ಪಾಲಿಕೆಯ ಸಭೆಯಲ್ಲಿ ನಗರದ ಸಮಸ್ಯೆಗಳಿಗೆ ಧ್ವನಿ ಎತ್ತಲು ಮನವಿ

ಬಳ್ಳಾರಿ, ಜು.29:ಬಳ್ಳಾರಿ ನಗರದಲ್ಲಿ ಅನೇಕ ಮೂಲಸೌಲಭ್ಯಗಳ ಕೊರತೆ ಕಂಡು ಬರುತ್ತಿದ್ದು ಇದರ ವಿರುದ್ಧ ಮಹಾನಗರ ಪಾಲಿಕೆಯ ಸಾಮಾನ್ಯ ಸಭೆಗಳಲ್ಲಿ ಬಿಜೆಪಿಯ (ಬಿ.ಎಸ್.ಆರ್) ಪಾಲಿಕೆ ಸದಸ್ಯರು ಧ್ವನಿ ಎತ್ತುವಂತೆ ಯುವ ಸೇನಾ ಮನವಿ ಮಾಡಿಕೊಂಡಿದೆ.

ಮಾಜಿ ಶಾಸಕ ಜಿ.ಸೋಮಶೇಖರರೆಡ್ಡಿಯವರಿಗೆ ಈ ಕುರಿತಂತೆ ಮನವಿ ಪತ್ರವನ್ನು ಸಲ್ಲಿಸಿದ್ದು, ಮಹಾನಗರ ಪಾಲಿಕೆಯಲ್ಲಿ ವಿರೋಧ ಪಕ್ಷವಾಗಿ ಕಾರ್ಯನಿರ್ವಹಿಸುತ್ತಿರುವ ನಿಮ್ಮ ಪಕ್ಷದ ಸದಸ್ಯರು ನಗರದ ಸಮಸ್ಯೆಗಳ ಬಗ್ಗೆ ಧ್ವನಿ ಎತ್ತುತ್ತಿಲ್ಲ. ನಿಮ್ಮ ಪಾಲಿಕೆಯ ಸದಸ್ಯರೆಲ್ಲರೂ ನಗರದ ಸಮಸ್ಯೆಗಳ ಬಗ್ಗೆ ಧ್ವನಿ ಎತ್ತುವಂತೆ, ಚರ್ಚಿಸುವಂತೆ ಸೂಚಿಸಬೇಕು ಎಂದು ಮನವಿ ಪತ್ರದಲ್ಲಿ ವಿನಂತಿಸಿಕೊಳ್ಳಲಾಗಿದೆ.

ನೀರಿನ ತೆರಿಗೆ ಇಳಿಸುವುದಾಗಿ ಆಶ್ವಾಸನೆ ನೀಡಿದ್ದ ಕಾಂಗ್ರೆಸ್ ಪಕ್ಷದವರು ಇದುವರೆಗೂ ಕ್ರಮ ಕೈಗೊಂಡಿಲ್ಲ. ಪಾಲಿಕೆಯ ಆರೋಗ್ಯ ಇಲಾಖೆಯಲ್ಲಿ ವೈದ್ಯಾಧಿಕಾರಿಗಳು ನಿವೃತ್ತಿಯಾಗಿದ್ದು, ಆ ಸ್ಥಾನಕ್ಕೆ ವೈದ್ಯರನ್ನು ನೇಮಿಸಲಾಗಿರುವುದಿಲ್ಲ, ನೇಮಕಕ್ಕೆ ಒತ್ತಾಯಿಸಬೇಕು. ಅಲ್ಲೀಪುರ ಕೆರೆಯ ಕುಸಿದ ಗೋಡೆಯನ್ನು ರಿಪೇರಿ ಮಾಡುವಲ್ಲಿ ಪಾಲಿಕೆ ವಿಫಲವಾಗಿದೆ ಇದರ ಬಗ್ಗೆ ಪ್ರಶ್ನಿಸಬೇಕು. ಪಾಲಿಕೆಯ ಪೌರ ಕಾರ್ಮಿಕರಿಗೆ ಪ್ರತಿ ತಿಂಗಳು ವೇತನ ನೀಡುತ್ತಿಲ್ಲ, ಬಡ ಫಲಾನುಭವಿಗಳಿಗೆ ನಿವೇಶನಗಳನ್ನು ವಿತರಿಸುತ್ತಿಲ್ಲ, ಹೀಗೆ ಅನೇಕ ವಿಷಯಗಳ ಬಗ್ಗೆ ಪಾಲಿಕೆಯ ಸಭೆಯಲ್ಲಿ ಪ್ರಸ್ತಾಪಿಸುವ ಮೂಲಕ ನಗರದ ಅಭಿವೃದ್ಧಿಗೆ ಶ್ರಮಿಸುವಂತೆ ಬಿಜೆಪಿ ಪಾಲಿಕೆ ಸದಸ್ಯರಿಗೆ ಸೂಚಿಸಬೇಕೆಂದು ಮನವಿ ಪತ್ರದಲ್ಲಿ ವಿನಂತಿಸಿಕೊಂಡಿದ್ದಾರೆ.

ಮನವಿ ಪತ್ರ ಸಲ್ಲಿಸಿದ ಸಂದರ್ಭದಲ್ಲಿ ಸಂಘಟನೆಯ ಅಧ್ಯಕ್ಷ ಮೇಕಲ ಈಶ್ವರರೆಡ್ಡಿ, ಕಾರ್ಯಕರ್ತರಾದ ಎಸ್.ಕೃಷ್ಣ, ಶಿವಾನಂದ, ಶ್ರೀನಿವಾಸ, ಕೆ.ವೆಂಕಟೇಶ, ಕೆ.ದುರುಗಪ್ಪ, ಎಂ.ರಾಮಕ್ರಿಷ್ಣ, ಜಿ.ಎಂ.ಭಾಷ, ಎಂ.ನಾಗೋಜಿರಾವ್, ಸಲಾವುದ್ದೀನ್ ಎಸ್.ಆರ್., ಶ್ರೀಧರ್, ಎಂ.ಎಱ್ರಿಸ್ವಾಮಿ ಮತ್ತು ಇತರರು ಉಪಸ್ಥಿತರಿದ್ದರು.

Post Title

ಸ್ವಾಮಿನಾಥನ್ ವರದಿ ಜಾರಿಗೆ ಆಗ್ರಹ

ಕೃಷಿ ರಂಗದ ಉಳಿವಿಗಾಗಿ ನಾಳೆ ದೇಶವ್ಯಾಪಿ ಪ್ರತಿಭಟನೆ

ಬಳ್ಳಾರಿ, ಜು.29:ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳು ಕೃಷಿಗೆ ಹೆಚ್ಚಿನ ಹಣ ನೀಡಬೇಕು. ಸ್ವಾಮಿನಾಥನ್ ವರದಿ ಜಾರಿಗೆ ಮುಂದಾಗಬೇಕು. ಮತ್ತಿತರೆ ಬೇ‌ಡಿಕೆಗಳನ್ನು ಈಡೇರಿಸುವಂತೆ ಒತ್ತಾಯಿಸಿ ದೇಶವ್ಯಾಪಿ ಸಿಐಟಿಯು ನೇತೃತ್ವದಲ್ಲಿ ನಾಳೆ ಜುಲೈ 30ರಂದು ಪ್ರತಿಭಟನೆ, ಧರಣಿ ನಡೆಸಲಾಗುತ್ತದೆ ಎಂದು ಸಿಐಟಿಯು ಅಖಿಲ ಭಾರತ ಕಾರ್ಯದರ್ಶಿ ಎಸ್.ಪ್ರಸನ್ನಕುಮಾರ್ ತಿಳಿಸಿದ್ದಾರೆ.

ನಗರದ ಮಯೂರ ಹೋಟೆಲ್ ನಲ್ಲಿಂದು ಪೂರ್ವಾಹ್ನ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಕೇಂದ್ರ ಸರ್ಕಾರ ಹಾಗೂ ವಿವಿಧ ರಾಜ್ಯ ಸರ್ಕಾರಗಳು ಅನುಸರಿಸುತ್ತಿರುವ ಕೃಷಿ ವಿರೋಧಿ-ರೈತ ವಿರೋಧಿ ನೀತಿಗಳಿಂದಾಗಿ ಕರ್ನಾಟಕವೂ ಸೇರಿದಂತೆ ತೆಲಂಗಾಣಾ, ಮಹಾರಾಷ್ಟ್ರ, ಮತ್ತಿತರೆ ರಾಜ್ಯಗಳಲ್ಲಿ ರೈತರ ಆತ್ಮಹತ್ಯೆ ಪ್ರಕರಣಗಳು ಹೆಚ್ಚಾಗುತ್ತಿವೆ. ಬೆಳೆದ ಬೆಳೆಗೆ ಸೂಕ್ತ ಬೆಂಬಲ ಬೆಲೆಯೂ ಸಿಕ್ಕದೇ, ಮಾಡಿದ ಕೃಷಿಸಾಲ ತೀರಿಸಲಾಗದೇ, ಪ್ರಕೃತಿ ವಿಕೋಪದಿಂದಾಗಿ ಬೆಳೆಹಾನಿಯಾಗಿ ರೈತರು ತತ್ತರಿಸಿ ಹೋಗಿದ್ದಾರೆ. ಇವೆಲ್ಲವುದರಿಂದ ಹತಾಶರಾಗಿ ರೈತರು ಸಾವಿಗೆ ಶರಣಾಗುತ್ತಿರುವುದು ನಿಜಕ್ಕೂ ದುರಂತ ಎಂದರು.

ಬೇಜವಾಬ್ದಾರಿ ಹೇಳಿಕೆ

ಪ್ರೇಮ ವೈಫಲ್ಯ, ನಪುಂಸಕತ್ವ ಮತ್ತಿತರೆ ಕಾರಣಗಳಿಂದಾಗಿ ರೈತರು ಆತ್ಮಹತ್ಯೆ ನೀಡುಕೊಳ್ಳುತ್ತಿದ್ದಾರೆ ಎಂದು ಕೇಂದ್ರ ಸರ್ಕಾರದ ಕೃಷಿ ಸಚಿವ ರಾಧಾ ಮೋಹನ್ ಸಿಂಗ್ ಅವರು ಅತ್ಯಂತ ಬೇಜವಾಬ್ದಾರಿ ಹೇಳಿಕೆ ನೀಡಿದ್ದಾರೆ. ಇದು ಅವರ ಅಪ್ರಬುದ್ಧತೆಯನ್ನು ಎತ್ತಿ ತೋರಿಸುತ್ತದೆ. ಕೇಂದ್ರ, ರಾಜ್ಯ ಸರ್ಕಾರಗಳ ಬಜೆಟ್ ಗಳಲ್ಲಿ ಕೃಷಿ ರಂಗಕ್ಕೆ ಹೆಚ್ಚಿನ ಹಣ ಮೀಸಲಿರಿಸಲಾಗುತ್ತಿಲ್ಲ. ಕೃಷಿ ವಲಯವನ್ನು ಕಡೆಗಣಿಸಲಾಗುತ್ತಿದೆ. ಬೇಸಾಯದ ಇಂದಿನ ಬಿಕ್ಕಟ್ಟಿಗೆ, ರೈತರ ಸಮಸ್ಯೆ, ಆತ್ಮಹತ್ಯೆಗಳಿಗೆ ಕೇಂದ್ರ-ರಾಜ್ಯ ಸರ್ಕಾರಗಳ ತಿಕ್ಕಲು ನೀತಿಗಳೇ ಕಾರಣ. ಕೃಷಿಗೆ, ಬೀಜ-ಗೊಬ್ಬರ-ಕ್ರಿಮಿನಾಶಕ ಔಷಧಿಗಳಿಗೆ ಸಬ್ಸಿಡೀ ಕಡಿಮೆ ಆಗ್ತಾ ಇದೆ. ರೈತರು ಬೆಳೆದ ಬೆಳೆಗೆ ವೈಜ್ಞಾನಿಕ ಮತ್ತು ನ್ಯಾಯೋಚಿತ ಬೆಲೆ ನೀಡಲಾಗುತ್ತಿಲ್ಲ ಎಂದು ಆರೋಪಿಸಿದರು.

ಸಿಎಂ ಬಾಲಿಷ ಹೇಳಿಕೆ

ರೈತರ ಆತ್ಮಹತ್ಯೆಗೆ ಕಾರಣಗಳ ಬಗ್ಗೆ ಅಧ್ಯಯನ ನಡೆಸಲು ಸ್ವಾಮಿನಾಥನ್ ನೇತೃತ್ವದಲ್ಲಿ ಸಮಿತಿ ರಚಿಸಲಾಗುತ್ತದೆ ಎಂದು ಸಿಎಂ ಸಿದ್ದರಾಮಯ್ಯ ಹೇಳಿರುವುದು ಬಾಲಿಶವಾಗಿದೆ. ಅದರ ಬದಲಿಗೆ ಸ್ವಾಮಿನಾಥನ್ ನೀಡಿದ ವರದಿಯನ್ನು ಯಥಾವತ್ತಾಗಿ ಜಾರಿಗೆ ತರಲು ಸಿಎಂ ಕ್ರಮ ಕೈಗೊಳ್ಳಲಿ ಎಂದು ಪ್ರಸನ್ನಕುಮಾರ್ ಆಗ್ರಹ ಪಡಿಸಿದರು.

10 ಲಕ್ಷ ರೂ ಪರಿಹಾರ

ಬೆಳೆ ಹಾನಿ, ಸಾಲಬಾಧೆಗಳಿಂದಾಗಿ ಆತ್ಮಹತ್ಯೆ ಮಾಡಿಕೊಂಡ ರೈತರ ಕುಟುಂಬಗಳಿಗೆ 10 ಲಕ್ಷ ರೂಗಳ ಪರಿಹಾರ ನೀಡಬೇಕು. ರೈತರು ಹಿತಕ್ಕೆ ಬದ್ದರಾಗಿ ಕೃಷಿ ವಲಯದ ಉಳಿವಿಗಾಗಿ ರೈತಪರ ನೀತಿ ಜಾರಿಗೆ ತರಬೇಕು ಎಂದು ಒತ್ತಾಯಿಸಿದರು.

ಈ ಸಂದರ್ಭದಲ್ಲಿ ಸಿಐಟಿಯು ಧುರೀಣರುಗಳಆದ ಆರ್.ಎಸ್.ಬಸವರಾಜ್, ಜೆ.ಸತ್ಯಬಾಬು, ತಿಪ್ಪಯ್ಯ, ಹಾಗೂ ಹುಳ್ಳಿ ಉಮೇಶ್ ಉಪಸ್ಥಿತರಿದ್ದರು.

ಕಾರ್ಮಿಕ ಸಚಿವರ ನಿರ್ಲಕ್ಷ್ಯತೆಯಿಂದ ಇಲಾಖೆಯಲ್ಲಿ ಭ್ರಷ್ಠಾಚಾರ

ಬಳ್ಳಾರಿ, ಜು.29:ರಾಜ್ಯದ ಕಾರ್ಮಿಕ ಸಚಿವರ ಅಸಮರ್ಥತೆ, ನಿರ್ಲಕ್ಷಗಳಿಂದಾಗಿ ವಿವಿಧ ಕಾರ್ಮಿಕರು ತೀವ್ರ ಸಂಕಷ್ಟ, ಸಮಸ್ಯೆ ಎದುರಿಸುವಂತಾಗಿದೆ. ಕಾರ್ಮಿಕ ಇಲಾಖೆಯಲ್ಲಿ ಭ್ರಷ್ಠಾಚಾರ ತಾಂಡವವಾಡುತ್ತಿದೆ ಎಂದು ಸಿಐಟಿಯು ಆರೋಪಿಸಿದೆ.

ಸಿಐಟಿಯು ರಾಜ್ಯ ಪ್ರಧಾನ ಕಾರ್ಯದರ್ಶಿ ಹಾಗೂ ರಾಷ್ಟ್ರೀಯ ಕಾರ್ಯದರ್ಶಿಗಳು ಆಗಿರುವ ಎಸ್.ಪ್ರಸನ್ನಕುಮಾರ್ ಅವರಿಂದು ಬಳ್ಳಾರಿಯಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿ, ಕಾರ್ಮಿಕರ ನ್ಯಾಯಯುತ ಬೇಡಿಕೆಗಳು ಈಡೇರಿಸುವಲ್ಲಿ ಸಚಿವರು ನಿರ್ಲಕ್ಷ ತಾಳಿದ್ದಾರೆ. ಬೀಡಿ ಕಾರ್ಮಿಕರಿಗೆ ನ್ಯಾಯಬದ್ದವಾಗಿ ಬರಬೇಕಾಗಿರುವ ತುಟ್ಟಿಭತ್ಯೆ ನೀಡುವಲ್ಲಿಯೂ ಮಾಲೀಕರು ಮುಂದಾಗುತ್ತಿಲ್ಲ. ಇದಕ್ಕೆ ಸಚಿವರ ಕುಮ್ಮಕ್ಕು ಕೂಡಾ ಕಾರಣವಾಗಿದೆ ಎಂದರು.

ಸಿಐಡಿ ತನಿಖೆ ನಡೆಸಿ

ಬೀಡಿ ಕಾರ್ಮಿಕರಿಗೆ ತುಟ್ಟಿಭತ್ಯೆ ನೀಡುವಲ್ಲಿ, ತುಟ್ಟಿಭತ್ಯೆ ಕಡಿತದಲ್ಲಿ ಮೋಸ, ಅನ್ಯಾಯ ಆಗಿದೆ. ಈ ಬಗ್ಗೆ ರಾಜ್ಯ ಸರ್ಕಾರವು ಸಿಐಡಿ ತನಿಖೆಯನ್ನು ನಡೆಸಿದ್ದಲ್ಲಿ ಸತ್ಯಾಂಶ ಹೊರ ಬೀಳಲಿದೆ. ತುಟ್ಟಿಭತ್ಯೆ ಕಡಿತವೂ ಸೇರಿದಂತೆ ಇನ್ನಿತರೆ ಅಂಶಗಳಲ್ಲಿ ನಿಯಮಗಳ ಉಲ್ಲಂಘನೆ ಮಾಡಲಾಗಿದೆ. ಉನ್ನತ ಮಟ್ಟದ ತನಿಖೆ ನಡೆದಲ್ಲಿ ಬೀಡಿ ಕಂಪನಿಗಳ ಮಾಲೀಕರೊಂದಿಗೆ ಸಚಿವರು ಷಾಮೀಲಾಗಿರುವ ವಿಷಯ ಬಹಿರಂಗವಾಗಲಿದೆ. ರಾಜ್ಯದಲ್ಲಿನ 10 ಲಕ್ಷ ಬೀಡಿ ಕಾರ್ಮಿಕರಿಗೆ ವಂಚನೆ ಮಾಡಲಾಗಿದೆ ಎಂದು ಆರೋಪಿಸಿದರು.

ಕರ್ನಾಟಕದಲ್ಲಿ ಬೀಡಿ ಕಾರ್ಮಿಕರಿಗೆ ಕಡಿಮೆ ಕೂಲಿ-ಹಣ ನೀಡಲಾಗುತ್ತಿದೆ. ಕೇರಳದಿಂದ ಬಂದು ಬೀಡಿ ಮಾಲೀಕರು ಕರ್ನಾಟಕದಲ್ಲಿ ಬೀಡಿ ಕಟ್ಟಿಸುತ್ತಾ ಇದ್ದಾರೆಂದರೆ, ನಮ್ಮಲ್ಲಿ ಬೀಡಿ ಕಾರ್ಮಿಕರಿಗೆ ಎಷ್ಟು ಕಡಿಮೆ ಹಣ ನೀಡಲಾಗುತ್ತಿದೆ ಎಂಬುದು ಸ್ಪಷ್ಟವಾಗುತ್ತದೆ. ಈ ಬಗ್ಗೆ ಸಚಿವರು ಜಾಣ ಕಿವುಡು, ಜಾಣ ಕುರುಡು ನೀತಿ ಅನುಸರಿಸುತ್ತಾ ಇದ್ದಾರೆ ಎಂದು ಟೀಕಿಸಿದರು.

ಕೇಂದ್ರದ ಕಾರ್ಮಿಕ ವಿರೋಧಿ ನೀತಿ

ಕೇಂದ್ರ ಸರ್ಕಾರವು ಕಾರ್ಮಿಕ ಕಾನೂನುಗಳನ್ನು ತಿದ್ದುಪಡಿ ಮಾಡುವ ಮೂಲಕ ಅವರನ್ನು ಗುಲಾಮಗಿರಿಯ ಕಡೆಗೆ ತಳ್ಳುತ್ತಿದೆ. ಏಳು ಕಾನೂನುಗಳನ್ನು ರದ್ದುಪಡಿಸಿ ಎರಡು ಲೇಬರ್ ಕೋಡ್ ಗಳನ್ನಾಗಿ ಮಾಡುವ ಮೂಲಕ ಕಾರ್ಮಿಕರ ಪಾಲಿಗೆ ಮರಣ ಶಾಸನವನ್ನು ಬರೆಯಲು ಕೇಂದ್ರ ಸರ್ಕಾರ ಸಂಚು ರೂಪಿಸಿದೆ ಎಂದು ಪ್ರಸನ್ನಕುಮಾರ್ ಟೀಕಿಸಿದರು.

ಸೆ.2ಕ್ಕೆ ಪ್ರತಿಭಟನೆ

ಕೇಂದ್ರದಲ್ಲಿನ ಬಿಜೆಪಿ ನೇತೃತ್ವದ ಎನ್.ಡಿ.ಎ ಸರ್ಕಾರವು ಕಾರ್ಮಿಕ ವಿರೋಧಿ ಧೋರಣೆ ಖಂಡಿಸಿ, ಬೆಲೆ ಏರಿಕೆ ತಡೆಗಟ್ಟುವಲ್ಲಿ ವಿಫಲವಾದುದನ್ನು ಖಂಡಿಸಿ ಸೆಪ್ಟೆಂಬರ್ 2ರಂದು ದೇಶವ್ಯಾಪಿ ಪ್ರತಿಭಟನೆ ನಡೆಸಲಾಗುತ್ತದೆ ಎಂದು ತಿಳಿಸಿದರು.

ಈ ಸಂದರ್ಭದಲ್ಲಿ ಆರ್.ಎಸ್.ಬಸವರಾಜ್, ಜೆ.ಸತ್ಯಬಾಬು, ತಿಪ್ಪಯ್ಯ, ಹುಳ್ಳಿ ಉಮೇಶ್ ಉಪಸ್ಥಿತರಿದ್ದರು.

ಹಮಾಲಿ ಕಾರ್ಮಿಕರಿಗೆ ಭೂಮಿ, ನಿವೇಶನ ನೀಡಲು ಆಗ್ರಹ

ಬಳ್ಳಾರಿ, ಜು.29:ಹಮಾಲಿ ಕಾರ್ಮಿಕರಿಗೆ ಹೈದ್ರಾಬಾದ್ ಕರ್ನಾಟಕದ 371 (ಜೆ) ಗೆ ಸಂಬಂಧಿಸಿದಂತೆ ಗೃಹ ಭಾಗ್ಯ ಮತ್ತು ಭೂಮಿ ಭಾಗ್ಯ ಯೋಜನೆಯಡಿ ಭೂಮಿ ಮತ್ತು ನಿವೇಶನವನ್ನು ನೀಡುವಂತೆ ಕರ್ನಾಟಕ ರಾಜ್ಯ ಗ್ರಾಮಾಂತರ ಹಮಾಲಿ ಕಾರ್ಮಿಕರ ಸಂಘ ಮತ್ತು ಕರ್ನಾಟಕ ದಲಿತ ಸಂಘರ್ಷ ಸಮಿತಿ (ಭೀಮವಾದ) ಆಗ್ರಹಿಸಿದೆ.

ನಗರದ ಡಾ||ರಾಜ್ ಕುಮಾರ್ ರಸ್ತೆಯಿಂದ ಜಿಲ್ಲಾಧಿಕಾರಿ ಕಛೇರಿಯವರೆಗೆ ಮೆರವಣಿಗೆಯಲ್ಲಿ ತೆರಳಿದ ಸಂಘಟನೆಗಳ ಸದಸ್ಯರು ಮತ್ತು ಹಮಾಲಿ ಕಾರ್ಮಿಕರು ಜಿಲ್ಲಾಧಿಕಾರಿಗಳಿಗೆ ಮನವಿ ಪತ್ರವನ್ನು ಸಲ್ಲಿಸಿದ್ದಾರೆ. ಮನವಿ ಪತ್ರದಲ್ಲಿ ಹಮಾಲಿ ಕಾರ್ಮಿಕರಿಗೆ ಐದು ಎಕರೆ ಭೂಮಿ ನೀಡಬೇಕು, ಗೃಹ ಭಾಗ್ಯ ಯೋಜನೆಯ‌ಡಿ ಮನೆಗಳನ್ನು ಮಂಜೂರು ಮಾಡಬೇಕು, 50 ವರ್ಷ ಪೂರೈಸಿದ ಹಮಾಲಿ ಕಾರ್ಮಿಕರಿಗೆ ಮಾಶಾಸನ ನೀಡಬೇಕು, ವಿದ್ಯಾವಂತ ನಿರುದ್ಯೋಗಿಗಳಿಗೆ ಶಿಷ್ಯವೇತನ, ಶ್ರಮಿಕ ಭವನ ಮಂಜೂರು ಮಾಡಬೇಕು, ಅಭಿವೃದ್ಧಿ ನಿಗಮಗಳಲ್ಲಿ ಶಾಸಕರ ಶಿಫಾರಸ್ಸು ಸಮಿತಿಗಳಿದ್ದು ಕೂಡಲೇ ರದ್ದುಪಡಿಸಬೇಕೆಂದು ಒತ್ತಾಯಿಸಿದ್ದಾರೆ.

ಮನವಿ ಪತ್ರ ಸಲ್ಲಿಸಿದ ಸಂದರ್ಭದಲ್ಲಿ ಹಮಾಲಿ ಕಾರ್ಮಿಕರ ಸಂಘದ ರಾಜ್ಯಾದ್ಯಕ್ಷರಾದ ಹೆಚ್.ತಿಮ್ಮಪ್ಪ, ರಾಜ್ಯ ಪ್ರಧಾನ ಕಾರ್ಯದರ್ಶಿಗಳಾದ ಡಿ.ಹೆಚ್.ಹನುಮೇಶಪ್ಪ, ದಲಿತ ಸಂಘರ್ಷ ಸಮಿತಿಯ ರಾಜ್ಯ ಸಂಚಾಲಕ ಆರ್.ಮೋಹನ್ ರಾಜ್, ರಾಜ್ಯ ಸಂಘಟನಾ ಸಂಚಾಲಕ ಗ್ಯಾನಪ್ಪ ಬಡಿಗೇರ, ತಿಪ್ಪಣ್ಣ ಆರತಿ, ಕರ್ನಾಟಕ ರಾಜ್ಯ ಗ್ರಾಮಾಂತರ ಹಮಾಲಿ ಕಾರ್ಮಿಕರ ಸಂಘದ ಬಳ್ಳಾರಿ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಕೆ.ಗಿರೀಶ್ ಗೌಡ, ಜಿಲ್ಲಾ ಉಸ್ತುವಾರಿಗಳಾದ ಜೆ.ಎಸ್.ಶ್ರೀನಿವಾಸ್ (ರಾವಣ), ಸಂಚಾಲಕ ಕಪ್ಪಗಲ್ಲು ಓಂಕಾರಪ್ಪ, ಜಿಲ್ಲಾ ಪದಾಧಿಕಾರಿಗಳಾದ ಸಿ.ಶಿವಕುಮಾರ್, ಬಸವರಾಜ, ಜಿ.ಕುಮಾರ್, ಪಿ.ಡಿ.ರಮಾನಾಯ್ಕ್, ಸಿ.ಶಂಕರ್, ನಾಗೇಂದ್ರ, ನೌಕರರ ಒಕ್ಕೂಟದ ಕಂಪ್ಲಿ ತಿಪ್ಪೇಸ್ವಾಮಿ, ಸುಗ್ಗೇನಹಳ್ಳಿ ರಮೇಶ್, ಮಹಿಳಾ ಒಕ್ಕೂಟ ದುರುಗಮ್ಮ, ಗೀತಾ, ಅನುಸೂಯಮ್ಮ ಹಾಗೂ ಹೈದ್ರಾಬಾದ್ ಕರ್ನಾಟಕ 6 ಜಿಲ್ಲೆಯ ಹಮಾಲಿ ಕಾರ್ಮಿಕರು, ಬಳ್ಳಾರಿ ತಾಲ್ಲೂಕು ಪದಾಧಿಕಾರಿಗಳು, ಬೈಲೂರು ಮಲ್ಲಿಕಾರ್ಜುನ, ನಿಂಗಪ್ಪ, ದುರುಗೇಶ, ಬಸವರಾಜ, ಶಿವಕುಮಾರ್, ವಿಜಯ್ ಕುಮಾರ್, ಅಜಯ್, ಸಿರುಗುಪ್ಪ ತಾಲೂಕಿನ ಪದಾಧಿಕಾರಿಗಳಾದ ಯೋಗರಾಜ, ಮಲ್ಲಿಕಾರ್ಜುನ, ವಿಜಯ್, ಕಂಪ್ಲಿ ಕ್ಷೇತ್ರದ ಪುರುಷೋತ್ತಮ, ಶಿವಣ್ಣ, ಮತ್ತಿತರರು ಉಪಸ್ಥಿತರಿದ್ದರು.

ಎಐಡಿಎಸ್ಓ ವಿದ್ಯಾರ್ಥಿಗಳ ಪ್ರತಿಭಟನಾ ಮೆರವಣಿಗೆ

ಬಳ್ಳಾರಿ, ಜು.29:ಶಿಕ್ಷಣದ ಖಾಸಗೀಕರಣ ತಡೆಗಟ್ಟಬೇಕು, ಕೇಂದ್ರ-ರಾಜ್ಯ ಸರ್ಕಾರಗಳು ತಂತಮ್ಮ ಬಜೆಟ್ ಗಳಲ್ಲಿ ಶಿಕ್ಷಣಕ್ಕೆ ಹೆಚ್ಚಿನ ಅನುದಾನ ಮೀಸಲಿಡಬೇಕು, ಡೊನೇಷನ್ ಹಾವಳಿ ನಿಯಂತ್ರಿಸಲು ಒತ್ತಾಯಿಸಿ ಬಳ್ಳಾರಿಯಲ್ಲಿಂದು ಎಐಡಿಎಸ್ಓ ವಿದ್ಯಾರ್ಥಿ ಸಂಘಟನೆಯ ನೇತೃತ್ವದಲ್ಲಿ ವಿವಿಧ ಕಾಲೇಜುಗಳ ನೂರಾರು ವಿದ್ಯಾರ್ಥಿಗಳು ಪ್ರತಿಭಟನಾ ಮೆರವಣಿಗೆ ನಡೆಸಿದರು.

ರಾಜ್ಯವ್ಯಾಪಿ ಪ್ರತಿಭಟನಾ ದಿನದ ಅಂಗವಾಗಿ ಎಐಡಿಎಸ್ಓ ವಿದ್ಯಾರ್ಥಿಗಳು ಬಳ್ಳಾರಿ ನಗರದಲ್ಲಿ ಬೃಹತ್ ಪ್ರತಿಭಟನೆ ನಡೆಸಿದರು. ವಿವಿಧ ಕಾಲೇಜುಗಳಿಂದ ಗಡಿಗಿ ಚೆನ್ನಪ್ಪ ಸರ್ಕಲ್ ತಲುಪಿ ಅಲ್ಲಿ ಕೆಲ ಕಾಲ ಪ್ರತಿಭಟನೆ ನಡೆಸಿದ ನಂತರ ವಿದ್ಯಾರ್ಥಿಗಳು ಮೆರವಣಿಗೆಯಲ್ಲಿ ಡಿಸಿ ಕಛೇರಿಗೆ ತೆರಳಿ ಜಿಲ್ಲಾಧಿಕಾರಿಗಳ ಮೂಲಕ ರಾಜ್ಯದ ಮುಖ್ಯಮಂತ್ರಿಗಳಿಗೆ ಮನವಿ ಪತ್ರ ಕಳುಹಿಸಿಕೊಟ್ಟರು.

ವಿದ್ಯಾರ್ಥಿಗಳಿಗೆ ಎಲ್ಲಾ ಹಂತಗಳಲ್ಲಿನ ಹೊರೆಯಾಗಿರುವ ಶೈಕ್ಷಣಿಕ ಶುಲ್ಕದ ಹೆಚ್ಚಳವನ್ನು ಹಿಂದಕ್ಕೆ ಪಡೆಯಬೇಕು. ಶಿಕ್ಷಣದ ಖಾಸಗೀಕರಣ, ವ್ಯಾಪಾರೀಕರಣ ನಿಲ್ಲಿಸಬೇಕು, ರಾಜ್ಯದ ಬಜೆಟ್ ನಲ್ಲಿ ಶೇ.30ರಷ್ಟು ಹಾಗೂ ಕೇಂದ್ರದ ಬಜೆಟ್ ನಲ್ಲಿ ಶೇ.10 ರಿಂದ 15 ರಷ್ಟು ಹಣವನ್ನು ಶಿಕ್ಷಣಕ್ಕೆ ಮೀಸಲಿರಿಸಬೇಕು. ಡೊನೇಷನ್, ದುಬಾರಿ ಶುಲ್ಕಗಳಿಗೆ ಕಡಿವಾಣ ಹಾಕಬೇಕು.

ಕಲಿಕೆ, ಬೋಧನೆ ಮತ್ತು ಜ್ಞಾನ ಸಂಪಾದನೆಗೆ ಅಡ್ಡಿಯಾಗಿರುವ ಸೆಮಿಸ್ಟರ್ ಪದ್ದತಿ, ಪ್ರಾಥಮಿಕ ಶಿಕ್ಷಣದಲ್ಲಿ ಪಾಸ್-ಫೇಲ್ ವ್ಯವಸ್ಥೆಯ ರದ್ದತಿ, ಚಾಯ್ಸ್ ಬೇಸ್ಡ್ ಕ್ರೆಡಿಟ್ ಸಿಸ್ಟಂ (ಸಿಬಿಸಿಎಸ್) ಮತ್ತು ನಿರಂತರ ಹಾಗೂ ಸಮಗ್ರ ಮೌಲ್ಯಮಾಪನ (ಸಿಸಿಇ) ನೀತಿಗಳನ್ನು ಹಿಂದಕ್ಕೆ ಪಡೆಯಬೇಕು. ಸರ್ಕಾರಿ ಶಾಲೆ-ಕಾಲೇಜುಗಳಲ್ಲಿ, ವಿವಿಗಳಲ್ಲಿ ಅಗತ್ಯ ಸಿಬ್ಬಂದಿ ಒದಗಿಸಿ, ಮೂಲಭೂತ ಸೌಕರ್ಯ ಕಲ್ಪಿಸಬೇಕು. ವಿದ್ಯಾರ್ಥಿನಿಯರು, ಮಹಿಳೆಯರಿಗೆ ಭದ್ರತೆ ಖಾತ್ರಿ ಪಡಿಸಬೇಕು, ಅಶ್ಲೀಲ ಸಿನಿಮಾ-ಸಾಹಿತ್ಯ, ಜಾಹಿರಾತು ಮತ್ತು ಅಂತರ್ಜಾಲ ತಾಣಗಳ ಮೇಲೆ ನಿಷೇಧ ಹೇರಬೇಕು, ಈ ಅಪರಾಧಿಗಳಿಗೆ ನಿದರ್ಶನೀಯ ಶಿಕ್ಷೆ ನೀಡಬೇಕು ಎಂದು ಸಂಘಟನೆ ಆಗ್ರಹ ಪಡಿಸಿದೆ.

ಶಿಕ್ಷಣದಲ್ಲಿ ಕೇಸರೀಕರಣ ತಡೆಯಬೇಕು, ಶಿಕ್ಷಣ ತಜ್ಞರ, ಶಿಕ್ಷಕರು, ಪಾಲಕರು, ವಿದ್ಯಾರ್ಥಿಗಳ ಪ್ರತಿನಿಧಿಗಳನ್ನೊಳಗೊಂಡ ಸಮಿತಿಗೆ ಪಠ್ಯ ಪುಸ್ತಕದ ಜವಾಬ್ದಾರಿಯನ್ನು ವಹಿಸಬೇಕು, ರಾಜ್ಯ ಹಾಗೂ ಕೇಂದ್ರ ಸರ್ಕಾರಗಳು ಪಠ್ಯ ರಚನೆಯಲ್ಲಿ ಮೂಗು ತೂರಿಸಬಾರದು ಎಂದು ಒತ್ತಾಯಿಸಿದೆ.

ನಗರದಲ್ಲಿ ಸರ್ಕಾರಿ ಪಿಯು ಕಾಲೇಜ್ ಕಟ್ಟಡ ನಿರ್ಮಾಣ, ತಾಲ್ಲೂಕುಗಳಲ್ಲಿ ಹಾಸ್ಟೆಲ್ ಗಳ ಸಂಖ್ಯೆ ಹೆಚ್ಚಳ, ವಿ.ಎಸ್.ಕೆ ವಿವಿಯಲ್ಲಿ ಅಗತ್ಯತೆಗೆ ತಕ್ಕಂತೆ ಸಿಬ್ಬಂದಿ ನೇಮಕಾತಿ, ಖಾಸಗೀ ಶಾಲೆ-ಕಾಲೇಜುಗಳಲ್ಲಿ ಡೋನೇಷನ್ ಹಾವಳಿ ತಡೆಯಬೇಕು ಎಂದು ಮನವಿ ಪತ್ರದಲ್ಲಿ ತಿಳಿಸಲಾಗಿದೆ.

ಎಐಡಿಎಸ್ಓ ಜಿಲ್ಲಾ ಅಧ್ಯಕ್ಷ ಗೋವಿಂದ್, ಕಾರ್ಯದರ್ಶಿ ಜಿ.ಸುರೇಶ್, ವಿದ್ಯಾರ್ಥಿ ಧುರೀಣರುಗಳಆದ ಜಗದೀಶ್ ವಿ.ಎನ್., ರಫೀಕ್, ರವಿಕಿರಣ್, ರಾಜಾ, ಗೋಪಿನಾಯಕ್, ಬಸವರಾಜ್ ನೇತೃತ್ವದಲ್ಲಿ ವಿವಿಧ ಕಾಲೇಜುಗಳ ನೂರಾರು ವಿದ್ಯಾರ್ಥಿ-ವಿದ್ಯಾರ್ಥಿನಿಯರು ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು.

ರಾಜ್ಯ ಮಟ್ಟದ ಕರಾಟೆ ಸ್ಪರ್ಧೆಯಲ್ಲಿ ವಿಜೇತರಾದ ಬಳ್ಳಾರಿಯ ಕರಾಟೆ ವಿದ್ಯಾರ್ಥಿಗಳು

ಬಳ್ಳಾರಿ, ಜು.29:ಕರ್ನಾಟಕ ಸರ್ಕಾರದ ಸಾರ್ವಜನಿಕ ಶಿಕ್ಷಣ ಇಲಾಖೆ ಮತ್ತು ಹುಬ್ಬಳ್ಳಿಯ ಸುರಕ್ಷಾ ಕರಾಟೆ ಸ್ಪೋರ್ಟ್ಸ್ ಕ್ಲಬ್ ಇವರ ಸಂಯುಕ್ತಾಶ್ರಯದಲ್ಲಿ ಜರುಗಿದ 3 ದಿನಗಳ ರಾಜ್ಯಮಟ್ಟದ ಕರಾಟೆ ಸ್ಪರ್ಧೆಯಲ್ಲಿ ಬಳ್ಳಾರಿಯ ಕರಾಟೆ ವಿದ್ಯಾರ್ಥಿಗಳು ವಿಜೇತರಾಗಿ ಜಿಲ್ಲೆಗೆ ಕೀರ್ತಿ ತಂದಿದ್ದಾರೆ.

ಶ್ರೀ ಪಂಚಾಕ್ಷರಿ ಮಾರ್ಷಲ್ ಆರ್ಟ್ಸ್ ಟ್ರಸ್ಟ್ ನ ಸಂಸ್ಥೆಯ ಕರಾಟೆ ವಿದ್ಯಾರ್ಥಿಗಳಾದ ವಿದ್ಯಾಸಾಗರ ಮಠದ, ಕುಮಾರಿ ರಚನಾ, ಜಿ.ಕುಶಾಲ್, ಲೋಕೇಶ ಡಿ., ಕಾರ್ತಿಕ ದೇಸಾಯಿ, ಸಿದ್ಧಾರ್ಥಶೆಟ್ಟಿ, 18 ವರ್ಷದ ಒಳಗಿನ ಕರಾಟೆ ಮತ್ತು ಸ್ಟೆರಿಂಗ್ ವಿಭಾಗದಲ್ಲಿ ಪ್ರಥಮ ಮತ್ತು ದ್ವಿತೀಯ ಸ್ಥಾನವನ್ನು ಪಡೆದಿದ್ದಾರೆ.

ಈ ಸ್ಪರ್ಧೆಯಲ್ಲಿ ರಾಜ್ಯದ ಎಲ್ಲಾ ಜಿಲ್ಲೆಗಳಿಂದ ಸುಮಾರು 600ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಭಾಗವಹಿಸಿದ್ದರು. ಕಾರ್ಯಕ್ರಮವನ್ನು ರಾಜ್ಯದ ವಿಧಾನಸಭೆಯ ವಿರೋಧ ಪಕ್ಷದ ನಾಯಕರಾದ ಜಗದೀಶ ಶೆಟ್ಟರ್ ಉದ್ಘಾಟಿಸಿದರು ಎಂದು ಶ್ರೀ ಪಂಚಾಕ್ಷರಿ ಮಾರ್ಷಲ್ ಆರ್ಟ್ಸ್ ಟ್ರಸ್ಟ್ ನ ಸಂಸ್ಥೆಯ ಅಧ್ಯಕ್ಷರು ಮತ್ತು ತರಬೇತುದಾರರಾದ ಬಂಡ್ರಾಳ್ ಎಂ.ಮೃತ್ಯುಂಜಯ ಸ್ವಾಮಿ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ಎಟಿಎಂ ಕಾರ್ಡ್ ಬಳಸಿ 43 ಸಾವಿರ ರೂ ಹಣ ಪಡೆದು ವಂಚನೆ

ಬಳ್ಳಾರಿ, ಜು.29:ನಿಮ್ಮ ಎಟಿಎಂ ಕಾರ್ಡ್ ನ ಅವಧಿ ಮುಗಿದಿದ್ದು ಅದರ ನವೀಕರಣ ಮಾಡಬೇಕಾಗಿದೆ ಎಂದು ಎಟಿಎಂ ಕಾರ್ಡ್ ಗ್ರಾಹಕರೊಬ್ಬರಿಗೆ ದೂರವಾಣಿ ಕರೆ ಮಾಡಿ ನಂಬರ್ ಪಡೆದು ಅವರ ಖಾತೆಯಲ್ಲಿದ್ದ 43 ಸಾವಿರ ರೂಪಾಯಿಗಳ ಹಣವನ್ನು ಲಪಟಾಯಿಸಿದ ಘಟನೆ ನಗರದಲ್ಲಿ ನಡೆದ ಬಗ್ಗೆ ವರದಿಯಾಗಿದೆ.

ಬಳ್ಳಾರಿಯ ಗಾಂಧಇನಗರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಹುಸೇನ್ ನಗರದ ನಿವಾಸಿಯೊಬ್ಬರು ತಮ್ಮ ಎಟಿಎಂ ಕಾರ್ಡ್ ನ ನಂಬರ್ ನೀಡಿ ಹಣ ಕಳೆದುಕೊಂಡಿದ್ದಾರೆ ಎಂದು ನಗರ ಡಿವೈಎಸ್ಪಿ ತಿಳಿಸಿದ್ದಾರೆ.

ಮಹಮ್ಮದ್ ಗೌಸ್ ಎಂಬುವವರಿಗೆ ಫೋನ್ ಕರೆ ಮಾಡಿದ ವ್ಯಕ್ತಿಯೋರ್ವರು ನಿಮ್ಮ ಎಟಿಎಂ ಕಾರ್ಡ್ ಅವಧಿ ಮುಗಿದಿದ್ದು ಅದನ್ನು ನವೀಕರಿಸ (ರಿನಿವಲ್ ಮಾಡಲು) ಬೇಕಾಗಿದೆ. ಕಾರ್ಡ್ ನಂಬರ್ ತಿಳಿಸಿ ಎಂದು ಕೋರಿದಾಗ, ಅವರು ತಮ್ಮ ಕಾರ್ಡ್ ನಂಬರ್ ತಿಳಿಸಿದ್ದಾರೆ.

ಈ ಬಗ್ಗೆ ಅವರ ಖಾತೆಯಿಂದ 43 ಸಾವಿರ ರೂಗಳ ಹಣ ಪಡೆದಿರುವ ಬಗ್ಗೆ ಮೊಬೈಲ್ ಫೋನ್ ಗೆ ಸಂದೇಶ (ಎಸ್.ಎಂ.ಎಸ್) ಬಂದಾಗ ಅವರು ಅಚ್ಚರಿಗೊಂಡಿದ್ದಾರೆ. ಅಲ್ಲದೇ ವಂಚನೆ ಪ್ರಕರಣ ಬೆಳಕಿಗೆ ಬಂದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಈ ಬಗ್ಗೆ ಗಾಂಧಿನಗರ ಪೊಲೀಸ್ ಠಾಣೆಯಲ್ಲಿ ಕೇಸ್ ದಾಖಲಾಗಿದ್ದು, ಪೊಲೀಸರು ತನಿಖೆ ಮುಂದುವರೆಸಿದ್ದಾರೆ.

ಬಳ್ಳಾರಿ ತಾಲೂಕಿನ ಲಂಬಾಣಿ ಸಮುದಾಯಕ್ಕೆ ಸಮುದಾಯ ಭವನ, ರುದ್ರಭೂಮಿ ಮಂಜೂರಿಗೆ ಮನವಿ

ಬಳ್ಳಾರಿ, ಜು.29:ಬಳ್ಳಾರಿ ನಗರ ಮತ್ತು ಗ್ರಾಮಾಂತರ ವಿಧಾನಸಭಾ ಕ್ಷೇತ್ರದ ವ್ಯಾಪ್ತಿಯಲ್ಲಿ ವಾಸಿಸುವ ಲಂಬಾಣಿ ಸಮುದಾಯದ ಜನಾಂಗಕ್ಕೆ ಅನುಕೂಲವಾಗುವಂತೆ ಸಮುದಾಯ ಭವನ ಮತ್ತು ರುದ್ರಭೂಮಿಯನ್ನು ಮಂಜೂರು ಮಾಡಬೇಕೆಂದು ನವ ಕರ್ನಾಟಕ ನಿರ್ಮಾಣ ವೇದಿಕೆ ಜಿಲ್ಲಾ ಘಟಕ ಸಚಿವರಲ್ಲಿ ಮನವಿ ಮಾಡಿಕೊಂಡಿದೆ.

ಕಾರ್ಮಿಕ ಮತ್ತು ಜಿಲ್ಲಾ ಉಸ್ತುವಾರಿ ಸಚಿವ ಪಿ.ಟಿ.ಪರಮೇಶ್ವರ್ ನಾಯ್ಕ್ ಅವರಿಗೆ ಈ ಸಂಬಂಧ ಮನವಿ ಪತ್ರವನ್ನು ಸಲ್ಲಿಸಿ ಸಮುದಾಯ ಭವನ ಮತ್ತು ರುದ್ರಭೂಮಿಗೆ ಒತ್ತಾಯಿಸಲಾಗಿದೆ.

ಸಮುದಾಯ ಭವನ ಮತ್ತು ರುದ್ರಭೂಮಿಗಾಗಿ ಈ ಹಿಂದೆ ಮನವಿಯನ್ನು ಸಲ್ಲಿಸಲಾಗಿತ್ತು. ಮುಖ್ಯಮಂತ್ರಿಯವರ ಆಧೀನ ಕಾರ್ಯದರ್ಶಿಗಳು ಜಿಲ್ಲಾಧಿಕಾರಿಗಳಿಗೆ ಪತ್ರ ಬರೆದು ನಿಯಮಾನುಸಾರ ಪರಿಶೀಲಿಸಿ ಕ್ರಮ ಕೈಗೊಳ್ಳುವಂತೆ ಸೂಚಿಸಿದ್ದರು. ಆದರೂ ಜಿಲ್ಲಾಡಳಿತವಾಗಲೀ, ಪಾಲಿಕೆಯವರಾಗಲೀ ಈ ವಿಷಯದಲ್ಲಿ ಗಮನ ಹರಿಸದೇ ಇರುವುದು ಬೇಸರದ ಸಂಗತಿಯಾಗಿದೆ. ಆದ್ದರಿಂದ ಜಿಲ್ಲಾ ಉಸ್ತುವಾರಿ ಸಚಿವರುಗಳಾದ ತಾವು ಕೂಡಲೇ ಕ್ರಮ ಕೈಗೊಂಡು ಲಂಬಾಣಿ ಸಮುದಾಯಕ್ಕೆ ಸಮುದಾಯ ಭವನ ಮತ್ತು ರುದ್ರಭೂಮಿಯನ್ನು ಮಂಜೂರು ಮಾಡಿಕೊಡಬೇಕೆಂದು ಮನವಿ ಪತ್ರದಲ್ಲಿ ವಿನಂತಿಸಿಕೊಳ್ಳಲಾಗಿದೆ.

ಸಚಿವರಿಗೆ ಮನವಿ ಪತ್ರ ಸಲ್ಲಿಸಿದ ಸಂದರ್ಭದಲ್ಲಿ ನವ ಕರ್ನಾಟಕ ನಿರ್ಮಾಣ ವೇದಿಕೆಯ ಜಿಲ್ಲಾಧ್ಯಕ್ಷ ಪಿ.ಶೇಖರ್, ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಎಸ್.ಚಂದ್ರನಾಯ್ಕ್ ಮತ್ತಿತರರು ಉಪಸ್ಥಿತರಿದ್ದರು.

ಡಾ||ಅಬ್ದುಲ್ ಕಲಾಂ ಅವರ ಜನಪರ ಚಿಂತನೆಯೇ ಕನಸು-ಯೋಜನೆ-ಕ್ರಿಯೆ-ಅಭಿವೃದ್ಧಿ

ಬಳ್ಳಾರಿ, ಜು.29:ರಾಷ್ಟ್ರದ ಮಾಜಿ ರಾಷ್ಟ್ರಪತಿ, ಭಾರತ ರತ್ನ, ಡಾ||ಎ.ಪಿ.ಜೆ.ಅಬ್ದುಲ್ ಕಲಾಂ ಅವರು ಜನಪರವಾಗಿಯೇ ಚಿಂತಿಸುತ್ತಿದ್ದರು. ಅವರ ವಿಚಾರಧಾರೆಗಳಲ್ಲಿ ಕನಸು-ಯೋಜನೆ-ಕ್ರಿಯೆ-ಅಭಿವೃದ್ಧಿಯಾಗಿತ್ತು ಎಂದು ವಿಜಯನಗರ ಶ್ರೀ ಕೃಷ್ಣದೇವರಾಯ ವಿಶ್ವವಿದ್ಯಾಲಯದ ಕುಲಪತಿ ಪ್ರೊ||ಎಂ.ಎಸ್.ಸುಭಾಷ್ ಅಭಿಪ್ರಾಯಪಟ್ಟರು.

ವಿಶ್ವವಿದ್ಯಾಲಯದಲ್ಲಿ ಡಾ||ಕಲಾಂ ಅವರ ನಿಧನಕ್ಕೆ ಆಯೋಜಿಸಿದ್ದ ಸಂತಾಪ ಸಭೆಯಲ್ಲಿ ಮಾತನಾಡಿದ ಅವರು, ಉನ್ನತ ಕನಸುಗಳನ್ನು ಕಾಣಬೇಕು. ಏಕೆಂದರೆ ಕನಸುಗಳು ಯೋಜನೆಗಳನ್ನು ಪ್ರೇರೇಪಿಸುತ್ತದೆ. ಯೋಜನೆಗಳು ಕ್ರಿಯೆಯನ್ನು ಪ್ರಚೋದಿಸುತ್ತದೆ. ಪ್ರಾಮಾಣಿಕ ಕ್ರಿಯೆಯ ಮೂಲಕ ರಾಷ್ಟ್ರವನ್ನು ಅಭಿವೃದ್ಧಿಗೊಳಿಸಲು ಸಾಧ್ಯ ಎಂದು ನಂಬಿದ್ದರು. ಯುವ ಜನತೆಯೊಂದಿಗೆ ಅಸಾಧಾರಣವಾದ ಗುರುತ್ವಾಕರ್ಷಣ ಶಕ್ತಿಯನ್ನು ಹೊಂದುವುದರೊಂದಿಗೆ ಸ್ಫೂರ್ತಿಯ ಸೆಲೆಯಾಗಿದ್ದರು. ಬದುಕಿನುದ್ದಕ್ಕೂ ಸರಳ ಜೀವನವನ್ನು ನಡೆಸಿದರು. ಅಬ್ದುಲ್ ಕಲಾಂ ಭಾರತವನ್ನು ಹಾಗೂ ಮಕ್ಕಳನ್ನು ವಿಶೇಷವಾಗಿ ಪ್ರೀತಿಸಿದರು. ಎಲ್ಲೊ ಒಂದು ಕಡೆ ನಾನು ಮಕ್ಕಳೊಂದಿಗೆ ಏಕೆ ಮಾತನಾಡುತ್ತೇನೆಂದರೆ ಅವರು ನನ್ನನ್ನು ಅರ್ಥ ಮಾಡಿಕೊಳ್ಳುತ್ತಾರೆ. ಮನೆಗೆ ಹೋಗಿ ನೈತಿಕತೆ, ಪ್ರಾಮಾಣಿಕತೆ ಬಗ್ಗೆ ಮಗು ಹೇಳಿದಾಗ ಅಪ್ಪ-ಅಮ್ಮಂದಿರ ಮನಸ್ಸು-ಹೃದಯಗಳು ಮೃದುವಾಗುತ್ತವೆ ಎಂಬುದು ಅವರ ದೃಢ ನಂಬಿಕೆಯಾಗಿತ್ತು. ವಿದ್ಯಾರ್ಥಿಗಳೊಂದಿಗಿನ ಮಾತುಕತೆ ಭಾರತದ ಬದಲಾವಣೆಗೆ ಪ್ರೇರಕವಾಗಬಹುದೆಂಬುದು ಅವರ ಅಭಿಮತವಾಗಿತ್ತು. ಬಡ ವಿದ್ಯಾರ್ಥಿಗಳ ಶಿಕ್ಷಣ ಮತ್ತು ಅವಶ್ಯಕತೆಗಳ ಕುರಿತಾಗಿ ಕಲಾಂರಿಗೆ ವಿಶೇಷ ಕಾಳಜಿಯಿತ್ತು.

ವಿಜಯನಗರ ಶ್ರೀ ಕೃಷ್ಣದೇವರಾಯ ವಿಶ್ವವಿದ್ಯಾಲಯದ ವ್ಯಾಪ್ತಿಯಲ್ಲಿರುವ ಬಳ್ಳಾರಿ ಮತ್ತು ಕೊಪ್ಪಳ ಜಿಲ್ಲೆಗಳ ಪರಿಸ್ಥಿತಿಯು ಬದಲಾಗಬೇಕಿದೆ. ಆರ್ಥಿಕ-ಸಾಮಾಜಿಕ ಹಿಂದುಳಿದ ಪ್ರದೇಶದ ಕುಟುಂಬಗಳಿಂದ ಕಲಿಯಲು ಬರುತ್ತಿರುವ ನಮ್ಮ ವಿದ್ಯಾರ್ಥಿ ಸಮೂಹಕ್ಕೆ ಗುಣಮಟ್ಟದ ಶಿಕ್ಷಣ ದೊರೆಯಬೇಕಿದೆ. ಅವರ ಶೈಕ್ಷಣಿಕ ಕೌಶಲ್ಯವನ್ನು ವೃದ್ಧಿಸುವ ಹೊಣೆಗಾರಿಕೆ ವಿಶ್ವವಿದ್ಯಾಲಯದ ಮೇಲಿದೆ. ಈ ಜವಾಬ್ದಾರಿಯನ್ನು ಪ್ರಾಮಾಣಿಕವಾಗಿ ಪೂರೈಸುವುದರ ಮುಖಾಂತರ ಡಾ||ಅಬ್ದುಲ್ ಕಲಾಂರಿಗೆ ಗೌರವಯುತವಾದ ಶ್ರದ್ಧಾಂಜಲಿಯನ್ನು ಅರ್ಪಿಸಬಹುದು ಎಂದರು.

ಕಾರ್ಯಕ್ರಮದಲ್ಲಿ ಕುಲಸಚಿವರು, ಆಡಳಿತ ಸಿಬ್ಬಂದಿ, ವಿದ್ಯಾರ್ಥಿಗಳು ಭಾಗವಹಿಸಿದ್ದರು.

ನೃತ್ಯ ಸ್ಪರ್ಧೆ:ನಳಂದ ಶಾಲಾ ವಿದ್ಯಾರ್ಥಿಗಳಿಗೆ ಪ್ರಥಮ ಬಹುಮಾನ

ಬಳ್ಳಾರಿ, ಜು.29:ನಗರದಲ್ಲಿ ಶಾಲಾ-ಕಾಲೇಜ್ ವಿದ್ಯಾರ್ಥಿಗಳಿಗಾಗಿ ಏರ್ಪಡಿಸಿದ್ದ ನೃತ್ಯ ಸ್ಪರ್ಧೆಯಲ್ಲಿ ಸ್ಥಳೀಯ ಮೋಕಾ ರಸ್ತೆ ಪ್ರದೇಶದಲ್ಲಿರುವ ನಳಂದ ಶಾಲೆಯ ವಿದ್ಯಾರ್ಥಿಗಳು ಪ್ರಥಮ ಬಹುಮಾನ ಪಡೆದಿದ್ದಾರೆ

ಕಲಾ ಸಂಗಮ ಸಾಂಸ್ಕೃತಿಕ ಸಂಸ್ಥೆ (ರಿ) ಬಳ್ಳಾರಿ ಇವರು ರಾಷ್ಟ್ರದೇವೋಭವ ಎಂಬ ಶಿರೋನಾಮೆಯಲ್ಲಿ ನಗರದ ಡಾ||ಜೋಳದರಾಶಿ ದೊಡ್ಡನಗೌಡ ರಂಗಮಂದಿರದಲ್ಲಿ ಶಾಲಾ-ಕಾಲೇಜ್ ವಿದ್ಯಾರ್ಥಿಗಳಿಗಾಗಿ ಏರ್ಪಡಿಸಿದ್ದ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳಲ್ಲಿ, ಶಾಲಾ ವಿದ್ಯಾರ್ಥಿಗಳಿಗಾಗಿ ಆಯೋಜಿಸಿದ್ದ ನೃತ್ಯ ಸ್ಪರ್ಧೆಯಲ್ಲಿ ನಳಂದ ಶಾಲೆಯ ವಿದ್ಯಾರ್ಥಿಗಳಾದ ನಿರಂಜನ ಜಾಲಿಹಾಳ್, ಆದರ್ಶ ಪಾಟಿಲ್, ಆಕರ್ಷ, ಕಾವ್ಯ, ಅಂಜಲಿ, ಸುಶ್ಮಿತಾ, ಆಕಾಶ್, ವಸಂತ್, ಮೇಘನಾ, ಸುಪ್ರಿಯಾರವರು ತಮ್ಮಲ್ಲಿಡಗಿದ್ದ ಉದಯೋನ್ಮುಖ ನೃತ್ಯ ಪ್ರತಿಭೆಯಿಂದ ತೀರ್ಪುಗಾರರ ಹಾಗೂ ಪ್ರೇಕ್ಷಕರ ಮನಗೆದ್ದು ಸ್ಪರ್ಧೆಯಲ್ಲಿ ಪ್ರಥಮ ಬಹುಮಾನಕ್ಕೆ ಪಾತ್ರರಾಗಿದ್ದಾರೆ.

ಸದರಿ ವಿದ್ಯಾರ್ಥಿಗಳನ್ನು ನಳಂದ ಶಾಲೆಯ ಪ್ರಾಂಶುಪಾಲರು, ಶಿಕ್ಷಕ-ಶಿಕ್ಷಕೇತರ ವರ್ಗದವರು ಹಾಗೂ ವಿದ್ಯಾರ್ಥಿಗಳ ತಂದೆ-ತಾಯಿಗಳು, ಪೋಷಕರು ಅಭಿನಂದಿಸಿ ಪ್ರೋತ್ಸಾಹಿಸಿದ್ದಾರೆ.

ಶ್ರೀ ಶಿರಿಡಿ ಸಾಯಿಬಾಬಾ ಮಂದಿರದಲ್ಲಿ ಗುರು ಪೌರ್ಣಮಿ ಕಾರ್ಯಕ್ರಮಗಳು

ಬಳ್ಳಾರಿ, ಜು.29:ನಗರದ ಎಂ.ಜಿ.ಆಟೋ ಮೊಬೈಲ್ಸ್ ಪ್ರದೇಶದ ಹಿಂಭಾಗದಲ್ಲಿರುವ ಶ್ರೀ ಶಿರಿಡಿ ಸಾಯಿಬಾಬಾ ಮಂದಿರದಲ್ಲಿ ಜುಲೈ 31ರಂದು ಶುಕ್ರವಾರ ಗುರುಪೌರ್ಣಮಿಯ ಅಂಗವಾಗಿ ವಿಶೇಷ ಪೂಜಾ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗಿದೆ.

ಗುರು ಪೌರ್ಣಮಿಯ ಪ್ರಯುಕ್ತ ಜುಲೈ 30 ಗುರುವಾರದಿಂದ ಆಗಸ್ಟ್ 1ರ ಶನಿವಾರದವರೆಗೆ ಮೂರು ದಿನಗಳ ಕಾಲ ಸತತವಾಗಿ ವಿಶೇಷ ಪೂಜೆ, ಉತ್ಸವ, ಭಜನೆ, ಅನ್ನದಾನ, ಪ್ರಸಾದ ವಿತರಣೆ, ಮತ್ತಿತರೆ ಕಾರ್ಯಕ್ರಮಗಳನ್ನು ನಡೆಸಲಾಗುತ್ತಿದೆ. ಅಂದಾಜು ಒಂದು ಲಕ್ಷ ಜನ ಭಕ್ತಾದಿಗಳು ಈ ದಿನಗಳಲ್ಲಿ ಪಾಲ್ಗೊಳ್ಳುವ ನಿರೀಕ್ಷೆ ಇದೆ ಎಂದು ಶ್ರೀ ಶಿರಿಡಿ ಸಾಯಿಬಾಬಾ ಮಂದಿರದ ಆಡಳಿತ ಸಮಿತಿಯ ಅಧ್ಯಕ್ಷ ಎನ್.ಕುಮಾರಸ್ವಾಮಿ ತಿಳಿಸಿದ್ದಾರೆ.

ದೇವಸ್ಥಾನದಲ್ಲಿಂದು ಬೆಳಿಗ್ಗೆ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಈ ಮೂರು ದಿನಗಳ ಕಾಲ ಶ್ರೀ ಸಾಯಿಬಾಬಾ ಮಂದಿರದಲ್ಲಿ ಹಲವಾರು ಭಕ್ತಿ ಪೂರ್ವಕ ಸೇವಾ ಕಾರ್ಯಕ್ರಮಗಳು ವಿಜೃಂಭಣೆಯಿಂದ ನಡೆಯಲಿವೆ.

ಜು.30ರಂದು ಗುರುವಾರ ಬೆಳಿಗ್ಗೆ 5.15 ಗಂಟೆಗೆ ಕಾಕಡ ಆರತಿಯಿಂದ ಕಾರ್ಯಕ್ರಮಗಳು ಪ್ರಾರಂಭವಾಗಿ ರಾತ್ರಿ 9ರವರೆಗೆ ವಿವಿಧ ಪೂಜೆ-ಕಾರ್ಯದರ್ಶಿಗಳು ಪ್ರಸಾದ ವಿತರಣೆ ನಡೆಯಲಿವೆ. ಜು.31ರಂದು ಶುಕ್ರವಾರ ಬೆಳಿಗ್ಗೆ 5.15 ರಿಂದ ರಾತ್ರಿ 10.30ರ ವರೆಗೆ ಗಣಪತಿ ಪೂಜೆ, ಶ್ರೀ ಸಾಯಿ ಸಚ್ಚರಿತ್ರೆ ಪಾರಾಯಣ, ಸಂಕೀರ್ತನೆ, ಗಂಗಾಭಿಷೇಕ, ಅರ್ಚನ, ಶ್ರೀ ದತ್ತಾತ್ರೇಯ ಸಹಸ್ರ ನಾಮರ್ಚನೆ, ಮಧ್ಯಾಹ್ನ ಅನ್ನದಾನ ಸೇವೆ, ಪಲ್ಲಕ್ಕಿ ಉತ್ಸವ, ಉಯ್ಯಾಲೆ ಉತ್ಸವ, ನಡೆಯಲಿವೆ ಎಂದರು.

ಆ.1ರಂದು ಶನಿವಾರ ಬೆಳಿಗ್ಗೆ 5.15 ರಿಂದ ರಾತ್ರಿ 9 ಗಂಟೆಯವರೆಗೆ ಪೂಜಾ ಕಾರ್ಯಕ್ರಮಗಳು ಜರುಗಲಿವೆ. ಜುಲೈ 31 ರಂದು ಶುಕ್ರವಾರ ಬೃಹತ್ ಪ್ರಮಾಣದಲ್ಲಿ ಸ್ವಯಂ ಪ್ರೇರಿತ ರಕ್ತದಾನ ಶಿಬಿರವನ್ನು ಹಮ್ಮಿಕೊಳ್ಳಲಾಗಿದ್ದು 600 ರಿಂದ 700 ಜನರು ರಕ್ತದಾನ ಮಾಡುವ ನಿರೀಕ್ಷೆ ಇದೆ. ಈಗಾಗಲೇ 500 ಜನರು ತಮ್ಮ ಹೆಸರು ತಿಳಿಸಿದ್ದಾರೆ ಎಂದು ಕುಮಾರಸ್ವಾಮಿ ತಿಳಿಸಿದರು.

ಶ್ರೀ ಶಿರಿಡಿ ಸಾಯಿಬಾಬಾ ಮಂದಿರದಲ್ಲಿ ವಾರ-ವಾರವೂ ಉಚಿತ ಆರೋಗ್ಯ ಶಿಬಿರ ನಡೆಸಲಾಗುತ್ತಿದೆ. ಪ್ರತಿ ಗುರುವಾರ ಭಕ್ತಾದಿಗಳಿಗಾಗಿ ಅನ್ನ ಸಂತರ್ಪಣೆ ಕಾರ್ಯಕ್ರಮ ನಡೆಯುತ್ತವೆ. ಈ ಮಂದಿರವು ದಿನದಿಂದ ದಿನಕ್ಕೆ ತನ್ನ ಖ್ಯಾತಿಯನ್ನು ಹೆಚ್ಚಿಸಿಕೊಳ್ಳುತ್ತಿದ್ದು ಬೇರೆ-ಬೇರೆ ಊರುಗಳಿಂದಲೂ ಶ್ರೀ ಸಾಯಿ ಭಕ್ತಾದಿಗಳು ಆಗಮಿಸುತ್ತಿದ್ದಾರೆ. ತಿಂಗಳಿಗೆ 3 ರಿಂದ 4 ಲಕ್ಷ ರೂಗಳ ಹುಂಡಿ ಕಾಣಿಕೆ ಭಕ್ತಾದಿಗಳಿಂದ ಸೇವೆಯ ರೂಪದಲ್ಲಿ ದೊರೆಯುತ್ತವೆ. ಮುಂದಿನ ದಿನಗಳಲ್ಲಿ ರಕ್ತ ನಿಧಿ ಭಂಡಾರ (ಬ್ಲಡ್ ಬ್ಯಾಂಕ್) ಸ್ಥಾಪನೆ, ಇನ್ನೂ ಹೆಚ್ಚಿನ ಪ್ರಮಾಣದಲ್ಲಿ ಉಚಿತ ಆರೋಗ್ಯ ಸೇವೆ, ಉಚಿತ ವಿದ್ಯಾದಾನ ಕಾರ್ಯಕ್ರಮ ನಡೆಸಲು ಉದ್ದೇಶಿಸಲಾಗಿದೆ. ಕಡು ಬಡ ವಿದ್ಯಾರ್ಥಿಗಳಿಗೆ ಪದವಿ ಮತ್ತಿತರೆ ಶಿಕ್ಷಣ ಕಲಿಕೆಗೆ ನೆರವಾಗುವ ನಿರ್ಧಾರ ಕೈಗೊಂಡಿದ್ದೇವೆ ಎಂದು ಹೇಳಿದರು.

ತಮಿಳುನಾಡಿನ ಚೆನ್ನೈನ ಶ್ರೀ ಸಾಯಿ ಭಕ್ತರಾದ ರಮಣಿ ಎಂಬುವವರು 10 ಲಕ್ಷ ರೂಗಳನ್ನು ವಿದ್ಯಾದಾನ ಯೋಜನೆಯ ನೆರವನ್ನಾಗಿ ನೀಡಲು ಮುಂದೆ ಬಂದಿದ್ದಾರೆ ಎಂದು ಎನ್.ಕುಮಾರಸ್ವಾಮಿ ತಿಳಿಸಿದರು. ಈ ಸಂದರ್ಭದಲ್ಲಿ ಆರ್.ದತ್ತಾತ್ರೇಯ ಹಾಗೂ ಶ್ರೀನಿವಾಸ್ ಉಪಸ್ಥಿತರಿದ್ದರು.