ಕ್ರಿಶ್ಚಿಯನ್ ಸಮುದಾಯದ ಮೇಲೆನ ದೌರ್ಜನ್ಯ ಖಂಡಿಸಿ ಬೃಹತ್ ಪ್ರತಿಭಟನಾ ಮೆರವಣಿಗೆ

ಬಳ್ಳಾರಿ, ಮಾ.27:ದೇಶದಾದ್ಯಂತ ಕ್ರಿಶ್ಚಿಯನ್ ಸಮುದಾಯದವರ ಮೇಲೆ ಆಗುತ್ತಿರುವ ಹಲ್ಲೆ, ದೌರ್ಜನ್ಯ ಹಾಗೂ ಚರ್ಚ್ ಗಳ, ಕಾನ್ವೆಂಟ್ ಶಾಲೆಗಳ ಮೇಲೆ ಮಾಡಲಾಗುತ್ತಿರುವ ದಾಳಿಗಳನ್ನು ಖಂಡಿಸಿ, ಸೂಕ್ತ ಕ್ರಮಕೈಗೊಳ್ಳುವಂತೆ ಒತ್ತಾಯಿಸಿ ಬಳ್ಳಾರಿಯಲ್ಲಿಂದು ಸಾವಿರಾರು ಜನ ಕ್ರೈಸ್ತ ಬಾಂಧವರು ಬೃಹತ್ ಪ್ರತಿಭಟನಾ ಮೆರವಣಿಗೆ ನಡೆಸಿದರು.

ದೇಶದ ರಾಜಧಾನಿ ನಗರ ದೆಹಲಿಯೂ ಸೇರಿದಂತೆ ವಿವಿಧ ರಾಜ್ಯಗಳಲ್ಲಿ ಕ್ರಿಶ್ಚಿಯನ್ನರ ಮೇಲೆ ಹಲ್ಲೆ ದಾಳಿ, ದೌರ್ಜನ್ಯ ನಡೆಯುತ್ತಿವೆ. ಅಂತೆಯೇ ಮಹಿಳೆಯರು, ಶಾಲಾ ಕಾಲೇಜುಗಳ ಬಾಲಕಿಯರು, ಕ್ರೈಸ್ತ ಸನ್ಮಾಸಿಯರ ಮೇಲೆ ಆಗುತ್ತಿರುವ ಲೈಂಗಿಕ ದೌರ್ಜನ್ಯ, ಅತ್ಯಾಚಾರಗಳು ಇಡೀ ನಾಗರೀಕ ಸಮಾಜವೇ ನಾಚಿಕೆಯಿಂದ ತಲೆ ತಗ್ಗಿಸುವಂತಹ ವಿಷಯವಾಗಿದೆ.

ಮಕ್ಕಳು, ಮಹಿಳೆಯರ ಮೇಲೆ ಆಗುತ್ತಿರುವ ದೌರ್ಜನ್ಯಗಳು, ಹಲ್ಲೆ-ದಾಳಿಗಳು ಭಾರತದ ಸಂವಿಧಾನಿಕ ಹಕ್ಕುಗಳ ಸ್ಪಷ್ಟ ಉಲ್ಲಂಘನೆಯಾಗಿದೆ, ಅಲ್ಲದೇ ಇಂತಹ ದುಷ್ಕೃತ್ಯಗಳು ದೇಶದ ಜನರ ಮೇಲೆ ಪ್ರಭಾವ ಬೀರುತ್ತಿದ್ದು ಜನರನ್ನು ಧಾರ್ಮಿಕವಾಗಿ ಒಡೆಯುವ ಹಾಗೂ ತನ್ಮೂಲಕ ಕೋಮುವಾದವನ್ನು ಎತ್ತಿ ಹಿಡಿದು, ಜನರಲ್ಲಿನ ಧಾರ್ಮಿಕ ಸಹಿಷ್ಣುತೆಯನ್ನು ನಾಶಗೊಳಿಸುವ ಕಾರ್ಯಗಳು ನಡೆಯುತ್ತಿರುವುದು ನಿಜಕ್ಕೂ ವಿಷಾದನೀಯ. ಇಂತಹ ದುಷ್ಕೃತ್ಯಗಳಲ್ಲಿ ತೊಡಗಿರುವವರ ಮೇಲೆ ರಾಜ್ಯ ಮತ್ತು ಕೇಂದ್ರ ಸರ್ಕಾರಗಳು ನಿರ್ದಾಕ್ಷಿಣ್ಯ, ನಿಷ್ಪಕ್ಷಪಾತ ಕ್ರಮ ಕೈಗೊಂಡು ಸಮುದಾಯದಲ್ಲಿ ಶಾಂತಿ ಮತ್ತು ಭದ್ರತೆಯನ್ನು ಕಲ್ಪಿಸುವಂತೆ ಬಳ್ಳಾರಿಯ ಕ್ರೈಸ್ತ ಸಮುದಾಯದ ಒಕ್ಕೂಟವು ಮನವಿ ಮಾಡಿದೆ.

ಭಾರತದ ಸಂವಿಧಾನದ ಕಲಂ 25 ಧಾರ್ಮಿಕ ಸ್ವಾತಂತ್ರ್ಯವನ್ನು ಭಾರತದ ಪ್ರತಿಯೋರ್ವ ಪ್ರಜೆಗೂ ನೀಡಲಾಗಿದೆ. ಸಂವಿಧಾನದ ಕಲಂ 29ರ ಪ್ರಕಾರ ಅಲ್ಪಸಂಖ್ಯಾತರು ತಮ್ಮದೇ ಆದ ವಿದ್ಯಾಸಂಸ್ಥೆಗಳನ್ನು ನಡೆಸುವ ಹಕ್ಕನ್ನು ಪಡೆದಿರುತ್ತಾರೆ. ವಸ್ತುಸ್ಥಿತಿ ಹೀಗಿರುವಾಗ ಇತ್ತೀಚೆಗಿನ ದಿನಗಳಲ್ಲಿ ದೆಹಲಿ ಸೇರಿದಂತೆ ವಿವಿಧ ರಾಜ್ಯಗಳಲ್ಲಿ ಕ್ರೈಸ್ತ ಸಮುದಾಯದವರ ಮೇಲೆ ನಡೆಯುತ್ತಿರುವ ಹಲ್ಲೆ, ಚರ್ಚ್ ಗಳ ಧ್ವಂಸ, ವಿದ್ಯಾಕೇಂದ್ರಗಳ ನಾಶ, ಪಶ್ಚಿಮ ಬಂಗಾಲದ ಕ್ರೈಸ್ತ ಸನ್ಮಾಸಿನಿಯ ಮೇಲೆ ಅತ್ಯಾಚಾರ, ಬಡಜನರ ಮೇಲೆ ಆಗುತ್ತಿರುವ ಹಿಂಸೆ, ದೌರ್ಜನ್ಯಗಳು, ಅಲ್ಪಸಂಖ್ಯಾತರಲ್ಲಿ ಆತಂಕದ ಮತ್ತು ಅಭದ್ರತೆಯ ವಾತಾವರಣ ಸೃಷ್ಠಿಸಿದೆ. ಮತಾಂತರದ ಕಪ್ಪು ಹಣೆ ಪಟ್ಟಿಯನ್ನು ಸೇವಾ ಮೂರ್ತಿ, ಮದರ್ ಥೆರೇಸಾ ಅಂತಹ ನಿಸ್ವಾರ್ಥ ಮತ್ತು ನಿರ್ಮಲ ಸೇವೆಗೂ ಸೇರಿಸಿರುವುದು ಮಾನವ ಕುಲವೇ ತಲೆ ತಗ್ಗಿಸುವಂತಾಗಿದೆ ಎಂದು ಒಕ್ಕೂಟ ಅಭಿಪ್ರಾಯಪಟ್ಟರು.

ಈ ಬಗ್ಗೆ ದೇಶದ ಪ್ರಧಾನಮಂತ್ರಿ, ಗೃಹ ಸಚಿವರು, ರಾಜ್ಯದ ಮುಖ್ಯಮಂತ್ರಿ, ಗೃಹಸಚಿವರು ಮತ್ತಿತರರಿಗೆ ಬರೆದ ಮನವಿ ಪತ್ರಗಳನ್ನು ಬಳ್ಳಾರಿ ಜಿಲ್ಲಾಧಿಕಾರಿಗಳ ಮೂಲಕ ಕಳುಹಿಸಿಕೊಡಲಾಯಿತು, ನಗರದ ಹೆಚ್.ಆರ್.ಜಿ.(ಮೋತಿ)ಸರ್ಕಲ್ ನಿಂದ ಪ್ರಾರಂಭವಾದ ಕ್ರೈಸ್ತ ಬಾಂಧವರ ಬೃಹತ್ ಪ್ರತಿಭಟನಾ ಮೆರವಣಿಗೆಯು ಪ್ರಮುಖ ರಸ್ತೆಗಳ ಮೂಲಕ ಸಂಚರಿಸಿ ಜಿಲ್ಲಾಧಿಕಾರಿಗಳ ಕಛೇರಿ ತಲುಪಿತು. ನೂರಾರು ಜನ ಮಹಿಳೆಯರು ಸೇರಿದಂತೆ ಸಾವಿರಾರು ಜನ ಕ್ರೈಸ್ತ ಬಾಂಧವರು ಮೆರವಣಿಗೆಯಲ್ಲಿ ಭಾಗವಹಿಸಿದ್ದರು.

ಕ್ರೈಸ್ತ ಧರ್ಮದ ಗುರುಗಳು, ಸಿಸ್ಟರ್ ಗಳು, ಫಾದರ್ ಗಳು ಮತ್ತು ಸಮಾಜದ ಅನೇಕರು, ಸಂಘ ಸಂಸ್ಥೆಗಳ ಸದಸ್ಯರು ಪಾಗ್ಗೊಂಡಿದ್ದರು, ಒಕ್ಕೂಟದ ಸಂಚಾಲಕರಾದ ಬಳ್ಳಾರಿಯ ಧರ್ಮಾಧ್ಯಕ್ಷರಾದ ಗೌರವನೀಯ ಬಿಷಪ್ ಹೆನ್ರಿ ಡಿಸೋಜಾ, ಪೌಲ್ ರಾಜ್, ಜಫ್ರೀ ಫಾಸ್ಟರ, ಕೃಪಾವರಂ, ಗೋನಾ ಇಮ್ಯಾನುವೆಲ್, ಮ್ಯಾಕ್ಸಿನ್, ಹಾಗೂ ಸಿಸ್ಟರ್ ಗಳಾದ ಶಾಲಿನಿ, ಬಲ್ವೀನಾ, ಜ್ಯೋತಿ, ವಿಯೋಲಾ ಲೂಸಿಯಾನಾ ಮತ್ತು ಫೋರ್ಟ್ ರಾಜು (ಬಾಲರಾಜು), ಜಿ.ರವಿಕುಮಾರ್, ಜೆರಾಲ್ಡ್, ಐ.ದಾಸ್, ಮೇರಿ ಸಬೀನಾ, ಆರೋಗ್ಯದಾಸ್ ಮತ್ತು ಇತರರು ಮೆರವಣಿಗೆಯ ನೇತೃತ್ವ ವಹಿಸಿದ್ದರು.

ಬಿಷಪ್ ಹೆನ್ರಿ ಡಿಸೋಜಾ ನೇತೃತ್ವದಲ್ಲಿ ಮನವಿ ಪತ್ರವನ್ನು ಸಲ್ಲಿಸಲಾಯಿತು. ಪೊಲೀಸರು ಬಿಗಿಯಾದ ಬಂದೋಬಸ್ತು ಏರ್ಪಡಿಸಿದ್ದರು.

Post Title

ಜಿಲ್ಲಾ ದಲಿತ ಸಂಘಟನೆಗಳ ಒಕ್ಕೂಟದಿಂದ ಬೃಹತ್ ಅರೆಬೆತ್ತಲೆ ಮೆರವಣಿಗೆ

ಬಳ್ಳಾರಿ, ಮಾ.27:ನ್ಯಾಯಮೂರ್ತಿ ಎ.ಜೆ.ಸದಾಶಿವ ಆಯೋಗದ ವರದಿ ಜಾರಿಗೆ ಆಗ್ರಹಿಸಿ ಹಾಗೂ ಈ ವರದಿ ಅನುಷ್ಠಾನಕ್ಕೆ ವಿರೋಧಿಸುತ್ತಿರುವ ಕೆಲವೊಂದು ಸಚಿವರನ್ನು ಸಂಪುಟದಿಂದ ಕೈಬಿಡಲು ಒತ್ತಾಯಿಸಿ ಬಳ್ಳಾರಿಯಲ್ಲಿಂದು ಜಿಲ್ಲಾ ದಲಿತ ಸಂಘಟನೆಗಳ ಒಕ್ಕೂಟದ ವತಿಯಿಂದ ಬೃಹತ್ ಪ್ರತಿಭಟನೆ ನಡೆಸಲಾಯಿತು.

ನಗರದ ಶ್ರೀ ಕನಕದುರ್ಗಮ್ಮ ದೇವಸ್ಥಾನದ ಬಳಿಯ ಪ್ರದೇಶದಿಂದ ಪ್ರಾರಂಭವಾದ ಬಳ್ಳಾರಿ ಜಿಲ್ಲಾ ದಲಿತ ಸಂಘಟನೆಗಳ ಒಕ್ಕೂಟದ ಮೆರವಣಿಗೆಯು ಪ್ರಮುಖ ರಸ್ತೆಗಳಲ್ಲಿ ಸಾಗಿ, ಜಿಲ್ಲಾಧಿಕಾರಿಗಳ ಕಛೇರಿಗೆ ತಲುಪಿದೆ. ರಾಜ್ಯದ ರಾಜ್ಯಪಾಲರಿಗೆ ಬರೆದ ಮನವಿ ಪತ್ರವನ್ನು ಜಿಲ್ಲಾಧಿಕಾರಿಗಳ ಮೂಲಕ ಕಳುಹಿಸಿಕೊಡಲಾಯಿತು.

ನ್ಯಾಯಮೂರ್ತಿ ಎ.ಜೆ.ಸದಾಶಿವ ಆಯೋಗವು ಸಲ್ಲಿಸಿರುವ ವರದಿಯನ್ನು ಯಥಾವತ್ತಾಗಿ ಅನುಷ್ಠಾನಕ್ಕೆ ತರಬೇಕು, ಅಸ್ಪೃಶ್ಯರ ಸಾಮಾಜಿಕ ಅಭ್ಯುದಯಕ್ಕೆ ಅಂಗೀಕರಿಸಲ್ಪಟ್ಟ ಮೀಸಲಾತಿಯು ಅಸ್ಪೃಶ್ಯರಿಗೆ ದಕ್ಕದೇ ಪರಿಶಿಷ್ಟ ಜಾತಿ ಪಟ್ಟಿಯಲ್ಲಿರುವ ಹಲವು ಸ್ಪರ್ಶ ಜಾತಿಗಳು ಸಿಂಹಪಾಲನ್ನು ಪಡೆಯುವ ಮೂಲಕ ಅಸ್ಪೃಶ್ಯರಿಗೆ ಅನ್ಯಾಯವಾಗದೆ, ಮೂಲ ಆಸ್ಪೃಶ್ಯರಾದ ಹೊಲೆಯ, ಮಾದಿಗ, ಹಾಗೂ ಉಪಜಾತಿಗಳಿಗೆ ಇನ್ನು ಸಾಮಾಜಿಕ ನ್ಯಾಯ ಗಗನ ಕುಸುಮವಾಗಿದೆ ಎಂದು ಒಕ್ಕೂಟ ತಿಳಿಸಿದೆ.

ಒಂದೆಡೆ ರಾಜ್ಯದ ಮೂಲೆ ಮೂಲೆಗಳಲ್ಲಿ ಸದಾಶಿವ ಆಯೋಗದ ವರದಿ ಜಾರಿಗೆ ಆಗ್ರಹಿಸಿ ನಡೆಯುತ್ತಿರುವ ಹೋರಾಟಗಳು ಅರಣ್ಯ ರೋಧನವಾಗಿದ್ದರೆ, ಮತ್ತೊಂದೆಡೆ ಸಾಮಾಜಿಕವಾಗಿ, ಆರ್ಥಿಕವಾಗಿ, ರಾಜಕೀಯವಾಗಿ ಬಲಿಷ್ಠರಾಗಿರುವವರು ವರದಿಯ ಪಾವಿತ್ರ್ಯತೆಯ ಬಗ್ಗೆ ಅಪಸ್ವರ ಹಾಗೂ ಕುಹಕದ ನುಡಿಗಳನ್ನಾಡುತ್ತಾ ನಾಡಿನ ಜನರಲ್ಲಿ ಅನುಮಾನ ದಟ್ಟವಾಗಲು ಕಾರಣರಾಗಿರುತ್ತಾರೆ. ರಾಜ್ಯದ ಮುಖ್ಯಮಂತ್ರಿಗಳಾದ ಸಿದ್ದರಾಮಯ್ಯನವರು ದಲಿತ ಮುಖ್ಯಮಂತ್ರಿ ಎಂದು ಹೇಳುವುದರ ಮುಖಾಂತರ ವರದಿಯನ್ನು ಸಮಗ್ರವಾಗಿ ಅನುಷ್ಠಾನಗೊಳಿಸದೇ ಬಲಿಷ್ಠ ಜಾತಿಗಳ ಕುತಂತ್ರದ ಒತ್ತಡಕ್ಕೆ ಮಣಿದು ವರದಿಯನ್ನು ಜಾರಿಗೊಳಿಸದೇ ಬಹುಸಂಖ್ಯಾತರಾಗಿರುವ ಹೊಲೆಯ, ಮಾದಿಗರಿಗೆ ವಂಚಿಸಿರುತ್ತಾರೆ ಎಂದು ಆರೋಪಿಸಿದೆ.

ರಾಜ್ಯದ ಮಂತ್ರಿಮಂಡಲದಲ್ಲಿರುವ ಮೀಸಲು ಫಲಾನುಭವಿ ಸಚಿವರ ನ್ಯಾಯಮೂರ್ತಿ ಎ.ಜೆ.ಸದಾಶಿವ ಆಯೋಗದ ವರದಿಯ ಬಗ್ಗೆ ಲಘುವಾಗಿ ಮಾತನಾಡುತ್ತಾ, ಆಯೋಗದ ಘನತೆ, ಗೌರವಕ್ಕೆ ಧಕ್ಕೆ ತರುವ ಷಡ್ಯಂತ್ರ ನಡೆಸಿರುವುದು ಮತ್ತು ಯಾವುದೇ ಸಕಾರಣಗಳಿಲ್ಲದೇ ವಿರೋಧಿಸುತ್ತಿರುವುದು ಸರಿಯಲ್ಲ. ಸದಾಶಿವ ಆಯೋಗದ ವರದಿಯ ವಿರುದ್ಧವಾಗಿ ಮಾತನಾಡಿರುವ ಸಚಿವರುಗಳಾದ ಹೆಚ್.ಸಿ.ಮಹಾದೇವಪ್ಪ, ಶ್ರೀನಿವಾಸ ಪ್ರಸಾದ್, ಶಿವರಾಜ್ ತಂಗಡಿಗಿ, ಡಿ.ಕೆ.ಶಿವಕುಮಾರ್, ಇವರುಗಳನ್ನು ತಕ್ಷಣವೇ ಸಚಿವ ಸಂಪುಟದಿಂದ ಕೈಬಿಡಬೇಕು ಹಾಗೂ ಸದಾಶಿವ ಆಯೋಗದ ವರದಿಯನ್ನು ಯಥಾವತ್ತಾಗಿ ಜಾರಿಗೊಳಿಸಬೇಕು. ಮತ್ತು ಕೇಂದ್ರ ಸರ್ಕಾರಕ್ಕೆ ಶಿಫಾರಸ್ಸು ಮಾಡಬೇಕು ಎಂದು ಒತ್ತಾಯಿಸಿದೆ. ಒಂದು ವೇಳೆ ಈ ಬಗ್ಗೆ ನಿರ್ಲಕ್ಷ ತಾಳಿದಲ್ಲಿ ಮುಂದಿನ ದಿನಗಳಲ್ಲಿ ಒಕ್ಕೂಟದ ವತಿಯಿಂದ ರಾಜ್ಯವ್ಯಾಪಿ ಪ್ರತಿಭಟನೆ, ಧರಣಿ ನಡೆಸಲಾಗುತ್ತದೆ ಎಂದು ಮನವಿ ಪತ್ರದಲ್ಲಿ ವಿವರಿಸಿದರು.

ಬಳ್ಳಾರಿಯಲ್ಲಿ ಡಿಎಸ್ಎಸ್ ಕಾರ್ಯಕರ್ತರಿಂದ ಬೃಹತ್ ಪ್ರತಿಭಟನೆ

ಬಳ್ಳಾರಿ, ಮಾ.27:ಕೇಂದ್ರದಲ್ಲಿ ಕೋಮುವಾದಿ ಬಿಜೆಪಿ ನೇತೃತ್ವದ ಸರ್ಕಾರವು ಅಸ್ತಿತ್ವಕ್ಕೆ ಬರುತ್ತಲೇ ಒಂದೊಂದಾಗಿ ವಿವಾದಾಸ್ಪದ ಮತ್ತು ಜನವಿರೋಧಿ ಹೇಳಿಕೆಗಳು ಜನರಲ್ಲಿ ಒಡಕುಂಟು ಮಾಡುವ ಮತ್ತು ದಾರಿ ತಪ್ಪಿಸುವ ಹಲವಾರು ವಿವಾವಾಸ್ಪದ ಹೇಳಿಕೆಗಳು ಹೊರ ಹೊಮ್ಮುತ್ತಿವೆ. ಬಡವರು ಜನಸಾಮಾನ್ಯರ ದುಃಖ-ದುಮ್ಮಾನಗಳಿಗೆ, ಸಂಕಷ್ಟಗಳಿಗೆ ಸ್ಪಂದಿಸದೇ, ಸಮಸ್ಯೆಗಳನ್ನು ಪರಿಹರಿಸದೇ ಸಂಘ ಪರಿವಾರ, ಕೋಮುವಾದಿಗಳು ಹಲವಾರು ಜನವಿರೋಧಿ ಕಾರ್ಯಕ್ರಮಗಳನ್ನು ಜಾರಿಗೆ ತರುತ್ತಿವೆ. ಕೇಂದ್ರದ ಈ ಧೋರಣೆ ವಿರೋಧಿಸಿ ಹಾಗೂ ಕೋಮುವಾದಿಗಳ ಹುನ್ನಾರ ಖಂಡಿಸಿ ಹಾಗೂ ಭಗವದ್ಗೀತೆ ಹೆಸರಿನ ಹುನ್ನಾರ ಕುರಿತು ಜನರಲ್ಲಿ ಜಾಗೃತಿ ಮೂಡಿಸಲಿ. ಕರ್ನಾಟಕ ರಾಜ್ಯ ದಲಿತ ಸಂಘರ್ಷ ಸಮಿತಿ (‌ಡಿ.ಜಿ.ಸಾಗರ ಬಣ) ನೇತೃತ್ವದಲ್ಲಿ ಬಳ್ಳಾರಿಯಲ್ಲಿಂದು ಬೃಹತ್ ಪ್ರತಿಭಟನಾ ಮೆರವಣಿಗೆ ನಡೆಯಿತು.

ದೇಶದಲ್ಲಿ ಶತಶತ ಮಾನಗಳಿಂದಲೂ ಶೋಷಣೆ, ತುಳಿತಕ್ಕೆ ಒಳಗಾಗಿರುವ ಜನರು ಹಾಗೂ ಬಡವರ ಉದ್ಧಾರ, ಅಭಿವೃದ್ಧಿಗೆ ಕಾರ್ಯಕ್ರಮಗಳನ್ನು ರೂಪಿಸದೇ, ಸಾಮಾಜಿಕ ನ್ಯಾಯಕ್ಕೆ ಬದ್ಧವಾಗದೇ, ಜನವಿರೋಧಿ ನೀತಿಗಳನ್ನು ಅನುಸರಿಸಲಾಗುತ್ತಿದೆ. ಭಗವದ್ಗೀತೆಯನ್ನು ರಾಷ್ಟ್ರಗ್ರಂಥವನ್ನಾಗಿ ಮಾಡಬೇಕು ಎಂದು ಕೆಲವರು ಒತ್ತಾಯಿಸಿದರೆ, ಇನ್ನೂ ಕೆಲವರು ರಾಷ್ಟ್ರಪಿತ ಮಹಾತ್ಮಾಗಾಂಧಿ ಅವರನ್ನು ಹತ್ಯೆಗೈದ ಗೋಡ್ಸ್ ಅವರ ವಿಗ್ರಹಗಳನ್ನು ಸ್ಥಾಪಿಸಬೇಕೆನ್ನುವ ಮಾತುಗಳನ್ನಾಡುತ್ತಿದ್ದಾರೆ. ಹಿಂದೂ ಮಹಿಳೆಯರು ಹತ್ತು ಮಕ್ಕಳನ್ನು ಹೆರಬೇಕೆಂದು ಕೆಲವರು ಹೇಳುತ್ತಾರೆ, ಮರು ಮತಾಂತರ ಆಗಬೇಕು, ಘರ್ ವಾಪನ ನಡೆಯಲಿ ಎಂದು ಕೆಲವರು ಪ್ರತಿಪಾದಿಸುತ್ತಾ, ಜನಸಾಮಾನ್ಯರ ಸಮಸ್ಯೆಗಳ ಪರಿಹಾರ, ಹಸಿವು-ನಿರುದ್ಯೋಗ ಸಮಸ್ಯೆಗಳಿಂದ ಜನರ ಗಮನ ಬೇರೆಡೆ ಸೆಳೆಯುವ ಹುನ್ನಾರ ನಡೆದಿದೆ ಎಂದು ಡಿಎಸ್ಎಸ್ ಧುರೀಣರು ಆರೋಪಿಸಿದ್ದಾರೆ.

ಭಾರತವು ಜಾತ್ಯಾತೀತ ರಾಷ್ಟ್ರವಾಗಿದೆ. ಇಲ್ಲಿ ಅನೇಕ ಧರ್ಮಗಳನ್ನು ಅನುಸರಿಸುವ ಜನರಿದ್ದಾರೆ. ತಮಗೆ ಇಷ್ಟವಾದ ಧರ್ಮದಲ್ಲಿ ಮುಂದುವರಿಯುತ್ತಿದ್ದಾರೆ. ಯಾರಿಗಾದರೂ ತಮ್ಮ ಧರ್ಮವನ್ನು ಬಿಟ್ಟು, ಬೇರೊಂದು ಧರ್ಮವನ್ನು ಸೇರಬೇಕೆಂದು ಬಯಸಿದಲ್ಲಿ ಸಂವಿಧಾನದಲ್ಲಿ ಅದಕ್ಕೂ ಅವಕಾಶವನ್ನು ಕಲ್ಪಿಸಲಾಗಿದೆ. ಒತ್ತಾಯದಿಂದ ಏನನ್ನೂ ಮಾಡಬಾರದು ಎಂದು ಸ್ಪಷ್ಟವಿರುವಾಗ ಸಂಘ ಪರಿವಾರದ ಕುಮ್ಮಕ್ಕಿನಿಂದ ಹಿಂದೂವಾದಿಗಳು ಇತರೆ ಧರ್ಮೀಯರನ್ನು ಮತ್ತೆ ಹಿಂದೂ ಧರ್ಮಕ್ಕೆ ತರುತ್ತೇವೆ ಎನ್ನುವುದು ಸರಿಯಲ್ಲ ಎಂದು ಡಿಎಸ್ಎಸ್ ತಿಳಿಸಿದೆ.

ಕೋಮುವಾದಿಗಳ ಹುನ್ನಾರ, ಕೇಂದ್ರದ ಬಿಜೆಪಿ ನೇತೃತ್ವದ ಸರ್ಕಾರದ ಜನವಿರೋಧಿ ನೀತಿಗಳನ್ನು ಖಂಡಿಸಿ ಜನರು ಇವರ ಹುನ್ನಾರದ ಬಗ್ಗೆ ಜಾಗೃತರಾಗಬೇಕು ಎಂದು ಒತ್ತಾಯಿಸಿ ಕರ್ನಾಟಕ ರಾಜ್ಯ ದಲಿತ ಸಂಘರ್ಷ ಸಮಿತಿಯು (ಡಿ.ಸಿ.ಸಾಗರ ಬಣ) ಜಿಲ್ಲಾ ಘಟಕದ ನೇತೃತ್ವದಲ್ಲಿ ಬೃಹತ್ ಪ್ರತಿಭಟನೆ ನಡೆಯಿತು.

ನಗರದ ಡಬಲ್ ರಸ್ತೆಯಲ್ಲಿನ ಬಳ್ಳಾರಿ ಜಿಲ್ಲಾ ಡಾ||ಬಿ.ಆರ್.ಅಂಬೇಡ್ಕರ್ ಸಂಘದ ಕಛೇರಿ ಬಳಿಯ ಸ್ಥಳದಿಂದ ಪ್ರಾರಂಭವಾದ ಪ್ರತಿಭಟನಾ ಮೆರವಣಿಗೆಯು ಗಡಿಗಿ ಚೆನ್ನಪ್ಪ ಸರ್ಕಲ್, ಮೀನಾಕ್ಷಿ ಸರ್ಕಲ್, ಹಳೆ ಮುನಿಸಿಪಾಲಿಟಿ ಕಛೇರಿ ರಸ್ತೆ ಮೂಲಕ ಜಿಲ್ಲಾಧಿಕಾರಿಗಳ ಕಛೇರಿ ತಲುಪಿತು.

ರಾಜ್ಯ ದಲಿತ ಸಂಘರ್ಷ ಸಮಿತಿಯ ಸಂಘಟನಾ ಸಂಚಾಲಕ, ಹಿರಿಯ ಧುರೀಣ ಎ.ಮಾನಯ್ಯ, ನೇತೃತ್ವದಲ್ಲಿ ನಡೆದ ಪ್ರತಿಭಟನೆಯಲ್ಲಿ ಜಿಲ್ಲೆಯ ವಿವಿಧೆಡೆಗಳಿಂದ ಹೆಚ್ಚಿನ ಸಂಖ್ಯೆಗಳಲ್ಲಿ ಡಿಎಸ್ಎಸ್ ಕಾರ್ಯಕರ್ತರು ಆಗಮಿಸಿದ್ದರು. ನೂರಾರು ಜನ ಮಹಿಳೆಯರು, ಹಿರಿಯರು, ಯುವಕರು, ಪಾಲ್ಗೊಂಡಿದ್ದರು. ಡಿಸಿ ಕಛೇರಿಯಲ್ಲಿ ಪ್ರತಿಭಟನೆ ನಡೆಸಿದ ನಂತರ ಮುಖ್ಯಮಂತ್ರಿಗಳಿಗೆ ಬರೆದ ಮನವಿ ಪತ್ರವನ್ನು ಕಳುಹಿಸಿ ಕೊಡಲಾಯಿತು.

ಡಿಎಸ್ಎಸ್ ಸಂಘಟನಾ ಸಂಚಾಲಕ ಎ.ಮಾನಯ್ಯ, ಜಿಲ್ಲಾ ಸಂಚಾಲಕ ಕೆಂಚಪ್ಪ ಹಾಗೂ ಧುರೀಣರುಗಳಆದ ಹೆಚ್.ಹುಸೇನಪ್ಪ, ಹೆಚ್.ಸಿದ್ಧೇಶ್, ಮರಿಸ್ವಾಮಿ, ದೊಡ್ಡಬಸಪ್ಪ, ಎ.ಕೆ.ಗಂಗಾಧರ, ಗಾದಿಲಿಂಗ, ಎ.ಕೆ.ಲಿಂಗಪ್ಪ ಮತ್ತು ಹೆಚ್.ಬಿ.ಗಂಗಪ್ಪ (ಸಿರುಗುಪ್ಪ), ದೇವದಾಸ್ (ಸಂಡೂರು), ಲಕ್ಷ್ಮಣ್ ಕಾರಿಗನೂರು (ಹೊಸಪೇಟೆ), ಲಿಂಗಪ್ಪ ಹಡಗಲಿ, ಡಿ.ಹೆಚ್.ದುರುಗೇಶ್, ಶಿವರಾಜ್ ಕೂಡ್ಲಿಗಿ, ಮಹೇಶ್ ಹಗರಿಬೊಮ್ಮನಹಳ್ಳಿ ಹಾಗೂ ಹೆಚ್.ಆಂಜನೇಯ, ಹೆಚ್.ಮಲ್ಲಪ್ಪ, ಶಂಕರ್, ರಾಮಲಿಂಗ, ಹೊನ್ನೂರಪ್ಪ (ಕೀರಾ), ರಂಗಪ್ಪ, ರಾಜಣ್ಣ, ಆರ್.ವೀರೇಶ್, ತಿರುಮಲ, ಎಱ್ರಿಸ್ವಾಮಿ, ಬಿ.ಅಂಜಿನಿ (ಆಂಜನೇಯ), ಇಂದಿರಾನಗರ ಇನ್ನಿತರೆ ಅನೇಕರು ಪಾಲ್ಗೊಂಡಿದ್ದರು.

ಸೂಕ್ತ ಚಿಕಿತ್ಸೆ ನೀಡಲಿಲ್ಲವೆಂದು ಆರೋಪಿಸಿ ವಿದ್ಯಾರ್ಥಿಗಳಿಂದ ಪ್ರತಿಭಟನೆ

ಬಳ್ಳಾರಿ, ಮಾ.27:ರಸ್ತೆ ಅಪಘಾತದಲ್ಲಿ ಗಾಯಗೊಂಡ ವ್ಯಕ್ತಿಗಳಿಗೆ ವೈದ್ಯರು ಸೂಕ್ತ ಚಿಕಿತ್ಸೆ ನೀಡಲಿಲ್ಲವೆಂದು ಆರೋಪಿಸಿ ಸಂಜಯಗಾಂಧಿ ಪಾಲಿಟೆಕ್ನಿಕ್ ಕಾಲೇಜ್ ನ ವಿದ್ಯಾರ್ಥಿಗಳು ವಿಮ್ಸ್ ಆಸ್ಪತ್ರೆಯ ಹೊರಗಡೆ ಇಂದು ಪ್ರತಿಭಟನೆ ನಡೆಸಿದರು.

ಆಂಧ್ರದ ಡಿ.ಹಿರೇಹಾಳ್ ಗ್ರಾಮದ ಹೊರವಲಯದಲ್ಲಿ ಮೊನ್ನೆ ನಡೆದ ಭೀಕರ ರಸ್ತೆ ಅಪಘಾತದಲ್ಲಿ ತೀವ್ರ ಗಾಯಗೊಂಡ ಸಂಜಯಗಾಂಧಿ ಪಾಲಿಟೆಕ್ನಿಕ್ ಕಾಲೇಜಿನ ಪ್ರಾಚಾರ್ಯ ರವಿಶಂಕರ್ ಮತ್ತು ಅವರ ಕುಟುಂಬ ವರ್ಗದವರಿಗೆ ಸೂಕ್ತ ಚಿಕಿತ್ಸೆ ನೀಡುವಲ್ಲಿ ವಿಳಂಭ ಧೋರಣೆ ಅನುಸರಿಸಿದ ವಿಮ್ಸ್ ನ ಹೊರರೋಗಿಗಳ ಆಸ್ಪತ್ರೆಯ ಆ ದಿನದ ಕರ್ತವ್ಯದಲ್ಲಿದ್ದ ವೈದ್ಯರ ಕ್ರಮವನ್ನು ಖಂಡಿಸಿ ಸಂಜಯಗಾಂಧಿ ಪಾಲಿಟೆಕ್ನಿಕ್ ಕಾಲೇಜಿನಿಂದ ವಿಮ್ಸ್ ವರೆಗೆ ಪ್ರತಿಭಟನಾ ಮೆರವಣಿಗೆ ನಡೆಸಿದ ಸದರಿ ಕಾಲೇಜಿನ ವಿದ್ಯಾರ್ಥಿಗಳು ವಿಮ್ಸ್ ಆಸ್ಪತ್ರೆಯ ಹೊರಗಡೆ ಪ್ರತಿಭಟನೆ ನಡೆಸಿ, ವೈದ್ಯರ ವಿರುದ್ಧ ಸೂಕ್ತ ಕ್ರಮಕ್ಕೆ ಒತ್ತಾಯಿಸಿದರು.

ನಂತರ ಪ್ರತಿಭಟನಾ ಮೆರವಣಿಗೆ ಜಿಲ್ಲಾಧಿಕಾರಿಗಳ ಕಛೇರಿಗೆ ತೆರಳಿ ಮನವಿ ಪತ್ರ ಸಲ್ಲಿಸಲಾಯಿತು. ಪ್ರತಿಭಟನೆಯಲ್ಲಿ ಸಂಜಯಗಾಂಧಿ ಪಾಲಿಟೆಕ್ನಿಕ್ ಕಾಲೇಜಿನ ನೂರಾರು ವಿದ್ಯಾರ್ಥಿಗಳು ಭಾಗವಹಿಸಿದ್ದರು.

ಅಕ್ರಮ ಮರಳು ಸಾಗಾಟ-ಕೂಲಿ ಕಾರ್ಮಿಕ ಸಾವು-ತನಿಖೆಯಿಂದ ಬಹಿರಂಗ

ಕೂಡ್ಲಿಗಿ, ಮಾ.27:ತಾಲೂಕಿನ ನಾಗರಕಟ್ಟೆ ಸಮೀಪದ ಹಳ್ಳದಲ್ಲಿ ಮರಳು ದಿಬ್ಬ ಕುಸಿದು ಬಿದ್ದು ಕೂಲಿ ಕಾರ್ಮಿಕ ಸಾವನ್ನಪ್ಪಿದ ಘಟನೆ ಕುರಿತಂತೆ ತನಿಖೆ ನಡೆಸಿದ ಪೊಲೀಸರು ಅಕ್ರಮ ಮರಳು ಸಾಗಾಟಕ್ಕಾಗಿ ತೊಡಗಿದ್ದ ಸಂದರ್ಭದಲ್ಲಿ ದುರ್ಘಟನೆ ಸಂಭವಿಸಿದ್ದು ತನಿಖೆಯಿಂದ ನಾಲ್ವರ ವಿರುದ್ಧ ಪ್ರಕರಣ ದಾಖಲಿಸಿ ಮೂವರನ್ನು ದಸ್ತಗಿರಿ ಮಾಡಲಾಗಿದೆ.

ಮಾ.18ರಂದು ಮಧ್ಯಾಹ್ನ ನಾಗರಕಟ್ಟೆ ಸರ್ಕಾರಿ ಜಮೀನಿನ ಸ.ನಂ. 277ರ ಹಳ್ಳದಲ್ಲಿ ಮರಳು ತೆಗೆಯುವ ಮರಳಿನ ದಿಬ್ಬ ಕುಸಿದು ಬಿದ್ದು ಹರಪನಹಳ್ಳಿ ತಾಲೂಕು ಚೀರನಹಳ್ಳಿ ಸೋಮಣ್ಣ (22) ಸಾವನ್ನಪ್ಪಿದ್ದು, ಪ್ರಕರಣ ಕುರಿತಂತೆ ತನಿಖೆ ಮುಂದಾದ ಕೊಟ್ಟೂರು ಎ.ಎಸ್.ಐ ದೊಡ್ಡಪ್ಪ ತನಿಖೆಯಿಂದ ನಾಗರಕಟ್ಟೆ ಪೂಜಾರ ವಾಗೀಶ್ (25), ಎಂ.ಕೊಟ್ರಪ್ಪ (57), ಚಿನ್ನೆನಹಳ್ಳಿ ಅಕ್ಕಪ್ಪ(36), ಚೀರನಹಳ್ಳಿ ಗೂಳೆಪ್ಪರ ನಾಗರಾಜ (34) ಎಂಬುವವರು ಸೋಮಣ್ಣನ ಜೊತೆಗೂಡಿ ನಾಗರಕಟ್ಟೆ ಸರ್ಕಾರಿ ಜಮೀನಿನ ಹಳ್ಳದಲ್ಲಿ ಅಕ್ರಮ ಮರಳು ಸಾಗಾಟಕ್ಕಾಗಿ ಮುಂಜಾಗ್ರತಾ ಕ್ರಮ ವಹಿಸದೆ ಮರಳು ತೆಗೆಯುತ್ತಿದ್ದಾಗ ಸೋಮಣ್ಣನ ಸಾವು ಸಂಭವಿಸಿದ್ದು ತನಿಖೆಯಿಂದ ತಿಳಿದುಬಂದಿದೆ. ಮೇಲ್ಕಂಡ ನಾಲ್ಕು ಜನ ಆರೋಪಿತರಲ್ಲಿ ಮೂವರನ್ನು ದಸ್ತಗಿರಿ ಮಾಡಿ ನ್ಯಾಯಾಲಯಕ್ಕೆ ಒಪ್ಪಿಸಲಾಗಿದೆ ಎಂದು ಎ.ಎಸ್.ಐ ದೊಡ್ಡಪ್ಪ ನೀಡಿದ ತನಿಖಾ ವರದಿಯಂತೆ ಚಂದ್ರಪ್ಪ ಎ.ಎಸ್.ಐ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಪ್ರಗತಿ ಕೃಷ್ಣ ಗ್ರಾಮೀಣ ಬ್ಯಾಂಕ್ ನೌಕರರು, ಅಧಿಕಾರಿಗಳಿಂದ ಧರಣಿ ಸತ್ಯಾಗ್ರಹ

ಬಳ್ಳಾರಿ, ಮಾ.27:ತಮ್ಮ ಅನೇಕ ನ್ಯಾಯಯುತವಾದ ಬೇಡಿಕೆಗಳನ್ನು ಈಡೇರಿಸುವಂತೆ ಕೇಂದ್ರ ಸರ್ಕಾರವನ್ನು ಒತ್ತಾಯಿಸಿ ಪ್ರಗತಿ ಕೃಷ್ಣ ಗ್ರಾಮೀಣ ಬ್ಯಾಂಕ್ ನ ಅಧಿಕಾರಿಗಳು ಮತ್ತು ನೌಕರರ ಸಂಘಟನೆಗಳ ಜಂಟಿ ವೇದಿಕೆಯು ಬಳ್ಳಾರಿ ನಗರದಲ್ಲಿರುವ ಬ್ಯಾಂಕ್ ನ ಪ್ರಧಾನ ಕಛೇರಿ ಎದುರು ಪ್ರತಿಭಟನಾ ಧರಣಿ ನಡೆಸಿತು.

ಕೇಂದ್ರ ಸರ್ಕಾರದ ಆರ್ಥಿಕ ನೀತಿಗಳ ವಿರುದ್ಧ ಹಾಗೂ ಬ್ಯಾಂಕ್ ಖಾಸಗೀಕರಣ ಖಂಡಿಸಿ ಗ್ರಾಮೀಣ ಬ್ಯಾಂಕುಗಳ ಕಾಯಿದೆ 2014ರ ತಿದ್ದುಪಡಿಯನ್ನು ವಿರೋಧಿಸಿ, ಪಿಕೆಜಿ ಬ್ಯಾಂಕ್ ನ ನೌಕರರು, ಅಧಿಕಾರಿಗಳ ಸಂಘಟನೆಗಳ ಜಂಟಿ ವೇದಿಕೆಯ ನೂರಾರು ಜನ ಸದಸ್ಯರು ಪ್ರಗತಿ ಕೃಷ್ಣ ಗ್ರಾಮೀಣ ಬ್ಯಾಂಕ್ ನ ಪ್ರಧಾನ ಕಛೇರಿಯ ಮುಂದೆ ಧರಣಿ ಹಮ್ಮಿಕೊಂಡಿದ್ದರು. ಬ್ಯಾಂಕ್ ನ ಅಧಿಕಾರಿಗಳು, ನೌಕರರು ಸೇರಿ 300ಕ್ಕೂ ಹೆಚ್ಚು ಜನರು ವಿವಿಧ ಜಿಲ್ಲೆಗಳಿಂದ ಆಗಮಿಸಿ ಪ್ರತಿಭಟನೆಯಲ್ಲಿ ಭಾಗವಹಿಸಿದ್ದರು.

ಎಸ್.ಕೆ.ಮಿಶ್ರ ಅವರ ಮಾನವ ಶಕ್ತಿ ಯೋಜನೆಯ ಜಾರಿಯನ್ನು ವಿರೋಧಿಸಿರುವ ಈ ಸಂಘಟನೆಗಳು ನಿವೃತ್ತ ವೇತನ ಮತ್ತು ಪ್ರೇರಕ ಬ್ಯಾಂಕಿನಲ್ಲಿರುವ ನಿವೃತ್ತಿ ಸೌಲಭ್ಯಗಳನ್ನು ಜಾರಿ ಮಾಡುವಂತೆ ಒತ್ತಾಯಿಸಿ ಹಾಗೂ ಹತ್ತನೇ ವೇತನ ಒಪ್ಪಂದ ಕುರಿತು ಶೀಘ್ರ ಮಾತುಕತೆಯನ್ನು ಮುಕ್ತಾಯಗೊಳಿಸಬೇಕು, ಗ್ರಾಮೀಣ ಬ್ಯಾಂಕುಗಳಲ್ಲಿ ದುಡಿಯುತ್ತಿರುವ ಎಲ್ಲಾ ದಿನಗೂಲಿ ನೌಕರರನ್ನು ಖಾಯಂಗೊಳಿಸುವಂತೆ ಒತ್ತಾಯಿಸಿ ಧರಣಿ ನಡೆಸಿದರು.

ಪ್ರತಿಭಟನಾಕಾರರನ್ನು ಉದ್ದೇಶಿಸಿ ಪ್ರಗತಿ ಕೃಷ್ಣ ಗ್ರಾಮೀಣ ಬ್ಯಾಂಕ್ ನೌಕರರ ಸಂಘದ ಪ್ರಧಾನ ಕಾರ್ಯದರ್ಶಿ ಕೆ.ಎಂ.ಗುರುಮೂರ್ತಿ, ಅಧಿಕಾರಿಗಳ ಸಂಘದ ಪ್ರಧಾನ ಕಾರ್ಯದರ್ಶಿ ಎ.ಆರ್.ಪರಮೇಶ್ವರಪ್ಪ, ನೌಕರರ ಸಂಘಟನೆಯ ಪ್ರಧಾನ ಕಾರ್ಯದರ್ಶಿ ಎಸ್.ಶಂಕರಪ್ಪ, ಅಧಿಕಾರಿಗಳ ಯೂನಿಯನ್ ಪ್ರಧಾನ ಕಾರ್ಯದರ್ಶಿ ಡಿ.ಎಸ್.ಪುರುಷೋತ್ತಮ, ಅಧಿಕಾರಿಗಳ ಸಂಘಟನೆಯ ಪ್ರಧಾನ ಕಾರ್ಯದರ್ಶಿಗಳಾದ ಹೆಚ್.ಧರ್ಮಪಾಲ್ ಕುಮಾರ್ ಮತ್ತು ಇತರರು ಮಾತನಾಡಿದರು.

ಗ್ರಾಮೀಣ ಬ್ಯಾಂಕುಗಳ ಸಂಘಗಳ ಜಂಟಿ ವೇದಿಕೆಯು ಈ ಬೇಡಿಕೆಗಳನ್ನು ಮುಂದಿಟ್ಟುಕೊಂಡು ಮಾರ್ಚ್ 10ರಂದು ನವದೆಹಲಿಯಲ್ಲಿ ಜಂತರ್ ಮಂತರ್ ಮುಂದೆ ಧರಣಿಯನ್ನು ನಡೆಸಿತು. ಎರಡನೇ ಹೋರಾಟದ ಕಾರ್ಯಕ್ರಮವಾಗಿ ಎಲ್ಲಾ ಗ್ರಾಮೀಣ ಬ್ಯಾಂಕುಗಳ ಪ್ರಧಾನ ಕಛೇರಿಗಳ ಮುಂದೆ ಒಂದು ದಿನದ ಧರಣಿಯನ್ನು ಯಶಸ್ವಿಯಾಗಿ ನಡೆಸಲಾಗಿದೆ. ಕೇಂದ್ರ ಸರ್ಕಾರವು ಜಂಟಿ ವೇದಿಕೆಯ ಪದಾಧಿಕಾರಿಗಳನ್ನು ಮಾತುಕತೆಗೆ ಆಹ್ವಾನಿಸಿ, ಬೇಡಿಕೆಗಳನ್ನು ಈಡೇರಿಸುವ ನಿಟ್ಟಿನಲ್ಲಿ ವಿಫಲವಾದಲ್ಲಿ ಬರುವ ಏಪ್ರಿಲ್ 28ರಂದು ಒಂದು ದಿನದ ಅಖಿಲ ಭಾರತ ಮುಷ್ಕರವನ್ನು ನಡೆಸಲಾಗುತ್ತದೆ ಎಂದು ವೇದಿಕೆ ತಿಳಿಸಿದೆ.

ಯುಜಿಸಿ ಪ್ರಾಯೋಜಿತ ಇಂಗ್ಲೀಷ್ ಭಾಷಾ ಶಿಬಿರ

ಬಳ್ಳಾರಿ, ಮಾ.27:ನಗರದ ವೀರಶೈವ ಮಹಾವಿದ್ಯಾಲಯದಲ್ಲಿ ಎರಡು ದಿನಗಳ ಕಾಲ ಜರುಗುವ ಯುಜಿಸಿ ಪ್ರಾಯೋಜಿತ ಇಂಗ್ಲೀಷ್ ಭಾಷೆಯ ಶಿಬಿರವನ್ನು ಆಯೋಜಿಸಲಾಗಿದೆ.

ಕರ್ನೂಲ್ ನ ರಾಯಲಸೀಮಾ ವಿಶ್ವವಿದ್ಯಾಲಯದ ಪ್ರೊ||ವಿ.ವಿ.ಎನ್.ರಾಜೇಂದ್ರ ಪ್ರಸಾದ್ ಅವರು ಆಂಗ್ಲ ಭಾಷೆಯ ಶಿಬಿರವನ್ನು ಉದ್ಘಾಟಿಸಿ ಮಾತನಾಡುತ್ತಾ, ಪಠ್ಯ ಕ್ರಮವನ್ನು ತಯಾರಿಸುವವರಿಗೆ ಭಾಷಾ ವಿಷಯದ ಬಗ್ಗೆ ಪರಿಪೂರ್ಣ ಜ್ಞಾನವಿರಬೇಕಾಗಿರುವುದು ಅವಶ್ಯಕ ಎಂದರು. ಒಂದು ಭಾಷೆ ಗೊತ್ತಿರುವುದು ಮತ್ತು ಆ ಭಾಷೆಯ ಬಗ್ಗೆ ತಿಳಿದುಕೊಂಡಿರುವುದು ಈ ಎರಡರ ನಡುವೆ ವ್ಯತ್ಯಾಸವಿರುತ್ತದೆ. ಭಾಷೆ ಗೊತ್ತಿರುವುದು ವ್ಯವಹಾರಿಕ ಬಳಕೆಗೆ ಸಹಾಯವಾದರೆ, ಭಾಷೆಯ ಬಗ್ಗೆ ತಿಳಿದುಕೊಂಡಲ್ಲಿ ಸಾಹಿತ್ಯಿಕ ವಿಚಾರದ ಒಳ-ಹೊರಗನ್ನೂ ಅರಿಯಬಹುದು ಎಂದ ಅವರು, ಪಠ್ಯ ಕ್ರಮವನ್ನು ತಯಾರಿಸುವವರು ಇದರ ಬಗ್ಗೆ ಎಚ್ಚರಿಕೆ ವಹಿಸಬೇಕೆಂದರು. ಕಾಲೇಜಿನ ಪ್ರಾಚಾರ್ಯ ಹೆಚ್.ಜಯಪ್ರಕಾಶ್ ಗೌಡ ಅಧ್ಯಕ್ಷತೆ ವಹಿಸಿ ಮಾತನಾಡುತ್ತಾ, ಆಂಗ್ಲ ಭಾಷೆಯ ಪ್ರಸ್ತುತತೆ ಹಿಂದಿಗಿಂತಲೂ ಇಂದು ಹೆಚ್ಚು ಮಹತ್ವವನ್ನು ಪಡೆದುಕೊಂಡಿದೆ. ಆದ್ದರಿಂದ ಸಾಮಾನ್ಯ ವಿದ್ಯಾರ್ಥಿಯು ಆಂಗ್ಲ ಭಾಷೆಯನ್ನು ಗ್ರಹಿಸಲು ನೆರವಾಗುವಂತೆ ಆಂಗ್ಲ ಭಾಷೆಯ ವ್ಯಾಕರಣವನ್ನು ಸರಳೀಕರಣಗೊಳಿಸುವ ಅಗತ್ಯವಿದೆ ಎಂದು ಅಭಿಪ್ರಾಯಪಟ್ಟರು.

ಕಾರ್ಯಕ್ರಮದಲ್ಲಿ ಕೋರಿ ವಿರೂಪಾಕ್ಷಪ್ಪ, ಅಣ್ಣಿ ವಿರೂಪಾಕ್ಷಪ್ಪ, ಸುನೀಲ್, ಶಿಬಿರದ ಕಾರ್ಯದರ್ಶಿ ಎ.ಮಲ್ಲಿಕಾರ್ಜುನ, ಮತ್ತಿತರರು ಉಪಸ್ಥಿತರಿದ್ದರು. ಪ್ರೊ||ಎವಜಾಲಿನ್ ಸ್ವಾಗತಿಸಿದರೆ, ಪ್ರೊ||ಮುಸ್ತಾನಪ್ಪ ವಂದಿಸಿದರು.

ಕೂಡ್ಲಿಗಿ:ಬೈಕ್ ಗೆ ಲಾರಿ ಢಿಕ್ಕಿ-ಓರ್ವ ಸಾವು, ಇನ್ನೋರ್ವನಿಗೆ ತೀವ್ರ ಗಾಯ

ಕೂಡ್ಲಿಗಿ, ಮಾ.27:ಬೈಕ್ ತರಲು ಹೋದವರು ಮನೆ ಸೇರುವ ಮೊದಲೇ ಬೈಕ್ ಗೆ ಲಾರಿಯೊಂದು ಢಿಕ್ಕಿ ಹೊಡೆಸಿದ ಪರಿಣಾಮ ತಾಲೂಕಿನ ವಿರುಪಾಪುರ ಹೈವೇ 13ರಲ್ಲಿ ಓರ್ವ ಸ್ಥಳದಲ್ಲೆ ಸಾವನ್ನಪ್ಪಿ ಇನ್ನೋರ್ವನಿಗೆ ತೀವ್ರ ಗಾಯವಾಗಿರುವ ಘಟನೆ ಗುರುವಾರ ಮಧ್ಯಾಹ್ನ ಜರುಗಿದೆ.

ಹೊಸಪೇಟೆ ತಾಲೂಕಿನ ಡಣಾಯಕನಕೆರೆ ಈಡಿಗರ ಅನಿಲ್ ಕುಮಾರ್ (28) ಸ್ಥಳದಲ್ಲೆ ಮೃತಪಟ್ಟ ದುರ್ದೈವಿಯಾಗಿದ್ದು, ಇನ್ನೋರ್ವ ಬೈಕ್ ಸವಾರ ಹೊಸಪೇಟೆ ತಾಲೂಕಿನ ಡಣಾಪುರದ ಕುರುಬರ ಭೀಮಪ್ಪ (32) ತೀವ್ರ ಗಾಯಗೊಂಡು ದಾವಣಗೆರೆ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾನೆಂದು ತಿಳಿದು ಬಂದಿದೆ. ಇವರಿಬ್ಬರು ತುಮಕೂರಿನಲ್ಲಿ ಎ.ಪಿ.02, ಹೆಚ್.4483 ನಂಬರಿನ ಹಳೆಯ ಬುಲೆಟ್ ನ್ನು ಖರೀದಿ ಮಾಡಿಕೊಂಡು ಗ್ರಾಮಕ್ಕೆ ಹಿಂತಿರುಗುವಾಗ ಕೂಡ್ಲಿಗಿ ಕಡೆ ಹೊರಟಿದ್ದಾಗ ವಿರುಪಾಪುರದ ಹೈವೆ 13ರ ರಸ್ತೆಯಲ್ಲಿ ಹೋಗುತ್ತಿರುವಾಗ್ಗೆ ಹಿಂದುಗಡೆಯಿಂದ ಬಂದ ಲಾರಿ ನಂಬರ್ ಕೆ.ಎ.01 ಬಿ4249 ನೆದ್ದರ ಚಾಲಕ ಅತಿವೇಗ ಅಜಾಗರುಕತೆಯಿಂದ ನಡೆಸಿಕೊಂಡು ಹೋಗಿ ಬೈಕ್ ನ ಹಿಂಬದಿಗೆ ಢಿಕ್ಕಿ ಹೊಡೆಸಿದ ಪರಿಣಾಮ ಬೈಕ್ ನಲ್ಲಿ ಹಿಂದೆ ಕುಳಿತಿದ್ದ ಅನಿಲ್ ಕುಮಾರ್ ಕೆಳಗೆ ಬಿದ್ದ ಪರಿಣಾಮ ತಲೆ, ಹಣೆಗೆ ಭಾರಿ ರಕ್ತಗಾಯವಾಗಿ ಕಿವಿ, ಬಾಯಿಯಿಂದ ತೀವ್ರ ರಕ್ತಸ್ರಾವದಿಂದ ಸ್ಥಳದಲ್ಲೆ ಸಾವನ್ನಪ್ಪಿದ್ದರೆ, ಬೈಕ್ ಸವಾರನಾಗಿದ್ದ ಭೀಮಪ್ಪನಿಗೆ ತಲೆಗೆ ರಕ್ತ ಗಾಯವಾಗಿ ತಕ್ಷಣ ಕೂಡ್ಲಿಗಿ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಿ ನಂತರ ಹೆಚ್ಚಿನ ಚಿಕಿತ್ಸೆಗಾಗಿ ದಾವಣಗೆರೆ ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ತಿಳಿದಿದೆ. ಗಾಯಾಳು ಭೀಮಪ್ಪ ನೀಡಿದ ದೂರಿನಂತೆ ಲಾರಿ ಚಾಲಕನ ವಿರುದ್ಧ ಕೂಡ್ಲಿಗಿ ಪೊಲೀಸ್ ಠಾಣಾ ಎಎಸ್ಐ ಅಬ್ದುಲ್ ಜಬ್ಬರ್ ಪ್ರಕರಣ ದಾಖಲಿಸಿಕೊಂಡಿದ್ದಾರೆ ಎಂದು ಪೊಲೀಸ್ ಮೂಲಗಳಿಂದ ತಿಳಿದು ಬಂದಿದೆ.

ನಾಳೆ ಸಂಜೆ ಶ್ರೀ ಗುರು ಪುಟ್ಟರಾಜರ ಮಹಾಜ್ಯೋತಿಯ ಮೆರವಣಿಗೆ

ಬಳ್ಳಾರಿ, ಮಾ.27:ನಾಳೆ ಸಂಜೆ (ಮಾ.28ರಂದು) 5.00 ಗಂಟೆಗೆ ನಗರದಲ್ಲಿ ಶ್ರೀ ಗುರು ಪುಟ್ಟರಾಜರ ಮಹಾಜ್ಯೋತಿಯ ಭವ್ಯ ಮೆರವಣಿಗೆಯನ್ನು ಆಯೋಜಿಸಲಾಗಿದೆ ಎಂದು ಶ್ರೀ ಪುಟ್ಟರಾಜ ಕವಿ ಗವಾಯಿಗಳ ಸೇವಾ ಸಂಘದ ಅಧ್ಯಕ್ಷ ಬಂಡ್ರಾಳ್ ಮೃತ್ಯುಂಜಯ ಸ್ವಾಮಿ ತಿಳಿಸಿದರು.

ನಗರದಲ್ಲಿಂದು ನಡೆದ ಪತ್ರಿಕಾಗೋಷ್ಠಿಯಲ್ಲಿ ಅವರು ಮಾತನಾಡುತ್ತಾ, ಶ್ರೀ ಗುರು ಪುಟ್ಟರಾಜರ ಮಹಾಜ್ಯೋತಿಯ ಮೆರವಣಿಗೆಯು ನಾಳೆ ಸಂಜೆ 5.00 ಗಂಟೆಯಿಂದ ನಗರದ ದುರ್ಗಮ್ಮ ದೇವಸ್ಥಾನದಿಂದ ಪ್ರಾರಂಭಗೊಂಡು ರಾಯಲ್ ವೃತ್ತ, ಬೆಂಗಳೂರು ರಸ್ತೆ, ಬ್ರೂಸ್ ಪೇಟೆ, ತೇರು ಬೀದಿ, ಬ್ರಾಹ್ಮಣ ಬೀದಿ, ಸ್ಟೇಷನ್ ರಸ್ತೆ, ಡಿಸಿ ಕಛೇರಿಯಿಂದ ರಾಜ್ ಕುಮಾರ್ ರಸ್ತೆಯ ಮಾರ್ಗವಾಗಿ ರಾಘವ ಕಲಾಮಂದಿರವನ್ನು ಸಂಜೆ 7.30ಕ್ಕೆ ತಲುಪಲಿದೆ ಎಂದು ತಿಳಿಸಿದರು.

ಮಹಾಜ್ಯೋತಿಯ ಮೆರವಣಿಗೆಗೆ ಮಾಜಿ ಸಚಿವರಾದ ಅಲ್ಲಂ ವೀರಭದ್ರಪ್ಪ ಚಾಲನೆ ನೀಡಲಿದ್ದಾರೆ. ಮೆರವಣಿಗೆಯಲ್ಲಿ ಕಮ್ಮರಚೇಡು ಸಂಸ್ಥಾನ ಮಠದ ಕಲ್ಯಾಣಸ್ವಾಮಿ, ಹರಗಿನಡೋಣಿಯ ಸಿದ್ದಲಿಂಗ ಶಿವಾಚಾರ್ಯಸ್ವಾಮಿಗಳು ಮೆರವಣಿಗೆಯಲ್ಲಿ ಉಪಸ್ಥಿತರಿರುತ್ತಾರೆ. ಅಲ್ಲದೇ ಕಳಸ, ಡೊಳ್ಳು, ಭಜನೆ, ಸಮಳಾದೊಂದಿಗೆ ಮೆರವಣಿಗೆಯು ಸಾಗಲಿದ್ದು, ಎಲ್ಲಾ ರಾಜಕೀಯ ಪಕ್ಷದ ಮುಖಂಡರು, ಸಂಗೀತ ವಿಧ್ವಾಂಸರು, ಸಾಹಿತಿಗಳು, ಪೂಜ್ಯರ ಶಿಷ್ಯ ವರ್ಗ, ಪೂಜ್ಯರ ಭಕ್ತರು, ವಿವಿಧ ಸಂಘ-ಸಂಸ್ಥೆಗಳ ಪದಾಧಿಕಾರಿಗಳು, ಸದಸ್ಯರು, ಮೆರವಣಿಗೆಯಲ್ಲಿ ಭಾಗವಹಿಸಲಿದ್ದಾರೆ ಸಂಜೆ 7.30ಕ್ಕೆ ರಾಘವ ಕಲಾಮಂದಿರದಲ್ಲಿ ಜರುಗುವ ಕಾರ್ಯಕ್ರಮದಲ್ಲಿ ಸಂಗೀತ ಕಾರ್ಯಕ್ರಮವನ್ನು ಆಯೋಜಿಸಲಾಗಿದೆ ಎಂದು ಮೃತ್ಯುಂಜಯ ಸ್ವಾಮಿ ತಿಳಿಸಿದರು.

ಉದ್ದೇಶ

ಕನ್ನಡ ನಾಡಿನ ಸಾಂಸ್ಕೃತಿಕ ಅಂಗವಾಗಿ ಶತಮಾನಗಳಿಂದ ಸಂಗೀತದ ಮಹೋನ್ನತ ಸೇವೆ ಸಲ್ಲಿಸುತ್ತಿರುವ ದಾನಶೂರು ಬಸರಿಗಿಡದ ವೀರಪ್ಪನವರು ದಾನಗೈದ ಪುಣ್ಯಭೂಮಿ ಸುಕ್ಷೇತ್ರ ಶ್ರೀ ವೀರೇಶ್ವರ ಪುಣ್ಯಾಶ್ರಮದ ಶತಮಾನೋತ್ಸವ, ನಡೆದಾಡುವ, ಮಾತನಾಡುವ ದೇವರೆಂದೇ ಭಕ್ತರ ಹೃದಯಸಿಂಹಾಸನದಲ್ಲಿ ಆಸೀನರಾಗಿರುವ ಹಾಗೂ ಅಂಧ-ಅನಾಥ ಮಕ್ಕಳ ಬಾಳಿಗೆ ಬೆಳಕಾಗಿರುವ ಪರಮಪೂಜ್ಯ ಪದ್ಮಭೂಷಣ ಡಾ|| ಪಂ. ಪುಟ್ಟರಾಜ ಗುರುವರ್ಯರ ಜನ್ಮ ಶತಮಾನೋತ್ಸವ ಹಾಗೂ ಪಂ. ಪಂಚಾಕ್ಷರ ಗವಾಯಿಗಳವರ ನಾಟ್ಯ ಸಂಘದ 75ನೇ ವರ್ಷದ ವಜ್ರಮಹೋತ್ಸವದ ಶುಭ ಸಂದರ್ಭದಲ್ಲಿ ಶ್ರೀ ಗುರು ಪುಟ್ಟರಾಜರ ಮಹಾಜ್ಯೋತಿಯು ಹಾನಗಲ್ ಶ್ರೀಮಠದಿಂದ ಜನೆವರಿ 1, 2015ರಿಂದ ಪ್ರಾರಂಭಗೊಂಡು ರಾಜ್ಯದ ವಿವಿಧ ಜಿಲ್ಲೆಗಳಲ್ಲಿ ಸಂಚರಿಸಿ ಜೂನ್ 1,2015ರಂದು ಶ್ರೀ ವೀರೇಶ್ವರ ಪುಣ್ಯಾಶ್ರಮಕ್ಕೆ ತಲುಪುವುದು ಎಂದು ವಿವರಿಸಿದರು.

ಪತ್ರಿಕಾಗೋಷ್ಠಿಯಲ್ಲಿ ಹೆಚ್.ಕೆ.ಗೌರಿಶಂಕರ್, ಹೆಚ್.ಎಂ.ಅಮರೇಶಸ್ವಾಮಿ, ಹನುಮಂತ ಗು‌ಡಗುಂಟೆ, ಯುವರಾಜ್ ಗೌಡ, ಬಸವಣ್ಣಯ್ಯ ಶಾಸ್ತ್ರಿಗಳು, ಸಿದ್ದಲಿಂಗಯ್ಯಸ್ವಾಮಿ, ಜಾಲಿಹಾಳು ಶ್ರೀಧರ, ಹೆಚ್.ಎಂ.ವೀರಯ್ಯಸ್ವಾಮಿ ಉಪಸ್ಥಿತರಿದ್ದರು.