಗಿದ್ದು, ಇಬ್ಬರೂ ಒಂದೇ ಪ್ರಶ್ನೆಗಳಿಗೆ ಉತ್ತರಿಸಿದ್ದು, ಯಾವುದಾದರೂ ವ್ಯತಿರಿಕ್ತ ಹೇಳಿಕೆಗಳಿವೆಯೇ ಎಂಬುದನ್ನು ತನಿಖಾಧಿಕಾರಿಗಳು ಪರಿಶೀಲಿಸುತ್ತಿದ್ದಾರೆ.

ಪೀಟರ್ ಅವರ ಆರ್ಥಿಕ ಸ್ಥಿತಿಗತಿ, ವಿವಿಧ ಕಂಪನಿಗಳಲ್ಲಿನ ಹೂಡಿಕೆ ವಿವರ, ಇಂದ್ರಾಣಿಗೆ ನೀಡಿರುವ ಹಣದ ವಿವರ, ಪುತ್ರ ರಾಹುಲ್, ಮಲ ಮಗಳು ಶೀನಾ, ವಿಧಿ ಇವರಿಗಳಿಗೂ ನೀಡಿರುವ ಹಣದ ವಿವರ ಕುರಿತು ಮಾಹಿತಿ ಪಡೆಯಲಾಗಿದೆ.

ರಾಹುಲ್ ಶೀನಾಳೊಂದಿಗೆ ಮದುವೆಯಾಗಲು ಬಯಸಿದಾಗ ಇಂದ್ರಾಣಿಯ ಪ್ರತಿಕ್ರಿಯೆ ಹೇಗಿತ್ತು. ಅದಕ್ಕೆ ಆಕೆ ಸಮ್ಮತಿಸಿದ್ದಳೆ. ಆ ಸಂದರ್ಭದಲ್ಲಿ ಉಂಟಾದ ಬೆಳವಣಿಗೆಗಳ ಕುರಿತು ಮಾಹಿತಿ ಕೇಳಿದ್ದಾರೆ.

ಇಂದೂ ಕೂಡಾ ಪೀಟರ್ ಅವರ ವಿಚಾರಣೆ ಮುಂದುವರೆದಿದೆ.

ಸನ್ನಿ ಜಾಹೀರಾತಿನಿಂದ ಅತ್ಯಾಚಾರ ಹೆಚ್ಚಳ

ಎಡಪಕ್ಷ ಮುಖಂಡ ಅತುಲ್ ಅಪ್ಪಣೆ

ನವದೆಹಲಿ,ಸೆ.3: ನೀಲಿ ಚಿತ್ರ ತಾರೆ ಸನ್ನಿ ಲಿಯೋನ್‍ರ ಕಾಂಡೋಮ್ ಜಾಹೀರಾತು ದೇಶದಲ್ಲಿ ಅತ್ಯಾಚಾರ ಪ್ರಕರಣಗಳ ಹೆಚ್ಚಳಕ್ಕೆ ಕಾರಣವಾಗಿದೆ ಎಂದು ಎಡ ಪಕ್ಷದ ಮುಖಂಡ ಅತುಲ್ ಕುಮಾರ್ ಅಂಜನ್ ಅವರು ಉತ್ತರಪ್ರದೇಶದ ಘಾಜಿಪುರ ಜಿಲ್ಲೆಯ ಸಾರ್ವಜನಿಕ ರ್ಯಾಲಿಯಲ್ಲಿ ನೀಡಿರುವ ಬೇಜವಾಬ್ದಾರಿ ಹಾಗೂ ಆಘಾತಕಾರಿ ಹೇಳಿಕೆ ಇದೀಗ ಭಾರೀ ಚರ್ಚೆಗೆ ಗ್ರಾಸವಾಗಿದೆ.

ಸನ್ನಿಲಿಯೋನ್ ಅನೇಕ ಬೆತ್ತಲೆ ಚಿತ್ರಗಳಲ್ಲಿ ನಟಿಸಿದ್ದಾಳೆ. ಕಾಂಡೋಮ್ ಕುರಿತ ಜಾಹೀರಾತಿನಲ್ಲಿ ಆಕೆ ನಟಿಸಿದ್ದು, ಎಲ್ಲಾ ಟಿವಿ ಮತ್ತು ಪತ್ರಿಕೆಗಳಲ್ಲಿ ಪ್ರಕಟಗೊಳ್ಳುತ್ತಿದ್ದು, ಇದು ಅತ್ಯಾಚಾರ ಪ್ರಕರಣಗಳ ಹೆಚ್ಚಳಕ್ಕೆ ಪ್ರಮುಖ ಕಾರಣವಾಗಿದೆ ಎಂದು ಹೇಳಿಕೆ ನೀಡಿದ್ದರು.

ನಾನು ಯಾವುದೇ ನೀಲಿ ಚಿತ್ರಗಳನ್ನು ನೋಡುವುದಿಲ್ಲ. ಮೊದಲ ಬಾರಿಗೆ ನೀಲಿ ಚಿತ್ರ ವೀಕ್ಷಿಸಿದಾಗ ವಾಂತಿ ಬರುವಂತಾಯಿತು ಎಂದು ಹೇಳಿದ್ದಾರೆ.

ಇಂತಹ ಜಾಹೀರಾತುಗಳು ಸೆಕ್ಸ್ ಭಾವನೆಯನ್ನು ಕೆರಳಿಸಲಿದ್ದು, ಸಂವೇದನಾಶೀಲತೆಯನ್ನು ನಾಶಮಾಡಲಿದೆ ಎಂದು ಹೇಳಿರುವ ಅವರು ನನ್ನ ಜೀವನದಲ್ಲಿ ಒಮ್ಮೆಯೂ ನೀಲಿ ಚಿತ್ರ ವೀಕ್ಷಿಸಿಲ್ಲ. ಒಮ್ಮೆ ಎರಡು ನಿಮಿಷಗಳ ಕಾಲ ನೀಲಿ ಚಿತ್ರ ವೀಕ್ಷಿಸಿದ್ದರಿಂದ ವಾಂತಿ ಮಾಡಿಕೊಳ್ಳುವಂತಾಯಿತು ಎಂದಿದ್ದಾರೆ.

ಇತ್ತೀಚೆಗಷ್ಟೆ ಅತ್ಯಾಚಾರ ಪ್ರಕರಣ ಕುರಿತು ಸಮಾಜವಾದಿ ಪಕ್ಷದ ನಾಯಕ ಮುಲಾಯಂಸಿಂಗ್ ಯಾದವ್ ಇಂತಹುದೇ ವಿವಾದಾತ್ಮಕ ಹೇಳಿಕೆ ನೀಡಿದ್ದರು. ಮೊದಲು ಯುವತಿ ಯುವಕನೊಬ್ಬನನ್ನು ಪರಿಚಯಿಸಿಕೊಳ್ಳುತ್ತಾಳೆ. ಅದು ಸೆಕ್ಸ್ ಹಂತಕ್ಕೂ ಮುಟ್ಟುತ್ತದೆ. ತದನಂತರ ಅತ್ಯಾಚಾರದ ಆರೋಪ ಹೊರಿಸುತ್ತಾಳೆ ಎಂಬ ಹೇಳಿಕೆ ವಿವಾದ ಸೃಷ್ಟಿಸಿತ್ತು.

ನಾಲ್ವರು ಒಬ್ಬಾಕೆಯ ಮೇಲೆ ಅತ್ಯಾಚಾರವೆಸಗಲು ಸಾಧ್ಯವಿಲ್ಲ ಎಂದು ಹೇಳಿಕೆ ನೀಡಿದ್ದರು.

ಸೆಲ್ಫಿ ಭರದಲ್ಲಿ ಗುಂಡಿಕ್ಕಿಕೊಂಡ

ವಾಷಿಂಗ್‍ಟನ್,ಸೆ.3: ಗನ್‍ನೊಂದಿಗೆ ಸೆಲ್ಫಿ ತೆಗೆದುಕೊಳ್ಳುವ ಭರದಲ್ಲಿ ಗುಂಡು ಹಾರಿದ ಪರಿಣಾಮ ಯುವಕನೊಬ್ಬ ಸಾವನ್ನಪ್ಪಿರುವ ಆಘಾತಕಾರಿ ಘಟನೆ ನಡೆದಿದೆ.

ಗನ್‍ನೊಂದಿಗೆ ಸೆಲ್ಫಿ ತೆಗೆದುಕೊಳ್ಳುವಾಗ ಆಕಸ್ಮಿಕವಾಗಿ ಗುಂಡು ಹಾರಿದ್ದು, ದಿಲಿಯೋನ್ ಅಲೋನ್ಸೋ ಸ್ಮಿತ್ ಎಂಬ ಯುವಕ ಸಾವನ್ನಪ್ಪಿದ್ದಾನೆ.

ಈ ಸುದ್ದಿ ಕೇಳಿ ಕುಟುಂಬ ಸದಸ್ಯರು ಆಘಾತಕ್ಕೊಳಗಾಗಿದ್ದಾರೆ. ಇದೊಂದು ಅತ್ಯಂತ ದುಃಖಕರವಾದ ಸಂಗತಿಯಾಗಿದೆ ಎಂದು ಮೃತ ಯುವಕನ ಸಂಬಂಧಿ ಎರಿಕ್ ಡೌಗ್ಲಸ್ ತಿಳಿಸಿದ್ದಾರೆ.

ಈ ಘಟನೆ ಅತ್ಯಂತ ದುಃಖಕರವಾದುದು ಮತ್ತು ಈಗಲೂ ನಂಬಲಸಾಧ್ಯವಾದುದು ಎಂದು ಸ್ಮಿತ್ ಅಜ್ಜಿ ಅಲ್ಮಾ ಡೌಗ್ಲಸ್ ತಿಳಿಸಿದಾರೆ. ನಿನ್ನೆ ನನ್ನ ಹುಟ್ಟು ಹಬ್ಬ. ನನ್ನ ಬಳಿ ಬಂದು ಹುಟ್ಟುಹಬ್ಬದ ಶುಭಕೋರಿ ಹೋಗಿದ್ದ. ನಂತರ ಇಂತಹ ಕೆಟ್ಟ ಸುದ್ದಿಯನ್ನು ಕೇಳಲ್ಪಟ್ಟೆ ಎಂದು ತಿಳಿಸಿದ್ದಾರೆ.

ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ಚುರುಕುಗೊಳಿಸಿದ್ದಾರೆ

ರಾಜ್ಯದಲ್ಲಿ ಮತ್ತೆ 3 ರೈತರ ಆತ್ಮಹತ್ಯೆ

ಹಾಸನ/ಮಧುಗಿರಿ, ಸೆ. 3- ರಾಜ್ಯದಲ್ಲಿ ಸಾಲಬಾಧೆ ತಾಳದೆ ರೈತರು ಆತ್ಮಹತ್ಯೆ ಶರಣಾಗುತ್ತಿದ್ದು, ಇಂದು ಹಾಸನ, ಮಧುಗಿರಿ ಹಾಗೂ ಧಾರವಾಡಗಳಲ್ಲಿ ಮೂವರು ರೈತರು ಸಾಲದ ಶೂಲಕ್ಕೆ ಬಲಿಯಾಗಿದ್ದಾರೆ.

ಹಾಸನದ ಆಲೂರು ತಾಲೂಕಿನ ಕಾಟ್ ಹಳ್ಳಿ ಗ್ರಾಮದ ಶಿವಕುಮಾರ್(45) ಎಂಬಾ ಸಾಲಬಾಧೆ ತಾಳದೆ ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಶರಣಾಗಿದ್ದಾನೆ.

2013ರಲ್ಲಿ ಕಂದಲಿ ಕಾರ್ಪೋರೇಷನ್ ಬ್ಯಾಂಕ್‍ನಲ್ಲಿ 3ಲಕ್ಷ ರೂ. ಬೆಳೆಸಾಲ ಪಡೆದಿದ್ದಲ್ಲದೆ, 2 ಲಕ್ಷ ರೂ. ಕೈಸಾಲ ಮಾಡಿ ತಮ್ಮ ತಾಯಿಯ ಹೆಸರಿನಲ್ಲಿದ್ದ 5 ಎಕರೆ ಜಮೀನಿನಲ್ಲಿ ಜೋಳ ಹಾಗೂ ಶುಂಠಿ ಬೆಳೆ ಬೆಳೆದಿದ್ದರು.

ಮಳೆ ಅಭಾವದಿಂದ ಬೆಳೆ ಕೈಗೆ ಬಾರದ ಹಿನ್ನೆಲೆಯಲ್ಲಿ ಮನನೊಂದು ಮನೆಯಲ್ಲೇ ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಶರಣಾಗಿದ್ದಾರೆ. ಈ ಸಂಬಂಧ ಆಲೂರು ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಮುಂದಿನ ತನಿಖೆ ನಡೆಸುತ್ತಿದ್ದಾರೆ.

ಮಧುಗಿರಿ

ತಾಲೂಕಿನ ಮಿಡಿಗೇಶಿ ಹೋಬಳಿ ರೆಡ್ಡಿಹಳ್ಳಿ ಗ್ರಾ.ಪಂ.ವ್ಯಾಪ್ತಿಯ ಲಕ್ಷ್ಮೀಪುರ ಗ್ರಾಮದ ಕೃಷ್ಣಮೂರ್ತಿ(52) ಎಂಬ ರೈತ ಸಾಲಬಾಧೆ ತಾಳದೆ ವಿಷ ಸೇವಿಸಿ ಆತ್ಮಹತ್ಯೆಗೆ ಶರಣಾಗಿದ್ದಾನೆ.

ತೋವಿನಕೆರೆಯ ಎಸ್‍ಬಿಐನಲ್ಲಿ ಟ್ರ್ಯಾಕ್ಟರ್‍ಗಾಗಿ 4 ಲಕ್ಷ 80 ಸಾವಿರ ರೂ. ಹಾಗೂ ಮಿಡಿಗೇಶಿ ಕಲ್ಪತರು ಗ್ರಾಮೀಣ ಬ್ಯಾಂಕ್‍ನಲ್ಲಿ 1 ಲಕ್ಷ ರೂ. ಕೃಷಿ ಸಾಲ, ಕಸಾಪುರ ವಿಎಸ್‍ಎಸ್‍ಎನ್‍ನಲ್ಲಿ 30 ಸಾವಿರ ಹೀಗೆ ಒಟ್ಟು 6 ಲಕ್ಷಕ್ಕೂ ಅಧಿಕ ಸಾಲ ಮಾಡಿದ್ದ. ಸಾಲ ತೀರಿಸಲಾಗದೆ ಮನನೊಂದು ಆತ್ಮಹತ್ಯೆಗೆ ಶರಣಾಗಿದ್ದಾನೆ.