ಕಿರಿಯ ವೈದ್ಯರ ಮುಷ್ಕರ 4ನೇ ದಿನಕ್ಕೆ

ಸಿ.ಎಂ.ಸಿದ್ದರಾಮಯ್ಯ ಅವರಿಗೆ ವೈದ್ಯರ ಮನವಿ

ಬಳ್ಳಾರಿ, ಸೆ.3:ಸ್ಟೈಫಂಡ್ ಹೆಚ್ಚಳಕ್ಕೆ ಆಗ್ರಹಿಸಿ ಬಳ್ಳಾರಿಯ ವಿಮ್ಸ್ ವೈದ್ಯಕೀಯ ಕಾಲೇಜ್ ನ ಗೃಹ ವೈದ್ಯರು, ಪಿಜಿ ವಿದ್ಯಾರ್ಥಿಗಳು ಸೂಪರ್ ಸ್ಪೆಷಾಲಿಟಿ ವೈದ್ಯ ವಿದ್ಯಾರ್ಥಿಗಳು (ಕಿರಿಯ ವೈದ್ಯರು) ನಡೆಸಿರುವ ಅನಿರ್ದಿಷ್ಟ ಕಾಲದ ಧರಣಿ ಸತ್ಯಾಗ್ರಹ ಇಂದು 4ನೇ ದಿನಕ್ಕೆ ಕಾಲಿಟ್ಟಿದೆ.

ಏತನ್ಮಧ್ಯೆ ಇಂದು ಮಧ್ಯಾಹ್ನ ಬಳ್ಳಾರಿಯ ಜಿಂದಾಲ್ ವಿಮಾನ ನಿಲ್ದಾಣಕ್ಕೆ ಆಗಮಿಸಿದ್ದ ಮುಖ್ಯಮಂತ್ರಿ ಸಿದ್ದರಾಮಯ್ಯನವರನ್ನು ಭೇಟಿ ಮಾಡಿದ ಬಳ್ಳಾರಿಯ ವೈದ್ಯ ವಿದ್ಯಾರ್ಥಿಗಳ ಸಂಘದ ಪ್ರತಿನಿಧಿಗಳು ಮನವಿ ಪತ್ರ ಸಲ್ಲಿಸಿ, ಬೇಡಿಕೆ ಈಡೇರಿಸುವಂತೆ ಕಳಕಳಿಯಿಂದ ಕೋರಿದ್ದಾರೆ.

ಮನವಿ ಪತ್ರ ಸ್ವೀಕರಿಸಿದ ಸಿಎಂ ಸಿದ್ದರಾಮಯ್ಯನವರು, ವೈದ್ಯ ವಿದ್ಯಾರ್ಥಿಗಳ ಶಿಷ್ಯ ವೇತನ ಹೆಚ್ಚಳ ಮತ್ತಿತರೆ ಬೇಡಿಕೆ ಈಡೇರಿಸುವ ಭರವಸೆ ನೀಡಿ, ಸಕಾರಾತ್ಮಕವಾಗಿ ಪ್ರತಿಕ್ರಿಯಿಸಿದ್ದಾರೆ ಎಂದು ಸಂಘದ ಮೂಲಗಳು ಸಂಜೆವಾಣಿಗೆ ತಿಳಿಸಿವೆ.

ಬೆಂಗಳೂರಿನಿಂದ ರಾಯಚೂರಿಗೆ ತೆರಳುತ್ತಿದ್ದ ಸಿಎಂ ಅವರನ್ನು ಜಿಂದಾಲ್ ವಿಮಾನ ನಿಲ್ದಾಣದಲ್ಲಿ ಭೇಟಿ ಮಾಡಿದ ಬಳ್ಳಾರಿಯ ವಿಮ್ಸ್ ನ ವೈದ್ಯ ವಿದ್ಯಾರ್ಥಿಗಳು, ಕಿರಿಯ ವೈದ್ಯರ ಸಂಘದ (ಕಾರ್ಡ್) ಡಾ|| ರೋಹಿತ್, ಡಾ|| ಪ್ರಸಾದ್, ಡಾ|| ರಾಮನಗೌಡ, ಡಾ|| ರೇಷ್ಮಾ ಹಾಗೂ ಡಾ|| ಪ್ರೀತಿ ಮತ್ತಿತರರ ನಿಯೋಗವು ತಮ್ಮ ನ್ಯಾಯ ಸಮ್ಮತ ಬೇಡಿಕೆಗಳ ಬಗ್ಗೆ ಮುಖ್ಯಮಂತ್ರಿಗಳಿಗೆ ಮನವರಿಕೆ ಮಾಡಿಕೊಟ್ಟಿದ್ದಾರೆ, ಹಂಬಲದ ಬೇಡಿಕೆಗಳಿಗೆ ಬೆಂಬಲಿಸುವಂತೆ ಬೇಡಿಕೆ ಈಡೇರಿಸುವಂತೆ ಕೋರಿದ್ದಾರೆ.

ಕಳೆದ ನಾಲ್ಕು ದಿನಗಳಿಂದ ಸರ್ಕಾರಿ ವೈದ್ಯಕೀಯ ಕಾಲೇಜ್ ಗಳ ಹೌಸ್ ಸರ್ಜನ್ ವೈದ್ಯರು, ಪಿಜಿಗಳು, ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆ ವೈದ್ಯ ವಿದ್ಯಾರ್ಥಿಗಳು ಮುಷ್ಕರ ನಡೆಸಿದ್ದರಿಂದಾಗಿ, ರಾಜ್ಯದಾದ್ಯಂತ ಎಲ್ಲೆಡೆ ವೈದ್ಯಕೀಯ ಸೇವೆಗಳ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಿದೆ. ರೋಗಿಗಳು ಪರದಾಡುವಂತಾಗಿದೆ

Post Title

ದಿ||ಡಾ|| ಎಂ.ಎಂ.ಕಲಬುರ್ಗಿಯವರಿಗೆ ಶ್ರದ್ಧಾಂಜಲಿ

ಬಳ್ಳಾರಿ, ಸೆ.3:ಹಂಪಿ ಕನ್ನಡ ವಿಶ್ವವಿದ್ಯಾಲಯದ ವಿಶ್ರಾಂತಿ ಕುಲಪತಿಗಳು ಕನ್ನಡ ನಾಡಿನ ಪ್ರಖ್ಯಾತ ಸಾಹಿತಿಗಳು, ಲೇಖಕರು, ವಿಮರ್ಶಕರು, ನಾಡೋಜರು ಆದ ದಿ|| ಡಾ|| ಎಂ.ಎಂ.ಕಲಬುರ್ಗಿರವರಿಗೆ ಕರ್ನಾಟಕ ರಾಜ್ಯ ಬಣಜಿಗ ಸಮಾಜದ ಕ್ಷೇಮಾಭಿವೃದ್ಧಿ ಸಂಘ (ರಿ) ಭಾವಪೂರ್ಣ ಶ್ರದ್ಧಾಂಜಲಿ ಸಲ್ಲಿಸಿತು.

ಕರ್ನಾಟಕ ರಾಜ್ಯ ಬಣಜಿಗ ಸಮಾಜದ ಕ್ಷೇಮಾಭಿವೃದ್ಧಿ ಸಂಘ (ರಿ) ಕಛೇರಿಯಲ್ಲಿ ಏರ್ಪಡಿಸಿದ್ದ ಸರಳ-ಸಮಾರಂಭದಲ್ಲಿ ಹಂತಕರ ಗುಂಡಿಗೆ ಬಲಿಯಾದ ಡಾ|| ಎಂ.ಎಂ.ಕಲಬುರ್ಗಿಯವರ ಭಾವಚಿತ್ರಕ್ಕೆ ಪುಷ್ಪ ನಮನ ಸಲ್ಲಿಸಿ, ಅವರ ಆತ್ಮಕ್ಕೆ ಚಿರಶಾಂತಿಯನ್ನು ಕೋರಿ ಎರಡು ನಿಮಿಷಗಳ ಕಾಲ ಮೌನಾಚರಣೆಯನ್ನು ಆಚರಿಸಲಾಯಿತು.

ಸಭೆಯಲ್ಲಿ ಕರ್ನಾಟಕ ರಾಜ್ಯ ಬಣಜಿಗ ಸಮಾಜದ ಕ್ಷೇಮಾಭಿವೃದ್ಧಿ ಸಂಘ (ರಿ)ದ ಜಿಲ್ಲಾ ಕಾರ್ಯದರ್ಶಿ ಕೊಂಡಕುಂದಿ ಚಂದ್ರನಾಥ ಮಾತನಾಡಿ, ಕನ್ನಡ ನಾಡಿನ ಇತಿಹಾಸದಲ್ಲಿಯೇ ಇಂತಹ ಕೃತ್ಯ ನಡೆದಿದ್ದಿಲ್ಲ, ಇಡೀ ರಾಜ್ಯದ ಆರು ಕೋಟಿ ಕನ್ನಡಿಗರು ಗೌರವಿಸುವಂತಹ ಸಾರಸ್ವತ ಲೋಕದ ಮೇರು ಶಿಖರದಂತಿದ್ದ ಡಾ|| ಎಂ.ಎಂ.ಕಲಬುರ್ಗಿಯವರ ಹಂತಕರ ಗುಂಡಿಗೆ ಬಲಿಯಾಗಿದ್ದು, ಇಡೀ ರಾಜ್ಯವೇ ದುಃಖದ ಮಡುವಿನಲ್ಲಿ ಮೂಳುಗುವಂತಾಯಿತು. ಈ ಕೃತ್ಯಕ್ಕೆ ಕಾರಣರಾದ ದುಷ್ಕರ್ಮಿಗಳನ್ನು ತಕ್ಷಣ ಬಂಧಿಸಿ ಕಾನೂನಿನ ಚೌಕಟ್ಟಿನಲ್ಲಿ ಉಗ್ರ ಶಿಕ್ಷೆ ನೀಡಬೇಕೆಂದು ಒತ್ತಾಯಿಸಿದರಲ್ಲದೇ ರಾಜ್ಯದಲ್ಲಿ ಇಂತಹ ಘಟನೆಗಳು ಮರುಕಳಿಸದಂತೆ ರಾಜ್ಯ ಸರ್ಕಾರವು ಸೂಕ್ತಕ್ರಮಗಳನ್ನು ಕೈಗೊಳ್ಳಬೇಕೆಂದು ಆಗ್ರಹಿಸಿದರು.

ಸಭೆಯಲ್ಲಿ ಪ್ರೊಫೆಸರ್ ಶಿವಾನಂದ್ ಹೊಂಬಳ್ ಮಾತನಾಡಿ, ಡಾ|| ಎಂ.ಎಂ.ಕಲಬುರ್ಗಿಯವರ ವಿದ್ಯಾರ್ಥಿ ಎಂದು ಹೇಳಿಕೊಳ್ಳಲು ನನಗೆ ಹೆಮ್ಮಿ ಎನಿಸುತ್ತದೆ. ಶರಣರ ಗುಣ ಮರಣದಲ್ಲಿ ನೋಡು ಎನ್ನುವಂತೆ ಜಗತ್ತಿನ ದಾರ್ಶಿನಿಕರು ಕಂಡ ಘೋರ ಮರಣವನ್ನು ಡಾ|| ಎಂ.ಎಂ.ಕಲಬುರ್ಗಿಯವರು ಹೊಂದಿದ್ದಾರೆ ಎಂದರಲ್ಲದೇ ಡಾ|| ಕಲಬುರ್ಗಿಯವರು ತತ್ವ ನಿಷ್ಠೆಯ ಸಂಶೋಧಕರಾಗಿದ್ದರೇ ಹೊರತು ವ್ಯಕ್ತಿ ನಿಷ್ಠ ಸಂಶೋಧಕರಾಗಿರಲಿಲ್ಲ, ಹೀಗಾಗಿ ಕಲಬುರ್ಗಿಯವರ ಸಿದ್ಧಾಂತ ಮತ್ತು ಸಂಶೋಧನೆಗಳನ್ನು ಒಪ್ಪದ ವಿಕೃತ ಮನಸ್ಸುಗಳು ಇಂತಹ ಹೀನಾ ಕೃತ್ಯಕ್ಕೆ ಕೈಹಾಕಿವೆ ಎಂದು ಹೇಳಿದರು.

ಡಾ|| ಎಂ.ಎಂ.ಕಲಬುರ್ಗಿಯವರು ತಮ್ಮ ಒಡನಾಟವನ್ನು ಕಸಾಪ ನಿಕಟಪೂರ್ವ ಜಿಲ್ಲಾಧ್ಯಕ್ಷ ಹಾಗೂ ಲೇಖಕರು, ಸಾಹಿತಿಗಳು ಆದ ನಿಷ್ಠಿರುದ್ರಪ್ಪ ಸಭೆಯಲ್ಲಿ ಹಂಚಿಕೊಂಡರು.

ಶ್ರದ್ಧಾಂಜಲಿ ಸಭೆಯಲ್ಲಿ ಹಾವಿನಾಳ್ ಬಸವರಾಜ, ಕೋರಿ ಪ್ರಭಾಕರ್, ಪರಡಿ ಬಸವರಾಜ, ಗಾಳಿ ರಾಜಶೇಖರ್, ಕೋರಿ ವಿರುಪಾಕ್ಷಪ್ಪ, ಮಹಾನಂದಿ ಬಸವಲಿಂಗಪ್ಪ, ನಿಷ್ಠಿ ಬಸವೇಶ್, ಅಂದ್ರಾಳು ಚಿದಾನಂದಪ್ಪ, ತುಪ್ಪದ ಯಱ್ರಿಸ್ವಾಮಿ, ತೆಂಗಿನಕಾಯಿ ಮಹಾಂತೇಶ್, ಎಂ.ಪುರುಷೋತ್ತಮ ಮತ್ತಿತರರು ಉಪಸ್ಥಿತರಿದ್ದರು.

ಕಾರ್ಮಿಕರ ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ ಟಿಯುಸಿಐನಿಂದ ಪ್ರತಿಭಟನೆ

ಬಳ್ಳಾರಿ, ಸೆ.3:ಕಾರ್ಮಿಕರ ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ ಟಿಯುಸಿಐನಿಂದ ಪ್ರತಿಭಟನೆಯನ್ನು ನಗರದಲ್ಲಿ ಆಯೋಜಿಸಲಾಗಿತ್ತು.

ಪ್ರತಿಭಟನಾ ಮೆರವಣಿಗೆಯ ನಂತರ ಜಿಲ್ಲಾಧಿಕಾರಿಗಳ ಕಛೇರಿಗೆ ತೆರಳಿ ಜಿಲ್ಲಾಧಿಕಾರಿಗಳ ಮೂಲಕ ರಾಷ್ಟ್ರಪತಿಗಳಿಗೆ ಹಕ್ಕೊತ್ತಾಯದ ಮನವಿಪತ್ರವನ್ನು ಸಲ್ಲಿಸಲಾಯಿತು.

ಹಕ್ಕೊತ್ತಾಯಗಳು

ಕೇಂದ್ರ ಸರ್ಕಾರ ಮಾಡಲು ಹೊರಟಿರುವ ಕೇಂದ್ರ ಕಾರ್ಮಿಕ ಕಾಯ್ದೆಗಳ ಬದಲಾವಣೆಯನ್ನು ಕೂಡಲೇ ಕೈಬಿಡಬೇಕು, ಕೇಂದ್ರ ಆಯೋಗದ ಲೆಕ್ಕಾಚಾರ ಸೂತ್ರದಂತೆ ದೇಶದ ಪ್ರತಿಯೊಬ್ಬ ಕಾರ್ಮಿಕರಿಗೆ ಮಾಸಿಕ ದಿನಗೂಲಿ 15000 ರೂ.ಗೆ ನಿಗಧಿಗೊಳಿಸಿ ಜಾರಿಗೊಳಿಸಬೇಕು, ದೇಶಾದ್ಯಂತ ಗುತ್ತಿಗೆ ಕಾರ್ಮಿಕ ಪದ್ಧತಿ ರಾರಾಜಿಸುತ್ತಿದ್ದು, ಇದು ನೂತನ ಜೀತ ಪದ್ಧತಿಯಾಗಿ ಕಾರ್ಮಿಕರ ಕುತ್ತಿಗೆ ಕೊಯ್ಯುತ್ತಿದೆ. ಹಾಗಾಗಿ , ಈ ಪದ್ಧತಿಯನ್ನು ನಿಷೇಧಿಸಬೇಕು, ಕನಿಷ್ಠ 5 ಗರಿಷ್ಠ 20 ವರ್ಷಗಳಿಂದ ಸರ್ಕಾರಿ, ಅರೆ ಸರ್ಕಾರಿ, ಹಾಗೂ ಖಾಸಗೀ ವಲಯದಲ್ಲಿ ದುಡಿಯುತ್ತಿರುವ ದಿನಗೂಲಿ/ಸಾಂದರ್ಭಿಕ/ಗುತ್ತಿಗೆ ಹಾಗೂ ಇತರೆ ಹೆಸರಲ್ಲಿ ಕರೆಯಲ್ಪಡುವ ಕಾರ್ಮಿಕರನ್ನು ಖಾಯಂಗೊಳಿಸಬೇಕು, ಬಿಸಿಯೂಟ, ಅಂಗನವಾಡಿ, ಆಶಾ ಹಾಗೂ ಸರ್ವಶಿಕ್ಷಣ ಅಭಿಯಾನದಲ್ಲಿ ದುಡಿಯುತ್ತಿರುವ ಮಿಲಿಯಾಂತರ ಕಾರ್ಮಿಕರಿಗೆ ಕನಿಷ್ಠ ದಿನಗೂಲಿ ಕಾಯ್ದೆ ಹಾಗೂ ಸಾಮಾಜಿಕ ಭದ್ರತೆ ಅನ್ವಹಿಸಿ ಉದ್ಯೋಗ ಭದ್ರತೆ ನೀಡಬೇಕು, ರೈತರ ಅಸ್ತಿತ್ವಕ್ಕೆ ಸವಾಲ್ಹಾಕುತ್ತಿರುವ ಭೂಸ್ವಾಧೀನ ಸುಗ್ರೀವಾಜ್ಞೆಯನ್ನು ಬೇಷರತ್ತಾಗಿ ಹಿಂಪಡೆಯಲೇಬೇಕು. ಇದುವರೆಗೆ ವಶಪಡಿಸಿಕೊಂಡ ಬಲತ್ಕಾರದ ಭೂಸ್ವಾಧೀನತೆಗಳನ್ನು ಕೈಬಿಟ್ಟು ರೈತರಿಗೆ ಭೂಮಿ ಹಿನ್ದಿರುಗಿಸಬೇಕು, ರಾಜ್ಯ ಹಾಗೂ ಅಂತರಾಜ್ಯ ಗುಳೆ ಕಾರ್ಮಿಕರ ಬಗ್ಗೆ ಈಗಿರುವ ಕಾನೂನುಗಳನ್ನು ಸಮರ್ಪಕವಾಗಿ ಜಾರಿಗೆ ತರಬೇಕು. ಇವರ ದಾಖಲಾತಿಯನ್ನು ರಾಜ್ಯ ಕಾರ್ಮಿಕ ಸಚಿವಾಲಯದ ಬದಲು ಆಯಾ ಜಿಲ್ಲಾ ಕಾರ್ಮಿಕಾಧಿಕಾರಿಗಳ ಕಾರ್ಯಾಲಯದಲ್ಲಿ ನಿರ್ವಹಣೆ ಯಾಗಬೇಕು, ಸರ್ಕಾರಿ, ಅರೆ ಸರ್ಕಾರಿ ಹಾಗೂ ಖಾಸಗೀ ವಲಯಗಳಲ್ಲಿ ಖಾಯಂ ಕಾರ್ಮಿಕರ ಜೊತೆ ಸಮಾನಾಂತರವಾಗಿ ದುಡಿಯುತ್ತಿರುವ ಎಲ್ಲಾ ಬಗೆಯ ಕಾರ್ಮಿಕರಿಗೆ ಸಮಾನ ದುಡಿಮೆಗೆ ಸಮಾನ ವೇತನ ಕಾಯ್ದೆ ಅನ್ವಯ ವೇತನ ಹಾಗೂ ಸಾಮಾಜಿಕ ಭದ್ರತೆ ಒದಗಿಸಬೇಕು, ವಿಶೇಷವಾಗಿ ಗಣಿಗಾರಿಕೆ ಹಾಗೂ ಪ್ಲಾಂಟೇಷನ್ ಕ್ಷೇತ್ರದಲ್ಲಿ ದುಡಿಯುತ್ತಿರುವ ಕಾರ್ಮಿಕರಿಗೆ ಸೂಕ್ತ ಕಾನೂನು ರಕ್ಷಣೆ ಹಾಗೂ ಪರಿಹಾರಗಳು ಸಿಗಲೇಬೇಕು, ದೇಶದ ಎಲ್ಲಾ ದುಡಿಯುವ ಕೈಗಳಿಗೆ ಉದ್ಯೋಗ ಕೊಡುವ ಭರವಸೆ ಈಡೇರಿಸುವುದರ ಮೂಲಕ ನಿರುದ್ಯೋಗ ಹಾಗೂ ಉದ್ಯೋಗ ಅಭದ್ರತೆಯನ್ನು ನಿಯಂತ್ರಿಸಬೇಕು ಎಂದು ಮನವಿ ಪತ್ರದಲ್ಲಿ ಟಿಯುಸಿಐ ರಾಜ್ಯಾಧ್ಯಕ್ಷ ಮಾನಸಯ್ಯ, ಉಪಾಧ್ಯಕ್ಷ ಗೋಪಿನಾಥ್, ಪ್ರಧಾನ ಕಾರ್ಯದರ್ಶಿ ಎಂ.ಸತೀಶ್ ಒತ್ತಾಯಿಸಿದ್ದಾರೆ.

ಸೆ.5ರಂದು ಶ್ರೀ ಕೃಷ್ಣ ಜಯಂತಿ ಆಚರಣೆ

ಬಳ್ಳಾರಿ, ಸೆ.3:ಕರ್ನಾಟಕ ರಾಜ್ಯ ಸರ್ಕಾರ, ಬಳ್ಳಾರಿ ಜಿಲ್ಲಾ ಆಡಳಿತ ಹಾಗೂ ಬಳ್ಳಾರಿ ಜಿಲ್ಲಾ ಗೊಲ್ಲರ ಸಂಘಗಳ ಸಂಯುಕ್ತ ಆಶ್ರಯದಲ್ಲಿ ಸೆಪ್ಟೆಂಬರ್ 5ರಂದು ನಗರದ ಡಾ|| ಜೋಳದರಾಶಿ ದೊಡ್ಡನಗೌಡ ರಂಗಮಂದಿರದಲ್ಲಿ ಶ್ರೀ ಕೃಷ್ಣ ಜಯಂತಿ ಕಾರ್ಯಕ್ರಮವನ್ನು ಸಡಗರ, ಸಂಭ್ರಮಗಳಿಂದ ವಿಜೃಂಭಣೆಯಾಗಿ ಆಚರಿಸಲಾಗುತ್ತದೆ ಎಂದು ಜಿಲ್ಲಾ ಗೊಲ್ಲರ ಸಂಘದ ಅಧ್ಯಕ್ಷ ಪಿ.ಗಾದೆಪ್ಪ, ಕಾರ್ಯದರ್ಶಿ ಎನ್.ಯಶವಂತರಾಜ್ ತಿಳಿಸಿದ್ದಾರೆ.

ನಗರದ ಮಯೂರ ಹೋಟೆಲ್ ನಲ್ಲಿಂದು ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಸೆ.5ರಂದು ಬೆಳಿಗ್ಗೆ ಕೌಲ್ ಬಜಾರ್ ಪ್ರದೇಶದಲ್ಲಿರುವ ಶ್ರೀ ಕೋದಂಡರಾಮ ದೇವಸ್ಥಾನದಿಂದ 'ಶ್ರೀಕೃಷ್ಣ'ನ ಬೃಹತ್ ಭಾವಚಿತ್ರವನ್ನು ವಿವಿಧ ಜಾನಪದ ಕಲಾ ಪ್ರಾಕಾರಗಳೊಂದಿಗೆ, ಕಲಾವಿದರ ಹೆಜ್ಜೆ ಕುಣಿತಗಳೊಂದಿಗೆ ಮತ್ತು ಗೊಲ್ಲರ (ಯಾದವ) ಸಮಾಜದ ಯುವಜನತೆ ಬೈಕ್ ಗಳ ಱ್ಯಾಲಿಯ ಮೂಲಕ ವಿಜೃಂಭಣೆಯ ಮೆರವಣಿಗೆಯೊಂದಿಗೆ ಡಾ|| ಜೋಳದರಾಶಿ ದೊಡ್ಡನಗೌಡರ ರಂಗಮಂದಿರಕ್ಕೆ ತೆರಳುತ್ತೇವೆ ಎಂದರು.

ಅಂದು ಬೆಳಿಗ್ಗೆ 10.30 ಗಂಟೆಗೆ ರಂಗಮಂದಿರದಲ್ಲಿ ಜಿಲ್ಲಾ ಸಚಿವ ಪಿ.ಟಿ.ಪರಮೇಶ್ವರ್ ನಾಯ್ಕ್ ಅವರು ಶ್ರೀಕೃಷ್ಣ ಭಾವಚಿತ್ರಕ್ಕೆ ಪೂಜೆ ಸಲ್ಲಿಸಿ, ಸಮಾರಂಭವನ್ನು ಉದ್ಘಾಟಿಸಲಿದ್ದಾರೆ. ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ನಗರ ಶಾಸಕ ಅನಿಲ್ ಲಾಡ್ ವಹಿಸಲಿದ್ದು ಜಿಲ್ಲೆಯ ಚುನಾಯಿತ ಪ್ರತಿನಿಧಿಗಳು, ನಿಗಮ-ಮಂಡಳಿ ಅಧ್ಯಕ್ಷರು-ಉಪಾಧ್ಯಕ್ಷರು, ಸಮಾಜದ ಗಣ್ಯರು ಉಪಸ್ಥಿತರಿರಲಿದ್ದಾರೆ ಎಂದು ಕೆ.ವಸಂತಕುಮಾರ್ ಮತ್ತು ಸಂಗಡಿಗರಿಂದ ಭಕ್ತಿ ಸಂಗೀತ, ವಿವಿಧ ಶಾಲಾ ಮಕ್ಕಳಿಂದ ಶ್ರೀಕೃಷ್ಣನ ಸಮೂಹ ನೃತ್ಯ ಕಾರ್ಯಕ್ರಮಗಳು ನಡೆಯಲಿವೆ. ಅಂದು ಸಂಜೆ 6 ಗಂಟೆಗೆ ಗೊಲ್ಲರ ಸಂಘದ ನಂದ ಗೋಕುಲ ಶಾಲೆಯಲ್ಲಿ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆಯಲಿವೆ. ಗೋಪೂಜೆ, ಶ್ರೀಕೃಷ್ಣಪೂಜೆ ನಡೆಸಿ, ಶ್ರೀ ಕೃಷ್ಣನಿಗೆ ವಿವಿಧ ರೀತಿಯ ಅಲಂಕಾರಗಳನ್ನು ಮಾಡಲಾಗುತ್ತದೆ ಎಂದು ಪಿ.ಗಾದೆಪ್ಪ, ಎನ್.ಯಶವಂತರಾಜ್ ವಿವರಿಸಿದರು.

ಸೆಪ್ಟೆಂಬರ್ 6ರಂದು ಬೆಳಿಗ್ಗೆ ಕೌಲ್ ಬಜಾರ್ ನ ಶ್ರೀ ಕೋದಂಡರಾಮ ದೇವಸ್ಥಾನದಲ್ಲಿ ಮತ್ತು ಅಂದು ಸಂಜೆ 6 ಗಂಟೆಗೆ ನಗರದ ಅಧಿದೇವತೆ ಶ್ರೀ ಕನಕ ದುರ್ಗಮ್ಮ ದೇವಸ್ಥಾನದಲ್ಲಿ ಮೊಸರು ಗಡಿಗೆ ಹೊಡೆಯುವ ಕಾರ್ಯಕ್ರಮವನ್ನೂ ಸಹ ಆಯೋಜಿಸಲಾಗಿದೆ ಎಂದು ತಿಳಿಸಿದರು.

ಈ ಎಲ್ಲಾ ಕಾರ್ಯಕ್ರಮಗಳು ಗೊಲ್ಲರ ಸಂಘದ ಸದಸ್ಯರು, ಯಾದವ ಬಾಂಧವರು, ಶ್ರೀ ಕೃಷ್ಣನ ಭಕ್ತಾದಿಗಳು ಹೆಚ್ಚಿನ ಸಂಖ್ಯೆಗಳಲ್ಲಿ ಪಾಲ್ಗೊಂಡು ಯಶಸ್ವಿಗೊಳಿಸುವಂತೆ ಪಿ.ಗಾದೆಪ್ಪ ಹಾಗೂ ಯಶವಂತರಾಜ್ ಕೋರಿದರು.

ಪತ್ರಿಕಾಗೋಷ್ಠಿಯಲ್ಲಿ ಸಂಘದ ಮತ್ತು ಸಮಾಜದ ದುರೀಣರುಗಳಾದ ಶ್ರೀನಿವಾಸ್ ಯಾದವ್, ಗೋವಿಂದರಾಜು, ಲೋಕನಾಥ್, ವೆಂಕಟೇಶ್, ರಘು, ಕೃಷ್ಣಮೂರ್ತಿ, ಗೋಪಾಲ್, ಮತ್ತು ಇತರರು ಉಪಸ್ಥಿತರಿದ್ದರು.

ವಂಚನೆ ಆರೋಪ ಪ್ರಕರಣ ಬಿ.ಎಸ್.ಪಿ ಧುರೀಣ ಬಂಧನ

ಬಳ್ಳಾರಿ, ಸೆ.3:ವಂಚನೆಯ ಆರೋಪ ಪ್ರಕರಣದ ಅಡಿಯಲ್ಲಿ ಮಹಿಳೆಯೋರ್ವರು ನೀಡಿದ ದೂರಿನ ಮೇರೆಗೆ ಬಹುಜನ ಸಮಾಜ ಪಕ್ಷದ ಧುರೀಣರನ್ನು ಗಾಂಧಿನಗರ ಪೊಲೀಸರು ಬಂಧಿಸಿದ್ದಾರೆ ಎಂದು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಗಳು ತಿಳಿಸಿದ್ದಾರೆ.

ನಗರದಲ್ಲಿ ನಂದಿ ಪತ್ತಿನ ಸಹಕಾರಿ ಸಂಘ (ಬ್ಯಾಂಕ್) ಸ್ಥಾಪಿಸಿದ್ದ ಬಿ.ಎಸ್.ಪಿ ಧುರೀಣ ಮಲ್ಲಯ್ಯ ಹೆಗಡೆ ಎಂಬುವವರು ಕೆಲಸ ಕೊಡುವುದಾಗಿ ನಂಬಿಸಿ ಹಣ ಪಡೆದು ವಂಚಿಸಿದ್ದಾರೆ ಎಂದು ಅನಿತಾ ಎಂಬುವ ಮಹಿಳೆಯು ನೀಡಿದ್ದ ದೂರಿನ ಮೇರೆಗೆ ವಿಚಾರಣೆ ನಡೆಸಿದ ಗಾಂಧಿನಗರ ಠಾಣೆಯ ಪಿಎಸ್ಐ ಚಂದನ್ ಗೋಪಾಲ್ ಅವರು ಆರೋಪಿಯನ್ನು ಬಂಧಿಸಿದ್ದಾರೆ ಎಂದು ತಿಳಿಸಿದ್ದಾರೆ. ಕೆಲಸವೂ ದೊರೆಯದೇ (ಸಂಬಳ ನೀಡದೇ), ನೀಡಿದ್ದ ಹಣವೂ ವಾಪಸ್ಸು ಬಾರದ ಕಾರಣ ಗಾಂಧಿನಗರ ಠಾಣೆಯಲ್ಲಿ ಕೇಸ್ ದಾಖಲಾಗಿತ್ತು.

ಲೋಕಾಯುಕ್ತ ಪೊಲೀಸರ ಬಲೆಗೆ ಎಫ್.ಡಿ.ಎ

ಬಳ್ಳಾರಿ, ಸೆ.3:ಸಾರ್ವಜನಿಕರೊಬ್ಬರಿಂದ 15 ಸಾವಿರ ರೂಗಳ ಲಂಚದ ಹಣ ಪಡೆಯುತ್ತಿದ್ದಾಗ, ಬಳ್ಳಾರಿಯ ತಹಶೀಲ್ದಾರ್ ಕಛೇರಿಯ ಎಫ್.ಡಿ.ಎ ರಾಘವೇಂದ್ರ ಎಂಬುವವರು ಬಳ್ಳಾರಿಯ ಲೋಕಾಯುಕ್ತ ಪೊಲೀಸರ ಬಲೆಗೆ ಸಿಕ್ಕಿಬಿದ್ದಿದ್ದಾರೆ ಎಂದು ಲೋಕಾಯುಕ್ತ ಜಿಲ್ಲಾ ಎಸ್.ಪಿ. ತಿಳಿಸಿದ್ದಾರೆ.

ಜಮೀನಿನ ಪ್ರಮಾಣ ಪತ್ರ ಫಾರಂ 2ರ ನಕಲು ಪ್ರತಿಗಾಗಿ ಅರ್ಜಿ ಸಲ್ಲಿಸಿದ್ದ ಜಾಲಿಬೆಂಚಿ ಗ್ರಾಮದ ತುಕಾರಾಂ ಎಂಬುವವರಿಗೆ ಪ್ರತಿ ನೀಡಿರಲಿಲ್ಲ. ಈ ಬಗ್ಗೆ ರಾಘವೇಂದ್ರ ಅವರನ್ನು ಕೇಳಿದಾಗ, 30 ಸಾವಿರ ರೂ.ಗಳಿಗೆ ಬೇಡಿಕೆ ಇಟ್ಟಿದ್ದರೆಂದೂ, ಮದ್ಯವರ್ತಿಯೊಬ್ಬರ ಮೂಲಕ ಹಣ ನೀಡುವಂತೆ ಬೇಡಿಕೆ ಇಡಲಾಗಿತ್ತು ಎಂದು ಪೊಲೀಸರು ಹೇಳಿದ್ದಾರೆ.

ಈ ಬಗ್ಗೆ ತುಕಾರಾಂ ಅವರು ಲೋಕಾಯುಕ್ತ ಪೊಲೀಸರಿಗೆ ದೂರು ನೀಡಿದ್ದರು. ಲೋಕಾಯುಕ್ತ ಡಿವೈಎಸ್ಪಿ ಎಂ.ಕಲ್ಯಾಣಕುಮಾರ ಮಾರ್ಗದರ್ಶನದಲ್ಲಿ ಇನ್ಸ್ ಪೆಕ್ಟರ್ ಜಿ.ಎಸ್.ಹೆಬ್ಬಾಳ್ ಮತ್ತು ಅವರ ಸಿಬ್ಬಂದಿಯು ಹಣ ಪಡೆಯುತ್ತಿದ್ದಾಗ ರಾಘವೇಂದ್ರ ಅವರನ್ನು ರೆಡ್ ಹ್ಯಾಂಡೆಡ್ ಆಗಿ ಹಿಡಿದಿದ್ದಾರೆ. ಲೋಕಾಯುಕ್ತ ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.

ಬರ ನಿರ್ವಹಣೆಯಲ್ಲಿ ರಾಜ್ಯ ಸರ್ಕಾರ ವಿಫಲ-ಪ್ರಹ್ಲಾದ್ ಜೋಷಿ

ಬಳ್ಳಾರಿ, ಸೆ.3:ರಾಜ್ಯದಲ್ಲಿ ಕಳೆದ 40 ವರ್ಷಗಳಲ್ಲಿ ಕಂಡು ಕೇಳರಿಯದ ಭೀಕರ ಬರಗಾಲ ಕಾಣಿಸಿಕೊಂಡು ರೈತಾಪಿ ವರ್ಗ, ಸಾರ್ವಜನಿಕರು, ತತ್ತರಿಸಿರುವಾಗ, ಬರ ನಿರ್ವಹಣೆಯಲ್ಲಿ ರಾಜ್ಯ ಸರ್ಕಾರ ಸಂಪೂರ್ಣವಾಗಿ ವಿಫಲವಾಗಿದೆ ಎಂದು ಬಿಜೆಪಿ ರಾಜ್ಯಾಧ್ಯಕ್ಷ, ಸಂಸದ ಪ್ರಹ್ಲಾದ್ ಜೋಷಿ ಆರೋಪಿಸಿದ್ದಾರೆ.

ನಗರದ ರಾಯಲ್ ಫೋರ್ಟ್ ಹೋಟೆಲ್ ಸಭಾಂಗಣದಲ್ಲಿಂದು ಬೆಳಿಗ್ಗೆ ತಮ್ಮನ್ನು ಭೇಟಿ ಮಾಡಿದ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ರಾಜ್ಯ ಸರ್ಕಾರಕ್ಕೆ ಬರ ಪರಿಹಾರ ಕಾಮಗಾರಿ ಕೈಗೊಳ್ಳುವುದಕ್ಕಿಂಲೂ ರೈತರ ಸಂಕಷ್ಟ-ಸಮಸ್ಯೆ ಪರಿಹರಿಸುವುಕ್ಕಿಂತಲೂ ಬಿಬಿಎಂಪಿಯಲ್ಲಿ ಆಡಳಿತ ಸೂತ್ರ ಹಿಡಿಯುವುದೇ ಮುಖ್ಯವಾಗಿ ಹೋಗಿದೆ. ರಾಜ್ಯದ ಮುಖ್ಯಮಂತ್ರಿ, ಕಂದಾಯ, ಕೃಷಿ, ತೋಟಗಾರಿಕೆ, ಗ್ರಾಮೀಣಾಭಿವೃದ್ಧಿ ಸಚಿವರು ಭೀಕರ ಬರಪೀಡಿತ ಪ್ರದೇಶಗಳಿಗೆ ತೆರಳಿ ಜನತೆಯ ಸಮಸ್ಯೆ, ಕಷ್ಟಗಳನ್ನು ಆಲಿಸುತ್ತಿಲ್ಲ. ಸಂಪೂರ್ಣವಾಗಿ ನಿರ್ಲಕ್ಷ ವಹಿಸಿದ್ದಾರೆ ಎಂದರು.

ಪ್ರತಿ ತಾಲ್ಲೂಕಿಗೆ ಒಂದರಂತೆ ಗೋಶಾಲೆ ಪ್ರಾರಂಭಿಸುವುದಾಗಿ ಹೇಳಿದ ಸರ್ಕಾರ, ಆ ಬಗ್ಗೆ ಕ್ರಮ ಕೈಗೊಂಡಿಲ್ಲ. ಮೇವು ಬ್ಯಾಂಕ್ ಗಳ ನಿರ್ಮಾಣಕ್ಕೆ ಮುಂದಾಗಿಲ್ಲ. ಕುಡಿಯುವ ನೀರಿನ ತೀವ್ರ ಕೊರತೆ ಏರ್ಪಟ್ಟಿರುವ ಕಡೆಗೆ ನೀರು ಪೂರೈಸಲೂ ಆದ್ಯತೆ ನೀಡಿಲ್ಲ. ಒಟ್ಟಾರೆಯಾಗಿ ರಾಜ್ಯ ಕಾಂಗ್ರೆಸ್ ಸರ್ಕಾರವು ಬರಗಾಲ ಪರಿಸ್ಥಿತಿಯನ್ನು ನಿರ್ವಹಿಸುವಲ್ಲಿ ವಿಫಲವಾಗಿದೆ ಎಂದು ಪ್ರಹ್ಲಾದ್ ಜೋಷಿ ಟೀಕಿಸಿದರು.

ಸರ್ಕಾರವು ಗೋಶಾಲೆಗಳನ್ನು ತೆರೆಯದೇ ಇರುವ ಕಾರಣ ರೈತರು ಹತಾಶರಾಗಿ, ತಮ್ಮ ದನ-ಕರು (ಹಸು)ಗಳನ್ನು ಕಟುಕರಿಗೆ ಮಾರಾಟ ಮಾಡಲು ಕಸಾಯಿ ಖಾನೆಯತ್ತ ಕಳುಹಿಸಿಕೊಡುತ್ತಿದ್ದಾರೆಂದು ಸುದ್ದಿ ಮಾಧ್ಯಮಗಳಲ್ಲಿ ವರದಿಯಾಗುತ್ತಿರುವ ಪರಿಸ್ಥಿತಿಗೆ ಹಿಡಿದ ಕೈಗನ್ನಡಿಯಾಗಿದೆ. ಈ ಸರ್ಕಾರಕ್ಕೆ ಕಣ್ಣು-ಕಿವಿ ಯಾವುದೂ ಇಲ್ಲ. ಇದೊಂದು ದಪ್ಪ ಚರ್ಮದ ಸರ್ಕಾರವಾಗಿದೆ ಎಂದು ವ್ಯಂಗ್ಯವಾಡಿದರು.

571 ಕೋಟಿ ರೂ ಯಾವ ಬಾಬ್ತಿನಿಂದ?

ರಾಜ್ಯದ ಗ್ರಾಮೀಣಾಭಿವೃದ್ಧಿ ಸಚಿವ ಹೆಚ್.ಕೆ.ಪಾಟೀಲರು ಬರ ನಿರ್ವಹಣೆಗಾಗಿ 571 ಕೋಟಿ ರೂಗಳನ್ನು ಬಿಡುಗಡೆ ಮಾಡಿದ್ದೇವೆ ಎಂದು ಹೇಳಿದ್ದಾರೆ. ಈ ಹಣವನ್ನು ಯಾವ ಖಾತೆಯಿಂದ, ಯಾವ ಬಾಬ್ತಿನಿಂದ ನೀಡಲಾಗಿದೆ, ಯಾವ-ಯಾವ ಜಿಲ್ಲೆಗಳಿಗೆ ಎಷ್ಟೆಷ್ಟು ಹಣ ಬಿಡುಗಡೆ ಮಾಡಿದ್ದಾರೆ ಎಂಬುದನ್ನು ಅವರು ತಿಳಿಸಿಲ್ಲ. ಕೇಂದ್ರ ಸರ್ಕಾರವು ನೀಡಿರುವ ಪ್ರಕೃತಿ ವಿಕೋಪ ನಿಧಿಯಿಂದ ಹಣ ನೀಡಲಾಗಿದೆಯೆ? ಏನು ಎಂಬುದರ ಬಗ್ಗೆ ಸರ್ಕಾರ ಸ್ಪಷ್ಟ ಪಡಿಸಬೇಕು ಎಂದು ಜೋಷಿ ಒತ್ತಾಯಿಸಿದರು.

ರಾಜ್ಯ ವಿಧಾನಸಭೆಯ ಅಧ್ಯಕ್ಷ, ಹಿರಿಯ ಧುರೀಣ ಕಾಗೋಡು ತಿಮ್ಮಪ್ಪನವರೇ ಬರ ನಿರ್ವಹಣೆ ಬಗ್ಗೆ ರಾಜ್ಯ ಸರ್ಕಾರದ ನಿರ್ಲಕ್ಷತೆ ಬಗ್ಗೆ ಅಸಮಾಧಾನ, ಅತೃಪ್ತಿ ವ್ಯಕ್ತಪಡಿಸಿದ್ದಾರೆ. ಸರ್ಕಾರ, ಸಿಎಂ, ಕಂದಾಯ, ಕೃಷಿ, ತೋಟಗಾರಿಕೆ, ಗ್ರಾಮೀಣಾಭಿವೃದ್ಧಿ ಮತ್ತಿತರೆ ಸಚಿವರು ಬರದ ಬಗ್ಗೆ ಅಲಕ್ಷತೆ ತಾಳಿರುವುದನ್ನು ಗಂಭೀರವಾಗಿ ಟೀಕಿಸಿದ್ದಾರೆ. ಕಾಂಗ್ರೆಸ್ ಹಿರಿಯ ಶಾಸಕ ರಮೇಶ್ ಕುಮಾರ್ ಅವರೂ ಕೂಡಾ ಸರ್ಕಾರದ ಕಾರ್ಯವೈಖರಿ ಬಗ್ಗೆ ಬೇಸರ ವ್ಯಕ್ತಪಡಿಸಿದ್ದಾರೆ. ಇದೆಲ್ಲವೂ ರಾಜ್ಯ ಸರ್ಕಾರವು ಬರಗಾಲ ಪರಿಸ್ಥಿತಿಯನ್ನು ಎಷ್ಟರ ಮಟ್ಟಿಗೆ ಗಂಭೀರವಾಗಿ ತೆಗೆದುಕೊಂಡಿದೆ ಎಂಬುದನ್ನು ಸಾಬೀತು ಪಡಿಸುತ್ತದೆ ಎಂದು ತಿಳಿಸಿದರು.

ಕೇಂದ್ರವು 14ನೇ ಹಣಕಾಸು ಆಯೋಗದಿಂದ 10,628 ಕೋಟಿ ರೂಗಳ ಹಣವನ್ನು ರಾಜ್ಯ ಸರ್ಕಾರಕ್ಕೆ ನೆರವು ನೀಡಿದೆ. ಈ ಹಣದಲ್ಲಿ ರೈತರ ನೆರವಿಗೆ ಮುಂದಾಗಲು ಸರ್ಕಾರಕ್ಕೆ ತೊಂದರೆ ಏನಿದೆ? ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆಯಲ್ಲಿ ಜನಾದೇಶವನ್ನು ಧಿಕ್ಕರಿಸಿ ಅಧಿಕಾರ ಸೂತ್ರ ಹಿಡಿಯಲು ಸಂಚು ರೂಪಿಸುತ್ತಾ, ಸಮಯ ಕಳೆಯುವ ಸರ್ಕಾರಕ್ಕೆ ರೈತರ ಕಣ್ಣೀರು ಒರೆಸಲು, ಅವರಲ್ಲಿ ಆತ್ಮಸ್ಥೈರ್ಯ ತುಂಬಲು ಕಾಲಾವಕಾಶವೇ ದೊರೆಯದಿರುವುದು ನಿಜಕ್ಕೂ ಶೋಚನೀಯ ಎಂದರು.

ತಕ್ಕ ಶಾಸ್ತಿ

ರಾಜ್ಯದ ಜನರ ಕಾಂಗ್ರೆಸ್ ಸರ್ಕಾರದ ಬಗ್ಗೆ ರೋಸಿ ಹೋಗಿದ್ದರಿಂದಲೇ ಲೋಕಸಭೆ ಚುನಾವಣೆ ಹಾಗೂ ಬಿಬಿಎಂಪಿ ಚುನಾವಣೆಯಲ್ಲಿ ಆ ಪಕ್ಷಕ್ಕೆ ಪಾಠ ಕಲಿಸಿದ್ದಾರೆ. ಆದರೂ ಕೂಡಾ ವಾಮ ಮಾರ್ಗದಿಂದ ಬಿಬಿಎಂಪಿ

ಆಡಳಿತ ಚುಕ್ಕಾಣಿ ಹಿಡಿಯಲು ಷಡ್ಯಂತ್ರ ರಚಿಸಿರುವ ಕಾಂಗ್ರೆಸ್ ಗೆ ಮುಂಬರುವ ತಾಲ್ಲೂಕು ಮತ್ತು ಜಿಲ್ಲಾ ಪಂಚಾಯ್ತಿ ಚುನಾವಣೆಗಳಲ್ಲಿಯೂ ತಕ್ಕ ಶಾಸ್ತಿ ಮಾಡಲಿದ್ದಾರೆ ಎಂದು ಪ್ರಹ್ಲಾದ್ ಜೋಷಿ ಭವಿಷ್ಯ ನುಡಿದರು.

ಕೇಂದ್ರಕ್ಕೆ ಪ್ರಸ್ತಾವನೆ ಕಳಿಸಿಲ್ಲ

ರಾಜ್ಯ ಸರ್ಕಾರವು ಬರ ಪರಿಸ್ಥಿತಿಯ ನೈಜ ಚಿತ್ರಣ, ಅಂಕಿ ಅಂಶಗಳ ಜೊತೆ ಕೇಂದ್ರ ಸರ್ಕಾರಕ್ಕೆ ಸರಿಯಾದ ಪ್ರಸ್ತಾವನೆಯನ್ನು ಕೂಡಾ ಕಳುಹಿಸಿ

ಕೊಟ್ಟಿಲ್ಲ. ಇದು ಸರ್ಕಾರದ ಬೇಜವಾಬ್ದಾರಿತನವನ್ನು ಎತ್ತಿ ತೋರಿಸುತ್ತದೆ. ರಾಜ್ಯದ ರೈತರಲ್ಲಿ ಆತ್ಮಸ್ಥೈರ್ಯ ತುಂಬಲು, ಬಿಜೆಪಿ ಪಕ್ಷವು ರೈತ ಚೈತನ್ಯ ಯಾತ್ರೆ ನಡೆಸುತ್ತಿದೆ. ಈ ಯಾತ್ರೆಗೆ ಎಲ್ಲೆಡೆ ಉತ್ತಮ ಪ್ರತಿಕ್ರಿಯೆ ಕಂಡುಬಂದಿರುವುದು ಸರ್ಕಾರ ಮತ್ತು ಕಾಂಗ್ರೆಸ್ ಪಕ್ಷದ ನಿದ್ರೆಗೆಡಿಸಿದೆ ಎಂದು ಜೋಷಿ ಟೀಕಿಸಿದರು.

ಈ ಸಂದರ್ಭದಲ್ಲಿ ಜಿ.ಸೋಮಶೇಖರರೆಡ್ಡಿ, ನೇಮಿರಾಜ್ ನಾಯ್ಕ್, ಮೃತ್ಯುಂಜಯ ಜಿನಗಾ, ಡಾ||ಮಹಿಪಾಲ, ಮತ್ತು ಇತರರು ಉಪಸ್ಥಿತರಿದ್ದರು.

ಲೋಕಾಯುಕ್ತರನ್ನು ಪದಚ್ಯುತಿ ಗೊಳಿಸಲು ಬಿಜೆಪಿ, ಜೆಡಿಎಸ್ ಪಕ್ಷಗಳ ಎಂ.ಎಲ್.ಸಿಗಳಿಂದ ಸಭಾಪತಿಗಳಿಗೆ ಮನವಿ ಪತ್ರ-ಈಶ್ವರಪ್ಪ

ಬಳ್ಳಾರಿ, ಸೆ.3:ಭ್ರಷ್ಠಾಚಾರದ ಆರೋಪ ಹೊತ್ತಿರುವ ಕರ್ನಾಟಕ ಲೋಕಾಯುಕ್ತರನ್ನು ಪದಚ್ಯುತಿಗೊಳಿಸಲು ಆಗ್ರಹಿಸಿ ವಿಧಾನ ಪರಿಷತ್ತಿನ ಬಿಜೆಪಿ ಹಾಗೂ ಜೆಡಿಎಸ್ ಸದಸ್ಯರು, ಮುಂದಿನ ವಾರ ಸಹಿ ಸಂಗ್ರಹಣೆ ಮಾಡಿ ವಿಧಾನ ಪರಿಷತ್ ಸಭಾಪತಿ ಡಿ.ಹೆಚ್.ಶಂಕರಮೂರ್ತಿ ಅವರಿಗೆ ಮನವಿ ಪತ್ರವನ್ನು ಸಲ್ಲಿಸಲಿದ್ದಾರೆ ಎಂದು ವಿಧಾನ ಪರಿಷತ್ ನ ವಿರೋಧ ಪಕ್ಷದ ನಾಯಕ ಕೆ.ಎಸ್.ಈಶ್ವರಪ್ಪ ಹೇಳಿದ್ದಾರೆ.

ಬಳ್ಳಾರಿಯ ರಾಯಲ್ ಫೋರ್ಟ್ ಹೋಟೆಲ್ ನಲ್ಲಿಂದು ತಮ್ಮನ್ನು ಭೇಟಿ ಮಾಡಿದ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಭ್ರಷ್ಠ ಲೋಕಾಯುಕ್ತರನ್ನು ಪದಚ್ಯುತಿಗೊಳಿಸುವಂತೆ ರಾಜ್ಯದ ಪ್ರಧಾನ ಪ್ರತಿ ಪಕ್ಷವಾದ ಬಿಜೆಪಿಯ ವಿಧಾನ ಮಂಡಲದ ಒಳಗೆ-ಹೊರಗೆ ಪ್ರತಿಭಟನೆ, ಹೋರಾಟ ನಡೆಸಿದೆ. ವಿರೋಧ ಪಕ್ಷಗಳ ಒತ್ತಡಕ್ಕೆ ಮಣಿದ ಸರ್ಕಾರ ಭ್ರಷ್ಠ ಲೋಕಾಯುಕ್ತರನ್ನು ಪದಚ್ಯುತಿಗೊಳಿಸಲು ವಿಧಾನ ಮಂಡಲಕ್ಕೆ ಅಧಿಕಾರ ನೀಡುವ ಮಸೂದೆಯನ್ನು ಕೂಡಾ ಸಿದ್ದಪಡಿಸಿ, ರಾಜ್ಯಪಾಲರ ಅಂಕಿತಕ್ಕೆ ಕಳುಹಿಸಿದ್ದು ಅದಕ್ಕೆ ಅವರು ಅಂಕಿತವನ್ನು ಹಾಕಿದ್ದಾರೆ ಎಂದರು.

ಭ್ರಷ್ಠಾಚಾರದ ಆರೋಪ ಹೊತ್ತಿರುವ, ಕಳಂಕಿತ ಲೋಕಾಯುಕ್ತ ಭಾಸ್ಕರ್ ರಾವ್ ಅವರನ್ನು ಪದಚ್ಯುತಿ ಗೊಳಿಸುವಂತೆ ಬಿಜೆಪಿಯ ವಿಧಾನ ಪರಿಷತ್ ಸದಸ್ಯರು ಸಹಿ ಸಂಗ್ರಹಣೆ ಮಾಡಲಿದ್ದಾರೆ. ಪರಿಷತ್ತಿನಲ್ಲಿ ಜೆಡಿಎಸ್ ನಾಯಕರಾದ ಬಸವರಾಜ್ ಹೊರಟ್ಟಿ ಅವರನ್ನು ನಾನು ನಿನ್ನೆ ಸಂಪರ್ಕಿಸಿದಾಗ, ಅವರು ಕೂಡಾ ಇದಕ್ಕೆ ಸಮ್ಮತಿ ಸೂಚಿಸಿದ್ದಾರೆ. ಲೋಕಾಯುಕ್ತ ಪದಚ್ಯುತಿಗೊಳಿಸುವ ಪತ್ರಕ್ಕೆ ಜೆಡಿಎಸ್ ಸದಸ್ಯರು ಕೂಡಾ ಸಹಿ ಹಾಕುವುದಾಗಿ ಹೇಳಿದ್ದಾರೆ. ಬಿಜೆಪಿ, ಜೆಡಿಎಸ್ ನ ಪರಿಷತ್ ಸದಸ್ಯರು ಸಹಿ ಸಂಗ್ರಹಣೆ ಮಾಡಿ ಸಭಾಪತಿ ಶಂಕರಮೂರ್ತಿಗೆ ನೀಡುತ್ತೇವೆ. ಆನಂತರ ಸಭಾಪತಿಗಳು ರಾಜ್ಯ ಹೈಕೋರ್ಟ್ ಮುಖ್ಯ ನ್ಯಾಯಮೂರ್ತಿಗಳಿಗೆ ಅದನ್ನು ಕಳುಹಿಸಿ ಕೊಡುತ್ತಾರೆ. ಲೋಕಾಯುಕ್ತ ನ್ಯಾಯಮೂರ್ತಿ ಭಾಸ್ಕರ್ ರಾವ್ ಅಸಮರ್ಥರು ಎಂದು ಹೇಳಲಿಕ್ಕೆ ಅವರು ಅನೇಕ ಬಾರಿ ದೀರ್ಘ ರಜೆಯ ಮೇಲೆ ತೆರಳಿರುವುದು ಹಾಗೂ ಇತರೆ ಕಾರಣಗಳನ್ನು ಕೂಡಾ ಸಭಾಪತಿಗಳಿಗೆ ನೀಡಿ ಸವಿವರ ಪತ್ರ ಸಲ್ಲಿಸಲಾಗುತ್ತದೆ ಎಂದು ಈಶ್ವರಪ್ಪ ವಿವರಿಸಿದರು.

ವಿಧಾನ ಪರಿಷತ್ ಸಭಾಪತಿಗಳು ಹೈಕೋರ್ಟ್ ಗೆ ಪತ್ರವನ್ನು ಸಲ್ಲಿಸಿದ ನಂತರ 3 ತಿಂಗಳೊಳಗಡೆ (90 ದಿನಗಳಲ್ಲಿ) ಲೋಕಾಯುಕ್ತರು ಪದಚ್ಯುತಿರಾಗುವ ಸಾಧ್ಯತೆಗಳಿರುತ್ತವೆ ಎಂದು ಈಶ್ವರಪ್ಪ ತಿಳಿಸಿದರು.

ಸೋಮವಾರದ ನಂತರ

ಈ ಬಗ್ಗೆ ಸೋಮವಾರದ ನಂತರ ಬೆಂಗಳೂರಿನಲ್ಲಿ ಸಭೆ ಸೇರಲಿರುವ ಬಿಜೆಪಿ, ಜೆಡಿಎಸ್ ನ ವಿಧಾನ ಪರಿಷತ್ ಸದಸ್ಯರು ಸಹಿ ಸಂಗ್ರಹಣೆ ಪತ್ರ ಸಿದ್ದಪಡಿಸಿ, ಸಭಾಪತಿಗಳಿಗೆ ಸಲ್ಲಿಸಲಿದ್ದಾರೆ ಎಂದು ಪ್ರಶ್ನೆಯೊಂದಕ್ಕೆ ಉತ್ತರಿಸುತ್ತಾ ಸ್ಪಷ್ಟಪಡಿಸಿದರು.

ಈ ಸಂದರ್ಭದಲ್ಲಿ ರಾಜ್ಯ ಬಿಜೆಪಿ ಅಧ್ಯಕ್ಷ ಪ್ರಹ್ಲಾದ್ ಜೋಷಿ, ಮಾಜಿ ಸಚಿವ ಗೋವಿಂದ ಕಾರಜೋಳ, ಮಾಜಿ ಸಂಸದೆ ತೇಜಸ್ವಿನಿ, ಮಾಜಿ ಶಾಸಕರಾದ ಜಿ.ಸೋಮಶೇಖರರೆಡ್ಡಿ, ನೇಮಿರಾಜ್ ನಾಯ್ಕ್, ವಿಧಾನ ಪರಿಷತ್ ಸದಸ್ಯ ಮೃತ್ಯುಂಜಯ ಜಿನಗಾ, ಸೋಮಣ್ಣ ಬೋವಿನ ಮರದ್, ಧುರೀಣರುಗಳಾದ ಕೆ.ಎ.ರಾಮಲಿಂಗಪ್ಪ, ಡಾ||ಮಹಿಪಾಲ, ರಾಜಶೇಖರಗೌಡ ಗೋನಾಳ್, ರೈತ ಮೋರ್ಚಾದ ಅಧ್ಯಕ್ಷ ಅರಗ ಜ್ಞಾನೇಂದ್ರ, ಶಿವಪ್ರಸಾದ್, ಮುರಾರಿಗೌಡ, ಮತ್ತಿತರರು ಉಪಸ್ಥಿತರಿದ್ದರು.

ಭೀಕರ ಬರಗಾಲ ಪರಿಸ್ಥಿತಿ ವಿಧಾನ ಮಂಡಲದ ತುರ್ತು ಅಧಿವೇಶನಕ್ಕೆ ಬಿಜೆಪಿ ಆಗ್ರಹ

ಬಳ್ಳಾರಿ, ಸೆ.3:ರಾಜ್ಯದಲ್ಲಿ ಇತ್ತೀಚೆಗಿನ ವರ್ಷಗಳಲ್ಲಿ ಕಂಡು ಕೇಳರಿಯದಂತಹ ಭೀಕರ ಬರಗಾಲದ ಕರಿಛಾಯೆ ಆವರಿಸಿದ್ದು ಬರ ಪರಿಸ್ಥಿತಿ, ಪರಿಹಾರ ಕಾಮಗಾರಿಗಳ ಕುರಿತಂತೆ ಚರ್ಚಿಸಲು ಸರ್ಕಾರವು ತಕ್ಷಣವೇ ವಿಧಾನ ಮಂಡಲದ ತುರ್ತು ಅಧಿವೇಶನ ಕರೆಯುವಂತೆ ಬಿಜೆಪಿ ಆಗ್ರಹ ಪಡಿಸಿದೆ.

ರಾಜ್ಯ ಬಿಜೆಪಿ ಅಧ್ಯಕ್ಷ ಪ್ರಹ್ಲಾದ್ ಜೋಷಿ ಹಾಗೂ ವಿಧಾನ ಪರಿಷತ್ ನ ವಿರೋಧ ಪಕ್ಷದ ನಾಯಕ ಕೆ.ಎಸ್.ಈಶ್ವರಪ್ಪ ಅವರು ಇಂದು ಬಳ್ಳಾರಿಯ ರಾಯಲ್ ಫೋರ್ಟ್ ಹೋಟೆಲ್ ನಲ್ಲಿ ಜಂಟಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಕರ್ನಾಟಕ ಲೋಕಾಯುಕ್ತರನ್ನು ಪದಚ್ಯುತಿಗೊಳಿಸುವ ಸಂಬಂಧವಷ್ಟೇ ವಿಶೇಷ ಅಧಿವೇಶನ ಕರೆಯದೇ, ಭೀಕರ ಬರಗಾಲ ಪರಿಸ್ಥಿತಿಯ ಬಗ್ಗೆ ಚರ್ಚಿಸಲು ಕೂಡಾ ವಿಶೇಷ ತುರ್ತು ಅಧಿವೇಶನವನ್ನು ಕರೆಯಬೇಕು ಎಂದು ಒತ್ತಾಯಿಸಿದರು.

ಕೇವಲ ತೋರಿಕೆಗಾಗಿ ಒಂದೆರಡು ದಿನಗಳ ತುರ್ತು ಅಧಿವೇಶನ ನಡೆಸದೇ ಕನಿಷ್ಠ ಪಕ್ಷ 8-10 ದಿನಗಳಿಗಾದರೂ ಅಧಿವೇಶನ ನಡೆಯುವಂತೆ ಹಾಗೂ ಅರ್ಥಪೂರ್ಣ ಚರ್ಚೆಗಳು ನಡೆಯುವಂತೆ ನೋಡಿಕೊಳ್ಳಬೇಕು ಬರ ಪೀಡಿತ ಪ್ರತಿ ಜಿಲ್ಲೆಯಲ್ಲಿ ಕೈಗೊಳ್ಳಬೇಕಾಗಿರುವ ಪರಿಹಾರ ಕಾಮಗಾರಿಗಳ ಬಗ್ಗೆ ಚರ್ಚೆ ನಡೆಸಬೇಕು. ಅಧಿಕಾರಿ ಯಂತ್ರಾಂಗವನ್ನು ಚುರುಕುಗೊಳಿಸಬೇಕು ಎಂದು ಈಶ್ವರಪ್ಪ, ಜೋಷಿ ಹೇಳಿದರು.

ಬಿಜೆಪಿ ಧುರೀಣರು ರಾಜ್ಯವ್ಯಾಪಿ ಪ್ರವಾಸ ನಡೆಸಿದ್ದು, ಬರಕ್ಕೆ ತುತ್ತಾಗಿರುವ ಜಿಲ್ಲೆಗಳಲ್ಲಿಯೂ ಯುದ್ಧೋಪಾದಿಯಲ್ಲಿ ಬರ ಪರಿಹಾರ ಕಾರ್ಯಗಳನ್ನು ಕೈಗೊತ್ತಿಕೊಂಡಿಲ್ಲ. ಯಾವುದೇ ಪರಿಹಾರ ಧನವನ್ನು ನೀಡಿಲ್ಲ. ರಾಜ್ಯ ಸರ್ಕಾರವು ಬರ ನಿರ್ವಹಣೆಯಲ್ಲಿ ಸಂಪೂರ್ಣ ವಿಫಲವಾಗಿದೆ ಎಂದು ಟೀಕಿಸಿದರು.

ರಾಜ್ಯದ ಜನತೆ, ರೈತರು ಬರದಿಂದ ತತ್ತರಿಸಿದ್ದಾರೆ. ಕಾಂಗ್ರೆಸ್ ಧುರೀಣರೂ, ಸಿಎಂ ಮತ್ತು ಸಚಿವರು ಬಿಬಿಎಂಪಿ ಗದ್ದುಗೆ ವಶಕ್ಕೆ ಕುತಂತ್ರ ನಡೆಸಿದ್ದಾರೆ. ಬೆಂಗಳೂರು ಜನತೆ ನೀಡಿದ ತೀರ್ಪನ್ನು, ಜನಾದೇಶವನ್ನು ಧಿಕ್ಕರಿಸಿ ಅಧಿಕಾರಕ್ಕೇರಲು ಹುನ್ನಾರ ನಡೆಸಿದ್ದಾರೆ. ಮುಂಬರುವ ಚುನಾವಣೆಗಳಲ್ಲಿ ಜನತೆ ಕಾಂಗ್ರೆಸ್ ಪತ್ರಕ್ಕೆ ಮತ್ತೆ ಪಾಠ ಕಲಿಸುವುದು ನಿಶ್ಚಿತ ಎಂದು ಅಭಿಪ್ರಾಯ ಪಟ್ಟರು.

ಜೋಷಿ ವಿಶ್ವಾಸ

ಕಾಂಗ್ರೆಸ್ ನವರು ಏನೇ ಷಡ್ಯಂತ್ರ, ಕುತಂತ್ರ ನಡೆಸಿದರು ಸೆ.11ರಂದು ನಡೆಯಲಿರುವ ಬಿಬಿಎಂಪಿ ಮೇಯರ್-ಉಪಮೇಯರ್ ಚುನಾವಣೆಯಲ್ಲಿ ಬಿಜೆಪಿ ಅಭ್ಯರ್ಥಿಗಳು ಗೆಲುವು ಸಾಧಿಸುವ ಬಗ್ಗೆ ನನಗೆ ವಿಶ್ವಾಸವಿದೆ. ಪಾಲಿಕೆ ಆಡಳಿತ ಬಿಜೆಪಿ ತೆಕ್ಕೆಗೆ ಬರಲಿದೆ. ಅದು ಹೇಗೆ, ಏನು ಎಂದು ಈ ಸದ್ಯ ಕೇಳಬೇಡಿ ಎಂದು ಪ್ರಹ್ಲಾದ್ ಜೋಷಿ ಮಾರ್ಮಿಕವಾಗಿ ನುಡಿದರಲ್ಲದೇ, ಪಕ್ಷೇತರ ಸದಸ್ಯರು ಬೆಂಬಲಿಸುವ ವಿಶ್ವಾಸ ವ್ಯಕ್ತಪಡಿಸಿದರು.

ಈ ಸಂದರ್ಭದಲ್ಲಿ ಮಾಜಿ ಸಚಿವ ಗೋವಿಂದ ಕಾರಾಜೋಳ, ಧುರೀಣರುಗಳಾದ ಜಿ.ಸೋಮಶೇಖರರೆಡ್ಡಿ, ನೇಮಿರಾಜ್ ನಾಯ್ಕ್, ಮೃತ್ಯುಂಜಯ ಜಿನಗಾ, ಸೋಮಣ್ಣ ಬೋವಿನಮರದ್, ಅರಗ ಜಾನೇಂದ್ರ, ಶಿವಪ್ರಸಾದ್, ಮಾಜಿ ಸಂಸದೆ ತೇಜಸ್ವಿನಿ ರಮೇಶ್ ಹಾಗೂ ಕೆ.ಎ.ರಾಮಲಿಂಗಪ್ಪ, ಡಾ||ಮಹಿಪಾಲ, ಗೋನಾಳ ರಾಜಶೇಖರಗೌಡ ಮತ್ತು ಇತರರು ಉಪಸ್ಥಿತರಿದ್ದರು.