ಲಂಚಾವತಾರಕ್ಕೆ ಶರಣಾಗತಿ

ಬೆಂಗಳೂರು, ಜು. ೭- ಪುತ್ರನ ಭ್ರಷ್ಟಾಚಾರ ಪ್ರಕರಣದಲ್ಲಿ ಕಳಂಕ ಹೊತ್ತಿರುವ ಲೋಕಾಯುಕ್ತ ನ್ಯಾಯಮೂರ್ತಿ ವೈ. ಭಾಸ್ಕರ್‌ರಾವ್ ಪದಚ್ಯುತಿಗೆ ಮಾರ್ಗೋಪಾಯಕ್ಕೆ ಹುಡುಕಾಟ ಚುರುಕಾಗಿರುವ ಸಂದರ್ಭದಲ್ಲಿ ಶಾಸನಕ್ಕೆ ತಿದ್ದುಪಡಿ ತರುವ ನಿಟ್ಟಿನಲ್ಲಿ ಪ್ರಕ್ರಿಯೆ ಆರಂಭವಾಗಿದೆ.

ಮಹಾಭಿಯೋಗಕ್ಕೆ ಸಂಬಂಧಿಸಿದ ಪದಚ್ಯುತಿ ನಿರ್ಣಯದ ಮಂಡನೆಗೆ ನೂರೆಂಟು ಗೋಜಲುಗಳು. ಇನ್ನೂ ಅಂಗೀಕಾರಕ್ಕೆ ಅದಕ್ಕೆರಡರಷ್ಟು ಗೋಜಲು. ಇದನ್ನು ಕಾನೂನು ತಜ್ಞರು ಮನವರಿಕೆ ಮಾಡಿಕೊಟ್ಟ ಮೇಲೆ ಸರ್ಕಾರ ಹಾಗೂ ವಿಧಾನಮಂಡಲ ಅನ್ಯಥಾ ಶರಣಂ ನಾಸ್ತಿ ಎನ್ನುವ ಸ್ಥಿತಿಗೆ ಬಂದಿದೆ.

ಕಾನೂನು ತಂದೊಡ್ಡಿರುವ ಪರಿಣಾಮದಿಂದ ಭಾಸ್ಕರ್ ರಾವ್ ಬಂಡೆಗಲ್ಲಿನಷ್ಟೇ ಭದ್ರ. ಆದರೆ ಶಾಸಕರು ಹಾಗೂ ಸಾರ್ವಜನಿಕರ ಆಶಯ ಮಾತ್ರ ಛಿದ್ರ ಛಿದ್ರ. ಹೀಗಾಗಿ ಲಂಚಾವತಾರಕ್ಕೆ ಶರಣಾಗುವ ಪರಿಸ್ಥಿತಿ ಉಂಟಾಗಿದೆ.

ನೈತಿಕ ಹೊಣೆ ಹೊತ್ತು, ಸ್ವಯಂಪ್ರೇರಣೆಯಿಂದ ಭಾಸ್ಕರ್‌ರಾವ್ ರಾಜೀನಾಮೆ ಕೊಟ್ಟರಷ್ಟೇ ಬಿಕ್ಕಟ್ಟಿಗೆ ಪರಿಹಾರ. ಕಾನೂನಿನ ಬಲ ಪ್ರಯೋಗದ ಮೂಲಕ ಏನನ್ನು ಸಾಧಿಸಲು ಸಾಧ್ಯವಾಗದಂತಹ ಸ್ಥಿತಿ. ಶಾಸನ ರಚನೆಯ ಸಂದರ್ಭದಲ್ಲಿ ಇಂತಹ ಅವಘಡದ ನಿರೀಕ್ಷೆ ಯಾರಿಗೂ ಇರಲಿಲ್ಲ. ಆದರೆ, ಈಗ ಅವಘಡಗಳದೇ ರಾಜ್ಯಭಾರ.

ವಿಧಾನಮಂಡಲದಲ್ಲಿ ಲೋಕಾಯುಕ್ತ ಸಂಸ್ಥೆಯ ವಿಚಾರ ಪ್ರಸ್ತಾಪವಾದರೂ ಛೀಮಾರಿ ಹಾಕುವುದರಲ್ಲೇ ತೃಪ್ತಿಪಟ್ಟುಕೊಳ್ಳಬೇಕು. ಪದಚ್ಯುತಿ ಅಸಾಧ್ಯ.

ಇದಕ್ಕೆ ಬಲವಂತ ರಜೆ ಮೇಲೆ ಭಾಸ್ಕರ್‌ರಾಯರನ್ನು ಕಳುಹಿಸುವ ಲೆಕ್ಕಾಚಾರ ಫಲಪ್ರದವಾದಂತಿಲ್ಲ. ಲೋಕಾಯುಕ್ತರಾಗಿರುವ ಭಾಸ್ಕರ್‌ರಾಯರಿಗೆ ಈ ಸೂಚನೆ ನೀಡುವ ಧೈರ್ಯ ಯಾರಿಗೂ ಇದ್ದಂತಿಲ್ಲ. ಪರಿಣಾಮ ಲೋಕಾಯುಕ್ತದಲ್ಲಿ ಭಾಸ್ಕರರಾಯರು ಹಾಜರು.

ಈ ಮಧ್ಯೆ, ಲೋಕಾಯುಕ್ತ ಸಂಸ್ಥೆಯೊಳಗಿನ ಹುಳುಕುಗಳು ಒಂದೊಂದಾಗಿ ಹೊರಗೆ ಬರುತ್ತಿವೆ. ಉಪಲೋಕಾಯುಕ್ತರ ನಡುವಣ ಬಹಿರಂಗ ಕಚ್ಚಾಟ ಈ ಪ್ರಕರಣಕ್ಕೆ ಹೊಸ ತಿರುವು ನೀಡಿದೆ.

ಇದೇ ಹೊತ್ತಿಗೆ ಪ್ರತಿಭಟನೆ ಹಾಗೂ ರಾಜೀನಾಮೆಗೆ ಹಕ್ಕೋತ್ತಾಯಗಳ ಸರಮಾಲೆ ಮುಂದುವರಿದಿದೆ.

* ಪದಚ್ಯುತಗೊಳಿಸಲು ಶಾಸನ ಸಭೆಯ ಅಸಹಾಯಕತೆ.

* ಕಾನೂನಿನ ಷರತ್ತುಗಳ ಪಾಲನೆ ಕಷ್ಟ.

* ಶಾಸನ ಸಭೆಯಲ್ಲಿ ಲೋಕಾಯುಕ್ತ ವಿವಾದ ಪ್ರಸ್ತಾಪಗೊಂಡರೂ ಪದಚ್ಯುತಿ ಅಸಾಧ್ಯ.

* ಭಾಸ್ಕರ್ ರಾವ್ ಲೋಕಾಯುಕ್ತ ಕಾರ್ಯಾಲಯಕ್ಕೆ ಹಾಜರಿ.

* ಉಪಲೋಕಾಯುಕ್ತರ ನಡುವೆ ಬಹಿರಂಗ ಕಚ್ಚಾಟ.

* ಲೋಕಾಯುಕ್ತ ಶಾಸನ ಮಾರ್ಪಾಟಿಗೆ ಹೆಜ್ಜೆ.

Post Title

ವಿಶ್ವದ ಹೈಟೆಕ್ ನಗರಗಳಲ್ಲಿ ಬೆಂಗಳೂರಿಗೆ 12ನೇ ಸ್ಥಾನ

ಬೆಂಗಳೂರು, ಜು. ೭ - ಈ ಹಿಂದೆ ಕ್ರೈಂ ಸಿಟಿ ಎಂಬ ಕುಖ್ಯಾತಿ ಗಳಿಸಿದ್ದ ಬೆಂಗಳೂರಿಗೆ ದಿನಗಳೆದಂತೆ ಗಾರ್ಡನ್ ಸಿಟಿ, ಸಿಲಿಕಾನ್ ಸಿಟಿ ಎಂಬ ಹಿರಿಮೆಗಳು ಸಿಕ್ಕಿದ್ದವು. ಬಳಿಕ ಹಲವು ಹಿರಿಮೆಗಳಿಗೆ ಬೆಂಗಳೂರು ಪಾತ್ರವಾಗಿತ್ತು. ಇದೀಗ ಮತ್ತೊಂದು ಗರಿಮೆಗೆ ಬೆಂಗಳೂರು ಪಾತ್ರವಾಗಿದೆ.

ವಿಶ್ವದ ಅತ್ಯುನ್ನತ 20 ಹೈಟೆಕ್ ಸಿಟಿಗಳ ಪಟ್ಟಿಯಲ್ಲಿ ಬೆಂಗಳೂರು 12ನೇ ಸ್ಥಾನ ಪಡೆದುಕೊಂಡಿದೆ.

ಜಾಗತಿಕ ಆಸ್ತಿ ಸಲಹಾ ಸಂಸ್ಥೆ ನಡೆಸಿರುವ `ಜೆಎಲ್ಎಲ್` ನಡೆಸಿದ ಸಮೀಕ್ಷೆಯಲ್ಲಿ ಅತ್ಯುನ್ನತ 20 ಹೈಟೆಕ್ ನಗರಗಳ ಪೈಕಿ ಬೆಂಗಳೂರಿಗೆ 12ನೇ ಸ್ಥಾನ ಸಿಕ್ಕಿದೆ.

`ಉತ್ತಮ ಆರ್ಥಿಕ ಪ್ರಗತಿ, ಹೂಡಿಕೆ, ಮೂಲ ಸೌಕರ್ಯ, ಉತ್ತಮ ಉದ್ಯಮಶೀಲತೆ ಹಾಗೂ ಪುಷ್ಕಳವಾಗಿ ಲಭ್ಯವಿರುವ ಕಚೇರಿ ಸ್ಥಳಾವಕಾಶ ಹೈಟೆಕ್ ನಗರಗಳ ಸ್ಪರ್ಧೆಯಲ್ಲಿ ಪೈಪೋಟಿ ಕಾಯ್ದುಕೊಳ್ಳಲು ಬೆಂಗಳೂರಿಗೆ ನೆರವಾಗಿದೆ` ಎಂದು ಭಾರತದಲ್ಲಿ ಜೆಎಲ್ಎಲ್ ಸಂಸ್ಥೆಯ ಮುಖ್ಯಸ್ಥ ಅನೂಜ್ ಪುರಿ ಹೇಳಿದ್ದಾರೆ.

ಸಮೀಕ್ಷೆಯ ಪ್ರಕಾರ, ಬೆಂಗಳೂರಿನಲ್ಲಿ ಆರ್ಥಿಕ ಪ್ರಗತಿ ಜೊತೆಗೆ ರಿಯಲ್ ಎಸ್ಟೇಟ್ ಉದ್ಯಮದ ಬೆಳವಣಿಗೆ ವೇಗವೂ ಗಣನೀಯವಾಗಿದೆ. ತಂತ್ರಜ್ಞಾನ ವಲಯದ ಬೃಹತ್ ಕಂಪನಿಗಳು ನಗರದಲ್ಲಿ ಹೂಡಿಕೆ ಮಾಡಲು ಮತ್ತು ವ್ಯಾಪಾರ ವಿಸ್ತರಿಸಲು ಹೆಚ್ಚೆಚ್ಚು ಉತ್ಸುಕತೆ ತೋರುತ್ತಿರುವುದೇ ಇದಕ್ಕೆ ಕಾರಣವಾಗಿದೆ.

ಲಂಡನ್, ಸ್ಯಾನ್ ಹೋಸೆ ಮತ್ತು ಬೀಜಿಂಗ್ ನಗರಗಳು ಕ್ರಮವಾಗಿ ಮೊದಲ ಮೂರು ಸ್ಥಾನದಲ್ಲಿವೆ. ಉಳಿದಂತೆ ಶೆನ್ ಯಿನ್, ಶಾಂಘೈ, ಹೊಚಿಮಿನ್ ಸಿಟಿ, ಬೋಸ್ಟನ್, ವುಹಾನ್, ಸ್ಯಾನ್ ಫ್ರಾನ್ಸಿಸ್ಕೋ, ಚಾಂಗ್ಗಿಂಗ್, ಸಿಡ್ನಿ, ಬೆಂಗಳೂರು, ದುಬೈ, ದುಬ್ಲಿನ್, ನೈರೋಬಿ, ಮೆಲ್ಬೋರ್ನ್, ಸಿಂಗಪುರ್, ನ್ಯೂಯಾರ್ಕ್, ಟಿಯಾಂಜಿನ್, ನಂಜಿಂಗ್ ಇದೆ.

ದೇಶದಲ್ಲೇ ಮೊದಲ ನಗರ

ಜೆಎಲ್ಎಲ್ ಸಂಸ್ಥೆಯಿಂದ ಪ್ರತಿ ವರ್ಷ ಈ ಸಮೀಕ್ಷೆ ನಡೆಸಲಿದ್ದು, ಹೈಟೆಕ್ ನಗರಗಳ ಅತ್ಯುನ್ನತ 20ರ ಪಟ್ಟಿಯಲ್ಲಿ ಸ್ಥಾನ ಪಡೆದ ದೇಶದ ನಗರ ಎಂಬ ಹೆಗ್ಗಳಿಕೆಗೆ ಬೆಂಗಳೂರು ಪಾತ್ರವಾಗಿದ್ದು, ಸಂಶೋಧನೆಯಲ್ಲೂ ಬೆಂಗಳೂರು ಮೇಲುಗೈ ಸಾಧಿಸಿದೆ.

ಆಯ್ಕೆಗೆ ಕಾರಣಗಳಿವು...!

ರಸ್ತೆ, ಸೇತುವೆ, ಮೆಟ್ರೊ ಯೋಜನೆಗಳಲ್ಲಿ ಭಾರಿ ಹೂಡಿಕೆ, ಪೂರಕ ರಿಯಲ್ ಎಸ್ಟೇಟ್.

ಸ್ಟಾರ್ಟ್ಅಪ್‌ಗಳ ಅಬ್ಬರ, ಪೇಟೆಂಟ್‌ಗೆ ಹೆಚ್ಚು ಅರ್ಜಿ ಸಲ್ಲಿಕೆ, ಹೆಚ್ಚು ಆಫೀಸ್ ಸ್ಪೇಸ್.

ಜೆಎಲ್ಎಲ್‌ ಪಟ್ಟಿಯಲ್ಲಿ ಕಾಣಿಸಿಕೊಂಡ ಭಾರತದ ಮೊದಲ ನಗರ ಬೆಂಗಳೂರು.

ಸಿಂಗಾಪುರ, ನ್ಯೂಯಾರ್ಕ್, ದುಬೈ ನಗರಗಳನ್ನೂ ಹಿಂದಿಕ್ಕಿದ ಸಿಲಿಕಾನ್ ಸಿಟಿ.

120 ನಗರಗಳಲ್ಲಿ ಸರ್ವೆ; ಲಂಡನ್, ಸ್ಯಾನ್ ಹೋಸೆ, ಬೀಜಿಂಗ್‌ಗೆ ಮೊದಲ 3 ಸ್ಥಾನ. .

20 ನಗರಗಳ ಪಟ್ಟಿಯಲ್ಲಿ ದಿಲ್ಲಿ, ಮುಂಬೈ, ಹೈದರಾಬಾದ್, ಚೆನ್ನೈಗೆ ಸ್ಥಾನವಿಲ್ಲ. .

ವಿಚಾರಣೆ ಕೈಬಿಡಲು ಜಡ್ಜ್‌ಗೆ ತಾಕೀತು ಅಶ್ವಿನ್ ರಾವ್ ಪ್ರಕರಣ

ಬೆಂಗಳೂರು, ಜು. ೭ - ಲೋಕಾಯುಕ್ತ ನ್ಯಾ. ವೈ. ಭಾಸ್ಕರ್ ರಾವ್ ಅವರ ಪುತ್ರ ಅಶ್ವಿನ್ ರಾವ್ ಪ್ರಕರಣದ ವಿಚಾರಣೆಯಿಂದ ಹೈಕೋರ್ಟ್ ನ್ಯಾ. ಎನ್. ಕುಮಾರ್ ಹಿಂದೆ ಸರಿಯಬೇಕು ಎಂದು ವಕೀಲರ ಸಂಘಗಳ ಒಕ್ಕೂಟದ ಅಧ್ಯಕ್ಷ ಕೆ.ಎನ್. ಸುಬ್ಬಾರೆಡ್ಡಿ ಆಗ್ರಹಿಸಿದ್ದಾರೆ.

ಪ್ರೆಸ್‌ಕ್ಲಬ್‌ನಲ್ಲಿ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಅವರು, ಎಫ್.ಐ.ಆರ್. ರದ್ದು ಕೋರಿ ಅಶ್ವಿನ್ ರಾವ್ ಸಲ್ಲಿಸಿರುವ ಅರ್ಜಿ ವಿಚಾರಣೆಯನ್ನು ನ್ಯಾ. ಎನ್. ಕುಮಾರ್ ನಡೆಸುತ್ತಿದ್ದಾರೆ. ಆದರೆ, ನ್ಯಾ. ಭಾಸ್ಕರ್ ರಾವ್ ಅವಧಿಯಲ್ಲೇ ಎನ್. ಕುಮಾರ್ ನ್ಯಾಯಮೂರ್ತಿಯಾಗಿ ನೇಮಕಗೊಂಡಿದ್ದರು.

ಅಲ್ಲದೆ, ೧೦ ದಿನಗಳ ಹಿಂದಷ್ಟೇ ನ್ಯಾ. ಭಾಸ್ಕರ್ ರಾವ್ ಬರೆದಿರುವ ಪುಸ್ತಕವನ್ನು ನ್ಯಾ. ಎನ್. ಕುಮಾರ್ ಬಿಡುಗಡೆಗೊಳಿಸಿದ್ದಾರೆ. ನ್ಯಾ. ಭಾಸ್ಕರ್ ರಾವ್ ಅವಧಿಯಲ್ಲೇ ನ್ಯಾಯಾಂಗ ಅಕಾಡೆಮಿ ಸ್ಥಾಪನೆಯಾಗಿದ್ದು, ಎನ್. ಕುಮಾರ್ ಅದಕ್ಕೆ ಅಧ್ಯಕ್ಷರಾಗಿದ್ದರು.

ನ್ಯಾ. ಎನ್. ಕುಮಾರ್ ಬಹಿರಂಗವಾಗಿಯೇ ಭಾಸ್ಕರ್ ರಾವ್ ತಮ್ಮ ಗುರು ಎಂದು ಹೇಳಿಕೆ ನೀಡಿದ್ದಾರೆ. ಹೀಗಾಗಿ ನ್ಯಾ. ಭಾಸ್ಕರ್ ರಾವ್ ಪುತ್ರ ಅಶ್ವಿನ್ ರಾವ್ ಅರ್ಜಿ ವಿಚಾರಣೆಯಿಂದ ನ್ಯಾ. ಎನ್. ಕುಮಾರ್ ಹಿಂದೆ ಸರಿಯಬೇಕೆಂದು ಒತ್ತಾಯಿಸಿದರು.

ನ್ಯಾ. ಎನ್. ಕುಮಾರ್ ಅವರ ಬಗ್ಗೆ ಯಾವುದೇ ತಕರಾರಿಲ್ಲ, ಅವರು ಉತ್ತಮ ನ್ಯಾಯಮೂರ್ತಿ, ಆದರೆ ಈ ಪ್ರಕರಣದ ವಿಚಾರಣೆ ನಡೆಸುವುದು ಬೇಡ, ಈ ಸಂಬಂಧ ಹೈಕೋರ್ಟ್ ಮುಖ್ಯ ನ್ಯಾಯಮೂರ್ತಿ ಅವರನ್ನು ಭೇಟಿಯಾಗಿ ಮನವಿ ಸಲ್ಲಿಸುವುದಾಗಿ ತಿಳಿಸಿದರು.

ಇದೇ ವೇಳೆ ಲೋಕಾಯುಕ್ತ ಸ್ಥಾನಕ್ಕೆ ನ್ಯಾ. ಭಾಸ್ಕರ್ ರಾವ್ ರಾಜೀನಾಮೆ ನೀಡಬೇಕು, ಪ್ರಕರಣದ ತನಿಖೆಯನ್ನು ಸಿಬಿಐಗೆ ವಹಿಸಬೇಕು, ಅಲ್ಲಿಯವರೆಗೆ ಹೋರಾಟ ನಿಲ್ಲುವುದಿಲ್ಲ ಎಂದು ಸುಬ್ಬಾರೆಡ್ಡಿ ಎಚ್ಚರಿಕೆ ನೀಡಿದ್ದಾರೆ.

ಟಾಟಾ ಏಸರ್‌ಗೆ 15 ಕುರಿಗಳು ಬಲಿ

ವಿಜಯಪುರ, ಜು. ೭- ರಸ್ತೆ ದಾಟುತ್ತಿದ್ದ ಕುರಿಗಳ ಮೇಲೆ ಟಾಟಾ ಏಸರ್ ವಾ‌ಹನ ಹರಿದ ಪರಿಣಾಮ 15ಕ್ಕೂ ಹೆಚ್ಚು ಕುರಿಗಳು ಸ್ಥಳದಲ್ಲಿಯೇ ಸಾವನ್ನಪ್ಪಿದ ಘಟನೆ ನಗರದ ಹೊರವಲಯದಲ್ಲಿ ನಡೆದಿದೆ.

ರಾಷ್ಟ್ರೀಯ ಹೆದ್ದಾರಿ ಸಂಖ್ಯೆ 13 ರಲ್ಲಿ ಸಬಲಾ ಸಂಸ್ಥೆಯ ಬಳಿ ಈ ಕುರಿಗಳು ರಸ್ತೆ ದಾಟುತ್ತಿದ್ದವು. ಈ ಸಂದರ್ಭದಲ್ಲಿ ಸೋಲಾಪುರದ ಕಡೆಗೆ ಹೊರಟಿದ್ದ ಟಾಟಾ ಏಸರ್ ಈ ಕುರಿಗಳ ಮೇಲೆ ಹರಿದುಹೋಗಿದೆ. ಪರಿಣಾಮ 15ಕ್ಕೂ ಹೆಚ್ಚು ಕುರಿಗಳು ಸ್ಥಳದಲ್ಲಿಯೇ ಸಾವಿಗೀಡಾಗಿದ್ದರೆ, 10 ಕುರಿಗಳು ಗಾಯಗೊಂಡಿವೆ.

ಬೆಳಿಗ್ಗೆ 5.45ರ ಸುಮಾರಿಗೆ ಕುರಿಗಾರರು ತಮ್ಮ ನೂರಾರು ಕುರಿಗಳೊಂದಿಗೆ ಕನಕದಾಸ ಬಡಾವಣೆಯಿಂದ ಸಬಲಾ ಸಂಸ್ಥೆಯ ಕಡೆಗೆ ರಸ್ತೆ ದಾಟುತ್ತಿದ್ದರು. ಈ ವೇಳೆ ವೇಗವಾಗಿ ಬಂದ ಟಾಟಾ ಏಸರ್ ವಾಹನ ಕುರಿಗಳಿಗೆ ಡಿಕ್ಕಿ ಹೊಡೆದಿದೆ.

ವಿಜಯಪುರ ಜಿಲ್ಲೆ ಅಲಿಯಾಬಾದ್ ಬಳಿಯ ಪಾಂಗರೂನದೊಡ್ಡಿಯ ಮರಗೂಮಾರುತಿಸುಳ್ಳ ಎಂಬುವವರಿಗೆ ಸೇರಿದ ಕುರಿಗಳಾಗಿವೆ. ಕುರಿಗಳ ಸಾವಿನಿಂದಾಗಿ ರೈತನಿಗೆ ಸುಮಾರು ಎರಡೂವರೆಯಿಂದ ಮೂರು ಲಕ್ಷ ರೂಪಾಯಿಗಳ ಹಾನಿ ಉಂಟಾಗಿದೆ ಎಂದು ಅಂದಾಜಿಸಲಾಗಿದೆ.

ಈ ಸಂಬಂಧ ವಿಜಯಪುರ ಸಂಚಾರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಗುಂಡಿನ ಮಾರಾಟಕ್ಕೆ ಗುರಿ ಮುಟ್ಟದಿದ್ದರೆ ದಂಡ

ಬೆಂಗಳೂರು, ಜು. ೭- ಮದ್ಯಪಾನ ಆರೋಗ್ಯಕ್ಕೆ ಹಾನಿಕಾರ, ಕುಡುಕರಿಂದ ಹಿಡಿದು ಎಲ್ಲರಿಗೂ ಗೊತ್ತಿರುವ ಸತ್ಯ. ಆದರೆ ನಮ್ಮ ಸರ್ಕಾರ ಈಗ ರಾಜ್ಯದಲ್ಲಿ ಹೆಚ್ಚು ಹೆಚ್ಚು ಕುಡುಕರನ್ನು ಸೃಷ್ಟಿ ಮಾಡುವಂತೆ ಬಾರ್‌ಗಳಿಗೆ ಪ್ರೇರೇಪಿಸಿದೆ. ಅಷ್ಟೇ ಅಲ್ಲದೇ ಎಣ್ಣೆ ಜಾಸ್ತಿ ಮಾರಾಟ ಮಾಡದೇ ಇದ್ದರೆ ನಮ್ಮ ಘನ ಸರ್ಕಾರ ದಂಡವನ್ನು ಹಾಕಿದೆ.

ಹೌದು. `ಲೀಟರುಗಟ್ಟಲೇ ಮದ್ಯ ಮಾರಾಟದ ಟಾರ್ಗೆಟ್, ಮದ್ಯ ಮಾರಾಟ ಮಾಡದೇ ಇದ್ದರೆ ಬಾರ್‌ಗಳಿಗೆ ಲಕ್ಷಗಟ್ಟಲೇ ದಂಡ.` ಬಹುಶಃ ಇಂತಹದೊಂದು ಕಾಯ್ದೆಯನ್ನು ಅಬಕಾರಿ ಅಧಿಕಾರಿಗಳು ಟೈಟಾಗಿರುವಾಗಲೇ ಮಾಡಿರಬೇಕು ಎಂದು ಕಾಣುತ್ತದೆ.

ಮದ್ಯಪಾನ ಆರೋಗ್ಯಕ್ಕೆ ಹಾನಿಕಾರ ಎಂದು ಪ್ರವಚನ ನೀಡುವ ಸರ್ಕಾರ ಕರ್ನಾಟಕ ಅಬಕಾರಿ ಕಾಯ್ದೆ- 1968ರ ಸೆಕ್ಷನ್ 14(2)ರ ನಿಯಮದ ಕಾನೂನು ಜಾರಿಗೆ ತಂದಿದೆ. 2003 ರಿಂದ ಬಾರ್‌ಗಳಿಗೆ ತಿಂಗಳಿಗೆ 468 ಬಲ್ಕ್ ಲೀಟರ್ ಮದ್ಯ ಮಾರಾಟದ ಟಾರ್ಗೆಟ್ ನೀಡಿತ್ತು. ಆದರೆ ಇದಕ್ಕೆ ವಿರೋಧ ಬಂದಾಗ 2014 ರಲ್ಲಿ ಆದೇಶ ಹಿಂಪಡೆಯಿತು.

ಆದರೆ ಈಗ ನಶೆ ಇಳಿದ ನಂತರ ಎಚ್ಚೆತ್ತ ಅಬಕಾರಿ ಇಲಾಖೆ ಜಿಲ್ಲಾಧಿಕಾರಿ ಮುಖಾಂತರ ರಾಜ್ಯದ ಬರೋಬ್ಬರಿ 350 ಬಾರ್‌ಗಳಿಗೆ ಹಳೆ ಟಾರ್ಗೆಟ್ ರಿಚ್ ಆಗಿರದೇ ಇದ್ದಿದ್ದಕ್ಕೆ ದಂಡ ಪಾವತಿ ಮಾಡುವಂತೆ ನೋಟಿಸ್ ನೀಡಿರುವುದು ಆರ್‌ಟಿಯು ಮಾಹಿತಿಯಡಿಯಲ್ಲಿ ಬಯಲಾಗಿದೆ. ಕೆಲ ಬಾರ್‌ಗಳಿಗೆ ಟಾರ್ಗೆಟ್ ಮದ್ಯ ಮಾರಾಟ ಮಾಡದೇ ಇರುವುದಕ್ಕೆ 50 ಲಕ್ಷ ರೂ., 60 ಲಕ್ಷ ರೂ. ಹೀಗೆ ಪ್ರತಿಲೀಟರ್‌ಗೆ 100 ರೂಪಾಯಿಯಂತೆ ಹತ್ತು ವರ್ಷದ ದಂಡವನ್ನು ಪಾವತಿಸುವಂತೆ ಸೂಚಿಸಿದೆ.

ಕರ್ನಾಟಕ ಅಬಕಾರಿ ಕಾಯ್ದೆ- 1968ರ ಸೆಕ್ಷನ್ 14(2)ರ ನಿಯಮದ ಪ್ರಕಾರ ಕರ್ನಾಟಕ ಅಬಕಾರಿ (ವಿದೇಶಿ ಮತ್ತು ದೇಶೀಯ ಮದ್ಯಮಾರಾಟ) ಕಾಯ್ದೆ-1968ರ ಸೆಕ್ಷನ್ 14(2)ರಂತೆ ಮುನ್ಸಿಪಲ್ ಕಾರ್ಪೋರೇಷನ್ ಪ್ರದೇಶದ ವ್ಯಾಪ್ತಿಯ ಬಾರ್‌ಗಳು ತಿಂಗಳಿಗೆ 468 ಬಲ್ಕ್ ಲೀಟರ್ (52 ಕೇಸ್‌ಗಳು) ಖರೀದಿಸಿ ಕಡ್ಡಾಯವಾಗಿ ಮಾರಾಟ ಮಾಡಬೇಕು.

ಇನ್ನು ನಗರಸಭೆ ವ್ಯಾಪ್ತಿಯ ಬಾರ್‌ಗಳು 423 ಬಲ್ಕ್ ಲೀಟರ್, ಪಟ್ಟಣಪಂಚಾಯತ್ ವ್ಯಾಪ್ತಿಯ ಬಾರ್‌ಗಳು 378 ಬಲ್ಕ್ ಲೀಟರ್, ಪುರಸಭೆ ವ್ಯಾಪ್ತಿಯ ಬಾರ್‌ಗಳು 306 ಬಲ್ಕ್ ಲೀಟರ್ ಮತ್ತು ಇತರೆ ಪ್ರದೇಶದಲ್ಲಿನ ಬಾರ್‌ಗಳು 225 ಬಲ್ಕ್ ಲೀಟರ್ ಮಾರಾಟ ಮಾಡಬೇಕು. ಕಡಿಮೆ ಮಾರಾಟ ಮಾಡಿದ ಪ್ರತಿಲೀಟರ್‌ಗೆ ತಲಾ 100 ರೂ. ದಂಡವಿಧಿಸಬಹುದು.

ರಾಜ್ಯದ ಸರ್ಕಾರದ ದಂಡವನ್ನು ಕೇಳಿ ಬಾರ್ ಮಾಲೀಕರು ತಲೆಕೆಡಿಸಿಕೊಂಡಿದ್ದಾರೆ. ಕುಡಿಯೋದಕ್ಕೆ ನಮ್ಮ ಸರ್ಕಾರ ಪ್ರೇರೆಪಿಸುತ್ತಿದೆ. ಗ್ರಾಹಕ ಕೇಳಿದಷ್ಟು ಮದ್ಯ ನೀಡಬಹುದು. ನಾವೇನು ಒತ್ತಾಯಪೂರ್ವಕವಾಗಿ ಕುಡಿಸಲು ಸಾಧ್ಯವೇ ಎಂದು ಬಾರ್ ಮಾಲೀಕರ ಸಂಘದ ಕರುಣಾಕರ್ ಹೆಗ್ಡೆ ಪ್ರಶ್ನಿಸಿದ್ದಾರೆ. ಇದೀಗ ಹೈಕೋರ್ಟ್‌ ಮೋರೆ ಹೋಗಿರುವ ಬಾರ್ ಮಾಲೀಕರು ಈ ನಿಯಮದ ಕಾನೂನನ್ನೇ ರದ್ದುಮಾಡಿ ಎಂದು ತಕರಾರು ಅರ್ಜಿ ಸಲ್ಲಿಸಿದ್ದಾರೆ.

ದೇಶದ ಯಾವ ಮೂಲೆಯಲ್ಲಿ ಇರದ ಕಾನೂನನ್ನು ಈ ಸರ್ಕಾರ ಜಾರಿಗೆ ತಂದಿದೆ. ಈ ಮೂಲಕ ಕುಡುಕರಿಗೆ ಸಿದ್ದು ಸರ್ಕಾರ ಬೆಂಬಲ ನೀಡಲು ಮುಂದಾಗುತ್ತಿದೆ. ಸರ್ಕಾರದ ಎಡಂಬಿಡಗಿ ತನದಿಂದ ಬಾರ್ ಮಾಲೀಕರು ಕುಡಿಯದೇ ಅಮಲೇರಿಸಿಕೊಂಡ ಪರಿಸ್ಥಿತಿ ತಲುಪಿದ್ದಾರೆ.